Chapter 286

parāśara uvāca |
pitā sakhāyo guravaḥ striyaśca na nirguṇā nāma bhavanti loke |
ananyabhaktāḥ priyavādinaśca hitāśca vaśyāśca tathaiva rājan || 1 ||
[Analyze grammar]

pitā paraṃ daivataṃ mānavānāṃ māturviśiṣṭaṃ pitaraṃ vadanti |
jñānasya lābhaṃ paramaṃ vadanti jitendriyārthāḥ paramāpnuvanti || 2 ||
[Analyze grammar]

raṇājire yatra śarāgnisaṃstare nṛpātmajo ghātamavāpya dahyate |
prayāti lokānamaraiḥ sudurlabhānniṣevate svargaphalaṃ yathāsukham || 3 ||
[Analyze grammar]

śrāntaṃ bhītaṃ bhraṣṭaśastraṃ rudantaṃ parāṅmukhaṃ paribarhaiśca hīnam |
anudyataṃ rogiṇaṃ yācamānaṃ na vai hiṃsyādbālavṛddhau ca rājan || 4 ||
[Analyze grammar]

paribarhaiḥ susaṃpannamudyataṃ tulyatāṃ gatam |
atikrameta nṛpatiḥ saṃgrāme kṣatriyātmajam || 5 ||
[Analyze grammar]

tulyādiha vadhaḥ śreyānviśiṣṭācceti niścayaḥ |
nihīnātkātarāccaiva nṛpāṇāṃ garhito vadhaḥ || 6 ||
[Analyze grammar]

pāpātpāpasamācārānnihīnācca narādhipa |
pāpa eva vadhaḥ prokto narakāyeti niścayaḥ || 7 ||
[Analyze grammar]

na kaścittrāti vai rājandiṣṭāntavaśamāgatam |
sāvaśeṣāyuṣaṃ cāpi kaścidevāpakarṣati || 8 ||
[Analyze grammar]

snigdhaiśca kriyamāṇāni karmāṇīha nivartayet |
hiṃsātmakāni karmāṇi nāyuricchetparāyuṣā || 9 ||
[Analyze grammar]

gṛhasthānāṃ tu sarveṣāṃ vināśamabhikāṅkṣatām |
nidhanaṃ śobhanaṃ tāta pulineṣu kriyāvatām || 10 ||
[Analyze grammar]

āyuṣi kṣayamāpanne pañcatvamupagacchati |
nākāraṇāttadbhavati kāraṇairupapāditam || 11 ||
[Analyze grammar]

tathā śarīraṃ bhavati dehādyenopapāditam |
adhvānaṃ gatakaścāyaṃ prāptaścāyaṃ gṛhādgṛham || 12 ||
[Analyze grammar]

dvitīyaṃ kāraṇaṃ tatra nānyatkiṃcana vidyate |
taddehaṃ dehināṃ yuktaṃ mokṣabhūteṣu vartate || 13 ||
[Analyze grammar]

sirāsnāyvasthisaṃghātaṃ bībhatsāmedhyasaṃkulam |
bhūtānāmindriyāṇāṃ ca guṇānāṃ ca samāgamam || 14 ||
[Analyze grammar]

tvagantaṃ dehamityāhurvidvāṃso'dhyātmacintakāḥ |
guṇairapi parikṣīṇaṃ śarīraṃ martyatāṃ gatam || 15 ||
[Analyze grammar]

śarīriṇā parityaktaṃ niśceṣṭaṃ gatacetanam |
bhūtaiḥ prakṛtimāpannaistato bhūmau nimajjati || 16 ||
[Analyze grammar]

bhāvitaṃ karmayogena jāyate tatra tatra ha |
idaṃ śarīraṃ vaideha mriyate yatra tatra ha |
tatsvabhāvo'paro dṛṣṭo visargaḥ karmaṇastathā || 17 ||
[Analyze grammar]

na jāyate tu nṛpate kaṃcitkālamayaṃ punaḥ |
paribhramati bhūtātmā dyāmivāmbudharo mahān || 18 ||
[Analyze grammar]

sa punarjāyate rājanprāpyehāyatanaṃ nṛpa |
manasaḥ paramo hyātmā indriyebhyaḥ paraṃ manaḥ || 19 ||
[Analyze grammar]

dvividhānāṃ ca bhūtānāṃ jaṅgamāḥ paramā nṛpa |
jaṅgamānāmapi tathā dvipadāḥ paramā matāḥ |
dvipadānāmapi tathā dvijā vai paramāḥ smṛtāḥ || 20 ||
[Analyze grammar]

dvijānāmapi rājendra prajñāvantaḥ parā matāḥ |
prājñānāmātmasaṃbuddhāḥ saṃbuddhānāmamāninaḥ || 21 ||
[Analyze grammar]

jātamanveti maraṇaṃ nṛṇāmiti viniścayaḥ |
antavanti hi karmāṇi sevante guṇataḥ prajāḥ || 22 ||
[Analyze grammar]

āpanne tūttarāṃ kāṣṭhāṃ sūrye yo nidhanaṃ vrajet |
nakṣatre ca muhūrte ca puṇye rājansa puṇyakṛt || 23 ||
[Analyze grammar]

ayojayitvā kleśena janaṃ plāvya ca duṣkṛtam |
mṛtyunāprākṛteneha karma kṛtvātmaśaktitaḥ || 24 ||
[Analyze grammar]

viṣamudbandhanaṃ dāho dasyuhastāttathā vadhaḥ |
daṃṣṭribhyaśca paśubhyaśca prākṛto vadha ucyate || 25 ||
[Analyze grammar]

na caibhiḥ puṇyakarmāṇo yujyante nābhisaṃdhijaiḥ |
evaṃvidhaiśca bahubhiraparaiḥ prākṛtairapi || 26 ||
[Analyze grammar]

ūrdhvaṃ hitvā pratiṣṭhante prāṇāḥ puṇyakṛtāṃ nṛpa |
madhyato madhyapuṇyānāmadho duṣkṛtakarmaṇām || 27 ||
[Analyze grammar]

ekaḥ śatrurna dvitīyo'sti śatrurajñānatulyaḥ puruṣasya rājan |
yenāvṛtaḥ kurute saṃprayukto ghorāṇi karmāṇi sudāruṇāni || 28 ||
[Analyze grammar]

prabodhanārthaṃ śrutidharmayuktaṃ vṛddhānupāsyaṃ ca bhaveta yasya |
prayatnasādhyo hi sa rājaputra prajñāśareṇonmathitaḥ paraiti || 29 ||
[Analyze grammar]

adhītya vedāṃstapasā brahmacārī yajñāñśaktyā saṃnisṛjyeha pañca |
vanaṃ gacchetpuruṣo dharmakāmaḥ śreyaścitvā sthāpayitvā svavaṃśam || 30 ||
[Analyze grammar]

upabhogairapi tyaktaṃ nātmānamavasādayet |
caṇḍālatve'pi mānuṣyaṃ sarvathā tāta durlabham || 31 ||
[Analyze grammar]

iyaṃ hi yoniḥ prathamā yāṃ prāpya jagatīpate |
ātmā vai śakyate trātuṃ karmabhiḥ śubhalakṣaṇaiḥ || 32 ||
[Analyze grammar]

kathaṃ na vipraṇaśyema yonito'syā iti prabho |
kurvanti dharmaṃ manujāḥ śrutiprāmāṇyadarśanāt || 33 ||
[Analyze grammar]

yo durlabhataraṃ prāpya mānuṣyamiha vai naraḥ |
dharmāvamantā kāmātmā bhavetsa khalu vañcyate || 34 ||
[Analyze grammar]

yastu prītipurogeṇa cakṣuṣā tāta paśyati |
dīpopamāni bhūtāni yāvadarcirna naśyati || 35 ||
[Analyze grammar]

sāntvenānupradānena priyavādena cāpyuta |
samaduḥkhasukho bhūtvā sa paratra mahīyate || 36 ||
[Analyze grammar]

dānaṃ tyāgaḥ śobhanā mūrtiradbhyo bhūyaḥ plāvyaṃ tapasā vai śarīram |
sarasvatīnaimiṣapuṣkareṣu ye cāpyanye puṇyadeśāḥ pṛthivyām || 37 ||
[Analyze grammar]

gṛheṣu yeṣāmasavaḥ patanti teṣāmatho nirharaṇaṃ praśastam |
yānena vai prāpaṇaṃ ca śmaśāne śaucena nūnaṃ vidhinā caiva dāhaḥ || 38 ||
[Analyze grammar]

iṣṭiḥ puṣṭiryajanaṃ yājanaṃ ca dānaṃ puṇyānāṃ karmaṇāṃ ca prayogaḥ |
śaktyā pitryaṃ yacca kiṃcitpraśastaṃ sarvāṇyātmārthe mānavo yaḥ karoti || 39 ||
[Analyze grammar]

dharmaśāstrāṇi vedāśca ṣaḍaṅgāni narādhipa |
śreyaso'rthe vidhīyante narasyākliṣṭakarmaṇaḥ || 40 ||
[Analyze grammar]

bhīṣma uvāca |
etadvai sarvamākhyātaṃ muninā sumahātmanā |
videharājāya purā śreyaso'rthe narādhipa || 41 ||
[Analyze grammar]