Chapter 9

saṃjaya uvāca |
tatprabhagnaṃ balaṃ dṛṣṭvā madrarājaḥ pratāpavān |
uvāca sārathiṃ tūrṇaṃ codayāśvānmahājavān || 1 ||
[Analyze grammar]

eṣa tiṣṭhati vai rājā pāṇḍuputro yudhiṣṭhiraḥ |
chatreṇa dhriyamāṇena pāṇḍureṇa virājatā || 2 ||
[Analyze grammar]

atra māṃ prāpaya kṣipraṃ paśya me sārathe balam |
na samarthā hi me pārthāḥ sthātumadya puro yudhi || 3 ||
[Analyze grammar]

evamuktastataḥ prāyānmadrarājasya sārathiḥ |
yatra rājā satyasaṃdho dharmarājo yudhiṣṭhiraḥ || 4 ||
[Analyze grammar]

āpatantaṃ ca sahasā pāṇḍavānāṃ mahadbalam |
dadhāraiko raṇe śalyo velevoddhṛtamarṇavam || 5 ||
[Analyze grammar]

pāṇḍavānāṃ balaughastu śalyamāsādya māriṣa |
vyatiṣṭhata tadā yuddhe sindhorvega ivācalam || 6 ||
[Analyze grammar]

madrarājaṃ tu samare dṛṣṭvā yuddhāya viṣṭhitam |
kuravaḥ saṃnyavartanta mṛtyuṃ kṛtvā nivartanam || 7 ||
[Analyze grammar]

teṣu rājannivṛtteṣu vyūḍhānīkeṣu bhāgaśaḥ |
prāvartata mahāraudraḥ saṃgrāmaḥ śoṇitodakaḥ |
samārchaccitrasenena nakulo yuddhadurmadaḥ || 8 ||
[Analyze grammar]

tau parasparamāsādya citrakārmukadhāriṇau |
meghāviva yathodvṛttau dakṣiṇottaravarṣiṇau || 9 ||
[Analyze grammar]

śaratoyaiḥ siṣicatustau parasparamāhave |
nāntaraṃ tatra paśyāmi pāṇḍavasyetarasya vā || 10 ||
[Analyze grammar]

ubhau kṛtāstrau balinau rathacaryāviśāradau |
parasparavadhe yattau chidrānveṣaṇatatparau || 11 ||
[Analyze grammar]

citrasenastu bhallena pītena niśitena ca |
nakulasya mahārāja muṣṭideśe'cchinaddhanuḥ || 12 ||
[Analyze grammar]

athainaṃ chinnadhanvānaṃ rukmapuṅkhaiḥ śilāśitaiḥ |
tribhiḥ śarairasaṃbhrānto lalāṭe vai samarpayat || 13 ||
[Analyze grammar]

hayāṃścāsya śaraistīkṣṇaiḥ preṣayāmāsa mṛtyave |
tathā dhvajaṃ sārathiṃ ca tribhistribhirapātayat || 14 ||
[Analyze grammar]

sa śatrubhujanirmuktairlalāṭasthaistribhiḥ śaraiḥ |
nakulaḥ śuśubhe rājaṃstriśṛṅga iva parvataḥ || 15 ||
[Analyze grammar]

sa chinnadhanvā virathaḥ khaḍgamādāya carma ca |
rathādavātaradvīraḥ śailāgrādiva kesarī || 16 ||
[Analyze grammar]

padbhyāmāpatatastasya śaravṛṣṭimavāsṛjat |
nakulo'pyagrasattāṃ vai carmaṇā laghuvikramaḥ || 17 ||
[Analyze grammar]

citrasenarathaṃ prāpya citrayodhī jitaśramaḥ |
āruroha mahābāhuḥ sarvasainyasya paśyataḥ || 18 ||
[Analyze grammar]

sakuṇḍalaṃ samukuṭaṃ sunasaṃ svāyatekṣaṇam |
citrasenaśiraḥ kāyādapāharata pāṇḍavaḥ |
sa papāta rathopasthāddivākarasamaprabhaḥ || 19 ||
[Analyze grammar]

citrasenaṃ viśastaṃ tu dṛṣṭvā tatra mahārathāḥ |
sādhuvādasvanāṃścakruḥ siṃhanādāṃśca puṣkalān || 20 ||
[Analyze grammar]

viśastaṃ bhrātaraṃ dṛṣṭvā karṇaputrau mahārathau |
suṣeṇaḥ satyasenaśca muñcantau niśitāñśarān || 21 ||
[Analyze grammar]

tato'bhyadhāvatāṃ tūrṇaṃ pāṇḍavaṃ rathināṃ varam |
jighāṃsantau yathā nāgaṃ vyāghrau rājanmahāvane || 22 ||
[Analyze grammar]

tāvabhyadhāvatāṃ tīkṣṇau dvāvapyenaṃ mahāratham |
śaraughānsamyagasyantau jīmūtau salilaṃ yathā || 23 ||
[Analyze grammar]

sa śaraiḥ sarvato viddhaḥ prahṛṣṭa iva pāṇḍavaḥ |
anyatkārmukamādāya rathamāruhya vīryavān |
atiṣṭhata raṇe vīraḥ kruddharūpa ivāntakaḥ || 24 ||
[Analyze grammar]

tasya tau bhrātarau rājañśaraiḥ saṃnataparvabhiḥ |
rathaṃ viśakalīkartuṃ samārabdhau viśāṃ pate || 25 ||
[Analyze grammar]

tataḥ prahasya nakulaścaturbhiścaturo raṇe |
jaghāna niśitaistīkṣṇaiḥ satyasenasya vājinaḥ || 26 ||
[Analyze grammar]

tataḥ saṃdhāya nārācaṃ rukmapuṅkhaṃ śilāśitam |
dhanuściccheda rājendra satyasenasya pāṇḍavaḥ || 27 ||
[Analyze grammar]

athānyaṃ rathamāsthāya dhanurādāya cāparam |
satyasenaḥ suṣeṇaśca pāṇḍavaṃ paryadhāvatām || 28 ||
[Analyze grammar]

avidhyattāvasaṃbhrāntau mādrīputraḥ pratāpavān |
dvābhyāṃ dvābhyāṃ mahārāja śarābhyāṃ raṇamūrdhani || 29 ||
[Analyze grammar]

suṣeṇastu tataḥ kruddhaḥ pāṇḍavasya mahaddhanuḥ |
ciccheda prahasanyuddhe kṣurapreṇa mahārathaḥ || 30 ||
[Analyze grammar]

athānyaddhanurādāya nakulaḥ krodhamūrchitaḥ |
suṣeṇaṃ pañcabhirviddhvā dhvajamekena cicchide || 31 ||
[Analyze grammar]

satyasenasya ca dhanurhastāvāpaṃ ca māriṣa |
ciccheda tarasā yuddhe tata uccukruśurjanāḥ || 32 ||
[Analyze grammar]

athānyaddhanurādāya vegaghnaṃ bhārasādhanam |
śaraiḥ saṃchādayāmāsa samantātpāṇḍunandanam || 33 ||
[Analyze grammar]

saṃnivārya tu tānbāṇānnakulaḥ paravīrahā |
satyasenaṃ suṣeṇaṃ ca dvābhyāṃ dvābhyāmavidhyata || 34 ||
[Analyze grammar]

tāvenaṃ pratyavidhyetāṃ pṛthakpṛthagajihmagaiḥ |
sārathiṃ cāsya rājendra śarairvivyadhatuḥ śitaiḥ || 35 ||
[Analyze grammar]

satyaseno ratheṣāṃ tu nakulasya dhanustathā |
pṛthakśarābhyāṃ ciccheda kṛtahastaḥ pratāpavān || 36 ||
[Analyze grammar]

sa rathe'tirathastiṣṭhanrathaśaktiṃ parāmṛśat |
svarṇadaṇḍāmakuṇṭhāgrāṃ tailadhautāṃ sunirmalām || 37 ||
[Analyze grammar]

lelihānāmiva vibho nāgakanyāṃ mahāviṣām |
samudyamya ca cikṣepa satyasenasya saṃyuge || 38 ||
[Analyze grammar]

sā tasya hṛdayaṃ saṃkhye bibheda śatadhā nṛpa |
sa papāta rathādbhūmau gatasattvo'lpacetanaḥ || 39 ||
[Analyze grammar]

bhrātaraṃ nihataṃ dṛṣṭvā suṣeṇaḥ krodhamūrchitaḥ |
abhyavarṣaccharaistūrṇaṃ padātiṃ pāṇḍunandanam || 40 ||
[Analyze grammar]

nakulaṃ virathaṃ dṛṣṭvā draupadeyo mahābalaḥ |
sutasomo'bhidudrāva parīpsanpitaraṃ raṇe || 41 ||
[Analyze grammar]

tato'dhiruhya nakulaḥ sutasomasya taṃ ratham |
śuśubhe bharataśreṣṭho giristha iva kesarī |
so'nyatkārmukamādāya suṣeṇaṃ samayodhayat || 42 ||
[Analyze grammar]

tāvubhau śaravarṣābhyāṃ samāsādya parasparam |
parasparavadhe yatnaṃ cakratuḥ sumahārathau || 43 ||
[Analyze grammar]

suṣeṇastu tataḥ kruddhaḥ pāṇḍavaṃ viśikhaistribhiḥ |
sutasomaṃ ca viṃśatyā bāhvorurasi cārpayat || 44 ||
[Analyze grammar]

tataḥ kruddho mahārāja nakulaḥ paravīrahā |
śaraistasya diśaḥ sarvāśchādayāmāsa vīryavān || 45 ||
[Analyze grammar]

tato gṛhītvā tīkṣṇāgramardhacandraṃ sutejanam |
sa vegayuktaṃ cikṣepa karṇaputrasya saṃyuge || 46 ||
[Analyze grammar]

tasya tena śiraḥ kāyājjahāra nṛpasattama |
paśyatāṃ sarvasainyānāṃ tadadbhutamivābhavat || 47 ||
[Analyze grammar]

sa hataḥ prāpatadrājannakulena mahātmanā |
nadīvegādivārugṇastīrajaḥ pādapo mahān || 48 ||
[Analyze grammar]

karṇaputravadhaṃ dṛṣṭvā nakulasya ca vikramam |
pradudrāva bhayātsenā tāvakī bharatarṣabha || 49 ||
[Analyze grammar]

tāṃ tu senāṃ mahārāja madrarājaḥ pratāpavān |
apālayadraṇe śūraḥ senāpatirariṃdamaḥ || 50 ||
[Analyze grammar]

vibhīstasthau mahārāja vyavasthāpya ca vāhinīm |
siṃhanādaṃ bhṛśaṃ kṛtvā dhanuḥśabdaṃ ca dāruṇam || 51 ||
[Analyze grammar]

tāvakāḥ samare rājanrakṣitā dṛḍhadhanvanā |
pratyudyayurarātīṃste samantādvigatavyathāḥ || 52 ||
[Analyze grammar]

madrarājaṃ maheṣvāsaṃ parivārya samantataḥ |
sthitā rājanmahāsenā yoddhukāmāḥ samantataḥ || 53 ||
[Analyze grammar]

sātyakirbhīmasenaśca mādrīputrau ca pāṇḍavau |
yudhiṣṭhiraṃ puraskṛtya hrīniṣedhamariṃdamam || 54 ||
[Analyze grammar]

parivārya raṇe vīrāḥ siṃhanādaṃ pracakrire |
bāṇaśabdaravāṃścogrānkṣveḍāṃśca vividhāndadhuḥ || 55 ||
[Analyze grammar]

tathaiva tāvakāḥ sarve madrādhipatimañjasā |
parivārya susaṃrabdhāḥ punaryuddhamarocayan || 56 ||
[Analyze grammar]

tataḥ pravavṛte yuddhaṃ bhīrūṇāṃ bhayavardhanam |
tāvakānāṃ pareṣāṃ ca mṛtyuṃ kṛtvā nivartanam || 57 ||
[Analyze grammar]

yathā devāsuraṃ yuddhaṃ pūrvamāsīdviśāṃ pate |
abhītānāṃ tathā rājanyamarāṣṭravivardhanam || 58 ||
[Analyze grammar]

tataḥ kapidhvajo rājanhatvā saṃśaptakānraṇe |
abhyadravata tāṃ senāṃ kauravīṃ pāṇḍunandanaḥ || 59 ||
[Analyze grammar]

tathaiva pāṇḍavāḥ śeṣā dhṛṣṭadyumnapurogamāḥ |
abhyadhāvanta tāṃ senāṃ visṛjantaḥ śitāñśarān || 60 ||
[Analyze grammar]

pāṇḍavairavakīrṇānāṃ saṃmohaḥ samajāyata |
na ca jajñuranīkāni diśo vā pradiśastathā || 61 ||
[Analyze grammar]

āpūryamāṇā niśitaiḥ śaraiḥ pāṇḍavacoditaiḥ |
hatapravīrā vidhvastā kīryamāṇā samantataḥ |
kauravyavadhyata camūḥ pāṇḍuputrairmahārathaiḥ || 62 ||
[Analyze grammar]

tathaiva pāṇḍavī senā śarai rājansamantataḥ |
raṇe'hanyata putraiste śataśo'tha sahasraśaḥ || 63 ||
[Analyze grammar]

te sene bhṛśasaṃtapte vadhyamāne parasparam |
vyākule samapadyetāṃ varṣāsu saritāviva || 64 ||
[Analyze grammar]

āviveśa tatastīvraṃ tāvakānāṃ mahadbhayam |
pāṇḍavānāṃ ca rājendra tathābhūte mahāhave || 65 ||
[Analyze grammar]