Chapter 132

umovāca |
bhagavansarvabhūteśa surāsuranamaskṛta |
dharmādharme nṛṇāṃ deva brūhi me saṃśayaṃ vibho || 1 ||
[Analyze grammar]

karmaṇā manasā vācā trividhaṃ hi naraḥ sadā |
badhyate bandhanaiḥ pāśairmucyate'pyatha vā punaḥ || 2 ||
[Analyze grammar]

kena śīlena vā deva karmaṇā kīdṛśena vā |
samācārairguṇairvākyaiḥ svargaṃ yāntīha mānavāḥ || 3 ||
[Analyze grammar]

maheśvara uvāca |
devi dharmārthatattvajñe satyanitye dame rate |
sarvaprāṇihitaḥ praśnaḥ śrūyatāṃ buddhivardhanaḥ || 4 ||
[Analyze grammar]

satyadharmaratāḥ santaḥ sarvalipsāvivarjitāḥ |
nādharmeṇa na dharmeṇa badhyante chinnasaṃśayāḥ || 5 ||
[Analyze grammar]

pralayotpattitattvajñāḥ sarvajñāḥ samadarśinaḥ |
vītarāgā vimucyante puruṣāḥ sarvabandhanaiḥ || 6 ||
[Analyze grammar]

karmaṇā manasā vācā ye na hiṃsanti kiṃcana |
ye na sajjanti kasmiṃścidbadhyante te na karmabhiḥ || 7 ||
[Analyze grammar]

prāṇātipātādviratāḥ śīlavanto dayānvitāḥ |
tulyadveṣyapriyā dāntā mucyante karmabandhanaiḥ || 8 ||
[Analyze grammar]

sarvabhūtadayāvanto viśvāsyāḥ sarvajantuṣu |
tyaktahiṃsāsamācārāste narāḥ svargagāminaḥ || 9 ||
[Analyze grammar]

parasve nirmamā nityaṃ paradāravivarjakāḥ |
dharmalabdhārthabhoktāraste narāḥ svargagāminaḥ || 10 ||
[Analyze grammar]

mātṛvatsvasṛvaccaiva nityaṃ duhitṛvacca ye |
paradāreṣu vartante te narāḥ svargagāminaḥ || 11 ||
[Analyze grammar]

stainyānnivṛttāḥ satataṃ saṃtuṣṭāḥ svadhanena ca |
svabhāgyānyupajīvanti te narāḥ svargagāminaḥ || 12 ||
[Analyze grammar]

svadāraniratā ye ca ṛtukālābhigāminaḥ |
agrāmyasukhabhogāśca te narāḥ svargagāminaḥ || 13 ||
[Analyze grammar]

paradāreṣu ye nityaṃ cāritrāvṛtalocanāḥ |
yatendriyāḥ śīlaparāste narāḥ svargagāminaḥ || 14 ||
[Analyze grammar]

eṣa devakṛto mārgaḥ sevitavyaḥ sadā naraiḥ |
akaṣāyakṛtaścaiva mārgaḥ sevyaḥ sadā budhaiḥ || 15 ||
[Analyze grammar]

dānadharmatapoyuktaḥ śīlaśaucadayātmakaḥ |
vṛttyarthaṃ dharmahetorvā sevitavyaḥ sadā naraiḥ |
svargavāsamabhīpsadbhirna sevyastvata uttaraḥ || 16 ||
[Analyze grammar]

umovāca |
vācātha badhyate yena mucyate'pyatha vā punaḥ |
tāni karmāṇi me deva vada bhūtapate'nagha || 17 ||
[Analyze grammar]

maheśvara uvāca |
ātmahetoḥ parārthe vā narmahāsyāśrayāttathā |
ye mṛṣā na vadantīha te narāḥ svargagāminaḥ || 18 ||
[Analyze grammar]

vṛttyarthaṃ dharmahetorvā kāmakārāttathaiva ca |
anṛtaṃ ye na bhāṣante te narāḥ svargagāminaḥ || 19 ||
[Analyze grammar]

ślakṣṇāṃ vāṇīṃ nirābādhāṃ madhurāṃ pāpavarjitām |
svāgatenābhibhāṣante te narāḥ svargagāminaḥ || 20 ||
[Analyze grammar]

kaṭukāṃ ye na bhāṣante paruṣāṃ niṣṭhurāṃ giram |
apaiśunyaratāḥ santaste narāḥ svargagāminaḥ || 21 ||
[Analyze grammar]

piśunāṃ ye na bhāṣante mitrabhedakarīṃ giram |
ṛtāṃ maitrīṃ prabhāṣante te narāḥ svargagāminaḥ || 22 ||
[Analyze grammar]

varjayanti sadā sūcyaṃ paradrohaṃ ca mānavāḥ |
sarvabhūtasamā dāntāste narāḥ svargagāminaḥ || 23 ||
[Analyze grammar]

śaṭhapralāpādviratā viruddhaparivarjakāḥ |
saumyapralāpino nityaṃ te narāḥ svargagāminaḥ || 24 ||
[Analyze grammar]

na kopādvyāharante ye vācaṃ hṛdayadāraṇīm |
sāntvaṃ vadanti kruddhāpi te narāḥ svargagāminaḥ || 25 ||
[Analyze grammar]

eṣa vāṇīkṛto devi dharmaḥ sevyaḥ sadā naraiḥ |
śubhaḥ satyaguṇo nityaṃ varjanīyā mṛṣā budhaiḥ || 26 ||
[Analyze grammar]

umovāca |
manasā badhyate yena karmaṇā puruṣaḥ sadā |
tanme brūhi mahābhāga devadeva pinākadhṛk || 27 ||
[Analyze grammar]

maheśvara uvāca |
mānaseneha dharmeṇa saṃyuktāḥ puruṣāḥ sadā |
svargaṃ gacchanti kalyāṇi tanme kīrtayataḥ śṛṇu || 28 ||
[Analyze grammar]

duṣpraṇītena manasā duṣpraṇītatarākṛtiḥ |
badhyate mānavo yena śṛṇu cānyacchubhānane || 29 ||
[Analyze grammar]

araṇye vijane nyastaṃ parasvaṃ vīkṣya ye narāḥ |
manasāpi na hiṃsanti te narāḥ svargagāminaḥ || 30 ||
[Analyze grammar]

grāme gṛhe vā yaddravyaṃ pārakyaṃ vijane sthitam |
nābhinandanti vai nityaṃ te narāḥ svargagāminaḥ || 31 ||
[Analyze grammar]

tathaiva paradārānye kāmavṛttānrahogatān |
manasāpi na hiṃsanti te narāḥ svargagāminaḥ || 32 ||
[Analyze grammar]

śatruṃ mitraṃ ca ye nityaṃ tulyena manasā narāḥ |
bhajanti maitrāḥ saṃgamya te narāḥ svargagāminaḥ || 33 ||
[Analyze grammar]

śrutavanto dayāvantaḥ śucayaḥ satyasaṃgarāḥ |
svairarthaiḥ parisaṃtuṣṭāste narāḥ svargagāminaḥ || 34 ||
[Analyze grammar]

avairā ye tvanāyāsā maitracittaparāḥ sadā |
sarvabhūtadayāvantaste narāḥ svargagāminaḥ || 35 ||
[Analyze grammar]

śraddhāvanto dayāvantaścokṣāścokṣajanapriyāḥ |
dharmādharmavido nityaṃ te narāḥ svargagāminaḥ || 36 ||
[Analyze grammar]

śubhānāmaśubhānāṃ ca karmaṇāṃ phalasaṃcaye |
vipākajñāśca ye devi te narāḥ svargagāminaḥ || 37 ||
[Analyze grammar]

nyāyopetā guṇopetā devadvijaparāḥ sadā |
samatāṃ samanuprāptāste narāḥ svargagāminaḥ || 38 ||
[Analyze grammar]

śubhaiḥ karmaphalairdevi mayaite parikīrtitāḥ |
svargamārgopagā bhūyaḥ kimanyacchrotumicchasi || 39 ||
[Analyze grammar]

umovāca |
mahānme saṃśayaḥ kaścinmartyānprati maheśvara |
tasmāttaṃ naipuṇenādya mamākhyātuṃ tvamarhasi || 40 ||
[Analyze grammar]

kenāyurlabhate dīrghaṃ karmaṇā puruṣaḥ prabho |
tapasā vāpi deveśa kenāyurlabhate mahat || 41 ||
[Analyze grammar]

kṣīṇāyuḥ kena bhavati karmaṇā bhuvi mānavaḥ |
vipākaṃ karmaṇāṃ deva vaktumarhasyanindita || 42 ||
[Analyze grammar]

apare ca mahābhogā mandabhogāstathāpare |
akulīnāstathā cānye kulīnāśca tathāpare || 43 ||
[Analyze grammar]

durdarśāḥ kecidābhānti narāḥ kāṣṭhamayā iva |
priyadarśāstathā cānye darśanādeva mānavāḥ || 44 ||
[Analyze grammar]

duṣprajñāḥ kecidābhānti kecidābhānti paṇḍitāḥ |
mahāprajñāstathaivānye jñānavijñānadarśinaḥ || 45 ||
[Analyze grammar]

alpābādhāstathā kecinmahābādhāstathāpare |
dṛśyante puruṣā deva tanme śaṃsitumarhasi || 46 ||
[Analyze grammar]

maheśvara uvāca |
hanta te'haṃ pravakṣyāmi devi karmaphalodayam |
martyaloke narāḥ sarve yena svaṃ bhuñjate phalam || 47 ||
[Analyze grammar]

prāṇātipātī yo raudro daṇḍahastodyatastathā |
nityamudyatadaṇḍaśca hanti bhūtagaṇānnaraḥ || 48 ||
[Analyze grammar]

nirdayaḥ sarvabhūtānāṃ nityamudvegakārakaḥ |
api kīṭapipīlānāmaśaraṇyaḥ sunirghṛṇaḥ || 49 ||
[Analyze grammar]

evaṃbhūto naro devi nirayaṃ pratipadyate |
viparītastu dharmātmā rūpavānabhijāyate || 50 ||
[Analyze grammar]

nirayaṃ yāti hiṃsātmā yāti svargamahiṃsakaḥ |
yātanāṃ niraye raudrāṃ sa kṛcchrāṃ labhate naraḥ || 51 ||
[Analyze grammar]

atha cennirayāttasmātsamuttarati karhicit |
mānuṣyaṃ labhate cāpi hīnāyustatra jāyate || 52 ||
[Analyze grammar]

pāpena karmaṇā devi baddho hiṃsāratirnaraḥ |
apriyaḥ sarvabhūtānāṃ hīnāyurupajāyate || 53 ||
[Analyze grammar]

yastu śuklābhijātīyaḥ prāṇighātavivarjakaḥ |
nikṣiptadaṇḍo nirdaṇḍo na hinasti kadācana || 54 ||
[Analyze grammar]

na ghātayati no hanti ghnantaṃ naivānumodate |
sarvabhūteṣu sasneho yathātmani tathāpare || 55 ||
[Analyze grammar]

īdṛśaḥ puruṣotkarṣo devi devatvamaśnute |
upapannānsukhānbhogānupāśnāti mudā yutaḥ || 56 ||
[Analyze grammar]

atha cenmānuṣe loke kadācidupapadyate |
tatra dīrghāyurutpannaḥ sa naraḥ sukhamedhate || 57 ||
[Analyze grammar]

evaṃ dīrghāyuṣāṃ mārgaḥ suvṛttānāṃ sukarmaṇām |
prāṇihiṃsāvimokṣeṇa brahmaṇā samudīritaḥ || 58 ||
[Analyze grammar]