Chapter 68

saṃjaya uvāca |
śalyastu karṇārjunayorvimarde balāni dṛṣṭvā mṛditāni bāṇaiḥ |
duryodhanaṃ yāntamavekṣamāṇo saṃdarśayadbhārata yuddhabhūmim || 1 ||
[Analyze grammar]

nipātitasyandanavājināgaṃ dṛṣṭvā balaṃ taddhatasūtaputram |
duryodhano'śrupratipūrṇanetro muhurmuhurnyaśvasadārtarūpaḥ || 2 ||
[Analyze grammar]

karṇaṃ tu śūraṃ patitaṃ pṛthivyāṃ śarācitaṃ śoṇitadigdhagātram |
yadṛcchayā sūryamivāvanisthaṃ didṛkṣavaḥ saṃparivārya tasthuḥ || 3 ||
[Analyze grammar]

prahṛṣṭavitrastaviṣaṇṇavismṛtāstathāpare śokagatā ivābhavan |
pare tvadīyāśca paraspareṇa yathā yathaiṣāṃ prakṛtistathābhavan || 4 ||
[Analyze grammar]

praviddhavarmābharaṇāmbarāyudhaṃ dhanaṃjayenābhihataṃ hataujasam |
niśamya karṇaṃ kuravaḥ pradudruvurhatarṣabhā gāva ivākulākulāḥ || 5 ||
[Analyze grammar]

kṛtvā vimardaṃ bhṛśamarjunena karṇaṃ hataṃ kesariṇeva nāgam |
dṛṣṭvā śayānaṃ bhuvi madrarājo bhīto'pasarpatsarathaḥ suśīghram || 6 ||
[Analyze grammar]

madrādhipaścāpi vimūḍhacetāstūrṇaṃ rathenāpahṛtadhvajena |
duryodhanasyāntikametya śīghraṃ saṃbhāṣya duḥkhārtamuvāca vākyam || 7 ||
[Analyze grammar]

viśīrṇanāgāśvarathapravīraṃ balaṃ tvadiyaṃ yamarāṣṭrakalpam |
anyonyamāsādya hataṃ mahadbhirnarāśvanāgairgirikūṭakalpaiḥ || 8 ||
[Analyze grammar]

naitādṛśaṃ bhārata yuddhamāsīdyathādya karṇārjunayorbabhūva |
grastau hi karṇena sametya kṛṣṇāvanye ca sarve tava śatravo ye || 9 ||
[Analyze grammar]

daivaṃ tu yattatsvavaśaṃ pravṛttaṃ tatpāṇḍavānpāti hinasti cāsmān |
tavārthasiddhyarthakarā hi sarve prasahya vīrā nihatā dviṣadbhiḥ || 10 ||
[Analyze grammar]

kuberavaivasvatavāsavānāṃ tulyaprabhāvāmbupateśca vīrāḥ |
vīryeṇa śauryeṇa balena caiva taistaiśca yuktā vipulairguṇaughaiḥ || 11 ||
[Analyze grammar]

avadhyakalpā nihatā narendrāstavārthakāmā yudhi pāṇḍaveyaiḥ |
tanmā śuco bhārata diṣṭametatparyāyasiddhirna sadāsti siddhiḥ || 12 ||
[Analyze grammar]

etadvaco madrapaterniśamya svaṃ cāpanītaṃ manasā nirīkṣya |
duryodhano dīnamanā visaṃjñaḥ punaḥ punarnyaśvasadārtarūpaḥ || 13 ||
[Analyze grammar]

taṃ dhyānamūkaṃ kṛpaṇaṃ bhṛśārtamārtāyanirdīnamuvāca vākyam |
paśyedamugraṃ naravājināgairāyodhanaṃ vīrahataiḥ prapannam || 14 ||
[Analyze grammar]

mahīdharābhaiḥ patitairmahāgajaiḥ sakṛtpraviddhaiḥ śaraviddhamarmabhiḥ |
tairvihvaladbhiśca gatāsubhiśca pradhvastayantrāyudhavarmayodhaiḥ || 15 ||
[Analyze grammar]

vajrāpaviddhairiva cācalendrairvibhinnapāṣāṇamṛgadrumauṣadhaiḥ |
praviddhaghaṇṭāṅkuśatomaradhvajaiḥ sahemamālai rudhiraughasaṃplutaiḥ || 16 ||
[Analyze grammar]

śarāvabhinnaiḥ patitaiśca vājibhiḥ śvasadbhiranyaiḥ kṣatajaṃ vamadbhiḥ |
dīnaiḥ stanadbhiḥ parivṛttanetrairmahīṃ daśadbhiḥ kṛpaṇaṃ nadadbhiḥ || 17 ||
[Analyze grammar]

tathāpaviddhairgajavājiyodhairmandāsubhiścaiva gatāsubhiśca |
narāśvanāgaiśca rathaiśca marditairmahī mahāvaitaraṇīva durdṛśā || 18 ||
[Analyze grammar]

gajairnikṛttāparahastagātrairudvepamānaiḥ patitaiḥ pṛthivyām |
yaśasvibhirnāgarathāśvayodhibhiḥ padātibhiścābhimukhairhataiḥ paraiḥ |
viśīrṇavarmābharaṇāmbarāyudhairvṛtā niśāntairiva pāvakairmahī || 19 ||
[Analyze grammar]

śaraprahārābhihatairmahābalairavekṣyamāṇaiḥ patitaiḥ sahasraśaḥ |
pranaṣṭasaṃjñaiḥ punarucchvasadbhirmahī babhūvānugatairivāgnibhiḥ |
divaścyutairbhūratidīptimadbhirnaktaṃ grahairdyauramaleva dīptaiḥ || 20 ||
[Analyze grammar]

śarāstu karṇārjunabāhumuktā vidārya nāgāśvamanuṣyadehān |
prāṇānnirasyāśu mahīmatīyurmahoragā vāsamivābhito'straiḥ || 21 ||
[Analyze grammar]

hatairmanuṣyāśvagajaiśca saṃkhye śarāvabhinnaiśca rathairbabhūva |
dhanaṃjayasyādhiratheśca mārge gajairagamyā vasudhātidurgā || 22 ||
[Analyze grammar]

rathairvareṣūnmathitaiśca yodhaiḥ saṃsyūtasūtāśvavarāyudhadhvajaiḥ |
viśīrṇaśastrairvinikṛttabandhurairnikṛttacakrākṣayugatriveṇubhiḥ || 23 ||
[Analyze grammar]

vimuktayantrairnihatairayasmayairhatānuṣaṅgairviniṣaṅgabandhuraiḥ |
prabhagnanīḍairmaṇihemamaṇḍitaiḥ stṛtā mahī dyauriva śāradairghanaiḥ || 24 ||
[Analyze grammar]

vikṛṣyamaṇairjavanairalaṃkṛtairhateśvarairājirathaiḥ sukalpitaiḥ |
manuṣyamātaṅgarathāśvarāśibhirdrutaṃ vrajanto bahudhā vicūrṇitāḥ || 25 ||
[Analyze grammar]

sahemapaṭṭāḥ parighāḥ paraśvadhāḥ kaḍaṅgarāyomusalāni paṭṭiśāḥ |
petuśca khaḍgā vimalā vikośā gadāśca jāmbūnadapaṭṭabaddhāḥ || 26 ||
[Analyze grammar]

cāpāni rukmāṅgadabhūṣaṇāni śarāśca kārtasvaracitrapuṅkhāḥ |
ṛṣṭyaśca pītā vimalā vikośāḥ prāsāḥ sakhaḍgāḥ kanakāvabhāsāḥ || 27 ||
[Analyze grammar]

chatrāṇi vālavyajanāni śaṅkhāḥ srajaśca puṣpottamahemacitrāḥ |
kuthāḥ patākāmbaraveṣṭitāśca kirīṭamālā mukuṭāśca śubhrāḥ || 28 ||
[Analyze grammar]

prakīrṇakā viprakīrṇāḥ kuthāśca pradhānamuktātaralāśca hārāḥ |
āpīḍakeyūravarāṅgadāni graiveyaniṣkāḥ sasuvarṇasūtrāḥ || 29 ||
[Analyze grammar]

maṇyuttamā vajrasuvarṇamuktā ratnāni coccāvacamaṅgalāni |
gātrāṇi cātyantasukhocitāni śirāṃsi cendupratimānanāni || 30 ||
[Analyze grammar]

dehāṃśca bhogāṃśca paricchadāṃśca tyaktvā manojñāni sukhāni cāpi |
svadharmaniṣṭhāṃ mahatīmavāpya vyāptāṃśca lokānyaśasā samīyuḥ || 31 ||
[Analyze grammar]

ityevamuktvā virarāma śalyo duryodhanaḥ śokaparītacetāḥ |
hā karṇa hā karṇa iti bruvāṇa ārto visaṃjño bhṛśamaśrunetraḥ || 32 ||
[Analyze grammar]

taṃ droṇaputrapramukhā narendrāḥ sarve samāśvāsya saha prayānti |
nirīkṣamāṇā muhurarjunasya dhvajaṃ mahāntaṃ yaśasā jvalantam || 33 ||
[Analyze grammar]

narāśvamātaṅgaśarīrajena raktena siktā rudhireṇa bhūmiḥ |
raktāmbarasraktapanīyayogānnārī prakāśā iva sarvagamyā || 34 ||
[Analyze grammar]

pracchannarūpā rudhireṇa rājanraudre muhūrte'tivirājamānāḥ |
naivāvatasthuḥ kuravaḥ samīkṣya pravrājitā devalokāśca sarve || 35 ||
[Analyze grammar]

vadhena karṇasya suduḥkhitāste hā karṇa hā karṇa iti bruvāṇāḥ |
drutaṃ prayātāḥ śibirāṇi rājandivākaraṃ raktamavekṣamāṇāḥ || 36 ||
[Analyze grammar]

gāṇḍīvamuktaistu suvarṇapuṅkhaiḥ śitaiḥ śaraiḥ śoṇitadigdhavājaiḥ |
śaraiścitāṅgo bhuvi bhāti karṇo hato'pi sansūrya ivāṃśumālī || 37 ||
[Analyze grammar]

karṇasya dehaṃ rudhirāvasiktaṃ bhaktānukampī bhagavānvivasvān |
spṛṣṭvā karairlohitaraktarūpaḥ siṣṇāsurabhyeti paraṃ samudram || 38 ||
[Analyze grammar]

itīva saṃcintya surarṣisaṃghāḥ saṃprasthitā yānti yathāniketam |
saṃcintayitvā ca janā visasruryathāsukhaṃ khaṃ ca mahītalaṃ ca || 39 ||
[Analyze grammar]

tadadbhutaṃ prāṇabhṛtāṃ bhayaṃkaraṃ niśamya yuddhaṃ kuruvīramukhyayoḥ |
dhanaṃjayasyādhiratheśca vismitāḥ praśaṃsamānāḥ prayayustadā janāḥ || 40 ||
[Analyze grammar]

śaraiḥ saṃkṛttavarmāṇaṃ vīraṃ viśasane hatam |
gatāsumapi rādheyaṃ naiva lakṣmīrvyamuñcata || 41 ||
[Analyze grammar]

nānābharaṇavānrājanmṛṣṭajāmbūnadāṅgadaḥ |
hato vaikartanaḥ śete pādapo'ṅkuravāniva || 42 ||
[Analyze grammar]

kanakottamasaṃkāśaḥ pradīpta iva pāvakaḥ |
saputraḥ puruṣavyāghraḥ saṃśāntaḥ pārthatejasā |
pratāpya pāṇḍavānrājanpāñcālāṃścāstratejasā || 43 ||
[Analyze grammar]

dadānītyeva yo'vocanna nāstītyarthito'rthibhiḥ |
sadbhiḥ sadā satpuruṣaḥ sa hato dvairathe vṛṣaḥ || 44 ||
[Analyze grammar]

yasya brāhmaṇasātsarvamātmārthaṃ na mahātmanaḥ |
nādeyaṃ brāhmaṇeṣvāsīdyasya svamapi jīvitam || 45 ||
[Analyze grammar]

sadā nṝṇāṃ priyo dātā priyadāno divaṃ gataḥ |
ādāya tava putrāṇāṃ jayāśāṃ śarma varma ca || 46 ||
[Analyze grammar]

hate sma karṇe sarito na sravanti jagāma cāstaṃ kaluṣo divākaraḥ |
grahaśca tiryagjvalitārkavarṇo yamasya putro'bhyudiyāya rājan || 47 ||
[Analyze grammar]

nabhaḥ paphālātha nanāda corvī vavuśca vātāḥ paruṣātivelam |
diśaḥ sadhūmāśca bhṛśaṃ prajajvalurmahārṇavāścukṣubhire ca sasvanāḥ || 48 ||
[Analyze grammar]

sakānanāḥ sādricayāścakampuḥ pravivyathurbhūtagaṇāśca māriṣa |
bṛhaspatī rohiṇīṃ saṃprapīḍya babhūva candrārkasamānavarṇaḥ || 49 ||
[Analyze grammar]

hate karṇe na diśo viprajajñustamovṛtā dyaurvicacāla bhūmiḥ |
papāta colkā jvalanaprakāśā niśācarāścāpyabhavanprahṛṣṭāḥ || 50 ||
[Analyze grammar]

śaśiprakāśānanamarjuno yadā kṣureṇa karṇasya śiro nyapātayat |
athāntarikṣe divi ceha cāsakṛdbabhūva hāheti janasya nisvanaḥ || 51 ||
[Analyze grammar]

sa devagandharvamanuṣyapūjitaṃ nihatya karṇaṃ ripumāhave'rjunaḥ |
rarāja pārthaḥ parameṇa tejasā vṛtraṃ nihatyeva sahasralocanaḥ || 52 ||
[Analyze grammar]

tato rathenāmbudavṛndanādinā śarannabhomadhyagabhāskaratviṣā |
patākinā bhīmaninādaketunā himenduśaṅkhasphaṭikāvabhāsinā |
suvarṇamuktāmaṇivajravidrumairalaṃkṛtenāpratimānaraṃhasā || 53 ||
[Analyze grammar]

narottamau pāṇḍavakeśimardanāvudāhitāvagnidivākaropamau |
raṇājire vītabhayau virejatuḥ samānayānāviva viṣṇuvāsavau || 54 ||
[Analyze grammar]

tato dhanurjyātalaneminisvanaiḥ prasahya kṛtvā ca ripūnhataprabhān |
saṃsādhayitvaiva kurūñśaraughaiḥ kapidhvajaḥ pakṣivaradhvajaśca |
prasahya śaṅkhau dhamatuḥ sughoṣau manāṃsyarīṇāmavasādayantau || 55 ||
[Analyze grammar]

suvarṇajālāvatatau mahāsvanau himāvadātau parigṛhya pāṇibhiḥ |
cucumbatuḥ śaṅkhavarau nṛṇāṃ varau varānanābhyāṃ yugapacca dadhmatuḥ || 56 ||
[Analyze grammar]

pāñcajanyasya nirghoṣo devadattasya cobhayoḥ |
pṛthivīmantarikṣaṃ ca dyāmapaścāpyapūrayat || 57 ||
[Analyze grammar]

tau śaṅkhaśabdena ninādayantau vanāni śailānsarito diśaśca |
vitrāsayantau tava putrasenāṃ yudhiṣṭhiraṃ nandayataḥ sma vīrau || 58 ||
[Analyze grammar]

tataḥ prayātāḥ kuravo javena śrutvaiva śaṅkhasvanamīryamāṇam |
vihāya madrādhipatiṃ patiṃ ca duryodhanaṃ bhārata bhāratānām || 59 ||
[Analyze grammar]

mahāhave taṃ bahu śobhamānaṃ dhanaṃjayaṃ bhūtagaṇāḥ sametāḥ |
tadānvamodanta janārdanaṃ ca prabhākarāvabhyuditau yathaiva || 60 ||
[Analyze grammar]

samācitau karṇaśaraiḥ paraṃtapāvubhau vyabhātāṃ samare'cyutārjunau |
tamo nihatyābhyuditau yathāmalau śaśāṅkasūryāviva raśmimālinau || 61 ||
[Analyze grammar]

vihāya tānbāṇagaṇānathāgatau suhṛdvṛtāvapratimānavikramau |
sukhaṃ praviṣṭau śibiraṃ svamīśvarau sadasyahūtāviva vāsavācyutau || 62 ||
[Analyze grammar]

sadevagandharvamanuṣyacāraṇairmaharṣibhiryakṣamahoragairapi |
jayābhivṛddhyā parayābhipūjitau nihatya karṇaṃ paramāhave tadā || 63 ||
[Analyze grammar]