Chapter 30

yudhiṣṭhira uvāca |
sa kathaṃ kāñcanaṣṭhīvī sṛñjayasya suto'bhavat |
parvatena kimarthaṃ ca dattaḥ kena mamāra ca || 1 ||
[Analyze grammar]

yadā varṣasahasrāyustadā bhavati mānavaḥ |
kathamaprāptakaumāraḥ sṛñjayasya suto mṛtaḥ || 2 ||
[Analyze grammar]

utāho nāmamātraṃ vai suvarṇaṣṭhīvino'bhavat |
tathyaṃ vā kāñcanaṣṭhīvītyetadicchāmi veditum || 3 ||
[Analyze grammar]

vāsudeva uvāca |
atra te kathayiṣyāmi yathā vṛttaṃ janeśvara |
nāradaḥ parvataścaiva prāgṛṣī lokapūjitau || 4 ||
[Analyze grammar]

mātulo bhāgineyaśca devalokādihāgatau |
vihartukāmau saṃprītyā mānuṣyeṣu purā prabhū || 5 ||
[Analyze grammar]

haviḥpavitrabhojyena devabhojyena caiva ha |
nārado mātulaścaiva bhāgineyaśca parvataḥ || 6 ||
[Analyze grammar]

tāvubhau tapasopetāvavanītalacāriṇau |
bhuñjānau mānuṣānbhogānyathāvatparyadhāvatām || 7 ||
[Analyze grammar]

prītimantau mudā yuktau samayaṃ tatra cakratuḥ |
yo bhaveddhṛdi saṃkalpaḥ śubho vā yadi vāśubhaḥ |
anyonyasya sa ākhyeyo mṛṣā śāpo'nyathā bhavet || 8 ||
[Analyze grammar]

tau tatheti pratijñāya maharṣī lokapūjitau |
sṛñjayaṃ śvaityamabhyetya rājānamidamūcatuḥ || 9 ||
[Analyze grammar]

āvāṃ bhavati vatsyāvaḥ kaṃcitkālaṃ hitāya te |
yathāvatpṛthivīpāla āvayoḥ praguṇībhava |
tatheti kṛtvā tau rājā satkṛtyopacacāra ha || 10 ||
[Analyze grammar]

tataḥ kadācittau rājā mahātmānau tathāgatau |
abravītparamaprītaḥ suteyaṃ varavarṇinī || 11 ||
[Analyze grammar]

ekaiva mama kanyaiṣā yuvāṃ paricariṣyati |
darśanīyānavadyāṅgī śīlavṛttasamanvitā |
sukumārī kumārī ca padmakiñjalkasaṃnibhā || 12 ||
[Analyze grammar]

paramaṃ saumya ityuktastābhyāṃ rājā śaśāsa tām |
kanye viprāvupacara devavatpitṛvacca ha || 13 ||
[Analyze grammar]

sā tu kanyā tathetyuktvā pitaraṃ dharmacāriṇī |
yathānideśaṃ rājñastau satkṛtyopacacāra ha || 14 ||
[Analyze grammar]

tasyāstathopacāreṇa rūpeṇāpratimena ca |
nāradaṃ hṛcchayastūrṇaṃ sahasaivānvapadyata || 15 ||
[Analyze grammar]

vavṛdhe ca tatastasya hṛdi kāmo mahātmanaḥ |
yathā śuklasya pakṣasya pravṛttāvuḍurāṭchanaiḥ || 16 ||
[Analyze grammar]

na ca taṃ bhāgineyāya parvatāya mahātmane |
śaśaṃsa manmathaṃ tīvraṃ vrīḍamānaḥ sa dharmavit || 17 ||
[Analyze grammar]

tapasā ceṅgitenātha parvato'tha bubodha tat |
kāmārtaṃ nāradaṃ kruddhaḥ śaśāpainaṃ tato bhṛśam || 18 ||
[Analyze grammar]

kṛtvā samayamavyagro bhavānvai sahito mayā |
yo bhaveddhṛdi saṃkalpaḥ śubho vā yadi vāśubhaḥ || 19 ||
[Analyze grammar]

anyonyasya sa ākhyeya iti tadvai mṛṣā kṛtam |
bhavatā vacanaṃ brahmaṃstasmādetadvadāmyaham || 20 ||
[Analyze grammar]

na hi kāmaṃ pravartantaṃ bhavānācaṣṭa me purā |
sukumāryāṃ kumāryāṃ te tasmādeṣa śapāmyaham || 21 ||
[Analyze grammar]

brahmavādī gururyasmāttapasvī brāhmaṇaśca san |
akārṣīḥ samayabhraṃśamāvābhyāṃ yaḥ kṛto mithaḥ || 22 ||
[Analyze grammar]

śapsye tasmātsusaṃkruddho bhavantaṃ taṃ nibodha me |
sukumārī ca te bhāryā bhaviṣyati na saṃśayaḥ || 23 ||
[Analyze grammar]

vānaraṃ caiva kanyā tvāṃ vivāhātprabhṛti prabho |
saṃdrakṣyanti narāścānye svarūpeṇa vinākṛtam || 24 ||
[Analyze grammar]

sa tadvākyaṃ tu vijñāya nāradaḥ parvatāttadā |
aśapattamapi krodhādbhāgineyaṃ sa mātulaḥ || 25 ||
[Analyze grammar]

tapasā brahmacaryeṇa satyena ca damena ca |
yukto'pi dharmanityaśca na svargavāsamāpsyasi || 26 ||
[Analyze grammar]

tau tu śaptvā bhṛśaṃ kruddhau parasparamamarṣaṇau |
pratijagmaturanyonyaṃ kruddhāviva gajottamau || 27 ||
[Analyze grammar]

parvataḥ pṛthivīṃ kṛtsnāṃ vicacāra mahāmuniḥ |
pūjyamāno yathānyāyaṃ tejasā svena bhārata || 28 ||
[Analyze grammar]

atha tāmalabhatkanyāṃ nāradaḥ sṛñjayātmajām |
dharmeṇa dharmapravaraḥ sukumārīmaninditām || 29 ||
[Analyze grammar]

sā tu kanyā yathāśāpaṃ nāradaṃ taṃ dadarśa ha |
pāṇigrahaṇamantrāṇāṃ prayogādeva vānaram || 30 ||
[Analyze grammar]

sukumārī ca devarṣiṃ vānarapratimānanam |
naivāvamanyata tadā prītimatyeva cābhavat || 31 ||
[Analyze grammar]

upatasthe ca bhartāraṃ na cānyaṃ manasāpyagāt |
devaṃ muniṃ vā yakṣaṃ vā patitve pativatsalā || 32 ||
[Analyze grammar]

tataḥ kadācidbhagavānparvato'nusasāra ha |
vanaṃ virahitaṃ kiṃcittatrāpaśyatsa nāradam || 33 ||
[Analyze grammar]

tato'bhivādya provāca nāradaṃ parvatastadā |
bhavānprasādaṃ kurutāṃ svargādeśāya me prabho || 34 ||
[Analyze grammar]

tamuvāca tato dṛṣṭvā parvataṃ nāradastadā |
kṛtāñjalimupāsīnaṃ dīnaṃ dīnataraḥ svayam || 35 ||
[Analyze grammar]

tvayāhaṃ prathamaṃ śapto vānarastvaṃ bhaviṣyasi |
ityuktena mayā paścācchaptastvamapi matsarāt |
adyaprabhṛti vai vāsaṃ svarge nāvāpsyasīti ha || 36 ||
[Analyze grammar]

tava naitaddhi sadṛśaṃ putrasthāne hi me bhavān |
nivartayetāṃ tau śāpamanyo'nyena tadā munī || 37 ||
[Analyze grammar]

śrīsamṛddhaṃ tadā dṛṣṭvā nāradaṃ devarūpiṇam |
sukumārī pradudrāva parapatyabhiśaṅkayā || 38 ||
[Analyze grammar]

tāṃ parvatastato dṛṣṭvā pradravantīmaninditām |
abravīttava bhartaiṣa nātra kāryā vicāraṇā || 39 ||
[Analyze grammar]

ṛṣiḥ paramadharmātmā nārado bhagavānprabhuḥ |
tavaivābhedyahṛdayo mā te bhūdatra saṃśayaḥ || 40 ||
[Analyze grammar]

sānunītā bahuvidhaṃ parvatena mahātmanā |
śāpadoṣaṃ ca taṃ bhartuḥ śrutvā svāṃ prakṛtiṃ gatā |
parvato'tha yayau svargaṃ nārado'tha yayau gṛhān || 41 ||
[Analyze grammar]

pratyakṣakarmā sarvasya nārado'yaṃ mahānṛṣiḥ |
eṣa vakṣyati vai pṛṣṭo yathā vṛttaṃ narottama || 42 ||
[Analyze grammar]