Chapter 200

yudhiṣṭhira uvāca |
pitāmaha mahāprājña puṇḍarīkākṣamacyutam |
kartāramakṛtaṃ viṣṇuṃ bhūtānāṃ prabhavāpyayam || 1 ||
[Analyze grammar]

nārāyaṇaṃ hṛṣīkeśaṃ govindamaparājitam |
tattvena bharataśreṣṭha śrotumicchāmi keśavam || 2 ||
[Analyze grammar]

bhīṣma uvāca |
śruto'yamartho rāmasya jāmadagnyasya jalpataḥ |
nāradasya ca devarṣeḥ kṛṣṇadvaipāyanasya ca || 3 ||
[Analyze grammar]

asito devalastāta vālmīkiśca mahātapāḥ |
mārkaṇḍeyaśca govinde kathayatyadbhutaṃ mahat || 4 ||
[Analyze grammar]

keśavo bharataśreṣṭha bhagavānīśvaraḥ prabhuḥ |
puruṣaḥ sarvamityeva śrūyate bahudhā vibhuḥ || 5 ||
[Analyze grammar]

kiṃ tu yāni vidurloke brāhmaṇāḥ śārṅgadhanvanaḥ |
māhātmyāni mahābāho śṛṇu tāni yudhiṣṭhira || 6 ||
[Analyze grammar]

yāni cāhurmanuṣyendra ye purāṇavido janāḥ |
aśeṣeṇa hi govinde kīrtayiṣyāmi tānyaham || 7 ||
[Analyze grammar]

mahābhūtāni bhūtātmā mahātmā puruṣottamaḥ |
vāyurjyotistathā cāpaḥ khaṃ gāṃ caivānvakalpayat || 8 ||
[Analyze grammar]

sa dṛṣṭvā pṛthivīṃ caiva sarvabhūteśvaraḥ prabhuḥ |
apsveva śayanaṃ cakre mahātmā puruṣottamaḥ || 9 ||
[Analyze grammar]

sarvatejomayastasmiñśayānaḥ śayane śubhe |
so'grajaṃ sarvabhūtānāṃ saṃkarṣaṇamacintayat || 10 ||
[Analyze grammar]

āśrayaṃ sarvabhūtānāṃ manaseti viśuśruma |
sa dhārayati bhūtātmā ubhe bhūtabhaviṣyatī || 11 ||
[Analyze grammar]

tatastasminmahābāho prādurbhūte mahātmani |
bhāskarapratimaṃ divyaṃ nābhyāṃ padmamajāyata || 12 ||
[Analyze grammar]

sa tatra bhagavāndevaḥ puṣkare bhāsayandiśaḥ |
brahmā samabhavattāta sarvabhūtapitāmahaḥ || 13 ||
[Analyze grammar]

tasminnapi mahābāho prādurbhūte mahātmani |
tamasaḥ pūrvajo jajñe madhurnāma mahāsuraḥ || 14 ||
[Analyze grammar]

tamugramugrakarmāṇamugrāṃ buddhiṃ samāsthitam |
brahmaṇopacitiṃ kurvañjaghāna puruṣottamaḥ || 15 ||
[Analyze grammar]

tasya tāta vadhātsarve devadānavamānavāḥ |
madhusūdanamityāhurvṛṣabhaṃ sarvasātvatām || 16 ||
[Analyze grammar]

brahmā tu sasṛje putrānmānasāndakṣasaptamān |
marīcimatryaṅgirasau pulastyaṃ pulahaṃ kratum || 17 ||
[Analyze grammar]

marīciḥ kaśyapaṃ tāta putraṃ cāsṛjadagrajam |
mānasaṃ janayāmāsa taijasaṃ brahmasattamam || 18 ||
[Analyze grammar]

aṅguṣṭhādasṛjadbrahmā marīcerapi pūrvajam |
so'bhavadbharataśreṣṭha dakṣo nāma prajāpatiḥ || 19 ||
[Analyze grammar]

tasya pūrvamajāyanta daśa tisraśca bhārata |
prajāpaterduhitarastāsāṃ jyeṣṭhābhavadditiḥ || 20 ||
[Analyze grammar]

sarvadharmaviśeṣajñaḥ puṇyakīrtirmahāyaśāḥ |
mārīcaḥ kaśyapastāta sarvāsāmabhavatpatiḥ || 21 ||
[Analyze grammar]

utpādya tu mahābhāgastāsāmavarajā daśa |
dadau dharmāya dharmajño dakṣa eva prajāpatiḥ || 22 ||
[Analyze grammar]

dharmasya vasavaḥ putrā rudrāścāmitatejasaḥ |
viśvedevāśca sādhyāśca marutvantaśca bhārata || 23 ||
[Analyze grammar]

aparāstu yavīyasyastābhyo'nyāḥ saptaviṃśatiḥ |
somastāsāṃ mahābhāgaḥ sarvāsāmabhavatpatiḥ || 24 ||
[Analyze grammar]

itarāstu vyajāyanta gandharvāṃsturagāndvijān |
gāśca kiṃpuruṣānmatsyānaudbhidāṃśca vanaspatīn || 25 ||
[Analyze grammar]

ādityānaditirjajñe devaśreṣṭhānmahābalān |
teṣāṃ viṣṇurvāmano'bhūdgovindaścābhavatprabhuḥ || 26 ||
[Analyze grammar]

tasya vikramaṇādeva devānāṃ śrīrvyavardhata |
dānavāśca parābhūtā daiteyī cāsurī prajā || 27 ||
[Analyze grammar]

vipracittipradhānāṃśca dānavānasṛjaddanuḥ |
ditistu sarvānasurānmahāsattvānvyajāyata || 28 ||
[Analyze grammar]

ahorātraṃ ca kālaṃ ca yathartu madhusūdanaḥ |
pūrvāhṇaṃ cāparāhṇaṃ ca sarvamevānvakalpayat || 29 ||
[Analyze grammar]

buddhyāpaḥ so'sṛjanmeghāṃstathā sthāvarajaṅgamān |
pṛthivīṃ so'sṛjadviśvāṃ sahitāṃ bhūritejasā || 30 ||
[Analyze grammar]

tataḥ kṛṣṇo mahābāhuḥ punareva yudhiṣṭhira |
brāhmaṇānāṃ śataṃ śreṣṭhaṃ mukhādasṛjata prabhuḥ || 31 ||
[Analyze grammar]

bāhubhyāṃ kṣatriyaśataṃ vaiśyānāmūrutaḥ śatam |
padbhyāṃ śūdraśataṃ caiva keśavo bharatarṣabha || 32 ||
[Analyze grammar]

sa evaṃ caturo varṇānsamutpādya mahāyaśāḥ |
adhyakṣaṃ sarvabhūtānāṃ dhātāramakarotprabhuḥ || 33 ||
[Analyze grammar]

yāvadyāvadabhūcchraddhā dehaṃ dhārayituṃ nṛṇām |
tāvattāvadajīvaṃste nāsīdyamakṛtaṃ bhayam || 34 ||
[Analyze grammar]

na caiṣāṃ maithuno dharmo babhūva bharatarṣabha |
saṃkalpādeva caiteṣāmapatyamudapadyata || 35 ||
[Analyze grammar]

tatra tretāyuge kāle saṃkalpājjāyate prajā |
na hyabhūnmaithuno dharmasteṣāmapi janādhipa || 36 ||
[Analyze grammar]

dvāpare maithuno dharmaḥ prajānāmabhavannṛpa |
tathā kaliyuge rājandvaṃdvamāpedire janāḥ || 37 ||
[Analyze grammar]

eṣa bhūtapatistāta svadhyakṣaśca prakīrtitaḥ |
niradhyakṣāṃstu kaunteya kīrtayiṣyāmi tānapi || 38 ||
[Analyze grammar]

dakṣiṇāpathajanmānaḥ sarve talavarāndhrakāḥ |
utsāḥ pulindāḥ śabarāścūcupā maṇḍapaiḥ saha || 39 ||
[Analyze grammar]

uttarāpathajanmānaḥ kīrtayiṣyāmi tānapi |
yaunakāmbojagāndhārāḥ kirātā barbaraiḥ saha || 40 ||
[Analyze grammar]

ete pāpakṛtastāta caranti pṛthivīmimām |
śvakākabalagṛdhrāṇāṃ sadharmāṇo narādhipa || 41 ||
[Analyze grammar]

naite kṛtayuge tāta caranti pṛthivīmimām |
tretāprabhṛti vartante te janā bharatarṣabha || 42 ||
[Analyze grammar]

tatastasminmahāghore saṃdhyākāle yugāntike |
rājānaḥ samasajjanta samāsādyetaretaram || 43 ||
[Analyze grammar]

evameṣa kuruśreṣṭha prādurbhāvo mahātmanaḥ |
devadevarṣirācaṣṭa nāradaḥ sarvalokadṛk || 44 ||
[Analyze grammar]

nārado'pyatha kṛṣṇasya paraṃ mene narādhipa |
śāśvatatvaṃ mahābāho yathāvadbharatarṣabha || 45 ||
[Analyze grammar]

evameṣa mahābāhuḥ keśavaḥ satyavikramaḥ |
acintyaḥ puṇḍarīkākṣo naiṣa kevalamānuṣaḥ || 46 ||
[Analyze grammar]