Chapter 4

saṃjaya uvāca |
evamuktastato rājā gautamena yaśasvinā |
niḥśvasya dīrghamuṣṇaṃ ca tūṣṇīmāsīdviśāṃ pate || 1 ||
[Analyze grammar]

tato muhūrtaṃ sa dhyātvā dhārtarāṣṭro mahāmanāḥ |
kṛpaṃ śāradvataṃ vākyamityuvāca paraṃtapaḥ || 2 ||
[Analyze grammar]

yatkiṃcitsuhṛdā vācyaṃ tatsarvaṃ śrāvito hyaham |
kṛtaṃ ca bhavatā sarvaṃ prāṇānsaṃtyajya yudhyatā || 3 ||
[Analyze grammar]

gāhamānamanīkāni yudhyamānaṃ mahārathaiḥ |
pāṇḍavairatitejobhirlokastvāmanudṛṣṭavān || 4 ||
[Analyze grammar]

suhṛdā yadidaṃ vācyaṃ bhavatā śrāvito hyaham |
na māṃ prīṇāti tatsarvaṃ mumūrṣoriva bheṣajam || 5 ||
[Analyze grammar]

hetukāraṇasaṃyuktaṃ hitaṃ vacanamuttamam |
ucyamānaṃ mahābāho na me viprāgrya rocate || 6 ||
[Analyze grammar]

rājyādvinikṛto'smābhiḥ kathaṃ so'smāsu viśvaset |
akṣadyūte ca nṛpatirjito'smābhirmahādhanaḥ |
sa kathaṃ mama vākyāni śraddadhyādbhūya eva tu || 7 ||
[Analyze grammar]

tathā dautyena saṃprāptaḥ kṛṣṇaḥ pārthahite rataḥ |
pralabdhaśca hṛṣīkeśastacca karma virodhitam |
sa ca me vacanaṃ brahmankathamevābhimaṃsyate || 8 ||
[Analyze grammar]

vilalāpa hi yatkṛṣṇā sabhāmadhye sameyuṣī |
na tanmarṣayate kṛṣṇo na rājyaharaṇaṃ tathā || 9 ||
[Analyze grammar]

ekaprāṇāvubhau kṛṣṇāvanyonyaṃ prati saṃhatau |
purā yacchrutamevāsīdadya paśyāmi tatprabho || 10 ||
[Analyze grammar]

svasrīyaṃ ca hataṃ śrutvā duḥkhaṃ svapiti keśavaḥ |
kṛtāgaso vayaṃ tasya sa madarthaṃ kathaṃ kṣamet || 11 ||
[Analyze grammar]

abhimanyorvināśena na śarma labhate'rjunaḥ |
sa kathaṃ maddhite yatnaṃ prakariṣyati yācitaḥ || 12 ||
[Analyze grammar]

madhyamaḥ pāṇḍavastīkṣṇo bhīmaseno mahābalaḥ |
pratijñātaṃ ca tenograṃ sa bhajyeta na saṃnamet || 13 ||
[Analyze grammar]

ubhau tau baddhanistriṃśāvubhau cābaddhakaṅkaṭau |
kṛtavairāvubhau vīrau yamāvapi yamopamau || 14 ||
[Analyze grammar]

dhṛṣṭadyumnaḥ śikhaṇḍī ca kṛtavairau mayā saha |
tau kathaṃ maddhite yatnaṃ prakuryātāṃ dvijottama || 15 ||
[Analyze grammar]

duḥśāsanena yatkṛṣṇā ekavastrā rajasvalā |
parikliṣṭā sabhāmadhye sarvalokasya paśyataḥ || 16 ||
[Analyze grammar]

tathā vivasanāṃ dīnāṃ smarantyadyāpi pāṇḍavāḥ |
na nivārayituṃ śakyāḥ saṃgrāmātte paraṃtapāḥ || 17 ||
[Analyze grammar]

yadā ca draupadī kṛṣṇā madvināśāya duḥkhitā |
ugraṃ tepe tapaḥ kṛṣṇā bhartṝṇāmarthasiddhaye |
sthaṇḍile nityadā śete yāvadvairasya yātanā || 18 ||
[Analyze grammar]

nikṣipya mānaṃ darpaṃ ca vāsudevasahodarā |
kṛṣṇāyāḥ preṣyavadbhūtvā śuśrūṣāṃ kurute sadā || 19 ||
[Analyze grammar]

iti sarvaṃ samunnaddhaṃ na nirvāti kathaṃcana |
abhimanyorvināśena sa saṃdheyaḥ kathaṃ mayā || 20 ||
[Analyze grammar]

kathaṃ ca nāma bhuktvemāṃ pṛthivīṃ sāgarāmbarām |
pāṇḍavānāṃ prasādena bhuñjīyāṃ rājyamalpakam || 21 ||
[Analyze grammar]

uparyupari rājñāṃ vai jvalito bhāskaro yathā |
yudhiṣṭhiraṃ kathaṃ paścādanuyāsyāmi dāsavat || 22 ||
[Analyze grammar]

kathaṃ bhuktvā svayaṃ bhogāndattvā dāyāṃśca puṣkalān |
kṛpaṇaṃ vartayiṣyāmi kṛpaṇaiḥ saha jīvikām || 23 ||
[Analyze grammar]

nābhyasūyāmi te vākyamuktaṃ snigdhaṃ hitaṃ tvayā |
na tu saṃdhimahaṃ manye prāptakālaṃ kathaṃcana || 24 ||
[Analyze grammar]

sunītamanupaśyāmi suyuddhena paraṃtapa |
nāyaṃ klībayituṃ kālaḥ saṃyoddhuṃ kāla eva naḥ || 25 ||
[Analyze grammar]

iṣṭaṃ me bahubhiryajñairdattā vipreṣu dakṣiṇāḥ |
prāptāḥ kramaśrutā vedāḥ śatrūṇāṃ mūrdhni ca sthitam || 26 ||
[Analyze grammar]

bhṛtyā me subhṛtāstāta dīnaścābhyuddhṛto janaḥ |
yātāni pararāṣṭrāṇi svarāṣṭramanupālitam || 27 ||
[Analyze grammar]

bhuktāśca vividhā bhogāstrivargaḥ sevito mayā |
pitṝṇāṃ gatamānṛṇyaṃ kṣatradharmasya cobhayoḥ || 28 ||
[Analyze grammar]

na dhruvaṃ sukhamastīha kuto rājyaṃ kuto yaśaḥ |
iha kīrtirvidhātavyā sā ca yuddhena nānyathā || 29 ||
[Analyze grammar]

gṛhe yatkṣatriyasyāpi nidhanaṃ tadvigarhitam |
adharmaḥ sumahāneṣa yacchayyāmaraṇaṃ gṛhe || 30 ||
[Analyze grammar]

araṇye yo vimuñceta saṃgrāme vā tanuṃ naraḥ |
kratūnāhṛtya mahato mahimānaṃ sa gacchati || 31 ||
[Analyze grammar]

kṛpaṇaṃ vilapannārto jarayābhipariplutaḥ |
mriyate rudatāṃ madhye jñātīnāṃ na sa pūruṣaḥ || 32 ||
[Analyze grammar]

tyaktvā tu vividhānbhogānprāptānāṃ paramāṃ gatim |
apīdānīṃ suyuddhena gaccheyaṃ satsalokatām || 33 ||
[Analyze grammar]

śūrāṇāmāryavṛttānāṃ saṃgrāmeṣvanivartinām |
dhīmatāṃ satyasaṃdhānāṃ sarveṣāṃ kratuyājinām || 34 ||
[Analyze grammar]

śastrāvabhṛthamāptānāṃ dhruvaṃ vāsastriviṣṭape |
mudā nūnaṃ prapaśyanti śubhrā hyapsarasāṃ gaṇāḥ || 35 ||
[Analyze grammar]

paśyanti nūnaṃ pitaraḥ pūjitāñśakrasaṃsadi |
apsarobhiḥ parivṛtānmodamānāṃstriviṣṭape || 36 ||
[Analyze grammar]

panthānamamarairyātaṃ śūraiścaivānivartibhiḥ |
api taiḥ saṃgataṃ mārgaṃ vayamapyāruhemahi || 37 ||
[Analyze grammar]

pitāmahena vṛddhena tathācāryeṇa dhīmatā |
jayadrathena karṇena tathā duḥśāsanena ca || 38 ||
[Analyze grammar]

ghaṭamānā madarthe'sminhatāḥ śūrā janādhipāḥ |
śerate lohitāktāṅgāḥ pṛthivyāṃ śaravikṣatāḥ || 39 ||
[Analyze grammar]

uttamāstravidaḥ śūrā yathoktakratuyājinaḥ |
tyaktvā prāṇānyathānyāyamindrasadmasu dhiṣṭhitāḥ || 40 ||
[Analyze grammar]

taistvayaṃ racitaḥ panthā durgamo hi punarbhavet |
saṃpatadbhirmahāvegairito yādbhiśca sadgatim || 41 ||
[Analyze grammar]

ye madarthe hatāḥ śūrāsteṣāṃ kṛtamanusmaran |
ṛṇaṃ tatpratimuñcāno na rājye mana ādadhe || 42 ||
[Analyze grammar]

pātayitvā vayasyāṃśca bhrātṝnatha pitāmahān |
jīvitaṃ yadi rakṣeyaṃ loko māṃ garhayeddhruvam || 43 ||
[Analyze grammar]

kīdṛśaṃ ca bhavedrājyaṃ mama hīnasya bandhubhiḥ |
sakhibhiśca suhṛdbhiśca praṇipatya ca pāṇḍavam || 44 ||
[Analyze grammar]

so'hametādṛśaṃ kṛtvā jagato'sya parābhavam |
suyuddhena tataḥ svargaṃ prāpsyāmi na tadanyathā || 45 ||
[Analyze grammar]

evaṃ duryodhanenoktaṃ sarve saṃpūjya tadvacaḥ |
sādhu sādhviti rājānaṃ kṣatriyāḥ saṃbabhāṣire || 46 ||
[Analyze grammar]

parājayamaśocantaḥ kṛtacittāśca vikrame |
sarve suniścitā yoddhumudagramanaso'bhavan || 47 ||
[Analyze grammar]

tato vāhānsamāśvāsya sarve yuddhābhinandinaḥ |
ūne dviyojane gatvā pratyatiṣṭhanta kauravāḥ || 48 ||
[Analyze grammar]

ākāśe vidrume puṇye prasthe himavataḥ śubhe |
aruṇāṃ sarasvatīṃ prāpya papuḥ sasnuśca tajjalam || 49 ||
[Analyze grammar]

tava putrāḥ kṛtotsāhāḥ paryavartanta te tataḥ |
paryavasthāpya cātmānamanyonyena punastadā |
sarve rājannyavartanta kṣatriyāḥ kālacoditāḥ || 50 ||
[Analyze grammar]