Chapter 3

saṃjaya uvāca |
śṛṇu rājannavahito yathā vṛtto mahānkṣayaḥ |
kurūṇāṃ pāṇḍavānāṃ ca samāsādya parasparam || 1 ||
[Analyze grammar]

nihate sūtaputre tu pāṇḍavena mahātmanā |
vidruteṣu ca sainyeṣu samānīteṣu cāsakṛt || 2 ||
[Analyze grammar]

vimukhe tava putre tu śokopahatacetasi |
bhṛśodvigneṣu sainyeṣu dṛṣṭvā pārthasya vikramam || 3 ||
[Analyze grammar]

dhyāyamāneṣu sainyeṣu duḥkhaṃ prāpteṣu bhārata |
balānāṃ mathyamānānāṃ śrutvā ninadamuttamam || 4 ||
[Analyze grammar]

abhijñānaṃ narendrāṇāṃ vikṛtaṃ prekṣya saṃyuge |
patitānrathanīḍāṃśca rathāṃścāpi mahātmanām || 5 ||
[Analyze grammar]

raṇe vinihatānnāgāndṛṣṭvā pattīṃśca māriṣa |
āyodhanaṃ cātighoraṃ rudrasyākrīḍasaṃnibham || 6 ||
[Analyze grammar]

aprakhyātiṃ gatānāṃ tu rājñāṃ śatasahasraśaḥ |
kṛpāviṣṭaḥ kṛpo rājanvayaḥśīlasamanvitaḥ || 7 ||
[Analyze grammar]

abravīttatra tejasvī so'bhisṛtya janādhipam |
duryodhanaṃ manyuvaśādvacanaṃ vacanakṣamaḥ || 8 ||
[Analyze grammar]

duryodhana nibodhedaṃ yattvā vakṣyāmi kaurava |
śrutvā kuru mahārāja yadi te rocate'nagha || 9 ||
[Analyze grammar]

na yuddhadharmācchreyānvai panthā rājendra vidyate |
yaṃ samāśritya yudhyante kṣatriyāḥ kṣatriyarṣabha || 10 ||
[Analyze grammar]

putro bhrātā pitā caiva svasreyo mātulastathā |
saṃbandhibāndhavāścaiva yodhyā vai kṣatrajīvinā || 11 ||
[Analyze grammar]

vadhe caiva paro dharmastathādharmaḥ palāyane |
te sma ghorāṃ samāpannā jīvikāṃ jīvitārthinaḥ || 12 ||
[Analyze grammar]

tatra tvāṃ prativakṣyāmi kiṃcideva hitaṃ vacaḥ |
hate bhīṣme ca droṇe ca karṇe caiva mahārathe || 13 ||
[Analyze grammar]

jayadrathe ca nihate tava bhrātṛṣu cānagha |
lakṣmaṇe tava putre ca kiṃ śeṣaṃ paryupāsmahe || 14 ||
[Analyze grammar]

yeṣu bhāraṃ samāsajya rājye matimakurmahi |
te saṃtyajya tanūryātāḥ śūrā brahmavidāṃ gatim || 15 ||
[Analyze grammar]

vayaṃ tviha vinābhūtā guṇavadbhirmahārathaiḥ |
kṛpaṇaṃ vartayiṣyāma pātayitvā nṛpānbahūn || 16 ||
[Analyze grammar]

sarvairapi ca jīvadbhirbībhatsuraparājitaḥ |
kṛṣṇanetro mahābāhurdevairapi durāsadaḥ || 17 ||
[Analyze grammar]

indrakārmukavajrābhamindraketumivocchritam |
vānaraṃ ketumāsādya saṃcacāla mahācamūḥ || 18 ||
[Analyze grammar]

siṃhanādena bhīmasya pāñcajanyasvanena ca |
gāṇḍīvasya ca nirghoṣātsaṃhṛṣyanti manāṃsi naḥ || 19 ||
[Analyze grammar]

carantīva mahāvidyunmuṣṇantī nayanaprabhām |
alātamiva cāviddhaṃ gāṇḍīvaṃ samadṛśyata || 20 ||
[Analyze grammar]

jāmbūnadavicitraṃ ca dhūyamānaṃ mahaddhanuḥ |
dṛśyate dikṣu sarvāsu vidyudabhraghaneṣviva || 21 ||
[Analyze grammar]

uhyamānaśca kṛṣṇena vāyuneva balāhakaḥ |
tāvakaṃ tadbalaṃ rājannarjuno'stravidāṃ varaḥ |
gahanaṃ śiśire kakṣaṃ dadāhāgnirivotthitaḥ || 22 ||
[Analyze grammar]

gāhamānamanīkāni mahendrasadṛśaprabham |
dhanaṃjayamapaśyāma caturdantamiva dvipam || 23 ||
[Analyze grammar]

vikṣobhayantaṃ senāṃ te trāsayantaṃ ca pārthivān |
dhanaṃjayamapaśyāma nalinīmiva kuñjaram || 24 ||
[Analyze grammar]

trāsayantaṃ tathā yodhāndhanurghoṣeṇa pāṇḍavam |
bhūya enamapaśyāma siṃhaṃ mṛgagaṇā iva || 25 ||
[Analyze grammar]

sarvalokamaheṣvāsau vṛṣabhau sarvadhanvinām |
āmuktakavacau kṛṣṇau lokamadhye virejatuḥ || 26 ||
[Analyze grammar]

adya saptadaśāhāni vartamānasya bhārata |
saṃgrāmasyātighorasya vadhyatāṃ cābhito yudhi || 27 ||
[Analyze grammar]

vāyuneva vidhūtāni tavānīkāni sarvaśaḥ |
śaradambhodajālāni vyaśīryanta samantataḥ || 28 ||
[Analyze grammar]

tāṃ nāvamiva paryastāṃ bhrāntavātāṃ mahārṇave |
tava senāṃ mahārāja savyasācī vyakampayat || 29 ||
[Analyze grammar]

kva nu te sūtaputro'bhūtkva nu droṇaḥ sahānugaḥ |
ahaṃ kva ca kva cātmā te hārdikyaśca tathā kva nu |
duḥśāsanaśca bhrātā te bhrātṛbhiḥ sahitaḥ kva nu || 30 ||
[Analyze grammar]

bāṇagocarasaṃprāptaṃ prekṣya caiva jayadratham |
saṃbandhinaste bhrātṝṃśca sahāyānmātulāṃstathā || 31 ||
[Analyze grammar]

sarvānvikramya miṣato lokāṃścākramya mūrdhani |
jayadratho hato rājankiṃ nu śeṣamupāsmahe || 32 ||
[Analyze grammar]

ko veha sa pumānasti yo vijeṣyati pāṇḍavam |
tasya cāstrāṇi divyāni vividhāni mahātmanaḥ |
gāṇḍīvasya ca nirghoṣo vīryāṇi harate hi naḥ || 33 ||
[Analyze grammar]

naṣṭacandrā yathā rātriḥ seneyaṃ hatanāyakā |
nāgabhagnadrumā śuṣkā nadīvākulatāṃ gatā || 34 ||
[Analyze grammar]

dhvajinyāṃ hatanetrāyāṃ yatheṣṭaṃ śvetavāhanaḥ |
cariṣyati mahābāhuḥ kakṣe'gniriva saṃjvalan || 35 ||
[Analyze grammar]

sātyakeścaiva yo vego bhīmasenasya cobhayoḥ |
dārayeta girīnsarvāñśoṣayeta ca sāgarān || 36 ||
[Analyze grammar]

uvāca vākyaṃ yadbhīmaḥ sabhāmadhye viśāṃ pate |
kṛtaṃ tatsakalaṃ tena bhūyaścaiva kariṣyati || 37 ||
[Analyze grammar]

pramukhasthe tadā karṇe balaṃ pāṇḍavarakṣitam |
durāsadaṃ tathā guptaṃ gūḍhaṃ gāṇḍīvadhanvanā || 38 ||
[Analyze grammar]

yuṣmābhistāni cīrṇāni yānyasādhūni sādhuṣu |
akāraṇakṛtānyeva teṣāṃ vaḥ phalamāgatam || 39 ||
[Analyze grammar]

ātmano'rthe tvayā loko yatnataḥ sarva āhṛtaḥ |
sa te saṃśayitastāta ātmā ca bharatarṣabha || 40 ||
[Analyze grammar]

rakṣa duryodhanātmānamātmā sarvasya bhājanam |
bhinne hi bhājane tāta diśo gacchati tadgatam || 41 ||
[Analyze grammar]

hīyamānena vai saṃdhiḥ paryeṣṭavyaḥ samena ca |
vigraho vardhamānena nītireṣā bṛhaspateḥ || 42 ||
[Analyze grammar]

te vayaṃ pāṇḍuputrebhyo hīnāḥ svabalaśaktitaḥ |
atra te pāṇḍavaiḥ sārdhaṃ saṃdhiṃ manye kṣamaṃ prabho || 43 ||
[Analyze grammar]

na jānīte hi yaḥ śreyaḥ śreyasaścāvamanyate |
sa kṣipraṃ bhraśyate rājyānna ca śreyo'nuvindati || 44 ||
[Analyze grammar]

praṇipatya hi rājānaṃ rājyaṃ yadi labhemahi |
śreyaḥ syānna tu mauḍhyena rājangantuṃ parābhavam || 45 ||
[Analyze grammar]

vaicitravīryavacanātkṛpāśīlo yudhiṣṭhiraḥ |
viniyuñjīta rājye tvāṃ govindavacanena ca || 46 ||
[Analyze grammar]

yadbrūyāddhi hṛṣīkeśo rājānamaparājitam |
arjunaṃ bhīmasenaṃ ca sarvaṃ kuryurasaṃśayam || 47 ||
[Analyze grammar]

nātikramiṣyate kṛṣṇo vacanaṃ kauravasya ha |
dhṛtarāṣṭrasya manye'haṃ nāpi kṛṣṇasya pāṇḍavaḥ || 48 ||
[Analyze grammar]

etatkṣamamahaṃ manye tava pārthairavigraham |
na tvā bravīmi kārpaṇyānna prāṇaparirakṣaṇāt |
pathyaṃ rājanbravīmi tvāṃ tatparāsuḥ smariṣyasi || 49 ||
[Analyze grammar]

iti vṛddho vilapyaitatkṛpaḥ śāradvato vacaḥ |
dīrghamuṣṇaṃ ca niḥśvasya śuśoca ca mumoha ca || 50 ||
[Analyze grammar]