Chapter 31

vaiśaṃpāyana uvāca |
tato rājā pāṇḍusuto nāradaṃ pratyabhāṣata |
bhagavañśrotumicchāmi suvarṇaṣṭhīvisaṃbhavam || 1 ||
[Analyze grammar]

evamuktaḥ sa ca munirdharmarājena nāradaḥ |
ācacakṣe yathā vṛttaṃ suvarṇaṣṭhīvinaṃ prati || 2 ||
[Analyze grammar]

evametanmahārāja yathāyaṃ keśavo'bravīt |
kāryasyāsya tu yaccheṣaṃ tatte vakṣyāmi pṛcchataḥ || 3 ||
[Analyze grammar]

ahaṃ ca parvataścaiva svasrīyo me mahāmuniḥ |
vastukāmāvabhigatau sṛñjayaṃ jayatāṃ varam || 4 ||
[Analyze grammar]

tatra saṃpūjitau tena vidhidṛṣṭena karmaṇā |
sarvakāmaiḥ suvihitau nivasāvo'sya veśmani || 5 ||
[Analyze grammar]

vyatikrāntāsu varṣāsu samaye gamanasya ca |
parvato māmuvācedaṃ kāle vacanamarthavat || 6 ||
[Analyze grammar]

āvāmasya narendrasya gṛhe paramapūjitau |
uṣitau samaye brahmaṃścintyatāmatra sāṃpratam || 7 ||
[Analyze grammar]

tato'hamabruvaṃ rājanparvataṃ śubhadarśanam |
sarvametattvayi vibho bhāgineyopapadyate || 8 ||
[Analyze grammar]

vareṇa chandyatāṃ rājā labhatāṃ yadyadicchati |
āvayostapasā siddhiṃ prāpnotu yadi manyase || 9 ||
[Analyze grammar]

tata āhūya rājānaṃ sṛñjayaṃ śubhadarśanam |
parvato'numataṃ vākyamuvāca munipuṃgavaḥ || 10 ||
[Analyze grammar]

prītau svo nṛpa satkāraistava hyārjavasaṃbhṛtaiḥ |
āvābhyāmabhyanujñāto varaṃ nṛvara cintaya || 11 ||
[Analyze grammar]

devānāmavihiṃsāyāṃ yadbhavenmānuṣakṣamam |
tadgṛhāṇa mahārāja pūjārho nau mato bhavān || 12 ||
[Analyze grammar]

sṛñjaya uvāca |
prītau bhavantau yadi me kṛtametāvatā mama |
eṣa eva paro lābho nirvṛtto me mahāphalaḥ || 13 ||
[Analyze grammar]

nārada uvāca |
tamevaṃvādinaṃ bhūyaḥ parvataḥ pratyabhāṣata |
vṛṇīṣva rājansaṃkalpo yaste hṛdi ciraṃ sthitaḥ || 14 ||
[Analyze grammar]

sṛñjaya uvāca |
abhīpsāmi sutaṃ vīraṃ vīryavantaṃ dṛḍhavratam |
āyuṣmantaṃ mahābhāgaṃ devarājasamadyutim || 15 ||
[Analyze grammar]

parvata uvāca |
bhaviṣyatyeṣa te kāmo na tvāyuṣmānbhaviṣyati |
devarājābhibhūtyarthaṃ saṃkalpo hyeṣa te hṛdi || 16 ||
[Analyze grammar]

suvarṇaṣṭhīvanāccaiva svarṇaṣṭhīvī bhaviṣyati |
rakṣyaśca devarājātsa devarājasamadyutiḥ || 17 ||
[Analyze grammar]

nārada uvāca |
tacchrutvā sṛñjayo vākyaṃ parvatasya mahātmanaḥ |
prasādayāmāsa tadā naitadevaṃ bhavediti || 18 ||
[Analyze grammar]

āyuṣmānme bhavetputro bhavatastapasā mune |
na ca taṃ parvataḥ kiṃciduvācendravyapekṣayā || 19 ||
[Analyze grammar]

tamahaṃ nṛpatiṃ dīnamabruvaṃ punareva tu |
smartavyo'haṃ mahārāja darśayiṣyāmi te smṛtaḥ || 20 ||
[Analyze grammar]

ahaṃ te dayitaṃ putraṃ pretarājavaśaṃ gatam |
punardāsyāmi tadrūpaṃ mā śucaḥ pṛthivīpate || 21 ||
[Analyze grammar]

evamuktvā tu nṛpatiṃ prayātau svo yathepsitam |
sṛñjayaśca yathākāmaṃ praviveśa svamandiram || 22 ||
[Analyze grammar]

sṛñjayasyātha rājarṣeḥ kasmiṃścitkālaparyaye |
jajñe putro mahāvīryastejasā prajvalanniva || 23 ||
[Analyze grammar]

vavṛdhe sa yathākālaṃ sarasīva mahotpalam |
babhūva kāñcanaṣṭhīvī yathārthaṃ nāma tasya tat || 24 ||
[Analyze grammar]

tadadbhutatamaṃ loke paprathe kurusattama |
bubudhe tacca devendro varadānaṃ mahātmanoḥ || 25 ||
[Analyze grammar]

tatastvabhibhavādbhīto bṛhaspatimate sthitaḥ |
kumārasyāntaraprekṣī babhūva balavṛtrahā || 26 ||
[Analyze grammar]

codayāmāsa vajraṃ sa divyāstraṃ mūrtisaṃsthitam |
vyāghro bhūtvā jahīmaṃ tvaṃ rājaputramiti prabho || 27 ||
[Analyze grammar]

vivṛddhaḥ kila vīryeṇa māmeṣo'bhibhaviṣyati |
sṛñjayasya suto vajra yathainaṃ parvato dadau || 28 ||
[Analyze grammar]

evamuktastu śakreṇa vajraḥ parapuraṃjayaḥ |
kumārasyāntaraprekṣī nityamevānvapadyata || 29 ||
[Analyze grammar]

sṛñjayo'pi sutaṃ prāpya devarājasamadyutim |
hṛṣṭaḥ sāntaḥpuro rājā vananityo'bhavattadā || 30 ||
[Analyze grammar]

tato bhāgīrathītīre kadācidvananirjhare |
dhātrīdvitīyo bālaḥ sa krīḍārthaṃ paryadhāvata || 31 ||
[Analyze grammar]

pañcavarṣakadeśīyo bālo nāgendravikramaḥ |
sahasotpatitaṃ vyāghramāsasāda mahābalaḥ || 32 ||
[Analyze grammar]

tena caiva viniṣpiṣṭo vepamāno nṛpātmajaḥ |
vyasuḥ papāta medinyāṃ tato dhātrī vicukruśe || 33 ||
[Analyze grammar]

hatvā tu rājaputraṃ sa tatraivāntaradhīyata |
śārdūlo devarājasya māyayāntarhitastadā || 34 ||
[Analyze grammar]

dhātryāstu ninadaṃ śrutvā rudatyāḥ paramārtavat |
abhyadhāvata taṃ deśaṃ svayameva mahīpatiḥ || 35 ||
[Analyze grammar]

sa dadarśa gatāsuṃ taṃ śayānaṃ pītaśoṇitam |
kumāraṃ vigatānandaṃ niśākaramiva cyutam || 36 ||
[Analyze grammar]

sa tamutsaṅgamāropya paripīḍitavakṣasam |
putraṃ rudhirasaṃsiktaṃ paryadevayadāturaḥ || 37 ||
[Analyze grammar]

tatastā mātarastasya rudantyaḥ śokakarśitāḥ |
abhyadhāvanta taṃ deśaṃ yatra rājā sa sṛñjayaḥ || 38 ||
[Analyze grammar]

tataḥ sa rājā sasmāra māmantargatamānasaḥ |
taccāhaṃ cintitaṃ jñātvā gatavāṃstasya darśanam || 39 ||
[Analyze grammar]

sa mayaitāni vākyāni śrāvitaḥ śokalālasaḥ |
yāni te yaduvīreṇa kathitāni mahīpate || 40 ||
[Analyze grammar]

saṃjīvitaścāpi mayā vāsavānumate tadā |
bhavitavyaṃ tathā tacca na tacchakyamato'nyathā || 41 ||
[Analyze grammar]

ata ūrdhvaṃ kumāraḥ sa svarṇaṣṭhīvī mahāyaśāḥ |
cittaṃ prasādayāmāsa piturmātuśca vīryavān || 42 ||
[Analyze grammar]

kārayāmāsa rājyaṃ sa pitari svargate vibhuḥ |
varṣāṇāmekaśatavatsahasraṃ bhīmavikramaḥ || 43 ||
[Analyze grammar]

tata iṣṭvā mahāyajñairbahubhirbhūridakṣiṇaiḥ |
tarpayāmāsa devāṃśca pitṝṃścaiva mahādyutiḥ || 44 ||
[Analyze grammar]

utpādya ca bahūnputrānkulasaṃtānakāriṇaḥ |
kālena mahatā rājankāladharmamupeyivān || 45 ||
[Analyze grammar]

sa tvaṃ rājendra saṃjātaṃ śokametannivartaya |
yathā tvāṃ keśavaḥ prāha vyāsaśca sumahātapāḥ || 46 ||
[Analyze grammar]

pitṛpaitāmahaṃ rājyamāsthāya duramudvaha |
iṣṭvā puṇyairmahāyajñairiṣṭāṃllokānavāpsyasi || 47 ||
[Analyze grammar]