Chapter 1

janamejaya uvāca |
evaṃ dyūtajitāḥ pārthāḥ kopitāśca durātmabhiḥ |
dhārtarāṣṭraiḥ sahāmātyairnikṛtyā dvijasattama || 1 ||
[Analyze grammar]

śrāvitāḥ paruṣā vācaḥ sṛjadbhirvairamuttamam |
kimakurvanta kauravyā mama pūrvapitāmahāḥ || 2 ||
[Analyze grammar]

kathaṃ caiśvaryavibhraṣṭāḥ sahasā duḥkhameyuṣaḥ |
vane vijahrire pārthāḥ śakrapratimatejasaḥ || 3 ||
[Analyze grammar]

ke cainānanvavartanta prāptānvyasanamuttamam |
kimāhārāḥ kimācārāḥ kva ca vāso mahātmanām || 4 ||
[Analyze grammar]

kathaṃ dvādaśa varṣāṇi vane teṣāṃ mahātmanām |
vyatīyurbrāhmaṇaśreṣṭha śūrāṇāmarighātinām || 5 ||
[Analyze grammar]

kathaṃ ca rājaputrī sā pravarā sarvayoṣitām |
pativratā mahābhāgā satataṃ satyavādinī |
vanavāsamaduḥkhārhā dāruṇaṃ pratyapadyata || 6 ||
[Analyze grammar]

etadācakṣva me sarvaṃ vistareṇa tapodhana |
śrotumicchāmi caritaṃ bhūridraviṇatejasām |
kathyamānaṃ tvayā vipra paraṃ kautūhalaṃ hi me || 7 ||
[Analyze grammar]

vaiśaṃpāyana uvāca |
evaṃ dyūtajitāḥ pārthāḥ kopitāśca durātmabhiḥ |
dhārtarāṣṭraiḥ sahāmātyairniryayurgajasāhvayāt || 8 ||
[Analyze grammar]

vardhamānapuradvāreṇābhiniṣkramya te tadā |
udaṅmukhāḥ śastrabhṛtaḥ prayayuḥ saha kṛṣṇayā || 9 ||
[Analyze grammar]

indrasenādayaścainānbhṛtyāḥ paricaturdaśa |
rathairanuyayuḥ śīghraiḥ striya ādāya sarvaśaḥ || 10 ||
[Analyze grammar]

vrajatastānviditvā tu paurāḥ śokābhipīḍitāḥ |
garhayanto'sakṛdbhīṣmaviduradroṇagautamān |
ūcurvigatasaṃtrāsāḥ samāgamya parasparam || 11 ||
[Analyze grammar]

nedamasti kulaṃ sarvaṃ na vayaṃ na ca no gṛhāḥ |
yatra duryodhanaḥ pāpaḥ saubaleyena pālitaḥ |
karṇaduḥśāsanābhyāṃ ca rājyametaccikīrṣati || 12 ||
[Analyze grammar]

no cetkulaṃ na cācāro na dharmo'rthaḥ kutaḥ sukham |
yatra pāpasahāyo'yaṃ pāpo rājyaṃ bubhūṣate || 13 ||
[Analyze grammar]

duryodhano gurudveṣī tyaktācārasuhṛjjanaḥ |
arthalubdho'bhimānī ca nīcaḥ prakṛtinirghṛṇaḥ || 14 ||
[Analyze grammar]

neyamasti mahī kṛtsnā yatra duryodhano nṛpaḥ |
sādhu gacchāmahe sarve yatra gacchanti pāṇḍavāḥ || 15 ||
[Analyze grammar]

sānukrośā mahātmāno vijitendriyaśatravaḥ |
hrīmantaḥ kīrtimantaśca dharmācāraparāyaṇāḥ || 16 ||
[Analyze grammar]

evamuktvānujagmustānpāṇḍavāṃste sametya ca |
ūcuḥ prāñjalayaḥ sarve tānkuntīmādrinandanān || 17 ||
[Analyze grammar]

kva gamiṣyatha bhadraṃ vastyaktvāsmānduḥkhabhāginaḥ |
vayamapyanuyāsyāmo yatra yūyaṃ gamiṣyatha || 18 ||
[Analyze grammar]

adharmeṇa jitāñśrutvā yuṣmāṃstyaktaghṛṇaiḥ paraiḥ |
udvignāḥ sma bhṛśaṃ sarve nāsmānhātumihārhatha || 19 ||
[Analyze grammar]

bhaktānuraktāḥ suhṛdaḥ sadā priyahite ratān |
kurājādhiṣṭhite rājye na vinaśyema sarvaśaḥ || 20 ||
[Analyze grammar]

śrūyatāṃ cābhidhāsyāmo guṇadoṣānnararṣabhāḥ |
śubhāśubhādhivāsena saṃsargaṃ kurute yathā || 21 ||
[Analyze grammar]

vastramāpastilānbhūmiṃ gandho vāsayate yathā |
puṣpāṇāmadhivāsena tathā saṃsargajā guṇāḥ || 22 ||
[Analyze grammar]

mohajālasya yonirhi mūḍhaireva samāgamaḥ |
ahanyahani dharmasya yoniḥ sādhusamāgamaḥ || 23 ||
[Analyze grammar]

tasmātprājñaiśca vṛddhaiśca susvabhāvaistapasvibhiḥ |
sadbhiśca saha saṃsargaḥ kāryaḥ śamaparāyaṇaiḥ || 24 ||
[Analyze grammar]

yeṣāṃ trīṇyavadātāni yonirvidyā ca karma ca |
tānsevettaiḥ samāsyā hi śāstrebhyo'pi garīyasī || 25 ||
[Analyze grammar]

nirārambhā hyapi vayaṃ puṇyaśīleṣu sādhuṣu |
puṇyamevāpnuyāmeha pāpaṃ pāpopasevanāt || 26 ||
[Analyze grammar]

asatāṃ darśanātsparśātsaṃjalpanasahāsanāt |
dharmācārāḥ prahīyante na ca sidhyanti mānavāḥ || 27 ||
[Analyze grammar]

buddhiśca hīyate puṃsāṃ nīcaiḥ saha samāgamāt |
madhyamairmadhyatāṃ yāti śreṣṭhatāṃ yāti cottamaiḥ || 28 ||
[Analyze grammar]

ye guṇāḥ kīrtitā loke dharmakāmārthasaṃbhavāḥ |
lokācārātmasaṃbhūtā vedoktāḥ śiṣṭasaṃmatāḥ || 29 ||
[Analyze grammar]

te yuṣmāsu samastāśca vyastāścaiveha sadguṇāḥ |
icchāmo guṇavanmadhye vastuṃ śreyo'bhikāṅkṣiṇaḥ || 30 ||
[Analyze grammar]

yudhiṣṭhira uvāca |
dhanyā vayaṃ yadasmākaṃ snehakāruṇyayantritāḥ |
asato'pi guṇānāhurbrāhmaṇapramukhāḥ prajāḥ || 31 ||
[Analyze grammar]

tadahaṃ bhrātṛsahitaḥ sarvānvijñāpayāmi vaḥ |
nānyathā taddhi kartavyamasmatsnehānukampayā || 32 ||
[Analyze grammar]

bhīṣmaḥ pitāmaho rājā viduro jananī ca me |
suhṛjjanaśca prāyo me nagare nāgasāhvaye || 33 ||
[Analyze grammar]

te tvasmaddhitakāmārthaṃ pālanīyāḥ prayatnataḥ |
yuṣmābhiḥ sahitaiḥ sarvaiḥ śokasaṃtāpavihvalāḥ || 34 ||
[Analyze grammar]

nivartatāgatā dūraṃ samāgamanaśāpitāḥ |
svajane nyāsabhūte me kāryā snehānvitā matiḥ || 35 ||
[Analyze grammar]

etaddhi mama kāryāṇāṃ paramaṃ hṛdi saṃsthitam |
sukṛtānena me tuṣṭiḥ satkāraśca bhaviṣyati || 36 ||
[Analyze grammar]

vaiśaṃpāyana uvāca |
tathānumantritāstena dharmarājena tāḥ prajāḥ |
cakrurārtasvaraṃ ghoraṃ hā rājanniti duḥkhitāḥ || 37 ||
[Analyze grammar]

guṇānpārthasya saṃsmṛtya duḥkhārtāḥ paramāturāḥ |
akāmāḥ saṃnyavartanta samāgamyātha pāṇḍavān || 38 ||
[Analyze grammar]

nivṛtteṣu tu paureṣu rathānāsthāya pāṇḍavāḥ |
prajagmurjāhnavītīre pramāṇākhyaṃ mahāvaṭam || 39 ||
[Analyze grammar]

taṃ te divasaśeṣeṇa vaṭaṃ gatvā tu pāṇḍavāḥ |
ūṣustāṃ rajanīṃ vīrāḥ saṃspṛśya salilaṃ śuci |
udakenaiva tāṃ rātrimūṣuste duḥkhakarśitāḥ || 40 ||
[Analyze grammar]

anujagmuśca tatraitānsnehātkeciddvijātayaḥ |
sāgnayo'nagnayaścaiva saśiṣyagaṇabāndhavāḥ |
sa taiḥ parivṛto rājā śuśubhe brahmavādibhiḥ || 41 ||
[Analyze grammar]

teṣāṃ prāduṣkṛtāgnīnāṃ muhūrte ramyadāruṇe |
brahmaghoṣapuraskāraḥ saṃjalpaḥ samajāyata || 42 ||
[Analyze grammar]

rājānaṃ tu kuruśreṣṭhaṃ te haṃsamadhurasvarāḥ |
āśvāsayanto viprāgryāḥ kṣapāṃ sarvāṃ vyanodayan || 43 ||
[Analyze grammar]