Chapter 312

bhīṣma uvāca |
sa mokṣamanucintyaiva śukaḥ pitaramabhyagāt |
prāhābhivādya ca guruṃ śreyorthī vinayānvitaḥ || 1 ||
[Analyze grammar]

mokṣadharmeṣu kuśalo bhagavānprabravītu me |
yathā me manasaḥ śāntiḥ paramā saṃbhavetprabho || 2 ||
[Analyze grammar]

śrutvā putrasya vacanaṃ paramarṣiruvāca tam |
adhīṣva putra mokṣaṃ vai dharmāṃśca vividhānapi || 3 ||
[Analyze grammar]

piturniyogājjagrāha śuko brahmavidāṃ varaḥ |
yogaśāstraṃ ca nikhilaṃ kāpilaṃ caiva bhārata || 4 ||
[Analyze grammar]

sa taṃ brāhmyā śriyā yuktaṃ brahmatulyaparākramam |
mene putraṃ yadā vyāso mokṣavidyāviśāradam || 5 ||
[Analyze grammar]

uvāca gaccheti tadā janakaṃ mithileśvaram |
sa te vakṣyati mokṣārthaṃ nikhilena viśeṣataḥ || 6 ||
[Analyze grammar]

piturniyogādagamanmaithilaṃ janakaṃ nṛpam |
praṣṭuṃ dharmasya niṣṭhāṃ vai mokṣasya ca parāyaṇam || 7 ||
[Analyze grammar]

uktaśca mānuṣeṇa tvaṃ pathā gacchetyavismitaḥ |
na prabhāveṇa gantavyamantarikṣacareṇa vai || 8 ||
[Analyze grammar]

ārjaveṇaiva gantavyaṃ na sukhānveṣiṇā pathā |
nānveṣṭavyā viśeṣāstu viśeṣā hi prasaṅginaḥ || 9 ||
[Analyze grammar]

ahaṃkāro na kartavyo yājye tasminnarādhipe |
sthātavyaṃ ca vaśe tasya sa te chetsyati saṃśayam || 10 ||
[Analyze grammar]

sa dharmakuśalo rājā mokṣaśāstraviśāradaḥ |
yājyo mama sa yadbrūyāttatkāryamaviśaṅkayā || 11 ||
[Analyze grammar]

evamuktaḥ sa dharmātmā jagāma mithilāṃ muniḥ |
padbhyāṃ śakto'ntarikṣeṇa krāntuṃ bhūmiṃ sasāgarām || 12 ||
[Analyze grammar]

sa girīṃścāpyatikramya nadīstīrtvā sarāṃsi ca |
bahuvyālamṛgākīrṇā vividhāścāṭavīstathā || 13 ||
[Analyze grammar]

merorhareśca dve varṣe varṣaṃ haimavataṃ tathā |
krameṇaiva vyatikramya bhārataṃ varṣamāsadat || 14 ||
[Analyze grammar]

sa deśānvividhānpaśyaṃścīnahūṇaniṣevitān |
āryāvartamimaṃ deśamājagāma mahāmuniḥ || 15 ||
[Analyze grammar]

piturvacanamājñāya tamevārthaṃ vicintayan |
adhvānaṃ so'ticakrāma khe'caraḥ khe caranniva || 16 ||
[Analyze grammar]

pattanāni ca ramyāṇi sphītāni nagarāṇi ca |
ratnāni ca vicitrāṇi śukaḥ paśyanna paśyati || 17 ||
[Analyze grammar]

udyānāni ca ramyāṇi tathaivāyatanāni ca |
puṇyāni caiva tīrthāni so'tikramya tathādhvanaḥ || 18 ||
[Analyze grammar]

so'cireṇaiva kālena videhānāsasāda ha |
rakṣitāndharmarājena janakena mahātmanā || 19 ||
[Analyze grammar]

tatra grāmānbahūnpaśyanbahvannarasabhojanān |
pallīghoṣānsamṛddhāṃśca bahugokulasaṃkulān || 20 ||
[Analyze grammar]

sphītāṃśca śāliyavasairhaṃsasārasasevitān |
padminībhiśca śataśaḥ śrīmatībhiralaṃkṛtān || 21 ||
[Analyze grammar]

sa videhānatikramya samṛddhajanasevitān |
mithilopavanaṃ ramyamāsasāda maharddhimat || 22 ||
[Analyze grammar]

hastyaśvarathasaṃkīrṇaṃ naranārīsamākulam |
paśyannapaśyanniva tatsamatikrāmadacyutaḥ || 23 ||
[Analyze grammar]

manasā taṃ vahanbhāraṃ tamevārthaṃ vicintayan |
ātmārāmaḥ prasannātmā mithilāmāsasāda ha || 24 ||
[Analyze grammar]

tasyā dvāraṃ samāsādya dvārapālairnivāritaḥ |
sthito dhyānaparo mukto viditaḥ praviveśa ha || 25 ||
[Analyze grammar]

sa rājamārgamāsādya samṛddhajanasaṃkulam |
pārthivakṣayamāsādya niḥśaṅkaḥ praviveśa ha || 26 ||
[Analyze grammar]

tatrāpi dvārapālāstamugravāco nyaṣedhayan |
tathaiva ca śukastatra nirmanyuḥ samatiṣṭhata || 27 ||
[Analyze grammar]

na cātapādhvasaṃtaptaḥ kṣutpipāsāśramānvitaḥ |
pratāmyati glāyati vā nāpaiti ca tathātapāt || 28 ||
[Analyze grammar]

teṣāṃ tu dvārapālānāmekaḥ śokasamanvitaḥ |
madhyaṃgatamivādityaṃ dṛṣṭvā śukamavasthitam || 29 ||
[Analyze grammar]

pūjayitvā yathānyāyamabhivādya kṛtāñjaliḥ |
prāveśayattataḥ kakṣyāṃ dvitīyāṃ rājaveśmanaḥ || 30 ||
[Analyze grammar]

tatrāsīnaḥ śukastāta mokṣamevānucintayan |
chāyāyāmātape caiva samadarśī mahādyutiḥ || 31 ||
[Analyze grammar]

taṃ muhūrtādivāgamya rājño mantrī kṛtāñjaliḥ |
prāveśayattataḥ kakṣyāṃ tṛtīyāṃ rājaveśmanaḥ || 32 ||
[Analyze grammar]

tatrāntaḥpurasaṃbaddhaṃ mahaccaitrarathopamam |
suvibhaktajalākrīḍaṃ ramyaṃ puṣpitapādapam || 33 ||
[Analyze grammar]

taddarśayitvā sa śukaṃ mantrī kānanamuttamam |
arhamāsanamādiśya niścakrāma tataḥ punaḥ || 34 ||
[Analyze grammar]

taṃ cāruveṣāḥ suśroṇyastaruṇyaḥ priyadarśanāḥ |
sūkṣmaraktāmbaradharāstaptakāñcanabhūṣaṇāḥ || 35 ||
[Analyze grammar]

saṃlāpollāpakuśalā nṛttagītaviśāradāḥ |
smitapūrvābhibhāṣiṇyo rūpeṇāpsarasāṃ samāḥ || 36 ||
[Analyze grammar]

kāmopacārakuśalā bhāvajñāḥ sarvakovidāḥ |
paraṃ pañcāśato nāryo vāramukhyāḥ samādravan || 37 ||
[Analyze grammar]

pādyādīni pratigrāhya pūjayā parayārcya ca |
deśakālopapannena sādhvannenāpyatarpayan || 38 ||
[Analyze grammar]

tasya bhuktavatastāta tadantaḥpurakānanam |
suramyaṃ darśayāmāsurekaikaśyena bhārata || 39 ||
[Analyze grammar]

krīḍantyaśca hasantyaśca gāyantyaścaiva tāḥ śukam |
udārasattvaṃ sattvajñāḥ sarvāḥ paryacaraṃstadā || 40 ||
[Analyze grammar]

āraṇeyastu śuddhātmā trisaṃdehastrikarmakṛt |
vaśyendriyo jitakrodho na hṛṣyati na kupyati || 41 ||
[Analyze grammar]

tasmai śayyāsanaṃ divyaṃ varārhaṃ ratnabhūṣitam |
spardhyāstaraṇasaṃstīrṇaṃ dadustāḥ paramastriyaḥ || 42 ||
[Analyze grammar]

pādaśaucaṃ tu kṛtvaiva śukaḥ saṃdhyāmupāsya ca |
niṣasādāsane puṇye tamevārthaṃ vicintayan || 43 ||
[Analyze grammar]

pūrvarātre tu tatrāsau bhūtvā dhyānaparāyaṇaḥ |
madhyarātre yathānyāyaṃ nidrāmāhārayatprabhuḥ || 44 ||
[Analyze grammar]

tato muhūrtādutthāya kṛtvā śaucamanantaram |
strībhiḥ parivṛto dhīmāndhyānamevānvapadyata || 45 ||
[Analyze grammar]

anena vidhinā kārṣṇistadahaḥśeṣamacyutaḥ |
tāṃ ca rātriṃ nṛpakule vartayāmāsa bhārata || 46 ||
[Analyze grammar]