Chapter 65

vaiśaṃpāyana uvāca |
tato gacchanmahābāhureko'mātyānvisṛjya tān |
nāpaśyadāśrame tasmiṃstamṛṣiṃ saṃśitavratam || 1 ||
[Analyze grammar]

so'paśyamānastamṛṣiṃ śūnyaṃ dṛṣṭvā tamāśramam |
uvāca ka ihetyuccairvanaṃ saṃnādayanniva || 2 ||
[Analyze grammar]

śrutvātha tasya taṃ śabdaṃ kanyā śrīriva rūpiṇī |
niścakrāmāśramāttasmāttāpasīveṣadhāriṇī || 3 ||
[Analyze grammar]

sā taṃ dṛṣṭvaiva rājānaṃ duḥṣantamasitekṣaṇā |
svāgataṃ ta iti kṣipramuvāca pratipūjya ca || 4 ||
[Analyze grammar]

āsanenārcayitvā ca pādyenārghyeṇa caiva hi |
papracchānāmayaṃ rājankuśalaṃ ca narādhipam || 5 ||
[Analyze grammar]

yathāvadarcayitvā sā pṛṣṭvā cānāmayaṃ tadā |
uvāca smayamāneva kiṃ kāryaṃ kriyatāmiti || 6 ||
[Analyze grammar]

tāmabravīttato rājā kanyāṃ madhurabhāṣiṇīm |
dṛṣṭvā sarvānavadyāṅgīṃ yathāvatpratipūjitaḥ || 7 ||
[Analyze grammar]

āgato'haṃ mahābhāgamṛṣiṃ kaṇvamupāsitum |
kva gato bhagavānbhadre tanmamācakṣva śobhane || 8 ||
[Analyze grammar]

śakuntalovāca |
gataḥ pitā me bhagavānphalānyāhartumāśramāt |
muhūrtaṃ saṃpratīkṣasva drakṣyasyenamihāgatam || 9 ||
[Analyze grammar]

vaiśaṃpāyana uvāca |
apaśyamānastamṛṣiṃ tayā coktastathā nṛpaḥ |
tāṃ ca dṛṣṭvā varārohāṃ śrīmatīṃ cāruhāsinīm || 10 ||
[Analyze grammar]

vibhrājamānāṃ vapuṣā tapasā ca damena ca |
rūpayauvanasaṃpannāmityuvāca mahīpatiḥ || 11 ||
[Analyze grammar]

kāsi kasyāsi suśroṇi kimarthaṃ cāgatā vanam |
evaṃrūpaguṇopetā kutastvamasi śobhane || 12 ||
[Analyze grammar]

darśanādeva hi śubhe tvayā me'pahṛtaṃ manaḥ |
icchāmi tvāmahaṃ jñātuṃ tanmamācakṣva śobhane || 13 ||
[Analyze grammar]

evamuktā tadā kanyā tena rājñā tadāśrame |
uvāca hasatī vākyamidaṃ sumadhurākṣaram || 14 ||
[Analyze grammar]

kaṇvaṣyāhaṃ bhagavato duḥṣanta duhitā matā |
tapasvino dhṛtimato dharmajñasya yaśasvinaḥ || 15 ||
[Analyze grammar]

duḥṣanta uvāca |
ūrdhvaretā mahābhāgo bhagavāṃllokapūjitaḥ |
caleddhi vṛttāddharmo'pi na caletsaṃśitavrataḥ || 16 ||
[Analyze grammar]

kathaṃ tvaṃ tasya duhitā saṃbhūtā varavarṇinī |
saṃśayo me mahānatra taṃ me chettumihārhasi || 17 ||
[Analyze grammar]

śakuntalovāca |
yathāyamāgamo mahyaṃ yathā cedamabhūtpurā |
śṛṇu rājanyathātattvaṃ yathāsmi duhitā muneḥ || 18 ||
[Analyze grammar]

ṛṣiḥ kaścidihāgamya mama janmābhyacodayat |
tasmai provāca bhagavānyathā tacchṛṇu pārthiva || 19 ||
[Analyze grammar]

tapyamānaḥ kila purā viśvāmitro mahattapaḥ |
subhṛśaṃ tāpayāmāsa śakraṃ suragaṇeśvaram || 20 ||
[Analyze grammar]

tapasā dīptavīryo'yaṃ sthānānmāṃ cyāvayediti |
bhītaḥ puraṃdarastasmānmenakāmidamabravīt || 21 ||
[Analyze grammar]

guṇairdivyairapsarasāṃ menake tvaṃ viśiṣyase |
śreyo me kuru kalyāṇi yattvāṃ vakṣyāmi tacchṛṇu || 22 ||
[Analyze grammar]

asāvādityasaṃkāśo viśvāmitro mahātapāḥ |
tapyamānastapo ghoraṃ mama kampayate manaḥ || 23 ||
[Analyze grammar]

menake tava bhāro'yaṃ viśvāmitraḥ sumadhyame |
saṃśitātmā sudurdharṣa ugre tapasi vartate || 24 ||
[Analyze grammar]

sa māṃ na cyāvayetsthānāttaṃ vai gatvā pralobhaya |
cara tasya tapovighnaṃ kuru me priyamuttamam || 25 ||
[Analyze grammar]

rūpayauvanamādhuryaceṣṭitasmitabhāṣitaiḥ |
lobhayitvā varārohe tapasaḥ saṃnivartaya || 26 ||
[Analyze grammar]

menakovāca |
mahātejāḥ sa bhagavānsadaiva ca mahātapāḥ |
kopanaśca tathā hyenaṃ jānāti bhagavānapi || 27 ||
[Analyze grammar]

tejasastapasaścaiva kopasya ca mahātmanaḥ |
tvamapyudvijase yasya nodvijeyamahaṃ katham || 28 ||
[Analyze grammar]

mahābhāgaṃ vasiṣṭhaṃ yaḥ putrairiṣṭairvyayojayat |
kṣatre jātaśca yaḥ pūrvamabhavadbrāhmaṇo balāt || 29 ||
[Analyze grammar]

śaucārthaṃ yo nadīṃ cakre durgamāṃ bahubhirjalaiḥ |
yāṃ tāṃ puṇyatamāṃ loke kauśikīti vidurjanāḥ || 30 ||
[Analyze grammar]

babhāra yatrāsya purā kāle durge mahātmanaḥ |
dārānmataṅgo dharmātmā rājarṣirvyādhatāṃ gataḥ || 31 ||
[Analyze grammar]

atītakāle durbhikṣe yatraitya punarāśramam |
muniḥ pāreti nadyā vai nāma cakre tadā prabhuḥ || 32 ||
[Analyze grammar]

mataṅgaṃ yājayāṃ cakre yatra prītamanāḥ svayam |
tvaṃ ca somaṃ bhayādyasya gataḥ pātuṃ śureśvara || 33 ||
[Analyze grammar]

ati nakṣatravaṃśāṃśca kruddho nakṣatrasaṃpadā |
prati śravaṇapūrvāṇi nakṣatrāṇi sasarja yaḥ || 34 ||
[Analyze grammar]

etāni yasya karmāṇi tasyāhaṃ bhṛśamudvije |
yathā māṃ na dahetkruddhastathājñāpaya māṃ vibho || 35 ||
[Analyze grammar]

tejasā nirdahellokānkampayeddharaṇīṃ padā |
saṃkṣipecca mahāmeruṃ tūrṇamāvartayettathā || 36 ||
[Analyze grammar]

tādṛśaṃ tapasā yuktaṃ pradīptamiva pāvakam |
kathamasmadvidhā bālā jitendriyamabhispṛśet || 37 ||
[Analyze grammar]

hutāśanamukhaṃ dīptaṃ sūryacandrākṣitārakam |
kālajihvaṃ suraśreṣṭha kathamasmadvidhā spṛśet || 38 ||
[Analyze grammar]

yamaśca somaśca maharṣayaśca sādhyā viśve vālakhilyāśca sarve |
ete'pi yasyodvijante prabhāvātkasmāttasmānmādṛśī nodvijeta || 39 ||
[Analyze grammar]

tvayaivamuktā ca kathaṃ samīpamṛṣerna gaccheyamahaṃ surendra |
rakṣāṃ tu me cintaya devarāja yathā tvadarthaṃ rakṣitāhaṃ careyam || 40 ||
[Analyze grammar]

kāmaṃ tu me mārutastatra vāsaḥ prakrīḍitāyā vivṛṇotu deva |
bhavecca me manmathastatra kārye sahāyabhūtastava devaprasādāt || 41 ||
[Analyze grammar]

vanācca vāyuḥ surabhiḥ pravāyettasminkāle tamṛṣiṃ lobhayantyāḥ |
tathetyuktvā vihite caiva tasmiṃstato yayau sāśramaṃ kauśikasya || 42 ||
[Analyze grammar]