Chapter 2

vaiśaṃpāyana uvāca |
prabhātāyāṃ tu śarvaryāṃ teṣāmakliṣṭakarmaṇām |
vanaṃ yiyāsatāṃ viprāstasthurbhikṣābhujo'grataḥ |
tānuvāca tato rājā kuntīputro yudhiṣṭhiraḥ || 1 ||
[Analyze grammar]

vayaṃ hi hṛtasarvasvā hṛtarājyā hṛtaśriyaḥ |
phalamūlāmiṣāhārā vanaṃ yāsyāma duḥkhitāḥ || 2 ||
[Analyze grammar]

vanaṃ ca doṣabahulaṃ bahuvyālasarīsṛpam |
parikleśaśca vo manye dhruvaṃ tatra bhaviṣyati || 3 ||
[Analyze grammar]

brāhmaṇānāṃ parikleśo daivatānyapi sādayet |
kiṃ punarmāmito viprā nivartadhvaṃ yatheṣṭataḥ || 4 ||
[Analyze grammar]

brāhmaṇā ūcuḥ |
gatiryā bhavatāṃ rājaṃstāṃ vayaṃ gantumudyatāḥ |
nārhathāsmānparityaktuṃ bhaktānsaddharmadarśinaḥ || 5 ||
[Analyze grammar]

anukampāṃ hi bhakteṣu daivatānyapi kurvate |
viśeṣato brāhmaṇeṣu sadācārāvalambiṣu || 6 ||
[Analyze grammar]

yudhiṣṭhira uvāca |
mamāpi paramā bhaktirbrāhmaṇeṣu sadā dvijāḥ |
sahāyaviparibhraṃśastvayaṃ sādayatīva mām || 7 ||
[Analyze grammar]

āhareyurhi me ye'pi phalamūlamṛgāṃstathā |
ta ime śokajairduḥkhairbhrātaro me vimohitāḥ || 8 ||
[Analyze grammar]

draupadyā viprakarṣeṇa rājyāpaharaṇena ca |
duḥkhānvitānimānkleśairnāhaṃ yoktumihotsahe || 9 ||
[Analyze grammar]

brāhmaṇā ūcuḥ |
asmatpoṣaṇajā cintā mā bhūtte hṛdi pārthiva |
svayamāhṛtya vanyāni anuyāsyāmahe vayam || 10 ||
[Analyze grammar]

anudhyānena japyena vidhāsyāmaḥ śivaṃ tava |
kathābhiścānukūlābhiḥ saha raṃsyāmahe vane || 11 ||
[Analyze grammar]

yudhiṣṭhira uvāca |
evametanna saṃdeho rameyaṃ brāhmaṇaiḥ saha |
nyūnabhāvāttu paśyāmi pratyādeśamivātmanaḥ || 12 ||
[Analyze grammar]

kathaṃ drakṣyāmi vaḥ sarvānsvayamāhṛtabhojanān |
madbhaktyā kliśyato'narhāndhikpāpāndhṛtarāṣṭrajān || 13 ||
[Analyze grammar]

vaiśaṃpāyana uvāca |
ityuktvā sa nṛpaḥ śocanniṣasāda mahītale |
tamadhyātmaratirvidvāñśaunako nāma vai dvijaḥ |
yoge sāṃkhye ca kuśalo rājānamidamabravīt || 14 ||
[Analyze grammar]

śokasthānasahasrāṇi bhayasthānaśatāni ca |
divase divase mūḍhamāviśanti na paṇḍitam || 15 ||
[Analyze grammar]

na hi jñānaviruddheṣu bahudoṣeṣu karmasu |
śreyoghātiṣu sajjante buddhimanto bhavadvidhāḥ || 16 ||
[Analyze grammar]

aṣṭāṅgāṃ buddhimāhuryāṃ sarvāśreyovighātinīm |
śrutismṛtisamāyuktāṃ sā rājaṃstvayyavasthitā || 17 ||
[Analyze grammar]

arthakṛcchreṣu durgeṣu vyāpatsu svajanasya ca |
śārīramānasairduḥkhairna sīdanti bhavadvidhāḥ || 18 ||
[Analyze grammar]

śrūyatāṃ cābhidhāsyāmi janakena yathā purā |
ātmavyavasthānakarā gītāḥ ślokā mahātmanā || 19 ||
[Analyze grammar]

manodehasamutthābhyāṃ duḥkhābhyāmarditaṃ jagat |
tayorvyāsasamāsābhyāṃ śamopāyamimaṃ śṛṇu || 20 ||
[Analyze grammar]

vyādheraniṣṭasaṃsparśācchramādiṣṭavivarjanāt |
duḥkhaṃ caturbhiḥ śārīraṃ kāraṇaiḥ saṃpravartate || 21 ||
[Analyze grammar]

tadāśupratikārācca satataṃ cāvicintanāt |
ādhivyādhipraśamanaṃ kriyāyogadvayena tu || 22 ||
[Analyze grammar]

matimanto hyato vaidyāḥ śamaṃ prāgeva kurvate |
mānasasya priyākhyānaiḥ saṃbhogopanayairnṛṇām || 23 ||
[Analyze grammar]

mānasena hi duḥkhena śarīramupatapyate |
ayaḥpiṇḍena taptena kumbhasaṃsthamivodakam || 24 ||
[Analyze grammar]

mānasaṃ śamayettasmājjñānenāgnimivāmbunā |
praśānte mānase duḥkhe śārīramupaśāmyati || 25 ||
[Analyze grammar]

manaso duḥkhamūlaṃ tu sneha ityupalabhyate |
snehāttu sajjate janturduḥkhayogamupaiti ca || 26 ||
[Analyze grammar]

snehamūlāni duḥkhāni snehajāni bhayāni ca |
śokaharṣau tathāyāsaḥ sarvaṃ snehātpravartate || 27 ||
[Analyze grammar]

snehātkaraṇarāgaśca prajajñe vaiṣayastathā |
aśreyaskāvubhāvetau pūrvastatra guruḥ smṛtaḥ || 28 ||
[Analyze grammar]

koṭarāgniryathāśeṣaṃ samūlaṃ pādapaṃ dahet |
dharmārthinaṃ tathālpo'pi rāgadoṣo vināśayet || 29 ||
[Analyze grammar]

viprayoge na tu tyāgī doṣadarśī samāgamāt |
virāgaṃ bhajate janturnirvairo niṣparigrahaḥ || 30 ||
[Analyze grammar]

tasmātsnehaṃ svapakṣebhyo mitrebhyo dhanasaṃcayāt |
svaśarīrasamutthaṃ tu jñānena vinivartayet || 31 ||
[Analyze grammar]

jñānānviteṣu mukhyeṣu śāstrajñeṣu kṛtātmasu |
na teṣu sajjate snehaḥ padmapatreṣvivodakam || 32 ||
[Analyze grammar]

rāgābhibhūtaḥ puruṣaḥ kāmena parikṛṣyate |
icchā saṃjāyate tasya tatastṛṣṇā pravartate || 33 ||
[Analyze grammar]

tṛṣṇā hi sarvapāpiṣṭhā nityodvegakarī nṛṇām |
adharmabahulā caiva ghorā pāpānubandhinī || 34 ||
[Analyze grammar]

yā dustyajā durmatibhiryā na jīryati jīryataḥ |
yo'sau prāṇāntiko rogastāṃ tṛṣṇāṃ tyajataḥ sukham || 35 ||
[Analyze grammar]

anādyantā tu sā tṛṣṇā antardehagatā nṛṇām |
vināśayati saṃbhūtā ayonija ivānalaḥ || 36 ||
[Analyze grammar]

yathaidhaḥ svasamutthena vahninā nāśamṛcchati |
tathākṛtātmā lobhena sahajena vinaśyati || 37 ||
[Analyze grammar]

rājataḥ salilādagneścorataḥ svajanādapi |
bhayamarthavatāṃ nityaṃ mṛtyoḥ prāṇabhṛtāmiva || 38 ||
[Analyze grammar]

yathā hyāmiṣamākāśe pakṣibhiḥ śvāpadairbhuvi |
bhakṣyate salile matsyaistathā sarveṇa vittavān || 39 ||
[Analyze grammar]

artha eva hi keṣāṃcidanartho bhavitā nṛṇām |
arthaśreyasi cāsakto na śreyo vindate naraḥ |
tasmādarthāgamāḥ sarve manomohavivardhanāḥ || 40 ||
[Analyze grammar]

kārpaṇyaṃ darpamānau ca bhayamudvega eva ca |
arthajāni viduḥ prājñā duḥkhānyetāni dehinām || 41 ||
[Analyze grammar]

arthasyopārjane duḥkhaṃ pālane ca kṣaye tathā |
nāśe duḥkhaṃ vyaye duḥkhaṃ ghnanti caivārthakāraṇāt || 42 ||
[Analyze grammar]

arthā duḥkhaṃ parityaktuṃ pālitāścāpi te'sukhāḥ |
duḥkhena cādhigamyante teṣāṃ nāśaṃ na cintayet || 43 ||
[Analyze grammar]

asaṃtoṣaparā mūḍhāḥ saṃtoṣaṃ yānti paṇḍitāḥ |
anto nāsti pipāsāyāḥ saṃtoṣaḥ paramaṃ sukham || 44 ||
[Analyze grammar]

tasmātsaṃtoṣameveha dhanaṃ paśyanti paṇḍitāḥ |
anityaṃ yauvanaṃ rūpaṃ jīvitaṃ dravyasaṃcayaḥ |
aiśvaryaṃ priyasaṃvāso gṛdhyedeṣu na paṇḍitaḥ || 45 ||
[Analyze grammar]

tyajeta saṃcayāṃstasmāttajjaṃ kleśaṃ saheta kaḥ |
na hi saṃcayavānkaściddṛśyate nirupadravaḥ || 46 ||
[Analyze grammar]

ataśca dharmibhiḥ pumbhiranīhārthaḥ praśasyate |
prakṣālanāddhi paṅkasya dūrādasparśanaṃ varam || 47 ||
[Analyze grammar]

yudhiṣṭhiraivamartheṣu na spṛhāṃ kartumarhasi |
dharmeṇa yadi te kāryaṃ vimukteccho bhavārthataḥ || 48 ||
[Analyze grammar]

yudhiṣṭhira uvāca |
nārthopabhogalipsārthamiyamarthepsutā mama |
bharaṇārthaṃ tu viprāṇāṃ brahmankāṅkṣe na lobhataḥ || 49 ||
[Analyze grammar]

kathaṃ hyasmadvidho brahmanvartamāno gṛhāśrame |
bharaṇaṃ pālanaṃ cāpi na kuryādanuyāyinām || 50 ||
[Analyze grammar]

saṃvibhāgo hi bhūtānāṃ sarveṣāmeva śiṣyate |
tathaivāpacamānebhyaḥ pradeyaṃ gṛhamedhinā || 51 ||
[Analyze grammar]

tṛṇāni bhūmirudakaṃ vākcaturthī ca sūnṛtā |
satāmetāni geheṣu nocchidyante kadācana || 52 ||
[Analyze grammar]

deyamārtasya śayanaṃ sthitaśrāntasya cāsanam |
tṛṣitasya ca pānīyaṃ kṣudhitasya ca bhojanam || 53 ||
[Analyze grammar]

cakṣurdadyānmano dadyādvācaṃ dadyācca sūnṛtām |
pratyudgamyābhigamanaṃ kuryānnyāyena cārcanam || 54 ||
[Analyze grammar]

aghihotramanaḍvāṃśca jñātayo'tithibāndhavāḥ |
putradārabhṛtāścaiva nirdaheyurapūjitāḥ || 55 ||
[Analyze grammar]

nātmārthaṃ pācayedannaṃ na vṛthā ghātayetpaśūn |
na ca tatsvayamaśnīyādvidhivadyanna nirvapet || 56 ||
[Analyze grammar]

śvabhyaśca śvapacebhyaśca vayobhyaścāvapedbhuvi |
vaiśvadevaṃ hi nāmaitatsāyaṃprātarvidhīyate || 57 ||
[Analyze grammar]

vighasāśī bhavettasmānnityaṃ cāmṛtabhojanaḥ |
vighasaṃ bhṛtyaśeṣaṃ tu yajñaśeṣaṃ tathāmṛtam || 58 ||
[Analyze grammar]

etāṃ yo vartate vṛttiṃ vartamāno gṛhāśrame |
tasya dharmaṃ paraṃ prāhuḥ kathaṃ vā vipra manyase || 59 ||
[Analyze grammar]

śaunaka uvāca |
aho bata mahatkaṣṭaṃ viparītamidaṃ jagat |
yenāpatrapate sādhurasādhustena tuṣyati || 60 ||
[Analyze grammar]

śiśnodarakṛte'prājñaḥ karoti vighasaṃ bahu |
moharāgasamākrānta indriyārthavaśānugaḥ || 61 ||
[Analyze grammar]

hriyate budhyamāno'pi naro hāribhirindriyaiḥ |
vimūḍhasaṃjño duṣṭāśvairudbhrāntairiva sārathiḥ || 62 ||
[Analyze grammar]

ṣaḍindriyāṇi viṣayaṃ samāgacchanti vai yadā |
tadā prādurbhavatyeṣāṃ pūrvasaṃkalpajaṃ manaḥ || 63 ||
[Analyze grammar]

mano yasyendriyagrāmaviṣayaṃ prati coditam |
tasyautsukyaṃ saṃbhavati pravṛttiścopajāyate || 64 ||
[Analyze grammar]

tataḥ saṃkalpavīryeṇa kāmena viṣayeṣubhiḥ |
viddhaḥ patati lobhāgnau jyotirlobhātpataṃgavat || 65 ||
[Analyze grammar]

tato vihārairāhārairmohitaśca viśāṃ pate |
mahāmohamukhe magno nātmānamavabudhyate || 66 ||
[Analyze grammar]

evaṃ patati saṃsāre tāsu tāsviha yoniṣu |
avidyākarmatṛṣṇābhirbhrāmyamāṇo'tha cakravat || 67 ||
[Analyze grammar]

brahmādiṣu tṛṇānteṣu hūteṣu parivartate |
jale bhuvi tathākāśe jāyamānaḥ punaḥ punaḥ || 68 ||
[Analyze grammar]

abudhānāṃ gatistveṣā budhānāmapi me śṛṇu |
ye dharme śreyasi ratā vimokṣaratayo janāḥ || 69 ||
[Analyze grammar]

yadidaṃ vedavacanaṃ kuru karma tyajeti ca |
tasmāddharmānimānsarvānnābhimānātsamācaret || 70 ||
[Analyze grammar]

ijyādhyayanadānāni tapaḥ satyaṃ kṣamā damaḥ |
alobha iti mārgo'yaṃ dharmasyāṣṭavidhaḥ smṛtaḥ || 71 ||
[Analyze grammar]

tatra pūrvaścaturvargaḥ pitṛyānapathe sthitaḥ |
kartavyamiti yatkāryaṃ nābhimānātsamācaret || 72 ||
[Analyze grammar]

uttaro devayānastu sadbhirācaritaḥ sadā |
aṣṭāṅgenaiva mārgeṇa viśuddhātmā samācaret || 73 ||
[Analyze grammar]

samyaksaṃkalpasaṃbandhātsamyakcendriyanigrahāt |
samyagvrataviśeṣācca samyakca gurusevanāt || 74 ||
[Analyze grammar]

samyagāhārayogācca samyakcādhyayanāgamāt |
samyakkarmopasaṃnyāsātsamyakcittanirodhanāt |
evaṃ karmāṇi kurvanti saṃsāravijigīṣavaḥ || 75 ||
[Analyze grammar]

rāgadveṣavinirmuktā aiśvaryaṃ devatā gatāḥ |
rudrāḥ sādhyāstathādityā vasavo'thāśvināvapi |
yogaiśvaryeṇa saṃyuktā dhārayanti prajā imāḥ || 76 ||
[Analyze grammar]

tathā tvamapi kaunteya śamamāsthāya puṣkalam |
tapasā siddhimanviccha yogasiddhiṃ ca bhārata || 77 ||
[Analyze grammar]

pitṛmātṛmayī siddhiḥ prāptā karmamayī ca te |
tapasā siddhimanviccha dvijānāṃ bharaṇāya vai || 78 ||
[Analyze grammar]

siddhā hi yadyadicchanti kurvate tadanugrahāt |
tasmāttapaḥ samāsthāya kuruṣvātmamanoratham || 79 ||
[Analyze grammar]