Chapter 297

vaiśaṃpāyana uvāca |
sa dadarśa hatānbhrātṝṃllokapālāniva cyutān |
yugānte samanuprāpte śakrapratimagauravān || 1 ||
[Analyze grammar]

viprakīrṇadhanurbāṇaṃ dṛṣṭvā nihatamarjunam |
bhīmasenaṃ yamau cobhau nirviceṣṭāngatāyuṣaḥ || 2 ||
[Analyze grammar]

sa dīrghamuṣṇaṃ niḥśvasya śokabāṣpapariplutaḥ |
buddhyā vicintayāmāsa vīrāḥ kena nipātitāḥ || 3 ||
[Analyze grammar]

naiṣāṃ śastraprahāro'sti padaṃ nehāsti kasyacit |
bhūtaṃ mahadidaṃ manye bhrātaro yena me hatāḥ |
ekāgraṃ cintayiṣyāmi pītvā vetsyāmi vā jalam || 4 ||
[Analyze grammar]

syāttu duryodhanenedamupāṃśuvihitaṃ kṛtam |
gāndhārarājaracitaṃ satataṃ jihmabuddhinā || 5 ||
[Analyze grammar]

yasya kāryamakāryaṃ vā samameva bhavatyuta |
kastasya viśvasedvīro durmaterakṛtātmanaḥ || 6 ||
[Analyze grammar]

atha vā puruṣairgūḍhaiḥ prayogo'yaṃ durātmanaḥ |
bhavediti mahābāhurbahudhā samacintayat || 7 ||
[Analyze grammar]

tasyāsīnna viṣeṇedamudakaṃ dūṣitaṃ yathā |
mukhavarṇāḥ prasannā me bhrātṝṇāmityacintayat || 8 ||
[Analyze grammar]

ekaikaśaścaughabalānimānpuruṣasattamān |
ko'nyaḥ pratisamāseta kālāntakayamādṛte || 9 ||
[Analyze grammar]

etenādhyavasāyena tattoyamavagāḍhavān |
gāhamānaśca tattoyamantarikṣātsa śuśruve || 10 ||
[Analyze grammar]

yakṣa uvāca |
ahaṃ bakaḥ śaivalamatsyabhakṣo mayā nītāḥ pretavaśaṃ tavānujāḥ |
tvaṃ pañcamo bhavitā rājaputra na cetpraśnānpṛcchato vyākaroṣi || 11 ||
[Analyze grammar]

mā tāta sāhasaṃ kārṣīrmama pūrvaparigrahaḥ |
praśnānuktvā tu kaunteya tataḥ piba harasva ca || 12 ||
[Analyze grammar]

yudhiṣṭhira uvāca |
rudrāṇāṃ vā vasūnāṃ vā marutāṃ vā pradhānabhāk |
pṛcchāmi ko bhavāndevo naitacchakuninā kṛtam || 13 ||
[Analyze grammar]

himavānpāriyātraśca vindhyo malaya eva ca |
catvāraḥ parvatāḥ kena pātitā bhuvi tejasā || 14 ||
[Analyze grammar]

atīva te mahatkarma kṛtaṃ balavatāṃ vara |
yanna devā na gandharvā nāsurā na ca rākṣasāḥ |
viṣaheranmahāyuddhe kṛtaṃ te tanmahādbhutam || 15 ||
[Analyze grammar]

na te jānāmi yatkāryaṃ nābhijānāmi kāṅkṣitam |
kautūhalaṃ mahajjātaṃ sādhvasaṃ cāgataṃ mama || 16 ||
[Analyze grammar]

yenāsmyudvignahṛdayaḥ samutpannaśirojvaraḥ |
pṛcchāmi bhagavaṃstasmātko bhavāniha tiṣṭhati || 17 ||
[Analyze grammar]

yakṣa uvāca |
yakṣo'hamasmi bhadraṃ te nāsmi pakṣī jalecaraḥ |
mayaite nihatāḥ sarve bhrātaraste mahaujasaḥ || 18 ||
[Analyze grammar]

vaiśaṃpāyana uvāca |
tatastāmaśivāṃ śrutvā vācaṃ sa paruṣākṣarām |
yakṣasya bruvato rājannupakramya tadā sthitaḥ || 19 ||
[Analyze grammar]

virūpākṣaṃ mahākāyaṃ yakṣaṃ tālasamucchrayam |
jvalanārkapratīkāśamadhṛṣyaṃ parvatopamam || 20 ||
[Analyze grammar]

setumāśritya tiṣṭhantaṃ dadarśa bharatarṣabhaḥ |
meghagambhīrayā vācā tarjayantaṃ mahābalam || 21 ||
[Analyze grammar]

yakṣa uvāca |
ime te bhrātaro rājanvāryamāṇā mayāsakṛt |
balāttoyaṃ jihīrṣantastato vai sūditā mayā || 22 ||
[Analyze grammar]

na peyamudakaṃ rājanprāṇāniha parīpsatā |
pārtha mā sāhasaṃ kārṣīrmama pūrvaparigrahaḥ |
praśnānuktvā tu kaunteya tataḥ piba harasva ca || 23 ||
[Analyze grammar]

yudhiṣṭhira uvāca |
naivāhaṃ kāmaye yakṣa tava pūrvaparigraham |
kāmaṃ naitatpraśaṃsanti santo hi puruṣāḥ sadā || 24 ||
[Analyze grammar]

yadātmanā svamātmānaṃ praśaṃsetpuruṣaḥ prabho |
yathāprajñaṃ tu te praśnānprativakṣyāmi pṛccha mām || 25 ||
[Analyze grammar]

yakṣa uvāca |
kiṃ svidādityamunnayati ke ca tasyābhitaścarāḥ |
kaścainamastaṃ nayati kasmiṃśca pratitiṣṭhati || 26 ||
[Analyze grammar]

yudhiṣṭhira uvāca |
brahmādityamunnayati devāstasyābhitaścarāḥ |
dharmaścāstaṃ nayati ca satye ca pratitiṣṭhati || 27 ||
[Analyze grammar]

yakṣa uvāca |
kena svicchrotriyo bhavati kena svidvindate mahat |
kena dvitīyavānbhavati rājankena ca buddhimān || 28 ||
[Analyze grammar]

yudhiṣṭhira uvāca |
śrutena śrotriyo bhavati tapasā vindate mahat |
dhṛtyā dvitīyavānbhavati buddhimānvṛddhasevayā || 29 ||
[Analyze grammar]

yakṣa uvāca |
kiṃ brāhmaṇānāṃ devatvaṃ kaśca dharmaḥ satāmiva |
kaścaiṣāṃ mānuṣo bhāvaḥ kimeṣāmasatāmiva || 30 ||
[Analyze grammar]

yudhiṣṭhira uvāca |
svādhyāya eṣāṃ devatvaṃ tapa eṣāṃ satāmiva |
maraṇaṃ mānuṣo bhāvaḥ parivādo'satāmiva || 31 ||
[Analyze grammar]

yakṣa uvāca |
kiṃ kṣatriyāṇāṃ devatvaṃ kaśca dharmaḥ satāmiva |
kaścaiṣāṃ mānuṣo bhāvaḥ kimeṣāmasatāmiva || 32 ||
[Analyze grammar]

yudhiṣṭhira uvāca |
iṣvastrameṣāṃ devatvaṃ yajña eṣāṃ satāmiva |
bhayaṃ vai mānuṣo bhāvaḥ parityāgo'satāmiva || 33 ||
[Analyze grammar]

yakṣa uvāca |
kimekaṃ yajñiyaṃ sāma kimekaṃ yajñiyaṃ yajuḥ |
kā caikā vṛścate yajñaṃ kāṃ yajño nātivartate || 34 ||
[Analyze grammar]

yudhiṣṭhira uvāca |
prāṇo vai yajñiyaṃ sāma mano vai yajñiyaṃ yajuḥ |
vāgekā vṛścate yajñaṃ tāṃ yajño nātivartate || 35 ||
[Analyze grammar]

yakṣa uvāca |
kiṃ svidāpatatāṃ śreṣṭhaṃ kiṃ svinnipatatāṃ varam |
kiṃ svitpratiṣṭhamānānāṃ kiṃ svitpravadatāṃ varam || 36 ||
[Analyze grammar]

yudhiṣṭhira uvāca |
varṣamāpatatāṃ śreṣṭhaṃ bījaṃ nipatatāṃ varam |
gāvaḥ pratiṣṭhamānānāṃ putraḥ pravadatāṃ varaḥ || 37 ||
[Analyze grammar]

yakṣa uvāca |
indriyārthānanubhavanbuddhimāṃllokapūjitaḥ |
saṃmataḥ sarvabhūtānāmucchvasanko na jīvati || 38 ||
[Analyze grammar]

yudhiṣṭhira uvāca |
devatātithibhṛtyānāṃ pitṝṇāmātmanaśca yaḥ |
na nirvapati pañcānāmucchvasanna sa jīvati || 39 ||
[Analyze grammar]

yakṣa uvāca |
kiṃ svidgurutaraṃ bhūmeḥ kiṃ sviduccataraṃ ca khāt |
kiṃ svicchīghrataraṃ vāyoḥ kiṃ svidbahutaraṃ nṛṇām || 40 ||
[Analyze grammar]

yudhiṣṭhira uvāca |
mātā gurutarā bhūmeḥ pitā uccataraśca khāt |
manaḥ śīghrataraṃ vāyościntā bahutarī nṛṇām || 41 ||
[Analyze grammar]

yakṣa uvāca |
kiṃ svitsuptaṃ na nimiṣati kiṃ svijjātaṃ na copati |
kasya sviddhṛdayaṃ nāsti kiṃ svidvegena vardhate || 42 ||
[Analyze grammar]

yudhiṣṭhira uvāca |
matsyaḥ supto na nimiṣatyaṇḍaṃ jātaṃ na copati |
aśmano hṛdayaṃ nāsti nadī vegena vardhate || 43 ||
[Analyze grammar]

yakṣa uvāca |
kiṃ svitpravasato mitraṃ kiṃ svinmitraṃ gṛhe sataḥ |
āturasya ca kiṃ mitraṃ kiṃ svinmitraṃ mariṣyataḥ || 44 ||
[Analyze grammar]

yudhiṣṭhira uvāca |
sārthaḥ pravasato mitraṃ bhāryā mitraṃ gṛhe sataḥ |
āturasya bhiṣaṅmitraṃ dānaṃ mitraṃ mariṣyataḥ || 45 ||
[Analyze grammar]

yakṣa uvāca |
kiṃ svideko vicarati jātaḥ ko jāyate punaḥ |
kiṃ sviddhimasya bhaiṣajyaṃ kiṃ svidāvapanaṃ mahat || 46 ||
[Analyze grammar]

yudhiṣṭhira uvāca |
sūrya eko vicarati candramā jāyate punaḥ |
agnirhimasya bhaiṣajyaṃ bhūmirāvapanaṃ mahat || 47 ||
[Analyze grammar]

yakṣa uvāca |
kiṃ svidekapadaṃ dharmyaṃ kiṃ svidekapadaṃ yaśaḥ |
kiṃ svidekapadaṃ svargyaṃ kiṃ svidekapadaṃ sukham || 48 ||
[Analyze grammar]

yudhiṣṭhira uvāca |
dākṣyamekapadaṃ dharmyaṃ dānamekapadaṃ yaśaḥ |
satyamekapadaṃ svargyaṃ śīlamekapadaṃ sukham || 49 ||
[Analyze grammar]

yakṣa uvāca |
kiṃ svidātmā manuṣyasya kiṃ sviddaivakṛtaḥ sakhā |
upajīvanaṃ kiṃ svidasya kiṃ svidasya parāyaṇam || 50 ||
[Analyze grammar]

yudhiṣṭhira uvāca |
putra ātmā manuṣyasya bhāryā daivakṛtaḥ sakhā |
upajīvanaṃ ca parjanyo dānamasya parāyaṇam || 51 ||
[Analyze grammar]

yakṣa uvāca |
dhanyānāmuttamaṃ kiṃ sviddhanānāṃ kiṃ sviduttamam |
lābhānāmuttamaṃ kiṃ svitkiṃ sukhānāṃ tathottamam || 52 ||
[Analyze grammar]

yudhiṣṭhira uvāca |
dhanyānāmuttamaṃ dākṣyaṃ dhanānāmuttamaṃ śrutam |
lābhānāṃ śreṣṭhamārogyaṃ sukhānāṃ tuṣṭiruttamā || 53 ||
[Analyze grammar]

yakṣa uvāca |
kaśca dharmaḥ paro loke kaśca dharmaḥ sadāphalaḥ |
kiṃ niyamya na śocanti kaiśca saṃdhirna jīryate || 54 ||
[Analyze grammar]

yudhiṣṭhira uvāca |
ānṛśaṃsyaṃ paro dharmastrayīdharmaḥ sadāphalaḥ |
mano yamya na śocanti sadbhiḥ saṃdhirna jīryate || 55 ||
[Analyze grammar]

yakṣa uvāca |
kiṃ nu hitvā priyo bhavati kiṃ nu hitvā na śocati |
kiṃ nu hitvārthavānbhavati kiṃ nu hitvā sukhī bhavet || 56 ||
[Analyze grammar]

yudhiṣṭhira uvāca |
mānaṃ hitvā priyo bhavati krodhaṃ hitvā na śocati |
kāmaṃ hitvārthavānbhavati lobhaṃ hitvā sukhī bhavet || 57 ||
[Analyze grammar]

yakṣa uvāca |
mṛtaḥ kathaṃ syātpuruṣaḥ kathaṃ rāṣṭraṃ mṛtaṃ bhavet |
śrāddhaṃ mṛtaṃ kathaṃ ca syātkathaṃ yajño mṛto bhavet || 58 ||
[Analyze grammar]

yudhiṣṭhira uvāca |
mṛto daridraḥ puruṣo mṛtaṃ rāṣṭramarājakam |
mṛtamaśrotriyaṃ śrāddhaṃ mṛto yajñastvadakṣiṇaḥ || 59 ||
[Analyze grammar]

yakṣa uvāca |
kā dikkimudakaṃ proktaṃ kimannaṃ pārtha kiṃ viṣam |
śrāddhasya kālamākhyāhi tataḥ piba harasva ca || 60 ||
[Analyze grammar]

yudhiṣṭhira uvāca |
santo digjalamākāśaṃ gaurannaṃ prārthanā viṣam |
śrāddhasya brāhmaṇaḥ kālaḥ kathaṃ vā yakṣa manyase || 61 ||
[Analyze grammar]

yakṣa uvāca |
vyākhyātā me tvayā praśnā yāthātathyaṃ paraṃtapa |
puruṣaṃ tvidānīmākhyāhi yaśca sarvadhanī naraḥ || 62 ||
[Analyze grammar]

yudhiṣṭhira uvāca |
divaṃ spṛśati bhūmiṃ ca śabdaḥ puṇyasya karmaṇaḥ |
yāvatsa śabdo bhavati tāvatpuruṣa ucyate || 63 ||
[Analyze grammar]

tulye priyāpriye yasya sukhaduḥkhe tathaiva ca |
atītānāgate cobhe sa vai sarvadhanī naraḥ || 64 ||
[Analyze grammar]

yakṣa uvāca |
vyākhyātaḥ puruṣo rājanyaśca sarvadhanī naraḥ |
tasmāttavaiko bhrātṝṇāṃ yamicchasi sa jīvatu || 65 ||
[Analyze grammar]

yudhiṣṭhira uvāca |
śyāmo ya eṣa raktākṣo bṛhacchāla ivodgataḥ |
vyūḍhorasko mahābāhurnakulo yakṣa jīvatu || 66 ||
[Analyze grammar]

yakṣa uvāca |
priyaste bhīmaseno'yamarjuno vaḥ parāyaṇam |
sa kasmānnakulaṃ rājansāpatnaṃ jīvamicchasi || 67 ||
[Analyze grammar]

yasya nāgasahasreṇa daśasaṃkhyena vai balam |
tulyaṃ taṃ bhīmamutsṛjya nakulaṃ jīvamicchasi || 68 ||
[Analyze grammar]

tathainaṃ manujāḥ prāhurbhīmasenaṃ priyaṃ tava |
atha kenānubhāvena sāpatnaṃ jīvamicchasi || 69 ||
[Analyze grammar]

yasya bāhubalaṃ sarve pāṇḍavāḥ samupāśritāḥ |
arjunaṃ tamapāhāya nakulaṃ jīvamicchasi || 70 ||
[Analyze grammar]

yudhiṣṭhira uvāca |
ānṛśaṃsyaṃ paro dharmaḥ paramārthācca me matam |
ānṛśaṃsyaṃ cikīrṣāmi nakulo yakṣa jīvatu || 71 ||
[Analyze grammar]

dharmaśīlaḥ sadā rājā iti māṃ mānavā viduḥ |
svadharmānna caliṣyāmi nakulo yakṣa jīvatu || 72 ||
[Analyze grammar]

yathā kuntī tathā mādrī viśeṣo nāsti me tayoḥ |
mātṛbhyāṃ samamicchāmi nakulo yakṣa jīvatu || 73 ||
[Analyze grammar]

yakṣa uvāca |
yasya te'rthācca kāmācca ānṛśaṃsyaṃ paraṃ matam |
tasmātte bhrātaraḥ sarve jīvantu bharatarṣabha || 74 ||
[Analyze grammar]