Chapter 117

bhīṣma uvāca |
atrāpyudāharantīmamitihāsaṃ purātanam |
nidarśanakaraṃ loke sajjanācaritaṃ sadā || 1 ||
[Analyze grammar]

asyaivārthasya sadṛśaṃ yacchrutaṃ me tapovane |
jāmadagnyasya rāmasya yaduktamṛṣisattamaiḥ || 2 ||
[Analyze grammar]

vane mahati kasmiṃścidamanuṣyaniṣevite |
ṛṣirmūlaphalāhāro niyato niyatendriyaḥ || 3 ||
[Analyze grammar]

dīkṣādamaparaḥ śāntaḥ svādhyāyaparamaḥ śuciḥ |
upavāsaviśuddhātmā satataṃ satpathe sthitaḥ || 4 ||
[Analyze grammar]

tasya saṃdṛśya sadbhāvamupaviṣṭasya dhīmataḥ |
sarvasattvāḥ samīpasthā bhavanti vanacāriṇaḥ || 5 ||
[Analyze grammar]

siṃhavyāghrāḥ saśarabhā mattāścaiva mahāgajāḥ |
dvīpinaḥ khaḍgabhallūkā ye cānye bhīmadarśanāḥ || 6 ||
[Analyze grammar]

te sukhapraśnadāḥ sarve bhavanti kṣatajāśanāḥ |
tasyarṣeḥ śiṣyavaccaiva nyagbhūtāḥ priyakāriṇaḥ || 7 ||
[Analyze grammar]

dattvā ca te sukhapraśnaṃ sarve yānti yathāgatam |
grāmyastvekaḥ paśustatra nājahācchvā mahāmunim || 8 ||
[Analyze grammar]

bhakto'nuraktaḥ satatamupavāsakṛśo'balaḥ |
phalamūlotkarāhāraḥ śāntaḥ śiṣṭākṛtiryathā || 9 ||
[Analyze grammar]

tasyarṣerupaviṣṭasya pādamūle mahāmuneḥ |
manuṣyavadgato bhāvaḥ snehabaddho'bhavadbhṛśam || 10 ||
[Analyze grammar]

tato'bhyayānmahāvīryo dvīpī kṣatajabhojanaḥ |
śvārthamatyantasaṃduṣṭaḥ krūraḥ kāla ivāntakaḥ || 11 ||
[Analyze grammar]

lelihyamānastṛṣitaḥ pucchāsphoṭanatatparaḥ |
vyāditāsyaḥ kṣudhābhagnaḥ prārthayānastadāmiṣam || 12 ||
[Analyze grammar]

taṃ dṛṣṭvā krūramāyāntaṃ jīvitārthī narādhipa |
provāca śvā muniṃ tatra yattacchṛṇu mahāmate || 13 ||
[Analyze grammar]

śvaśatrurbhagavannatra dvīpī māṃ hantumicchati |
tvatprasādādbhayaṃ na syāttasmānmama mahāmune || 14 ||
[Analyze grammar]

muniruvāca |
na bhayaṃ dvīpinaḥ kāryaṃ mṛtyutaste kathaṃcana |
eṣa śvarūparahito dvīpī bhavasi putraka || 15 ||
[Analyze grammar]

bhīṣma uvāca |
tataḥ śvā dvīpitāṃ nīto jāmbūnadanibhākṛtiḥ |
citrāṅgo visphuranhṛṣṭo vane vasati nirbhayaḥ || 16 ||
[Analyze grammar]

tato'bhyayānmahāraudro vyāditāsyaḥ kṣudhānvitaḥ |
dvīpinaṃ lelihadvaktro vyāghro rudhiralālasaḥ || 17 ||
[Analyze grammar]

vyāghraṃ dṛṣṭvā kṣudhābhagnaṃ daṃṣṭriṇaṃ vanagocaram |
dvīpī jīvitarakṣārthamṛṣiṃ śaraṇameyivān || 18 ||
[Analyze grammar]

tataḥ saṃvāsajaṃ snehamṛṣiṇā kurvatā sadā |
sa dvīpī vyāghratāṃ nīto ripubhirbalavattaraḥ |
tato dṛṣṭvā sa śārdūlo nābhyahaṃstaṃ viśāṃ pate || 19 ||
[Analyze grammar]

sa tu śvā vyāghratāṃ prāpya balavānpiśitāśanaḥ |
na mūlaphalabhogeṣu spṛhāmapyakarottadā || 20 ||
[Analyze grammar]

yathā mṛgapatirnityaṃ prakāṅkṣati vanaukasaḥ |
tathaiva sa mahārāja vyāghraḥ samabhavattadā || 21 ||
[Analyze grammar]

vyāghrastūṭajamūlasthastṛptaḥ supto hatairmṛgaiḥ |
nāgaścāgāttamuddeśaṃ matto megha ivotthitaḥ || 22 ||
[Analyze grammar]

prabhinnakaraṭaḥ prāṃśuḥ padmī vitatamastakaḥ |
suviṣāṇo mahākāyo meghagambhīranisvanaḥ || 23 ||
[Analyze grammar]

taṃ dṛṣṭvā kuñjaraṃ mattamāyāntaṃ madagarvitam |
vyāghro hastibhayāttrastastamṛṣiṃ śaraṇaṃ yayau || 24 ||
[Analyze grammar]

tato'nayatkuñjaratāṃ taṃ vyāghramṛṣisattamaḥ |
mahāmeghopamaṃ dṛṣṭvā taṃ sa bhīto'bhavadgajaḥ || 25 ||
[Analyze grammar]

tataḥ kamalaṣaṇḍāni śallakīgahanāni ca |
vyacaratsa mudā yuktaḥ padmareṇuvibhūṣitaḥ || 26 ||
[Analyze grammar]

kadācidramamāṇasya hastinaḥ sumukhaṃ tadā |
ṛṣestasyoṭajasthasya kālo'gacchanniśāniśam || 27 ||
[Analyze grammar]

athājagāma taṃ deśaṃ kesarī kesarāruṇaḥ |
girikandarajo bhīmaḥ siṃho nāgakulāntakaḥ || 28 ||
[Analyze grammar]

taṃ dṛṣṭvā siṃhamāyāntaṃ nāgaḥ siṃhabhayākulaḥ |
ṛṣiṃ śaraṇamāpede vepamāno bhayāturaḥ || 29 ||
[Analyze grammar]

tataḥ sa siṃhatāṃ nīto nāgendro muninā tadā |
vanyaṃ nāgaṇayatsiṃhaṃ tulyajātisamanvayāt || 30 ||
[Analyze grammar]

dṛṣṭvā ca so'naśatsiṃho vanyo bhīsannavāgbalaḥ |
sa cāśrame'vasatsiṃhastasminneva vane sukhī || 31 ||
[Analyze grammar]

na tvanye kṣudrapaśavastapovananivāsinaḥ |
vyadṛśyanta bhayatrastā jīvitākāṅkṣiṇaḥ sadā || 32 ||
[Analyze grammar]

kadācitkālayogena sarvaprāṇivihiṃsakaḥ |
balavānkṣatajāhāro nānāsattvabhayaṃkaraḥ || 33 ||
[Analyze grammar]

aṣṭapādūrdhvacaraṇaḥ śarabho vanagocaraḥ |
taṃ siṃhaṃ hantumāgacchanmunestasya niveśanam || 34 ||
[Analyze grammar]

taṃ muniḥ śarabhaṃ cakre balotkaṭamariṃdama |
tataḥ sa śarabho vanyo muneḥ śarabhamagrataḥ |
dṛṣṭvā balinamatyugraṃ drutaṃ saṃprādravadbhayāt || 35 ||
[Analyze grammar]

sa evaṃ śarabhasthāne nyasto vai muninā tadā |
muneḥ pārśvagato nityaṃ śārabhyaṃ sukhamāptavān || 36 ||
[Analyze grammar]

tataḥ śarabhasaṃtrastāḥ sarve mṛgagaṇā vanāt |
diśaḥ saṃprādravanrājanbhayājjīvitakāṅkṣiṇaḥ || 37 ||
[Analyze grammar]

śarabho'pyatisaṃduṣṭo nityaṃ prāṇivadhe rataḥ |
phalamūlāśanaṃ śāntaṃ naicchatsa piśitāśanaḥ || 38 ||
[Analyze grammar]

tato rudhiratarṣeṇa balinā śarabho'nvitaḥ |
iyeṣa taṃ muniṃ hantumakṛtajñaḥ śvayonijaḥ || 39 ||
[Analyze grammar]

tatastena tapaḥśaktyā vidito jñānacakṣuṣā |
vijñāya ca mahāprājño muniḥ śvānaṃ tamuktavān || 40 ||
[Analyze grammar]

śvā tvaṃ dvīpitvamāpanno dvīpī vyāghratvamāgataḥ |
vyāghro nāgo madapaṭurnāgaḥ siṃhatvamāptavān || 41 ||
[Analyze grammar]

siṃho'tibalasaṃyukto bhūyaḥ śarabhatāṃ gataḥ |
mayā snehaparītena na vimṛṣṭaḥ kulānvayaḥ || 42 ||
[Analyze grammar]

yasmādevamapāpaṃ māṃ pāpa hiṃsitumicchasi |
tasmātsvayonimāpannaḥ śvaiva tvaṃ hi bhaviṣyasi || 43 ||
[Analyze grammar]

tato munijanadveṣādduṣṭātmā śvākṛto'budhaḥ |
ṛṣiṇā śarabhaḥ śaptaḥ svaṃ rūpaṃ punarāptavān || 44 ||
[Analyze grammar]