Chapter 64

vaiśaṃpāyana uvāca |
tato mṛgasahasrāṇi hatvā vipulavāhanaḥ |
rājā mṛgaprasaṅgena vanamanyadviveśa ha || 1 ||
[Analyze grammar]

eka evottamabalaḥ kṣutpipāsāsamanvitaḥ |
sa vanasyāntamāsādya mahadīriṇamāsadat || 2 ||
[Analyze grammar]

taccāpyatītya nṛpatiruttamāśramasaṃyutam |
manaḥprahlādajananaṃ dṛṣṭikāntamatīva ca |
śītamārutasaṃyuktaṃ jagāmānyanmahadvanam || 3 ||
[Analyze grammar]

puṣpitaiḥ pādapaiḥ kīrṇamatīva sukhaśādvalam |
vipulaṃ madhurārāvairnāditaṃ vihagaistathā || 4 ||
[Analyze grammar]

pravṛddhaviṭapairvṛkṣaiḥ sukhacchāyaiḥ samāvṛtam |
ṣaṭpadāghūrṇitalataṃ lakṣmyā paramayā yutam || 5 ||
[Analyze grammar]

nāpuṣpaḥ pādapaḥ kaścinnāphalo nāpi kaṇṭakī |
ṣaṭpadairvāpyanākīrṇastasminvai kānane'bhavat || 6 ||
[Analyze grammar]

vihagairnāditaṃ puṣpairalaṃkṛtamatīva ca |
sarvartukusumairvṛkṣairatīva sukhaśādvalam |
manoramaṃ maheṣvāso viveśa vanamuttamam || 7 ||
[Analyze grammar]

mārutāgalitāstatra drumāḥ kusumaśālinaḥ |
puṣpavṛṣṭiṃ vicitrāṃ sma vyasṛjaṃste punaḥ punaḥ || 8 ||
[Analyze grammar]

divaspṛśo'tha saṃghuṣṭāḥ pakṣibhirmadhurasvaraiḥ |
virejuḥ pādapāstatra vicitrakusumāmbarāḥ || 9 ||
[Analyze grammar]

teṣāṃ tatra pravāleṣu puṣpabhārāvanāmiṣu |
ruvanti rāvaṃ vihagāḥ ṣaṭpadaiḥ sahitā mṛdu || 10 ||
[Analyze grammar]

tatra pradeśāṃśca bahūnkusumotkaramaṇḍitān |
latāgṛhaparikṣiptānmanasaḥ prītivardhanān |
saṃpaśyansa mahātejā babhūva muditastadā || 11 ||
[Analyze grammar]

parasparāśliṣṭaśākhaiḥ pādapaiḥ kusumācitaiḥ |
aśobhata vanaṃ tattairmahendradhvajasaṃnibhaiḥ || 12 ||
[Analyze grammar]

sukhaśītaḥ sugandhī ca puṣpareṇuvaho'nilaḥ |
parikrāmanvane vṛkṣānupaitīva riraṃsayā || 13 ||
[Analyze grammar]

evaṃguṇasamāyuktaṃ dadarśa sa vanaṃ nṛpaḥ |
nadīkacchodbhavaṃ kāntamucchritadhvajasaṃnibham || 14 ||
[Analyze grammar]

prekṣamāṇo vanaṃ tattu suprahṛṣṭavihaṃgamam |
āśramapravaraṃ ramyaṃ dadarśa ca manoramam || 15 ||
[Analyze grammar]

nānāvṛkṣasamākīrṇaṃ saṃprajvalitapāvakam |
yatibhirvālakhilyaiśca vṛtaṃ munigaṇānvitam || 16 ||
[Analyze grammar]

agnyāgāraiśca bahubhiḥ puṣpasaṃstarasaṃstṛtam |
mahākacchairbṛhadbhiśca vibhrājitamatīva ca || 17 ||
[Analyze grammar]

mālinīmabhito rājannadīṃ puṇyāṃ sukhodakām |
naikapakṣigaṇākīrṇāṃ tapovanamanoramām |
tatra vyālamṛgānsaumyānpaśyanprītimavāpa saḥ || 18 ||
[Analyze grammar]

taṃ cāpyatirathaḥ śrīmānāśramaṃ pratyapadyata |
devalokapratīkāśaṃ sarvataḥ sumanoharam || 19 ||
[Analyze grammar]

nadīmāśramasaṃśliṣṭāṃ puṇyatoyāṃ dadarśa saḥ |
sarvaprāṇabhṛtāṃ tatra jananīmiva viṣṭhitām || 20 ||
[Analyze grammar]

sacakravākapulināṃ puṣpaphenapravāhinīm |
sakiṃnaragaṇāvāsāṃ vānararkṣaniṣevitām || 21 ||
[Analyze grammar]

puṇyasvādhyāyasaṃghuṣṭāṃ pulinairupaśobhitām |
mattavāraṇaśārdūlabhujagendraniṣevitām || 22 ||
[Analyze grammar]

nadīmāśramasaṃbaddhāṃ dṛṣṭvāśramapadaṃ tathā |
cakārābhipraveśāya matiṃ sa nṛpatistadā || 23 ||
[Analyze grammar]

alaṃkṛtaṃ dvīpavatyā mālinyā ramyatīrayā |
naranārāyaṇasthānaṃ gaṅgayevopaśobhitam |
mattabarhiṇasaṃghuṣṭaṃ praviveśa mahadvanam || 24 ||
[Analyze grammar]

tatsa caitrarathaprakhyaṃ samupetya nareśvaraḥ |
atīva guṇasaṃpannamanirdeśyaṃ ca varcasā |
maharṣiṃ kāśyapaṃ draṣṭumatha kaṇvaṃ tapodhanam || 25 ||
[Analyze grammar]

rathinīmaśvasaṃbādhāṃ padātigaṇasaṃkulām |
avasthāpya vanadvāri senāmidamuvāca saḥ || 26 ||
[Analyze grammar]

muniṃ virajasaṃ draṣṭuṃ gamiṣyāmi tapodhanam |
kāśyapaṃ sthīyatāmatra yāvadāgamanaṃ mama || 27 ||
[Analyze grammar]

tadvanaṃ nandanaprakhyamāsādya manujeśvaraḥ |
kṣutpipāse jahau rājā harṣaṃ cāvāpa puṣkalam || 28 ||
[Analyze grammar]

sāmātyo rājaliṅgāni so'panīya narādhipaḥ |
purohitasahāyaśca jagāmāśramamuttamam |
didṛkṣustatra tamṛṣiṃ taporāśimathāvyayam || 29 ||
[Analyze grammar]

brahmalokapratīkāśamāśramaṃ so'bhivīkṣya ca |
ṣaṭpadodgītasaṃghuṣṭaṃ nānādvijagaṇāyutam || 30 ||
[Analyze grammar]

ṛco bahvṛcamukhyaiśca preryamāṇāḥ padakramaiḥ |
śuśrāva manujavyāghro vitateṣviha karmasu || 31 ||
[Analyze grammar]

yajñavidyāṅgavidbhiśca kramadbhiśca kramānapi |
amitātmabhiḥ suniyataiḥ śuśubhe sa tadāśramaḥ || 32 ||
[Analyze grammar]

atharvavedapravarāḥ pūgayājñika saṃmatāḥ |
saṃhitāmīrayanti sma padakramayutāṃ tu te || 33 ||
[Analyze grammar]

śabdasaṃskārasaṃyuktaṃ bruvadbhiścāparairdvijaiḥ |
nāditaḥ sa babhau śrīmānbrahmaloka ivāśramaḥ || 34 ||
[Analyze grammar]

yajñasaṃskāravidbhiśca kramaśikṣā viśāradaiḥ |
nyāyatattvārthavijñānasaṃpannairvedapāragaiḥ || 35 ||
[Analyze grammar]

nānāvākyasamāhārasamavāyaviśāradaiḥ |
viśeṣakāryavidbhiśca mokṣadharmaparāyaṇaiḥ || 36 ||
[Analyze grammar]

sthāpanākṣepasiddhāntaparamārthajñatāṃ gataiḥ |
lokāyatikamukhyaiśca samantādanunāditam || 37 ||
[Analyze grammar]

tatra tatra ca viprendrānniyatānsaṃśitavratān |
japahomaparānsiddhāndadarśa paravīrahā || 38 ||
[Analyze grammar]

āsanāni vicitrāṇi puṣpavanti mahīpatiḥ |
prayatnopahitāni sma dṛṣṭvā vismayamāgamat || 39 ||
[Analyze grammar]

devatāyatanānāṃ ca pūjāṃ prekṣya kṛtāṃ dvijaiḥ |
brahmalokasthamātmānaṃ mene sa nṛpasattamaḥ || 40 ||
[Analyze grammar]

sa kāśyapatapoguptamāśramapravaraṃ śubham |
nātṛpyatprekṣamāṇo vai tapodhanagaṇairyutam || 41 ||
[Analyze grammar]

sa kāśyapasyāyatanaṃ mahāvratairvṛtaṃ samantādṛṣibhistapodhanaiḥ |
viveśa sāmātyapurohito'rihā viviktamatyarthamanoharaṃ śivam || 42 ||
[Analyze grammar]