Chapter 255

vaiśaṃpāyana uvāca |
saṃtiṣṭhata praharata tūrṇaṃ viparidhāvata |
iti sma saindhavo rājā codayāmāsa tānnṛpān || 1 ||
[Analyze grammar]

tato ghorataraḥ śabdo raṇe samabhavattadā |
bhīmārjunayamāndṛṣṭvā sainyānāṃ sayudhiṣṭhirān || 2 ||
[Analyze grammar]

śibisindhutrigartānāṃ viṣādaścāpyajāyata |
tāndṛṣṭvā puruṣavyāghrānvyāghrāniva balotkaṭān || 3 ||
[Analyze grammar]

hemacitrasamutsedhāṃ sarvaśaikyāyasīṃ gadām |
pragṛhyābhyadravadbhīmaḥ saindhavaṃ kālacoditam || 4 ||
[Analyze grammar]

tadantaramathāvṛtya koṭikāśyo'bhyahārayat |
mahatā rathavaṃśena parivārya vṛkodaram || 5 ||
[Analyze grammar]

śaktitomaranārācairvīrabāhupracoditaiḥ |
kīryamāṇo'pi bahubhirna sma bhīmo'bhyakampata || 6 ||
[Analyze grammar]

gajaṃ tu sagajārohaṃ padātīṃśca caturdaśa |
jaghāna gadayā bhīmaḥ saindhavadhvajinīmukhe || 7 ||
[Analyze grammar]

pārthaḥ pañcaśatāñśūrānpārvatīyānmahārathān |
parīpsamānaḥ sauvīraṃ jaghāna dhvajinīmukhe || 8 ||
[Analyze grammar]

rājā svayaṃ suvīrāṇāṃ pravarāṇāṃ prahāriṇām |
nimeṣamātreṇa śataṃ jaghāna samare tadā || 9 ||
[Analyze grammar]

dadṛśe nakulastatra rathātpraskandya khaḍgadhṛk |
śirāṃsi pādarakṣāṇāṃ bījavatpravapanmuhuḥ || 10 ||
[Analyze grammar]

sahadevastu saṃyāya rathena gajayodhinaḥ |
pātayāmāsa nārācairdrumebhya iva barhiṇaḥ || 11 ||
[Analyze grammar]

tatastrigartaḥ sadhanuravatīrya mahārathāt |
gadayā caturo vāhānrājñastasya tadāvadhīt || 12 ||
[Analyze grammar]

tamabhyāśagataṃ rājā padātiṃ kuntinandanaḥ |
ardhacandreṇa bāṇena vivyādhorasi dharmarāṭ || 13 ||
[Analyze grammar]

sa bhinnahṛdayo vīro vaktrācchoṇitamudvaman |
papātābhimukhaḥ pārthaṃ chinnamūla iva drumaḥ || 14 ||
[Analyze grammar]

indrasenadvitīyastu rathātpraskandya dharmarāṭ |
hatāśvaḥ sahadevasya pratipede mahāratham || 15 ||
[Analyze grammar]

nakulaṃ tvabhisaṃdhāya kṣemaṃkaramahāmukhau |
ubhāvubhayatastīkṣṇaiḥ śaravarṣairavarṣatām || 16 ||
[Analyze grammar]

tau śarairabhivarṣantau jīmūtāviva vārṣikau |
ekaikena vipāṭhena jaghne mādravatīsutaḥ || 17 ||
[Analyze grammar]

trigartarājaḥ surathastasyātha rathadhūrgataḥ |
rathamākṣepayāmāsa gajena gajayānavit || 18 ||
[Analyze grammar]

nakulastvapabhīstasmādrathāccarmāsipāṇimān |
udbhrāntaṃ sthānamāsthāya tasthau giririvācalaḥ || 19 ||
[Analyze grammar]

surathastaṃ gajavaraṃ vadhāya nakulasya tu |
preṣayāmāsa sakrodhamabhyucchritakaraṃ tataḥ || 20 ||
[Analyze grammar]

nakulastasya nāgasya samīpaparivartinaḥ |
saviṣāṇaṃ bhujaṃ mūle khaḍgena nirakṛntata || 21 ||
[Analyze grammar]

sa vinadya mahānādaṃ gajaḥ kaṅkaṇabhūṣaṇaḥ |
patannavākśirā bhūmau hastyārohānapothayat || 22 ||
[Analyze grammar]

sa tatkarma mahatkṛtvā śūro mādravatīsutaḥ |
bhīmasenarathaṃ prāpya śarma lebhe mahārathaḥ || 23 ||
[Analyze grammar]

bhīmastvāpatato rājñaḥ koṭikāśyasya saṃgare |
sūtasya nudato vāhānkṣureṇāpāharacchiraḥ || 24 ||
[Analyze grammar]

na bubodha hataṃ sūtaṃ sa rājā bāhuśālinā |
tasyāśvā vyadravansaṃkhye hatasūtāstatastataḥ || 25 ||
[Analyze grammar]

vimukhaṃ hatasūtaṃ taṃ bhīmaḥ praharatāṃ varaḥ |
jaghāna talayuktena prāsenābhyetya pāṇḍavaḥ || 26 ||
[Analyze grammar]

dvādaśānāṃ tu sarveṣāṃ sauvīrāṇāṃ dhanaṃjayaḥ |
cakarta niṣitairbhallairdhanūṃṣi ca śirāṃsi ca || 27 ||
[Analyze grammar]

śibīnikṣvākumukhyāṃśca trigartānsaindhavānapi |
jaghānātirathaḥ saṃkhye bāṇagocaramāgatān || 28 ||
[Analyze grammar]

sāditāḥ pratyadṛśyanta bahavaḥ savyasācinā |
sapatākāśca mātaṅgāḥ sadhvajāśca mahārathāḥ || 29 ||
[Analyze grammar]

pracchādya pṛthivīṃ tasthuḥ sarvamāyodhanaṃ prati |
śarīrāṇyaśiraskāni videhāni śirāṃsi ca || 30 ||
[Analyze grammar]

śvagṛdhrakaṅkakākolabhāsagomāyuvāyasāḥ |
atṛpyaṃstatra vīrāṇāṃ hatānāṃ māṃsaśoṇitaiḥ || 31 ||
[Analyze grammar]

hateṣu teṣu vīreṣu sindhurājo jayadrathaḥ |
vimucya kṛṣṇāṃ saṃtrastaḥ palāyanaparo'bhavat || 32 ||
[Analyze grammar]

sa tasminsaṃkule sainye draupadīmavatārya vai |
prāṇaprepsurupādhāvadvanaṃ yena narādhamaḥ || 33 ||
[Analyze grammar]

draupadīṃ dharmarājastu dṛṣṭvā dhaumyapuraskṛtām |
mādrīputreṇa vīreṇa rathamāropayattadā || 34 ||
[Analyze grammar]

tatastadvidrutaṃ sainyamapayāte jayadrathe |
ādiśyādiśya nārācairājaghāna vṛkodaraḥ || 35 ||
[Analyze grammar]

savyasācī tu taṃ dṛṣṭvā palāyantaṃ jayadratham |
vārayāmāsa nighnantaṃ bhīmaṃ saindhavasainikān || 36 ||
[Analyze grammar]

arjuna uvāca |
yasyāpacārātprāpto'yamasmānkleśo durāsadaḥ |
tamasminsamaroddeśe na paśyāmi jayadratham || 37 ||
[Analyze grammar]

tamevānviṣa bhadraṃ te kiṃ te yodhairnipātitaiḥ |
anāmiṣamidaṃ karma kathaṃ vā manyate bhavān || 38 ||
[Analyze grammar]

vaiśaṃpāyana uvāca |
ityukto bhīmasenastu guḍākeśena dhīmatā |
yudhiṣṭhiramabhiprekṣya vāgmī vacanamabravīt || 39 ||
[Analyze grammar]

hatapravīrā ripavo bhūyiṣṭhaṃ vidrutā diśaḥ |
gṛhītvā draupadīṃ rājannivartatu bhavānitaḥ || 40 ||
[Analyze grammar]

yamābhyāṃ saha rājendra dhaumyena ca mahātmanā |
prāpyāśramapadaṃ rājandraupadīṃ parisāntvaya || 41 ||
[Analyze grammar]

na hi me mokṣyate jīvanmūḍhaḥ saindhavako nṛpaḥ |
pātālatalasaṃstho'pi yadi śakro'sya sārathiḥ || 42 ||
[Analyze grammar]

yudhiṣṭhira uvāca |
na hantavyo mahābāho durātmāpi sa saindhavaḥ |
duḥśalāmabhisaṃsmṛtya gāndhārīṃ ca yaśasvinīm || 43 ||
[Analyze grammar]

vaiśaṃpāyana uvāca |
tacchrutvā draupadī bhīmamuvāca vyākulendriyā |
kupitā hrīmatī prājñā patī bhīmārjunāvubhau || 44 ||
[Analyze grammar]

kartavyaṃ cetpriyaṃ mahyaṃ vadhyaḥ sa puruṣādhamaḥ |
saindhavāpasadaḥ pāpo durmatiḥ kulapāṃsanaḥ || 45 ||
[Analyze grammar]

bhāryābhihartā nirvairo yaśca rājyaharo ripuḥ |
yācamāno'pi saṃgrāme na sa jīvitumarhati || 46 ||
[Analyze grammar]

ityuktau tau naravyāghrau yayaturyatra saindhavaḥ |
rājā nivavṛte kṛṣṇāmādāya sapurohitaḥ || 47 ||
[Analyze grammar]

sa praviśyāśramapadaṃ vyapaviddhabṛsīghaṭam |
mārkaṇḍeyādibhirviprairanukīrṇaṃ dadarśa ha || 48 ||
[Analyze grammar]

draupadīmanuśocadbhirbrāhmaṇaistaiḥ samāgataiḥ |
samiyāya mahāprājñaḥ sabhāryo bhrātṛmadhyagaḥ || 49 ||
[Analyze grammar]

te sma taṃ muditā dṛṣṭvā punarabhyāgataṃ nṛpam |
jitvā tānsindhusauvīrāndraupadīṃ cāhṛtāṃ punaḥ || 50 ||
[Analyze grammar]

sa taiḥ parivṛto rājā tatraivopaviveśa ha |
praviveśāśramaṃ kṛṣṇā yamābhyāṃ saha bhāminī || 51 ||
[Analyze grammar]

bhīmārjunāvapi śrutvā krośamātragataṃ ripum |
svayamaśvāṃstudantau tau javenaivābhyadhāvatām || 52 ||
[Analyze grammar]

idamatyadbhutaṃ cātra cakāra puruṣo'rjunaḥ |
krośamātragatānaśvānsaindhavasya jaghāna yat || 53 ||
[Analyze grammar]

sa hi divyāstrasaṃpannaḥ kṛcchrakāle'pyasaṃbhramaḥ |
akarodduṣkaraṃ karma śarairastrānumantritaiḥ || 54 ||
[Analyze grammar]

tato'bhyadhāvatāṃ vīrāvubhau bhīmadhanaṃjayau |
hatāśvaṃ saindhavaṃ bhītamekaṃ vyākulacetasam || 55 ||
[Analyze grammar]

saindhavastu hatāndṛṣṭvā tathāśvānsvānsuduḥkhitaḥ |
dṛṣṭvā vikramakarmāṇi kurvāṇaṃ ca dhanaṃjayam |
palāyanakṛtotsāhaḥ prādravadyena vai vanam || 56 ||
[Analyze grammar]

saindhavaṃ tvabhisaṃprekṣya parākrāntaṃ palāyane |
anuyāya mahābāhuḥ phalguno vākyamabravīt || 57 ||
[Analyze grammar]

anena vīryeṇa kathaṃ striyaṃ prārthayase balāt |
rājaputra nivartasva na te yuktaṃ palāyanam |
kathaṃ cānucarānhitvā śatrumadhye palāyase || 58 ||
[Analyze grammar]

ityucyamānaḥ pārthena saindhavo na nyavartata |
tiṣṭha tiṣṭheti taṃ bhīmaḥ sahasābhyadravadbalī |
mā vadhīriti pārthastaṃ dayāvānabhyabhāṣata || 59 ||
[Analyze grammar]