Chapter 145

janamejaya uvāca |
ekacakrāṃ gatāste tu kuntīputrā mahārathāḥ |
ataḥ paraṃ dvijaśreṣṭha kimakurvata pāṇḍavāḥ || 1 ||
[Analyze grammar]

vaiśaṃpāyana uvāca |
ekacakrāṃ gatāste tu kuntīputrā mahārathāḥ |
ūṣurnāticiraṃ kālaṃ brāhmaṇasya niveśane || 2 ||
[Analyze grammar]

ramaṇīyāni paśyanto vanāni vividhāni ca |
pārthivānapi coddeśānsaritaśca sarāṃsi ca || 3 ||
[Analyze grammar]

cerurbhaikṣaṃ tadā te tu sarva eva viśāṃ pate |
babhūvurnāgarāṇāṃ ca svairguṇaiḥ priyadarśanāḥ || 4 ||
[Analyze grammar]

nivedayanti sma ca te bhaikṣaṃ kuntyāḥ sadā niśi |
tayā vibhaktānbhāgāṃste bhuñjate sma pṛthakpṛthak || 5 ||
[Analyze grammar]

ardhaṃ te bhuñjate vīrāḥ saha mātrā paraṃtapāḥ |
ardhaṃ bhaikṣasya sarvasya bhīmo bhuṅkte mahābalaḥ || 6 ||
[Analyze grammar]

tathā tu teṣāṃ vasatāṃ tatra rājanmahātmanām |
aticakrāma sumahānkālo'tha bharatarṣabha || 7 ||
[Analyze grammar]

tataḥ kadācidbhaikṣāya gatāste bharatarṣabhāḥ |
saṃgatyā bhīmasenastu tatrāste pṛthayā saha || 8 ||
[Analyze grammar]

athārtijaṃ mahāśabdaṃ brāhmaṇasya niveśane |
bhṛśamutpatitaṃ ghoraṃ kuntī śuśrāva bhārata || 9 ||
[Analyze grammar]

rorūyamāṇāṃstānsarvānparidevayataśca sā |
kāruṇyātsādhubhāvācca devī rājanna cakṣame || 10 ||
[Analyze grammar]

mathyamāneva duḥkhena hṛdayena pṛthā tataḥ |
uvāca bhīmaṃ kalyāṇī kṛpānvitamidaṃ vacaḥ || 11 ||
[Analyze grammar]

vasāmaḥ susukhaṃ putra brāhmaṇasya niveśane |
ajñātā dhārtarāṣṭrāṇāṃ satkṛtā vītamanyavaḥ || 12 ||
[Analyze grammar]

sā cintaye sadā putra brāhmaṇasyāsya kiṃ nvaham |
priyaṃ kuryāmiti gṛhe yatkuryuruṣitāḥ sukham || 13 ||
[Analyze grammar]

etāvānpuruṣastāta kṛtaṃ yasminna naśyati |
yāvacca kuryādanyo'sya kuryādabhyadhikaṃ tataḥ || 14 ||
[Analyze grammar]

tadidaṃ brāhmaṇasyāsya duḥkhamāpatitaṃ dhruvam |
tatrāsya yadi sāhāyyaṃ kuryāma sukṛtaṃ bhavet || 15 ||
[Analyze grammar]

bhīma uvāca |
jñāyatāmasya yadduḥkhaṃ yataścaiva samutthitam |
vidite vyavasiṣyāmi yadyapi syātsuduṣkaram || 16 ||
[Analyze grammar]

vaiśaṃpāyana uvāca |
tathā hi kathayantau tau bhūyaḥ śuśruvatuḥ svanam |
ārtijaṃ tasya viprasya sabhāryasya viśāṃ pate || 17 ||
[Analyze grammar]

antaḥpuraṃ tatastasya brāhmaṇasya mahātmanaḥ |
viveśa kuntī tvaritā baddhavatseva saurabhī || 18 ||
[Analyze grammar]

tatastaṃ brāhmaṇaṃ tatra bhāryayā ca sutena ca |
duhitrā caiva sahitaṃ dadarśa vikṛtānanam || 19 ||
[Analyze grammar]

brāhmaṇa uvāca |
dhigidaṃ jīvitaṃ loke'nalasāramanarthakam |
duḥkhamūlaṃ parādhīnaṃ bhṛśamapriyabhāgi ca || 20 ||
[Analyze grammar]

jīvite paramaṃ duḥkhaṃ jīvite paramo jvaraḥ |
jīvite vartamānasya dvandvānāmāgamo dhruvaḥ || 21 ||
[Analyze grammar]

ekātmāpi hi dharmārthau kāmaṃ ca na niṣevate |
etaiśca viprayogo'pi duḥkhaṃ paramakaṃ matam || 22 ||
[Analyze grammar]

āhuḥ kecitparaṃ mokṣaṃ sa ca nāsti kathaṃcana |
arthaprāptau ca narakaḥ kṛtsna evopapadyate || 23 ||
[Analyze grammar]

arthepsutā paraṃ duḥkhamarthaprāptau tato'dhikam |
jātasnehasya cārtheṣu viprayoge mahattaram || 24 ||
[Analyze grammar]

na hi yogaṃ prapaśyāmi yena mucyeyamāpadaḥ |
putradāreṇa vā sārdhaṃ prādraveyāmanāmayam || 25 ||
[Analyze grammar]

yatitaṃ vai mayā pūrvaṃ yathā tvaṃ vettha brāhmaṇi |
yataḥ kṣemaṃ tato gantuṃ tvayā tu mama na śrutam || 26 ||
[Analyze grammar]

iha jātā vivṛddhāsmi pitā ceha mameti ca |
uktavatyasi durmedhe yācyamānā mayāsakṛt || 27 ||
[Analyze grammar]

svargato hi pitā vṛddhastathā mātā ciraṃ tava |
bāndhavā bhūtapūrvāśca tatra vāse tu kā ratiḥ || 28 ||
[Analyze grammar]

so'yaṃ te bandhukāmāyā aśṛṇvantyā vaco mama |
bandhupraṇāśaḥ saṃprāpto bhṛśaṃ duḥkhakaro mama || 29 ||
[Analyze grammar]

atha vā madvināśo'yaṃ na hi śakṣyāmi kaṃcana |
parityaktumahaṃ bandhuṃ svayaṃ jīvannṛśaṃsavat || 30 ||
[Analyze grammar]

sahadharmacarīṃ dāntāṃ nityaṃ mātṛsamāṃ mama |
sakhāyaṃ vihitāṃ devairnityaṃ paramikāṃ gatim || 31 ||
[Analyze grammar]

mātrā pitrā ca vihitāṃ sadā gārhasthyabhāginīm |
varayitvā yathānyāyaṃ mantravatpariṇīya ca || 32 ||
[Analyze grammar]

kulīnāṃ śīlasaṃpannāmapatyajananīṃ mama |
tvāmahaṃ jīvitasyārthe sādhvīmanapakāriṇīm |
parityaktuṃ na śakṣyāmi bhāryāṃ nityamanuvratām || 33 ||
[Analyze grammar]

kuta eva parityaktuṃ sutāṃ śakṣyāmyahaṃ svayam |
bālāmaprāptavayasamajātavyañjanākṛtim || 34 ||
[Analyze grammar]

bharturarthāya nikṣiptāṃ nyāsaṃ dhātrā mahātmanā |
yasyāṃ dauhitrajāṃllokānāśaṃse pitṛbhiḥ saha |
svayamutpādya tāṃ bālāṃ kathamutsraṣṭumutsahe || 35 ||
[Analyze grammar]

manyante kecidadhikaṃ snehaṃ putre piturnarāḥ |
kanyāyāṃ naiva tu punarmama tulyāvubhau matau || 36 ||
[Analyze grammar]

yasmiṃllokāḥ prasūtiśca sthitā nityamatho sukham |
apāpāṃ tāmahaṃ bālāṃ kathamutsraṣṭumutsahe || 37 ||
[Analyze grammar]

ātmānamapi cotsṛjya tapsye pretavaśaṃ gataḥ |
tyaktā hyete mayā vyaktaṃ neha śakṣyanti jīvitum || 38 ||
[Analyze grammar]

eṣāṃ cānyatamatyāgo nṛśaṃso garhito budhaiḥ |
ātmatyāge kṛte ceme mariṣyanti mayā vinā || 39 ||
[Analyze grammar]

sa kṛcchrāmahamāpanno na śaktastartumāpadam |
aho dhikkāṃ gatiṃ tvadya gamiṣyāmi sabāndhavaḥ |
sarvaiḥ saha mṛtaṃ śreyo na tu me jīvitaṃ kṣamam || 40 ||
[Analyze grammar]