Chapter 211

yudhiṣṭhira uvāca |
kena vṛttena vṛttajño janako mithilādhipaḥ |
jagāma mokṣaṃ dharmajño bhogānutsṛjya mānuṣān || 1 ||
[Analyze grammar]

bhīṣma uvāca |
atrāpyudāharantīmamitihāsaṃ purātanam |
yena vṛttena vṛttajñaḥ sa jagāma mahatsukham || 2 ||
[Analyze grammar]

janako janadevastu mithilāyāṃ janādhipaḥ |
aurdhvadehikadharmāṇāmāsīdyukto vicintane || 3 ||
[Analyze grammar]

tasya sma śatamācāryā vasanti satataṃ gṛhe |
darśayantaḥ pṛthagdharmānnānāpāṣaṇḍavādinaḥ || 4 ||
[Analyze grammar]

sa teṣāṃ pretyabhāve ca pretyajātau viniścaye |
āgamasthaḥ sa bhūyiṣṭhamātmatattve na tuṣyati || 5 ||
[Analyze grammar]

tatra pañcaśikho nāma kāpileyo mahāmuniḥ |
paridhāvanmahīṃ kṛtsnāṃ jagāma mithilāmapi || 6 ||
[Analyze grammar]

sarvasaṃnyāsadharmāṇāṃ tattvajñānaviniścaye |
suparyavasitārthaśca nirdvaṃdvo naṣṭasaṃśayaḥ || 7 ||
[Analyze grammar]

ṛṣīṇāmāhurekaṃ yaṃ kāmādavasitaṃ nṛṣu |
śāśvataṃ sukhamatyantamanvicchansa sudurlabham || 8 ||
[Analyze grammar]

yamāhuḥ kapilaṃ sāṃkhyāḥ paramarṣiṃ prajāpatim |
sa manye tena rūpeṇa vismāpayati hi svayam || 9 ||
[Analyze grammar]

āsureḥ prathamaṃ śiṣyaṃ yamāhuścirajīvinam |
pañcasrotasi yaḥ satramāste varṣasahasrikam || 10 ||
[Analyze grammar]

taṃ samāsīnamāgamya maṇḍalaṃ kāpilaṃ mahat |
puruṣāvasthamavyaktaṃ paramārthaṃ nibodhayat || 11 ||
[Analyze grammar]

iṣṭisatreṇa saṃsiddho bhūyaśca tapasā muniḥ |
kṣetrakṣetrajñayorvyaktiṃ bubudhe devadarśanaḥ || 12 ||
[Analyze grammar]

yattadekākṣaraṃ brahma nānārūpaṃ pradṛśyate |
āsurirmaṇḍale tasminpratipede tadavyayam || 13 ||
[Analyze grammar]

tasya pañcaśikhaḥ śiṣyo mānuṣyā payasā bhṛtaḥ |
brāhmaṇī kapilā nāma kācidāsītkuṭumbinī || 14 ||
[Analyze grammar]

tasyāḥ putratvamāgamya striyāḥ sa pibati stanau |
tataḥ sa kāpileyatvaṃ lebhe buddhiṃ ca naiṣṭhikīm || 15 ||
[Analyze grammar]

etanme bhagavānāha kāpileyāya saṃbhavam |
tasya tatkāpileyatvaṃ sarvavittvamanuttamam || 16 ||
[Analyze grammar]

sāmānyaṃ kapilo jñātvā dharmajñānāmanuttamam |
upetya śatamācāryānmohayāmāsa hetubhiḥ || 17 ||
[Analyze grammar]

janakastvabhisaṃraktaḥ kāpileyānudarśanāt |
utsṛjya śatamācāryānpṛṣṭhato'nujagāma tam || 18 ||
[Analyze grammar]

tasmai paramakalyāya praṇatāya ca dharmataḥ |
abravītparamaṃ mokṣaṃ yattatsāṃkhyaṃ vidhīyate || 19 ||
[Analyze grammar]

jātinirvedamuktvā hi karmanirvedamabravīt |
karmanirvedamuktvā ca sarvanirvedamabravīt || 20 ||
[Analyze grammar]

yadarthaṃ karmasaṃsargaḥ karmaṇāṃ ca phalodayaḥ |
tadanāśvāsikaṃ moghaṃ vināśi calamadhruvam || 21 ||
[Analyze grammar]

dṛśyamāne vināśe ca pratyakṣe lokasākṣike |
āgamātparamastīti bruvannapi parājitaḥ || 22 ||
[Analyze grammar]

anātmā hyātmano mṛtyuḥ kleśo mṛtyurjarāmayaḥ |
ātmānaṃ manyate mohāttadasamyakparaṃ matam || 23 ||
[Analyze grammar]

atha cedevamapyasti yalloke nopapadyate |
ajaro'yamamṛtyuśca rājāsau manyate tathā || 24 ||
[Analyze grammar]

asti nāstīti cāpyetattasminnasati lakṣaṇe |
kimadhiṣṭhāya tadbrūyāllokayātrāviniścayam || 25 ||
[Analyze grammar]

pratyakṣaṃ hyetayormūlaṃ kṛtāntaitihyayorapi |
pratyakṣo hyāgamo'bhinnaḥ kṛtānto vā na kiṃcana || 26 ||
[Analyze grammar]

yatra tatrānumāne'sti kṛtaṃ bhāvayate'pi vā |
anyo jīvaḥ śarīrasya nāstikānāṃ mate smṛtaḥ || 27 ||
[Analyze grammar]

reto vaṭakaṇīkāyāṃ ghṛtapākādhivāsanam |
jātismṛtirayaskāntaḥ sūryakānto'mbubhakṣaṇam || 28 ||
[Analyze grammar]

pretya bhūtātyayaścaiva devatābhyupayācanam |
mṛte karmanivṛttiśca pramāṇamiti niścayaḥ || 29 ||
[Analyze grammar]

na tvete hetavaḥ santi ye kecinmūrtisaṃsthitāḥ |
amartyasya hi martyena sāmānyaṃ nopapadyate || 30 ||
[Analyze grammar]

avidyākarmaceṣṭānāṃ kecidāhuḥ punarbhavam |
kāraṇaṃ lobhamohau tu doṣāṇāṃ ca niṣevaṇam || 31 ||
[Analyze grammar]

avidyāṃ kṣetramāhurhi karma bījaṃ tathā kṛtam |
tṛṣṇāsaṃjananaṃ sneha eṣa teṣāṃ punarbhavaḥ || 32 ||
[Analyze grammar]

tasminvyūḍhe ca dagdhe ca citte maraṇadharmiṇi |
anyo'nyājjāyate dehastamāhuḥ sattvasaṃkṣayam || 33 ||
[Analyze grammar]

yadā sa rūpataścānyo jātitaḥ śrutito'rthataḥ |
kathamasminsa ityeva saṃbandhaḥ syādasaṃhitaḥ || 34 ||
[Analyze grammar]

evaṃ sati ca kā prītirdānavidyātapobalaiḥ |
yadanyācaritaṃ karma sarvamanyaḥ prapadyate || 35 ||
[Analyze grammar]

yadā hyayamihaivānyaiḥ prākṛtairduḥkhito bhavet |
sukhitairduḥkhitairvāpi dṛśyo'pyasya vinirṇayaḥ || 36 ||
[Analyze grammar]

tathā hi musalairhanyuḥ śarīraṃ tatpunarbhavet |
pṛthagjñānaṃ yadanyacca yenaitannopalabhyate || 37 ||
[Analyze grammar]

ṛtuḥ saṃvatsarastithyaḥ śītoṣṇe ca priyāpriye |
yathātītāni paśyanti tādṛśaḥ sattvasaṃkṣayaḥ || 38 ||
[Analyze grammar]

jarayā hi parītasya mṛtyunā vā vināśinā |
durbalaṃ durbalaṃ pūrvaṃ gṛhasyeva vinaśyati || 39 ||
[Analyze grammar]

indriyāṇi mano vāyuḥ śoṇitaṃ māṃsamasthi ca |
ānupūrvyā vinaśyanti svaṃ dhātumupayānti ca || 40 ||
[Analyze grammar]

lokayātrāvidhānaṃ ca dānadharmaphalāgamaḥ |
yadarthaṃ vedaśabdāśca vyavahārāśca laukikāḥ || 41 ||
[Analyze grammar]

iti samyaṅmanasyete bahavaḥ santi hetavaḥ |
etadastīdamastīti na kiṃcitpratipadyate || 42 ||
[Analyze grammar]

teṣāṃ vimṛśatāmevaṃ tattatsamabhidhāvatām |
kvacinniviśate buddhistatra jīryati vṛkṣavat || 43 ||
[Analyze grammar]

evamarthairanarthaiśca duḥkhitāḥ sarvajantavaḥ |
āgamairapakṛṣyante hastipairhastino yathā || 44 ||
[Analyze grammar]

arthāṃstathātyantasukhāvahāṃśca lipsanta ete bahavo viśulkāḥ |
mahattaraṃ duḥkhamabhiprapannā hitvāmiṣaṃ mṛtyuvaśaṃ prayānti || 45 ||
[Analyze grammar]

vināśino hyadhruvajīvitasya kiṃ bandhubhirmitraparigrahaiśca |
vihāya yo gacchati sarvameva kṣaṇena gatvā na nivartate ca || 46 ||
[Analyze grammar]

bhūvyomatoyānalavāyavo hi sadā śarīraṃ paripālayanti |
itīdamālakṣya kuto ratirbhavedvināśino hyasya na śarma vidyate || 47 ||
[Analyze grammar]

idamanupadhi vākyamacchalaṃ paramanirāmayamātmasākṣikam |
narapatirabhivīkṣya vismitaḥ punaranuyoktumidaṃ pracakrame || 48 ||
[Analyze grammar]