Chapter 10

saṃjaya uvāca |
tasminvilulite sainye vadhyamāne parasparam |
dravamāṇeṣu yodheṣu ninadatsu ca dantiṣu || 1 ||
[Analyze grammar]

kūjatāṃ stanatāṃ caiva padātīnāṃ mahāhave |
vidruteṣu mahārāja hayeṣu bahudhā tadā || 2 ||
[Analyze grammar]

prakṣaye dāruṇe jāte saṃhāre sarvadehinām |
nānāśastrasamāvāpe vyatiṣaktarathadvipe || 3 ||
[Analyze grammar]

harṣaṇe yuddhaśauṇḍānāṃ bhīrūṇāṃ bhayavardhane |
gāhamāneṣu yodheṣu parasparavadhaiṣiṣu || 4 ||
[Analyze grammar]

prāṇādāne mahāghore vartamāne durodare |
saṃgrāme ghorarūpe tu yamarāṣṭravivardhane || 5 ||
[Analyze grammar]

pāṇḍavāstāvakaṃ sainyaṃ vyadhamanniśitaiḥ śaraiḥ |
tathaiva tāvakā yodhā jaghnuḥ pāṇḍavasainikān || 6 ||
[Analyze grammar]

tasmiṃstathā vartamāne yuddhe bhīrubhayāvahe |
pūrvāhṇe caiva saṃprāpte bhāskarodayanaṃ prati || 7 ||
[Analyze grammar]

labdhalakṣāḥ pare rājanrakṣitāśca mahātmanā |
ayodhayaṃstava balaṃ mṛtyuṃ kṛtvā nivartanam || 8 ||
[Analyze grammar]

balibhiḥ pāṇḍavairdṛptairlabdhalakṣaiḥ prahāribhiḥ |
kauravyasīdatpṛtanā mṛgīvāgnisamākulā || 9 ||
[Analyze grammar]

tāṃ dṛṣṭvā sīdatīṃ senāṃ paṅke gāmiva durbalām |
ujjihīrṣustadā śalyaḥ prāyātpāṇḍucamūṃ prati || 10 ||
[Analyze grammar]

madrarājastu saṃkruddho gṛhītvā dhanuruttamam |
abhyadravata saṃgrāme pāṇḍavānātatāyinaḥ || 11 ||
[Analyze grammar]

pāṇḍavāśca mahārāja samare jitakāśinaḥ |
madrarājaṃ samāsādya vivyadhurniśitaiḥ śaraiḥ || 12 ||
[Analyze grammar]

tataḥ śaraśataistīkṣṇairmadrarājo mahābalaḥ |
ardayāmāsa tāṃ senāṃ dharmarājasya paśyataḥ || 13 ||
[Analyze grammar]

prādurāsaṃstato rājannānārūpāṇyanekaśaḥ |
cacāla śabdaṃ kurvāṇā mahī cāpi saparvatā || 14 ||
[Analyze grammar]

sadaṇḍaśūlā dīptāgrāḥ śīryamāṇāḥ samantataḥ |
ulkā bhūmiṃ divaḥ peturāhatya ravimaṇḍalam || 15 ||
[Analyze grammar]

mṛgāśca māhiṣāścāpi pakṣiṇaśca viśāṃ pate |
apasavyaṃ tadā cakruḥ senāṃ te bahuśo nṛpa || 16 ||
[Analyze grammar]

tatastadyuddhamatyugramabhavatsaṃghacāriṇām |
tathā sarvāṇyanīkāni saṃnipatya janādhipa |
abhyayuḥ kauravā rājanpāṇḍavānāmanīkinīm || 17 ||
[Analyze grammar]

śalyastu śaravarṣeṇa varṣanniva sahasradṛk |
abhyavarṣadadīnātmā kuntīputraṃ yudhiṣṭhiram || 18 ||
[Analyze grammar]

bhīmasenaṃ śaraiścāpi rukmapuṅkhaiḥ śilāśitaḥ |
draupadeyāṃstathā sarvānmādrīputrau ca pāṇḍavau || 19 ||
[Analyze grammar]

dhṛṣṭadyumnaṃ ca śaineyaṃ śikhaṇḍinamathāpi ca |
ekaikaṃ daśabhirbāṇairvivyādha ca mahābalaḥ |
tato'sṛjadbāṇavarṣaṃ gharmānte maghavāniva || 20 ||
[Analyze grammar]

tataḥ prabhadrakā rājansomakāśca sahasraśaḥ |
patitāḥ pātyamānāśca dṛśyante śalyasāyakaiḥ || 21 ||
[Analyze grammar]

bhramarāṇāmiva vrātāḥ śalabhānāmiva vrajāḥ |
hrādinya iva meghebhyaḥ śalyasya nyapatañśarāḥ || 22 ||
[Analyze grammar]

dviradāsturagāścārtāḥ pattayo rathinastathā |
śalyasya bāṇairnyapatanbabhramurvyanadaṃstathā || 23 ||
[Analyze grammar]

āviṣṭa iva madreśo manyunā pauruṣeṇa ca |
prācchādayadarīnsaṃkhye kālasṛṣṭa ivāntakaḥ |
vinardamāno madreśo meghahrādo mahābalaḥ || 24 ||
[Analyze grammar]

sā vadhyamānā śalyena pāṇḍavānāmanīkinī |
ajātaśatruṃ kaunteyamabhyadhāvadyudhiṣṭhiram || 25 ||
[Analyze grammar]

tāṃ samarpya tataḥ saṃkhye laghuhastaḥ śitaiḥ śaraiḥ |
śaravarṣeṇa mahatā yudhiṣṭhiramapīḍayat || 26 ||
[Analyze grammar]

tamāpatantaṃ pattyaśvaiḥ kruddho rājā yudhiṣṭhiraḥ |
avārayaccharaistīkṣṇairmattaṃ dvipamivāṅkuśaiḥ || 27 ||
[Analyze grammar]

tasya śalyaḥ śaraṃ ghoraṃ mumocāśīviṣopamam |
so'bhyavidhyanmahātmānaṃ vegenābhyapatacca gām || 28 ||
[Analyze grammar]

tato vṛkodaraḥ kruddhaḥ śalyaṃ vivyādha saptabhiḥ |
pañcabhiḥ sahadevastu nakulo daśabhiḥ śaraiḥ || 29 ||
[Analyze grammar]

draupadeyāśca śatrughnaṃ śūramārtāyaniṃ śaraiḥ |
abhyavarṣanmahābhāgaṃ meghā iva mahīdharam || 30 ||
[Analyze grammar]

tato dṛṣṭvā tudyamānaṃ śalyaṃ pārthaiḥ samantataḥ |
kṛtavarmā kṛpaścaiva saṃkruddhāvabhyadhāvatām || 31 ||
[Analyze grammar]

ulūkaśca patatrī ca śakuniścāpi saubalaḥ |
smayamānaśca śanakairaśvatthāmā mahārathaḥ |
tava putrāśca kārtsnyena jugupuḥ śalyamāhave || 32 ||
[Analyze grammar]

bhīmasenaṃ tribhirviddhvā kṛtavarmā śilīmukhaiḥ |
bāṇavarṣeṇa mahatā kruddharūpamavārayat || 33 ||
[Analyze grammar]

dhṛṣṭadyumnaṃ kṛpaḥ kruddho bāṇavarṣairapīḍayat |
draupadeyāṃśca śakuniryamau ca drauṇirabhyayāt || 34 ||
[Analyze grammar]

duryodhano yudhāṃ śreṣṭhāvāhave keśavārjunau |
samabhyayādugratejāḥ śaraiścābhyahanadbalī || 35 ||
[Analyze grammar]

evaṃ dvaṃdvaśatānyāsaṃstvadīyānāṃ paraiḥ saha |
ghorarūpāṇi citrāṇi tatra tatra viśāṃ pate || 36 ||
[Analyze grammar]

ṛśyavarṇāñjaghānāśvānbhojo bhīmasya saṃyuge |
so'vatīrya rathopasthāddhatāśvaḥ pāṇḍunandanaḥ |
kālo daṇḍamivodyamya gadāpāṇirayudhyata || 37 ||
[Analyze grammar]

pramukhe sahadevasya jaghānāśvāṃśca madrarāṭ |
tataḥ śalyasya tanayaṃ sahadevo'sināvadhīt || 38 ||
[Analyze grammar]

gautamaḥ punarācāryo dhṛṣṭadyumnamayodhayat |
asaṃbhrāntamasaṃbhrānto yatnavānyatnavattaram || 39 ||
[Analyze grammar]

draupadeyāṃstathā vīrānekaikaṃ daśabhiḥ śaraiḥ |
avidhyadācāryasuto nātikruddhaḥ smayanniva || 40 ||
[Analyze grammar]

śalyo'pi rājansaṃkruddho nighnansomakapāṇḍavān |
punareva śitairbāṇairyudhiṣṭhiramapīḍayat || 41 ||
[Analyze grammar]

tasya bhīmo raṇe kruddhaḥ saṃdaṣṭadaśanacchadaḥ |
vināśāyābhisaṃdhāya gadāmādatta vīryavān || 42 ||
[Analyze grammar]

yamadaṇḍapratīkāśāṃ kālarātrimivodyatām |
gajavājimanuṣyāṇāṃ prāṇāntakaraṇīmapi || 43 ||
[Analyze grammar]

hemapaṭṭaparikṣiptāmulkāṃ prajvalitāmiva |
śaikyāṃ vyālīmivātyugrāṃ vajrakalpāmayasmayīm || 44 ||
[Analyze grammar]

candanāgurupaṅkāktāṃ pramadāmīpsitāmiva |
vasāmedosṛgādigdhāṃ jihvāṃ vaivasvatīmiva || 45 ||
[Analyze grammar]

paṭughaṇṭāravaśatāṃ vāsavīmaśanīmiva |
nirmuktāśīviṣākārāṃ pṛktāṃ gajamadairapi || 46 ||
[Analyze grammar]

trāsanīṃ ripusainyānāṃ svasainyapariharṣiṇīm |
manuṣyaloke vikhyātāṃ giriśṛṅgavidāriṇīm || 47 ||
[Analyze grammar]

yayā kailāsabhavane maheśvarasakhaṃ balī |
āhvayāmāsa kaunteyaḥ saṃkruddhamalakādhipam || 48 ||
[Analyze grammar]

yayā māyāvino dṛptānsubahūndhanadālaye |
jaghāna guhyakānkruddho mandārārthe mahābalaḥ |
nivāryamāṇo bahubhirdraupadyāḥ priyamāsthitaḥ || 49 ||
[Analyze grammar]

tāṃ vajramaṇiratnaughāmaṣṭāśriṃ vajragauravām |
samudyamya mahābāhuḥ śalyamabhyadravadraṇe || 50 ||
[Analyze grammar]

gadayā yuddhakuśalastayā dāruṇanādayā |
pothayāmāsa śalyasya caturo'śvānmahājavān || 51 ||
[Analyze grammar]

tataḥ śalyo raṇe kruddhaḥ pīne vakṣasi tomaram |
nicakhāna nadanvīro varma bhittvā ca so'bhyagāt || 52 ||
[Analyze grammar]

vṛkodarastvasaṃbhrātastamevoddhṛtya tomaram |
yantāraṃ madrarājasya nirbibheda tato hṛdi || 53 ||
[Analyze grammar]

sa bhinnavarmā rudhiraṃ vamanvitrastamānasaḥ |
papātābhimukho dīno madrarājastvapākramat || 54 ||
[Analyze grammar]

kṛtapratikṛtaṃ dṛṣṭvā śalyo vismitamānasaḥ |
gadāmāśritya dhīrātmā pratyamitramavaikṣata || 55 ||
[Analyze grammar]

tataḥ sumanasaḥ pārthā bhīmasenamapūjayan |
taddṛṣṭvā karma saṃgrāme ghoramakliṣṭakarmaṇaḥ || 56 ||
[Analyze grammar]