Chapter 212

bhīṣma uvāca |
janako janadevastu jñāpitaḥ paramarṣiṇā |
punarevānupapraccha sāṃparāye bhavābhavau || 1 ||
[Analyze grammar]

bhagavanyadidaṃ pretya saṃjñā bhavati kasyacit |
evaṃ sati kimajñānaṃ jñānaṃ vā kiṃ kariṣyati || 2 ||
[Analyze grammar]

sarvamucchedaniṣṭhaṃ syātpaśya caitaddvijottama |
apramattaḥ pramatto vā kiṃ viśeṣaṃ kariṣyati || 3 ||
[Analyze grammar]

asaṃsargo hi bhūteṣu saṃsargo vā vināśiṣu |
kasmai kriyeta kalpena niścayaḥ ko'tra tattvataḥ || 4 ||
[Analyze grammar]

tamasā hi praticchannaṃ vibhrāntamiva cāturam |
punaḥ praśamayanvākyaiḥ kaviḥ pañcaśikho'bravīt || 5 ||
[Analyze grammar]

ucchedaniṣṭhā nehāsti bhāvaniṣṭhā na vidyate |
ayaṃ hyapi samāhāraḥ śarīrendriyacetasām |
vartate pṛthaganyonyamapyapāśritya karmasu || 6 ||
[Analyze grammar]

dhātavaḥ pañcaśākho'yaṃ khaṃ vāyurjyotirambu bhūḥ |
te svabhāvena tiṣṭhanti viyujyante svabhāvataḥ || 7 ||
[Analyze grammar]

ākāśaṃ vāyurūṣmā ca sneho yaccāpi pārthivam |
eṣa pañcasamāhāraḥ śarīramiti naikadhā |
jñānamūṣmā ca vāyuśca trividhaḥ karmasaṃgrahaḥ || 8 ||
[Analyze grammar]

indriyāṇīndriyārthāśca svabhāvaścetanā manaḥ |
prāṇāpānau vikāraśca dhātavaścātra niḥsṛtāḥ || 9 ||
[Analyze grammar]

śravaṇaṃ sparśanaṃ jihvā dṛṣṭirnāsā tathaiva ca |
indriyāṇīti pañcaite cittapūrvaṃgamā guṇāḥ || 10 ||
[Analyze grammar]

tatra vijñānasaṃyuktā trividhā vedanā dhruvā |
sukhaduḥkheti yāmāhuraduḥkhetyasukheti ca || 11 ||
[Analyze grammar]

śabdaḥ sparśaśca rūpaṃ ca raso gandhaśca mūrtyatha |
ete hyāmaraṇātpañca ṣaḍguṇā jñānasiddhaye || 12 ||
[Analyze grammar]

teṣu karmanisargaśca sarvatattvārthaniścayaḥ |
tamāhuḥ paramaṃ śukraṃ buddhirityavyayaṃ mahat || 13 ||
[Analyze grammar]

imaṃ guṇasamāhāramātmabhāvena paśyataḥ |
asamyagdarśanairduḥkhamanantaṃ nopaśāmyati || 14 ||
[Analyze grammar]

anātmeti ca yaddṛṣṭaṃ tenāhaṃ na mametyapi |
vartate kimadhiṣṭhānā prasaktā duḥkhasaṃtatiḥ || 15 ||
[Analyze grammar]

tatra samyaṅmano nāma tyāgaśāstramanuttamam |
śṛṇu yattava mokṣāya bhāṣyamāṇaṃ bhaviṣyati || 16 ||
[Analyze grammar]

tyāga eva hi sarveṣāmuktānāmapi karmaṇām |
nityaṃ mithyāvinītānāṃ kleśo duḥkhāvaho mataḥ || 17 ||
[Analyze grammar]

dravyatyāge tu karmāṇi bhogatyāge vratānyapi |
sukhatyāge tapoyogaḥ sarvatyāge samāpanā || 18 ||
[Analyze grammar]

tasya mārgo'yamadvaidhaḥ sarvatyāgasya darśitaḥ |
viprahāṇāya duḥkhasya durgatirhyanyathā bhavet || 19 ||
[Analyze grammar]

pañca jñānendriyāṇyuktvā manaḥṣaṣṭhāni cetasi |
manaḥṣaṣṭhāni vakṣyāmi pañca karmendriyāṇi tu || 20 ||
[Analyze grammar]

hastau karmendriyaṃ jñeyamatha pādau gatīndriyam |
prajanānandayoḥ śepho visarge pāyurindriyam || 21 ||
[Analyze grammar]

vāktu śabdaviśeṣārthaṃ gatiṃ pañcānvitāṃ viduḥ |
evamekādaśaitāni buddhyā tvavasṛjenmanaḥ || 22 ||
[Analyze grammar]

karṇau śabdaśca cittaṃ ca trayaḥ śravaṇasaṃgrahe |
tathā sparśe tathā rūpe tathaiva rasagandhayoḥ || 23 ||
[Analyze grammar]

evaṃ pañcatrikā hyete guṇāstadupalabdhaye |
yena yastrividho bhāvaḥ paryāyātsamupasthitaḥ || 24 ||
[Analyze grammar]

sāttviko rājasaścaiva tāmasaścaiva te trayaḥ |
trividhā vedanā yeṣu prasūtā sarvasādhanā || 25 ||
[Analyze grammar]

praharṣaḥ prītirānandaḥ sukhaṃ saṃśāntacittatā |
akutaścitkutaścidvā cittataḥ sāttviko guṇaḥ || 26 ||
[Analyze grammar]

atuṣṭiḥ paritāpaśca śoko lobhastathākṣamā |
liṅgāni rajasastāni dṛśyante hetvahetutaḥ || 27 ||
[Analyze grammar]

avivekastathā mohaḥ pramādaḥ svapnatandritā |
kathaṃcidapi vartante vividhāstāmasā guṇāḥ || 28 ||
[Analyze grammar]

tatra yatprītisaṃyuktaṃ kāye manasi vā bhavet |
vartate sāttviko bhāva ityapekṣeta tattathā || 29 ||
[Analyze grammar]

yattu saṃtāpasaṃyuktamaprītikaramātmanaḥ |
pravṛttaṃ raja ityeva tatastadabhicintayet || 30 ||
[Analyze grammar]

atha yanmohasaṃyuktaṃ kāye manasi vā bhavet |
apratarkyamavijñeyaṃ tamastadupadhārayet || 31 ||
[Analyze grammar]

taddhi śrotrāśrayaṃ bhūtaṃ śabdaḥ śrotraṃ samāśritaḥ |
nobhayaṃ śabdavijñāne vijñānasyetarasya vā || 32 ||
[Analyze grammar]

evaṃ tvakcakṣuṣī jihvā nāsikā caiva pañcamī |
sparśe rūpe rase gandhe tāni ceto manaśca tat || 33 ||
[Analyze grammar]

svakarmayugapadbhāvo daśasveteṣu tiṣṭhati |
cittamekādaśaṃ viddhi buddhirdvādaśamī bhavet || 34 ||
[Analyze grammar]

teṣāmayugapadbhāva ucchedo nāsti tāmasaḥ |
āsthito yugapadbhāve vyavahāraḥ sa laukikaḥ || 35 ||
[Analyze grammar]

indriyāṇyavasṛjyāpi dṛṣṭvā pūrvaṃ śrutāgamam |
cintayannānuparyeti tribhirevānvito guṇaiḥ || 36 ||
[Analyze grammar]

yattamopahataṃ cittamāśu saṃcāramadhruvam |
karotyuparamaṃ kāle tadāhustāmasaṃ sukham || 37 ||
[Analyze grammar]

yadyadāgamasaṃyuktaṃ na kṛtsnamupaśāmyati |
atha tatrāpyupādatte tamo vyaktamivānṛtam || 38 ||
[Analyze grammar]

evameṣa prasaṃkhyātaḥ svakarmapratyayī guṇaḥ |
kathaṃcidvartate samyakkeṣāṃcidvā na vartate || 39 ||
[Analyze grammar]

evamāhuḥ samāhāraṃ kṣetramadhyātmacintakāḥ |
sthito manasi yo bhāvaḥ sa vai kṣetrajña ucyate || 40 ||
[Analyze grammar]

evaṃ sati ka ucchedaḥ śāśvato vā kathaṃ bhavet |
svabhāvādvartamāneṣu sarvabhūteṣu hetutaḥ || 41 ||
[Analyze grammar]

yathārṇavagatā nadyo vyaktīrjahati nāma ca |
na ca svatāṃ niyacchanti tādṛśaḥ sattvasaṃkṣayaḥ || 42 ||
[Analyze grammar]

evaṃ sati kutaḥ saṃjñā pretyabhāve punarbhavet |
pratisaṃmiśrite jīve gṛhyamāṇe ca madhyataḥ || 43 ||
[Analyze grammar]

imāṃ tu yo veda vimokṣabuddhimātmānamanvicchati cāpramattaḥ |
na lipyate karmaphalairaniṣṭaiḥ patraṃ bisasyeva jalena siktam || 44 ||
[Analyze grammar]

dṛḍhaiśca pāśairbahubhirvimuktaḥ prajānimittairapi daivataiśca |
yadā hyasau sukhaduḥkhe jahāti muktastadāgryāṃ gatimetyaliṅgaḥ |
śrutipramāṇāgamamaṅgalaiśca śete jarāmṛtyubhayādatītaḥ || 45 ||
[Analyze grammar]

kṣīṇe ca puṇye vigate ca pāpe tatonimitte ca phale vinaṣṭe |
alepamākāśamaliṅgamevamāsthāya paśyanti mahaddhyasaktāḥ || 46 ||
[Analyze grammar]

yathorṇanābhiḥ parivartamānastantukṣaye tiṣṭhati pātyamānaḥ |
tathā vimuktaḥ prajahāti duḥkhaṃ vidhvaṃsate loṣṭa ivādrimarcchan || 47 ||
[Analyze grammar]

yathā ruruḥ śṛṅgamatho purāṇaṃ hitvā tvacaṃ vāpyurago yathāvat |
vihāya gacchatyanavekṣamāṇastathā vimukto vijahāti duḥkham || 48 ||
[Analyze grammar]

drumaṃ yathā vāpyudake patantamutsṛjya pakṣī prapatatyasaktaḥ |
tathā hyasau sukhaduḥkhe vihāya muktaḥ parārdhyāṃ gatimetyaliṅgaḥ || 49 ||
[Analyze grammar]

api ca bhavati maithilena gītaṃ nagaramupāhitamagninābhivīkṣya |
na khalu mama tuṣo'pi dahyate'tra svayamidamāha kila sma bhūmipālaḥ || 50 ||
[Analyze grammar]

idamamṛtapadaṃ videharājaḥ svayamiha pañcaśikhena bhāṣyamāṇaḥ |
nikhilamabhisamīkṣya niścitārthaṃ paramasukhī vijahāra vītaśokaḥ || 51 ||
[Analyze grammar]

imaṃ hi yaḥ paṭhati vimokṣaniścayaṃ na hīyate satatamavekṣate tathā |
upadravānnānubhavatyaduḥkhitaḥ pramucyate kapilamivaitya maithilaḥ || 52 ||
[Analyze grammar]