Chapter 203

mārkaṇḍeya uvāca |
evaṃ tu sūkṣme kathite dharmavyādhena bhārata |
brāhmaṇaḥ sa punaḥ sūkṣmaṃ papraccha susamāhitaḥ || 1 ||
[Analyze grammar]

brāhmaṇa uvāca |
sattvasya rajasaścaiva tamasaśca yathātatham |
guṇāṃstattvena me brūhi yathāvadiha pṛcchataḥ || 2 ||
[Analyze grammar]

vyādha uvāca |
hanta te kathayiṣyāmi yanmāṃ tvaṃ paripṛcchasi |
eṣāṃ guṇānpṛthaktvena nibodha gadato mama || 3 ||
[Analyze grammar]

mohātmakaṃ tamasteṣāṃ raja eṣāṃ pravartakam |
prakāśabahulatvācca sattvaṃ jyāya ihocyate || 4 ||
[Analyze grammar]

avidyābahulo mūḍhaḥ svapnaśīlo vicetanaḥ |
durdṛśīkastamodhvastaḥ sakrodhastāmaso'lasaḥ || 5 ||
[Analyze grammar]

pravṛttavākyo mantrī ca yo'nurāgyabhyasūyakaḥ |
vivitsamāno viprarṣe stabdho mānī sa rājasaḥ || 6 ||
[Analyze grammar]

prakāśabahulo dhīro nirvivitso'nasūyakaḥ |
akrodhano naro dhīmāndāntaścaiva sa sāttvikaḥ || 7 ||
[Analyze grammar]

sāttvikastvatha saṃbuddho lokavṛttena kliśyate |
yadā budhyati boddhavyaṃ lokavṛttaṃ jugupsate || 8 ||
[Analyze grammar]

vairāgyasya hi rūpaṃ tu pūrvameva pravartate |
mṛdurbhavatyahaṃkāraḥ prasīdatyārjavaṃ ca yat || 9 ||
[Analyze grammar]

tato'sya sarvadvaṃdvāni praśāmyanti parasparam |
na cāsya saṃyamo nāma kvacidbhavati kaścana || 10 ||
[Analyze grammar]

śūdrayonau hi jātasya sadguṇānupatiṣṭhataḥ |
vaiśyatvaṃ bhavati brahmankṣatriyatvaṃ tathaiva ca || 11 ||
[Analyze grammar]

ārjave vartamānasya brāhmaṇyamabhijāyate |
guṇāste kīrtitāḥ sarve kiṃ bhūyaḥ śrotumicchasi || 12 ||
[Analyze grammar]

brāhmaṇa uvāca |
pārthivaṃ dhātumāsādya śārīro'gniḥ kathaṃ bhavet |
avakāśaviśeṣeṇa kathaṃ vartayate'nilaḥ || 13 ||
[Analyze grammar]

mārkaṇḍeya uvāca |
praśnametaṃ samuddiṣṭaṃ brāhmaṇena yudhiṣṭhira |
vyādhaḥ sa kathayāmāsa brāhmaṇāya mahātmane || 14 ||
[Analyze grammar]

vyādha uvāca |
mūrdhānamāśrito vahniḥ śarīraṃ paripālayan |
prāṇo mūrdhani cāgnau ca vartamāno viceṣṭate |
bhūtaṃ bhavyaṃ bhaviṣyacca sarvaṃ prāṇe pratiṣṭhitam || 15 ||
[Analyze grammar]

śreṣṭhaṃ tadeva bhūtānāṃ brahmajyotirupāsmahe |
sa jantuḥ sarvabhūtātmā puruṣaḥ sa sanātanaḥ |
mano buddhirahaṃkāro bhūtānāṃ viṣayaśca saḥ || 16 ||
[Analyze grammar]

evaṃ tviha sa sarvatra prāṇena paripālyate |
pṛṣṭhatastu samānena svāṃ svāṃ gatimupāśritaḥ || 17 ||
[Analyze grammar]

bastimūle gude caiva pāvakaḥ samupāśritaḥ |
vahanmūtraṃ purīṣaṃ cāpyapānaḥ parivartate || 18 ||
[Analyze grammar]

prayatne karmaṇi bale ya ekastriṣu vartate |
udāna iti taṃ prāhuradhyātmaviduṣo janāḥ || 19 ||
[Analyze grammar]

saṃdhau saṃdhau saṃniviṣṭaḥ sarveṣvapi tathānilaḥ |
śarīreṣu manuṣyāṇāṃ vyāna ityupadiṣyate || 20 ||
[Analyze grammar]

dhātuṣvagnistu vitataḥ sa tu vāyusamīritaḥ |
rasāndhātūṃśca doṣāṃśca vartayanparidhāvati || 21 ||
[Analyze grammar]

prāṇānāṃ saṃnipātāttu saṃnipātaḥ prajāyate |
ūṣmā cāgniriti jñeyo yo'nnaṃ pacati dehinām || 22 ||
[Analyze grammar]

apānodānayormadhye prāṇavyānau samāhitau |
samanvitastvadhiṣṭhānaṃ samyakpacati pāvakaḥ || 23 ||
[Analyze grammar]

tasyāpi pāyuparyantastathā syādgudasaṃjñitaḥ |
srotāṃsi tasmājjāyante sarvaprāṇeṣu dehinām || 24 ||
[Analyze grammar]

agnivegavahaḥ prāṇo gudānte pratihanyate |
sa ūrdhvamāgamya punaḥ samutkṣipati pāvakam || 25 ||
[Analyze grammar]

pakvāśayastvadho nābhyā ūrdhvamāmāśayaḥ sthitaḥ |
nābhimadhye śarīrasya prāṇāḥ sarve pratiṣṭhitāḥ || 26 ||
[Analyze grammar]

pravṛttā hṛdayātsarvāstiryagūrdhvamadhastathā |
vahantyannarasānnāḍyo daśa prāṇapracoditāḥ || 27 ||
[Analyze grammar]

yogināmeṣa mārgastu yena gacchanti tatparam |
jitaklamāsanā dhīrā mūrdhanyātmānamādadhuḥ |
evaṃ sarveṣu vitatau prāṇāpānau hi dehiṣu || 28 ||
[Analyze grammar]

ekādaśavikārātmā kalāsaṃbhārasaṃbhṛtaḥ |
mūrtimantaṃ hi taṃ viddhi nityaṃ karmajitātmakam || 29 ||
[Analyze grammar]

tasminyaḥ saṃsthito hyagnirnityaṃ sthālyāmivāhitaḥ |
ātmānaṃ taṃ vijānīhi nityaṃ yogajitātmakam || 30 ||
[Analyze grammar]

devo yaḥ saṃsthitastasminnabbinduriva puṣkare |
kṣetrajñaṃ taṃ vijānīhi nityaṃ tyāgajitātmakam || 31 ||
[Analyze grammar]

jīvātmakāni jānīhi rajaḥ sattvaṃ tamastathā |
jīvamātmaguṇaṃ viddhi tathātmānaṃ parātmakam || 32 ||
[Analyze grammar]

sacetanaṃ jīvaguṇaṃ vadanti sa ceṣṭate ceṣṭayate ca sarvam |
tataḥ paraṃ kṣetravido vadanti prākalpayadyo bhuvanāni sapta || 33 ||
[Analyze grammar]

evaṃ sarveṣu bhūteṣu bhūtātmā na prakāśate |
dṛśyate tvagryayā buddhyā sūkṣmayā jñānavedibhiḥ || 34 ||
[Analyze grammar]

cittasya hi prasādena hanti karma śubhāśubham |
prasannātmātmani sthitvā sukhamānantyamaśnute || 35 ||
[Analyze grammar]

lakṣaṇaṃ tu prasādasya yathā tṛptaḥ sukhaṃ svapet |
nivāte vā yathā dīpo dīpyetkuśaladīpitaḥ || 36 ||
[Analyze grammar]

pūrvarātre pare caiva yuñjānaḥ satataṃ manaḥ |
laghvāhāro viśuddhātmā paśyannātmānamātmani || 37 ||
[Analyze grammar]

pradīpteneva dīpena manodīpena paśyati |
dṛṣṭvātmānaṃ nirātmānaṃ tadā sa tu vimucyate || 38 ||
[Analyze grammar]

sarvopāyaistu lobhasya krodhasya ca vinigrahaḥ |
etatpavitraṃ yajñānāṃ tapo vai saṃkramo mataḥ || 39 ||
[Analyze grammar]

nityaṃ krodhāttapo rakṣecchriyaṃ rakṣeta matsarāt |
vidyāṃ mānāpamānābhyāmātmānaṃ tu pramādataḥ || 40 ||
[Analyze grammar]

ānṛśaṃsyaṃ paro dharmaḥ kṣamā ca paramaṃ balam |
ātmajñānaṃ paraṃ jñānaṃ paraṃ satyavrataṃ vratam || 41 ||
[Analyze grammar]

satyasya vacanaṃ śreyaḥ satyaṃ jñānaṃ hitaṃ bhavet |
yadbhūtahitamatyantaṃ tadvai satyaṃ paraṃ matam || 42 ||
[Analyze grammar]

yasya sarve samārambhāḥ nirāśīrbandhanāḥ sadā |
tyāge yasya hutaṃ sarvaṃ sa tyāgī sa ca buddhimān || 43 ||
[Analyze grammar]

yato na gururapyenaṃ cyāvayedupapādayan |
taṃ vidyādbrahmaṇo yogaṃ viyogaṃ yogasaṃjñitam || 44 ||
[Analyze grammar]

na hiṃsyātsarvabhūtāni maitrāyaṇagataścaret |
nedaṃ jīvitamāsādya vairaṃ kurvīta kenacit || 45 ||
[Analyze grammar]

ākiṃcanyaṃ susaṃtoṣo nirāśitvamacāpalam |
etadeva paraṃ jñānaṃ sadātmajñānamuttamam || 46 ||
[Analyze grammar]

parigrahaṃ parityajya bhava buddhyā yatavrataḥ |
aśokaṃ sthānamātiṣṭhenniścalaṃ pretya ceha ca || 47 ||
[Analyze grammar]

taponityena dāntena muninā saṃyatātmanā |
ajitaṃ jetukāmena bhāvyaṃ saṅgeṣvasaṅginā || 48 ||
[Analyze grammar]

guṇāguṇamanāsaṅgamekakāryamanantaram |
etadbrāhmaṇa te vṛttamāhurekapadaṃ sukham || 49 ||
[Analyze grammar]

parityajati yo duḥkhaṃ sukhaṃ cāpyubhayaṃ naraḥ |
brahma prāpnoti so'tyantamasaṅgena ca gacchati || 50 ||
[Analyze grammar]

yathāśrutamidaṃ sarvaṃ samāsena dvijottama |
etatte sarvamākhyātaṃ kiṃ bhūyaḥ śrotumicchasi || 51 ||
[Analyze grammar]