Chapter 59

saṃjaya uvāca |
taṃ tu yāntaṃ mahāvegairaśvaiḥ kapivaradhvajam |
yuddhāyābhyadravanvīrāḥ kurūṇāṃ navatī rathāḥ |
parivavrurnaravyāghrā naravyāghraṃ raṇe'rjunam || 1 ||
[Analyze grammar]

kṛṣṇaḥ śvetānmahāvegānaśvānkanakabhūṣaṇān |
muktājālapraticchannānpraiṣītkarṇarathaṃ prati || 2 ||
[Analyze grammar]

tataḥ karṇarathaṃ yāntamarīnghnantaṃ dhanaṃjayam |
bāṇavarṣairabhighnantaḥ saṃśaptakarathā yayuḥ || 3 ||
[Analyze grammar]

tvaramāṇāṃstu tānsarvānsasūteṣvasanadhvajān |
jaghāna navatiṃ vīrānarjuno niśitaiḥ śaraiḥ || 4 ||
[Analyze grammar]

te'patanta hatā bāṇairnānārūpaiḥ kirīṭinā |
savimānā yathā siddhāḥ svargātpuṇyakṣaye tathā || 5 ||
[Analyze grammar]

tataḥ sarathanāgāśvāḥ kuravaḥ kurusattama |
nirbhayā bharataśreṣṭhamabhyavartanta phalgunam || 6 ||
[Analyze grammar]

tadāyastamamuktāstramudīrṇavaravāraṇam |
putrāṇāṃ te mahatsainyaṃ samarautsīddhanaṃjayaḥ || 7 ||
[Analyze grammar]

śaktyṛṣṭitomaraprāsairgadānistriṃśasāyakaiḥ |
prācchādayanmaheṣvāsāḥ kuravaḥ kurunandanam || 8 ||
[Analyze grammar]

tāṃ kurūṇāṃ pravitatāṃ śastravṛṣṭiṃ samudyatām |
vyadhamatpāṇḍavo bāṇaistamaḥ sūrya ivāṃśubhiḥ || 9 ||
[Analyze grammar]

tato mlecchāḥ sthitairmattaistrayodaśaśatairgajaiḥ |
pārśvato'bhyahananpārthaṃ tava putrasya śāsanāt || 10 ||
[Analyze grammar]

karṇinālīkanārācaistomaraiḥ prāsaśaktibhiḥ |
kampanairbhiṇḍipālaiśca rathasthaṃ pārthamārdayan || 11 ||
[Analyze grammar]

tāmastravṛṣṭiṃ prahitāṃ dvipasthairyavanaiḥ smayan |
ciccheda niśitairbhallairardhacandraiśca phalgunaḥ || 12 ||
[Analyze grammar]

atha tāndviradānsarvānnānāliṅgairmahāśaraiḥ |
sapatākānsahārohāngirīnvajrairivābhinat || 13 ||
[Analyze grammar]

te hemapuṅkhairiṣubhirācitā hemamālinaḥ |
hatāḥ peturmahānāgāḥ sāgnijvālā ivādrayaḥ || 14 ||
[Analyze grammar]

tato gāṇḍīvanirghoṣo mahānāsīdviśāṃ pate |
stanatāṃ kūjatāṃ caiva manuṣyagajavājinām || 15 ||
[Analyze grammar]

kuñjarāśca hatā rājanprādravaṃste samantataḥ |
aśvāśca paryadhāvanta hatārohā diśo daśa || 16 ||
[Analyze grammar]

rathā hīnā mahārāja rathibhirvājibhistathā |
gandharvanagarākārā dṛśyante sma sahasraśaḥ || 17 ||
[Analyze grammar]

aśvārohā mahārāja dhāvamānāstatastataḥ |
tatra tatraiva dṛśyante patitāḥ pārthasāyakaiḥ || 18 ||
[Analyze grammar]

tasminkṣaṇe pāṇḍavasya bāhvorbalamadṛśyata |
yatsādino vāraṇāṃśca rathāṃścaiko'jayadyudhi || 19 ||
[Analyze grammar]

tatastryaṅgeṇa mahatā balena bharatarṣabha |
dṛṣṭvā parivṛtaṃ rājanbhīmasenaḥ kirīṭinam || 20 ||
[Analyze grammar]

hatāvaśeṣānutsṛjya tvadīyānkaticidrathān |
javenābhyadravadrājandhanaṃjayarathaṃ prati || 21 ||
[Analyze grammar]

tatastatprādravatsainyaṃ hatabhūyiṣṭhamāturam |
dṛṣṭvā yadarjunaṃ bhīmo jagāma bhrātaraṃ prati || 22 ||
[Analyze grammar]

hatāvaśiṣṭāṃsturagānarjunena mahājavān |
bhīmo vyadhamadabhrānto gadāpāṇirmahāhave || 23 ||
[Analyze grammar]

kālarātrimivātyugrāṃ naranāgāśvabhojanām |
prākārāṭṭapuradvāradāraṇīmatidāruṇām || 24 ||
[Analyze grammar]

tato gadāṃ nṛnāgāśveṣvāśu bhīmo vyavāsṛjat |
sā jaghāna bahūnaśvānaśvārohāṃśca māriṣa || 25 ||
[Analyze grammar]

kāṃsyāyasatanutrāṃstānnarānaśvāṃśca pāṇḍavaḥ |
pothayāmāsa gadayā saśabdaṃ te'patanhatāḥ || 26 ||
[Analyze grammar]

hatvā tu tadgajānīkaṃ bhīmaseno mahābalaḥ |
punaḥ svarathamāsthāya pṛṣṭhato'rjunamanvagāt || 27 ||
[Analyze grammar]

hataṃ parāṅmukhaprāyaṃ nirutsāhaṃ paraṃ balam |
vyālambata mahārāja prāyaśaḥ śastraveṣṭitam || 28 ||
[Analyze grammar]

vilambamānaṃ tatsainyamapragalbhamavasthitam |
dṛṣṭvā prācchādayadbāṇairarjunaḥ prāṇatāpanaiḥ || 29 ||
[Analyze grammar]

tataḥ kurūṇāmabhavadārtanādo mahāmṛdhe |
rathāśvanāgāsuharairvadhyatāmarjuneṣubhiḥ || 30 ||
[Analyze grammar]

hāhākṛtaṃ bhṛśaṃ tasthau līyamānaṃ parasparam |
alātacakravatsainyaṃ tadābhramata tāvakam || 31 ||
[Analyze grammar]

ādīptaṃ tava tatsainyaṃ śaraiśchinnatanucchadam |
āsītsvaśoṇitaklinnaṃ phullāśokavanaṃ yathā || 32 ||
[Analyze grammar]

taddṛṣṭvā kuravastatra vikrāntaṃ savyasācinaḥ |
nirāśāḥ samapadyanta sarve karṇasya jīvite || 33 ||
[Analyze grammar]

aviṣahyaṃ tu pārthasya śarasaṃpātamāhave |
matvā nyavartankuravo jitā gāṇḍīvadhanvanā || 34 ||
[Analyze grammar]

te hitvā samare pārthaṃ vadhyamānāśca sāyakaiḥ |
pradudruvurdiśo bhītāścukruśuścāpi sūtajam || 35 ||
[Analyze grammar]

abhyadravata tānpārthaḥ kirañśaraśatānbahūn |
harṣayanpāṇḍavānyodhānbhīmasenapurogamān || 36 ||
[Analyze grammar]

putrāstu te mahārāja jagmuḥ karṇarathaṃ prati |
agādhe majjatāṃ teṣāṃ dvīpaḥ karṇo'bhavattadā || 37 ||
[Analyze grammar]

kuravo hi mahārāja nirviṣāḥ pannagā iva |
karṇamevopalīyanta bhayādgāṇḍīvadhanvanaḥ || 38 ||
[Analyze grammar]

yathā sarvāṇi bhūtāni mṛtyorbhītāni bhārata |
dharmamevopalīyante karmavanti hi yāni ca || 39 ||
[Analyze grammar]

tathā karṇaṃ maheṣvāsaṃ putrāstava narādhipa |
upālīyanta saṃtrāsātpāṇḍavasya mahātmanaḥ || 40 ||
[Analyze grammar]

tāñśoṇitapariklinnānviṣamasthāñśarāturān |
mā bhaiṣṭetyabravītkarṇo hyabhito māmiteti ca || 41 ||
[Analyze grammar]

saṃbhagnaṃ hi balaṃ dṛṣṭvā balātpārthena tāvakam |
dhanurvisphārayankarṇastasthau śatrujighāṃsayā |
pāñcālānpunarādhāvatpaśyataḥ savyasācinaḥ || 42 ||
[Analyze grammar]

tataḥ kṣaṇena kṣitipāḥ kṣatajapratimekṣaṇāḥ |
karṇaṃ vavarṣurbāṇaughairyathā meghā mahīdharam || 43 ||
[Analyze grammar]

tataḥ śarasahasrāṇi karṇamuktāni māriṣa |
vyayojayanta pāñcālānprāṇaiḥ prāṇabhṛtāṃ vara || 44 ||
[Analyze grammar]

tato raṇo mahānāsītpāñcālānāṃ viśāṃ pate |
vadhyatāṃ sūtaputreṇa mitrārthe'mitraghātinām || 45 ||
[Analyze grammar]