Chapter 165

arjuna uvāca |
kiṃnimittamabhūdvairaṃ viśvāmitravasiṣṭhayoḥ |
vasatorāśrame puṇye śaṃsa naḥ sarvameva tat || 1 ||
[Analyze grammar]

gandharva uvāca |
idaṃ vāsiṣṭhamākhyānaṃ purāṇaṃ paricakṣate |
pārtha sarveṣu lokeṣu yathāvattannibodha me || 2 ||
[Analyze grammar]

kanyakubje mahānāsītpārthivo bharatarṣabha |
gādhīti viśruto loke satyadharmaparāyaṇaḥ || 3 ||
[Analyze grammar]

tasya dharmātmanaḥ putraḥ samṛddhabalavāhanaḥ |
viśvāmitra iti khyāto babhūva ripumardanaḥ || 4 ||
[Analyze grammar]

sa cacāra sahāmātyo mṛgayāṃ gahane vane |
mṛgānvidhyanvarāhāṃśca ramyeṣu marudhanvasu || 5 ||
[Analyze grammar]

vyāyāmakarśitaḥ so'tha mṛgalipsuḥ pipāsitaḥ |
ājagāma naraśreṣṭha vasiṣṭhasyāśramaṃ prati || 6 ||
[Analyze grammar]

tamāgatamabhiprekṣya vasiṣṭhaḥ śreṣṭhabhāgṛṣiḥ |
viśvāmitraṃ naraśreṣṭhaṃ pratijagrāha pūjayā || 7 ||
[Analyze grammar]

pādyārghyācamanīyena svāgatena ca bhārata |
tathaiva pratijagrāha vanyena haviṣā tathā || 8 ||
[Analyze grammar]

tasyātha kāmadhugdhenurvasiṣṭhasya mahātmanaḥ |
uktā kāmānprayaccheti sā kāmānduduhe tataḥ || 9 ||
[Analyze grammar]

grāmyāraṇyā oṣadhīśca duduhe paya eva ca |
ṣaḍrasaṃ cāmṛtarasaṃ rasāyanamanuttamam || 10 ||
[Analyze grammar]

bhojanīyāni peyāni bhakṣyāṇi vividhāni ca |
lehyānyamṛtakalpāni coṣyāṇi ca tathārjuna || 11 ||
[Analyze grammar]

taiḥ kāmaiḥ sarvasaṃpūrṇaiḥ pūjitaḥ sa mahīpatiḥ |
sāmātyaḥ sabalaścaiva tutoṣa sa bhṛśaṃ nṛpaḥ || 12 ||
[Analyze grammar]

ṣaḍāyatāṃ supārśvoruṃ tripṛthuṃ pañca saṃvṛtām |
maṇḍūkanetrāṃ svākārāṃ pīnodhasamaninditām || 13 ||
[Analyze grammar]

suvāladhiṃ śaṅkukarṇāṃ cāruśṛṅgāṃ manoramām |
puṣṭāyataśirogrīvāṃ vismitaḥ so'bhivīkṣya tām || 14 ||
[Analyze grammar]

abhinandati tāṃ nandīṃ vasiṣṭhasya payasvinīm |
abravīcca bhṛśaṃ tuṣṭo viśvāmitro muniṃ tadā || 15 ||
[Analyze grammar]

arbudena gavāṃ brahmanmama rājyena vā punaḥ |
nandinīṃ saṃprayacchasva bhuṅkṣva rājyaṃ mahāmune || 16 ||
[Analyze grammar]

vasiṣṭha uvāca |
devatātithipitrarthamājyārthaṃ ca payasvinī |
adeyā nandinīyaṃ me rājyenāpi tavānagha || 17 ||
[Analyze grammar]

viśvāmitra uvāca |
kṣatriyo'haṃ bhavānviprastapaḥsvādhyāyasādhanaḥ |
brāhmaṇeṣu kuto vīryaṃ praśānteṣu dhṛtātmasu || 18 ||
[Analyze grammar]

arbudena gavāṃ yastvaṃ na dadāsi mamepsitām |
svadharmaṃ na prahāsyāmi nayiṣye te balena gām || 19 ||
[Analyze grammar]

vasiṣṭha uvāca |
balasthaścāsi rājā ca bāhuvīryaśca kṣatriyaḥ |
yathecchasi tathā kṣipraṃ kuru tvaṃ mā vicāraya || 20 ||
[Analyze grammar]

gandharva uvāca |
evamuktastadā pārtha viśvāmitro balādiva |
haṃsacandrapratīkāśāṃ nandinīṃ tāṃ jahāra gām || 21 ||
[Analyze grammar]

kaśādaṇḍapratihatā kālyamānā tatastataḥ |
hambhāyamānā kalyāṇī vasiṣṭhasyātha nandinī || 22 ||
[Analyze grammar]

āgamyābhimukhī pārtha tasthau bhagavadunmukhī |
bhṛśaṃ ca tāḍyamānāpi na jagāmāśramāttataḥ || 23 ||
[Analyze grammar]

vasiṣṭha uvāca |
śṛṇomi te ravaṃ bhadre vinadantyāḥ punaḥ punaḥ |
balāddhriyasi me nandi kṣamāvānbrāhmaṇo hyaham || 24 ||
[Analyze grammar]

gandharva uvāca |
sā tu teṣāṃ balānnandī balānāṃ bharatarṣabha |
viśvāmitrabhayodvignā vasiṣṭhaṃ samupāgamat || 25 ||
[Analyze grammar]

gauruvāca |
pāṣāṇadaṇḍābhihatāṃ krandantīṃ māmanāthavat |
viśvāmitrabalairghorairbhagavankimupekṣase || 26 ||
[Analyze grammar]

gandharva uvāca |
evaṃ tasyāṃ tadā partha dharṣitāyāṃ mahāmuniḥ |
na cukṣubhe na dhairyācca vicacāla dhṛtavrataḥ || 27 ||
[Analyze grammar]

vasiṣṭha uvāca |
kṣatriyāṇāṃ balaṃ tejo brāhmaṇānāṃ kṣamā balam |
kṣamā māṃ bhajate tasmādgamyatāṃ yadi rocate || 28 ||
[Analyze grammar]

gauruvāca |
kiṃ nu tyaktāsmi bhagavanyadevaṃ māṃ prabhāṣase |
atyaktāhaṃ tvayā brahmanna śakyā nayituṃ balāt || 29 ||
[Analyze grammar]

vasiṣṭha uvāca |
na tvāṃ tyajāmi kalyāṇi sthīyatāṃ yadi śakyate |
dṛḍhena dāmnā baddhvaiṣa vatsaste hriyate balāt || 30 ||
[Analyze grammar]

gandharva uvāca |
sthīyatāmiti tacchrutvā vasiṣṭhasya payasvinī |
ūrdhvāñcitaśirogrīvā prababhau ghoradarśanā || 31 ||
[Analyze grammar]

krodharaktekṣaṇā sā gaurhambhāravaghanasvanā |
viśvāmitrasya tatsainyaṃ vyadrāvayata sarvaśaḥ || 32 ||
[Analyze grammar]

kaśāgradaṇḍābhihatā kālyamānā tatastataḥ |
krodhadīptekṣaṇā krodhaṃ bhūya eva samādadhe || 33 ||
[Analyze grammar]

āditya iva madhyāhne krodhadīptavapurbabhau |
aṅgāravarṣaṃ muñcantī muhurvāladhito mahat || 34 ||
[Analyze grammar]

asṛjatpahlavānpucchācchakṛtaḥ śabarāñśakān |
mūtrataścāsṛjaccāpi yavanānkrodhamūrcchitā || 35 ||
[Analyze grammar]

puṇḍrānkirātāndramiḍānsiṃhalānbarbarāṃstathā |
tathaiva daradānmlecchānphenataḥ sā sasarja ha || 36 ||
[Analyze grammar]

tairvisṛṣṭairmahatsainyaṃ nānāmlecchagaṇaistadā |
nānāvaraṇasaṃchannairnānāyudhadharaistathā |
avākīryata saṃrabdhairviśvāmitrasya paśyataḥ || 37 ||
[Analyze grammar]

ekaikaśca tadā yodhaḥ pañcabhiḥ saptabhirvṛtaḥ |
astravarṣeṇa mahatā kālyamānaṃ balaṃ tataḥ |
prabhagnaṃ sarvatastrastaṃ viśvāmitrasya paśyataḥ || 38 ||
[Analyze grammar]

na ca prāṇairviyujyanta kecitte sainikāstadā |
viśvāmitrasya saṃkruddhairvāsiṣṭhairbharatarṣabha || 39 ||
[Analyze grammar]

viśvāmitrasya sainyaṃ tu kālyamānaṃ triyojanam |
krośamānaṃ bhayodvignaṃ trātāraṃ nādhyagacchata || 40 ||
[Analyze grammar]

dṛṣṭvā tanmahadāścaryaṃ brahmatejobhavaṃ tadā |
viśvāmitraḥ kṣatrabhāvānnirviṇṇo vākyamabravīt || 41 ||
[Analyze grammar]

dhigbalaṃ kṣatriyabalaṃ brahmatejobalaṃ balam |
balābalaṃ viniścitya tapa eva paraṃ balam || 42 ||
[Analyze grammar]

sa rājyaṃ sphītamutsṛjya tāṃ ca dīptāṃ nṛpaśriyam |
bhogāṃśca pṛṣṭhataḥ kṛtvā tapasyeva mano dadhe || 43 ||
[Analyze grammar]

sa gatvā tapasā siddhiṃ lokānviṣṭabhya tejasā |
tatāpa sarvāndīptaujā brāhmaṇatvamavāpa ca |
apibacca sutaṃ somamindreṇa saha kauśikaḥ || 44 ||
[Analyze grammar]