Chapter 36

janamejaya uvāca |
vanavāsaṃ gate vipra dhṛtarāṣṭre mahīpatau |
sabhārye nṛpaśārdūle vadhvā kuntyā samanvite || 1 ||
[Analyze grammar]

vidure cāpi saṃsiddhe dharmarājaṃ vyapāśrite |
vasatsu pāṇḍuputreṣu sarveṣvāśramamaṇḍale || 2 ||
[Analyze grammar]

yattadāścaryamiti vai kariṣyāmītyuvāca ha |
vyāsaḥ paramatejasvī maharṣistadvadasva me || 3 ||
[Analyze grammar]

vanavāse ca kauravyaḥ kiyantaṃ kālamacyutaḥ |
yudhiṣṭhiro narapatirnyavasatsajano dvija || 4 ||
[Analyze grammar]

kimāhārāśca te tatra sasainyā nyavasanprabho |
sāntaḥpurā mahātmāna iti tadbrūhi me'nagha || 5 ||
[Analyze grammar]

vaiśaṃpāyana uvāca |
te'nujñātāstadā rājankururājena pāṇḍavāḥ |
vividhānyannapānāni viśrāmyānubhavanti te || 6 ||
[Analyze grammar]

māsamekaṃ vijahruste sasainyāntaḥpurā vane |
atha tatrāgamadvyāso yathoktaṃ te mayānagha || 7 ||
[Analyze grammar]

tathā tu teṣāṃ sarveṣāṃ kathābhirnṛpasaṃnidhau |
vyāsamanvāsatāṃ rājannājagmurmunayo'pare || 8 ||
[Analyze grammar]

nāradaḥ parvataścaiva devalaśca mahātapāḥ |
viśvāvasustumburuśca citrasenaśca bhārata || 9 ||
[Analyze grammar]

teṣāmapi yathānyāyaṃ pūjāṃ cakre mahāmanāḥ |
dhṛtarāṣṭrābhyanujñātaḥ kururājo yudhiṣṭhiraḥ || 10 ||
[Analyze grammar]

niṣeduste tataḥ sarve pūjāṃ prāpya yudhiṣṭhirāt |
āsaneṣvatha puṇyeṣu barhiṣkeṣu vareṣu ca || 11 ||
[Analyze grammar]

teṣu tatropaviṣṭeṣu sa tu rājā mahāmatiḥ |
pāṇḍuputraiḥ parivṛto niṣasāda kurūdvahaḥ || 12 ||
[Analyze grammar]

gāndhārī caiva kuntī ca draupadī sātvatī tathā |
striyaścānyāstathānyābhiḥ sahopaviviśustataḥ || 13 ||
[Analyze grammar]

teṣāṃ tatra kathā divyā dharmiṣṭhāścābhavannṛpa |
ṛṣīṇāṃ ca purāṇānāṃ devāsuravimiśritāḥ || 14 ||
[Analyze grammar]

tataḥ kathānte vyāsastaṃ prajñācakṣuṣamīśvaram |
provāca vadatāṃ śreṣṭhaḥ punareva sa tadvacaḥ |
prīyamāṇo mahātejāḥ sarvavedavidāṃ varaḥ || 15 ||
[Analyze grammar]

viditaṃ mama rājendra yatte hṛdi vivakṣitam |
dahyamānasya śokena tava putrakṛtena vai || 16 ||
[Analyze grammar]

gāndhāryāścaiva yadduḥkhaṃ hṛdi tiṣṭhati pārthiva |
kuntyāśca yanmahārāja draupadyāśca hṛdi sthitam || 17 ||
[Analyze grammar]

yacca dhārayate tīvraṃ duḥkhaṃ putravināśajam |
subhadrā kṛṣṇabhaginī taccāpi viditaṃ mama || 18 ||
[Analyze grammar]

śrutvā samāgamamimaṃ sarveṣāṃ vastato nṛpa |
saṃśayacchedanāyāhaṃ prāptaḥ kauravanandana || 19 ||
[Analyze grammar]

ime ca devagandharvāḥ sarve caiva maharṣayaḥ |
paśyantu tapaso vīryamadya me cirasaṃbhṛtam || 20 ||
[Analyze grammar]

taducyatāṃ mahābāho kaṃ kāmaṃ pradiśāmi te |
pravaṇo'smi varaṃ dātuṃ paśya me tapaso balam || 21 ||
[Analyze grammar]

evamuktaḥ sa rājendro vyāsenāmitabuddhinā |
muhūrtamiva saṃcintya vacanāyopacakrame || 22 ||
[Analyze grammar]

dhanyo'smyanugṛhīto'smi saphalaṃ jīvitaṃ ca me |
yanme samāgamo'dyeha bhavadbhiḥ saha sādhubhiḥ || 23 ||
[Analyze grammar]

adya cāpyavagacchāmi gatimiṣṭāmihātmanaḥ |
bhavadbhirbrahmakalpairyatsameto'haṃ tapodhanāḥ || 24 ||
[Analyze grammar]

darśanādeva bhavatāṃ pūto'haṃ nātra saṃśayaḥ |
vidyate na bhayaṃ cāpi paralokānmamānaghāḥ || 25 ||
[Analyze grammar]

kiṃ tu tasya sudurbuddhermandasyāpanayairbhṛśam |
dūyate me mano nityaṃ smarataḥ putragṛddhinaḥ || 26 ||
[Analyze grammar]

apāpāḥ pāṇḍavā yena nikṛtāḥ pāpabuddhinā |
ghātitā pṛthivī ceyaṃ sahasā sanaradvipā || 27 ||
[Analyze grammar]

rājānaśca mahātmāno nānājanapadeśvarāḥ |
āgamya mama putrārthe sarve mṛtyuvaśaṃ gatāḥ || 28 ||
[Analyze grammar]

ye te putrāṃśca dārāśca prāṇāṃśca manasaḥ priyān |
parityajya gatāḥ śūrāḥ pretarājaniveśanam || 29 ||
[Analyze grammar]

kā nu teṣāṃ gatirbrahmanmitrārthe ye hatā mṛdhe |
tathaiva putrapautrāṇāṃ mama ye nihatā yudhi || 30 ||
[Analyze grammar]

dūyate me mano'bhīkṣṇaṃ ghātayitvā mahābalam |
bhīṣmaṃ śāṃtanavaṃ vṛddhaṃ droṇaṃ ca dvijasattamam || 31 ||
[Analyze grammar]

mama putreṇa mūḍhena pāpena suhṛdadviṣā |
kṣayaṃ nītaṃ kulaṃ dīptaṃ pṛthivīrājyamicchatā || 32 ||
[Analyze grammar]

etatsarvamanusmṛtya dahyamāno divāniśam |
na śāntimadhigacchāmi duḥkhaśokasamāhataḥ |
iti me cintayānasya pitaḥ śarma na vidyate || 33 ||
[Analyze grammar]