Chapter 60

saṃjaya uvāca |
tataḥ karṇaḥ kuruṣu pradruteṣu varūthinā śvetahayena rājan |
pāñcālaputrānvyadhamatsūtaputro maheṣubhirvāta ivābhrasaṃghān || 1 ||
[Analyze grammar]

sūtaṃ rathādañjalikena pātya jaghāna cāśvāñjanamejayasya |
śatānīkaṃ sutasomaṃ ca bhallairavākiraddhanuṣī cāpyakṛntat || 2 ||
[Analyze grammar]

dhṛṣṭadyumnaṃ nirbibhedātha ṣaḍbhirjaghāna cāśvaṃ dakṣiṇaṃ tasya saṃkhye |
hatvā cāśvānsātyakeḥ sūtaputraḥ kaikeyaputraṃ nyavadhīdviśokam || 3 ||
[Analyze grammar]

tamabhyadhāvannihate kumāre kaikeyasenāpatirugradhanvā |
śarairvibhinnaṃ bhṛśamugravegaiḥ karṇātmajaṃ so'bhyahanatsuṣeṇam || 4 ||
[Analyze grammar]

tasyārdhacandraistribhiruccakarta prasahya bāhū ca śiraśca karṇaḥ |
sa syandanādgāmapatadgatāsuḥ paraśvadhaiḥ śāla ivāvarugṇaḥ || 5 ||
[Analyze grammar]

hatāśvamañjogatibhiḥ suṣeṇaḥ śinipravīraṃ niśitaiḥ pṛṣatkaiḥ |
pracchādya nṛtyanniva sautiputraḥ śaineyabāṇābhihataḥ papāta || 6 ||
[Analyze grammar]

putre hate krodhaparītacetāḥ karṇaḥ śinīnāmṛṣabhaṃ jighāṃsuḥ |
hato'si śaineya iti bruvansa vyavāsṛjadbāṇamamitrasāham || 7 ||
[Analyze grammar]

sa tasya ciccheda śaraṃ śikhaṇḍī tribhistribhiśca pratutoda karṇam |
śikhaṇḍinaḥ kārmukaṃ sa dhvajaṃ ca cchittvā śarābhyāmahanatsujātam || 8 ||
[Analyze grammar]

śikhaṇḍinaṃ ṣaḍbhiravidhyadugro dānto dhārṣṭadyumnaśiraścakarta |
athābhinatsutasomaṃ śareṇa sa saṃśitenādhirathirmahātmā || 9 ||
[Analyze grammar]

athākrande tumule vartamāne dhārṣṭadyumne nihate tatra kṛṣṇaḥ |
apāñcālyaṃ kriyate yāhi pārtha karṇaṃ jahītyabravīdrājasiṃha || 10 ||
[Analyze grammar]

tataḥ prahasyāśu narapravīro rathaṃ rathenādhiratherjagāma |
bhaye teṣāṃ trāṇamicchansubāhurabhyāhatānāṃ rathayūthapena || 11 ||
[Analyze grammar]

visphārya gāṇḍīvamathograghoṣaṃ jyayā samāhatya tale bhṛśaṃ ca |
bāṇāndhakāraṃ sahasaiva kṛtvā jaghāna nāgāśvarathānnarāṃśca || 12 ||
[Analyze grammar]

taṃ bhīmaseno'nu yayau rathena pṛṣṭhe rakṣanpāṇḍavamekavīram |
tau rājaputrau tvaritau rathābhyāṃ karṇāya yātāvaribhirvimuktau || 13 ||
[Analyze grammar]

atrāntare sumahatsūtaputraścakre yuddhaṃ somakānsaṃpramṛdnan |
rathāśvamātaṅgagaṇāñjaghāna pracchādayāmāsa diśaḥ śaraiśca || 14 ||
[Analyze grammar]

tamuttamaujā janamejayaśca kruddhau yudhāmanyuśikhaṇḍinau ca |
karṇaṃ vineduḥ sahitāḥ pṛṣatkaiḥ saṃmardamānāḥ saha pārṣatena || 15 ||
[Analyze grammar]

te pañca pāñcālarathāḥ surūpairvaikartanaṃ karṇamabhidravantaḥ |
tasmādrathāccyāvayituṃ na śekurdhairyātkṛtātmānamivendriyāṇi || 16 ||
[Analyze grammar]

teṣāṃ dhanūṃṣi dhvajavājisūtāṃstūṇaṃ patākāśca nikṛtya bāṇaiḥ |
tānpañcabhiḥ sa tvahanatpṛṣatkaiḥ karṇastataḥ siṃha ivonnanāda || 17 ||
[Analyze grammar]

tasyāsyatastānabhinighnataśca jyābāṇahastasya dhanuḥsvanena |
sādridrumā syātpṛthivī viśīrṇā ityeva matvā janatā vyaṣīdat || 18 ||
[Analyze grammar]

sa śakracāpapratimena dhanvanā bhṛśātatenādhirathiḥ śarānsṛjan |
babhau raṇe dīptamarīcimaṇḍalo yathāṃśumālī pariveṣavāṃstathā || 19 ||
[Analyze grammar]

śikhaṇḍinaṃ dvādaśabhiḥ parābhinacchitaiḥ śaraiḥ ṣaḍbhirathottamaujasam |
tribhiryudhāmanyumavidhyadāśugaistribhistribhiḥ somakapārṣatātmajau || 20 ||
[Analyze grammar]

parājitāḥ pañca mahārathāstu te mahāhave sūtasutena māriṣa |
nirudyamāstasthuramitramardanā yathendriyārthātmavatā parājitāḥ || 21 ||
[Analyze grammar]

nimajjatastānatha karṇasāgare vipannanāvo vaṇijo yathārṇave |
uddadhrire naubhirivārṇavādrathaiḥ sukalpitairdraupadijāḥ svamātulān || 22 ||
[Analyze grammar]

tataḥ śinīnāmṛṣabhaḥ śitaiḥ śarairnikṛtya karṇaprahitāniṣūnbahūn |
vidārya karṇaṃ niśitairayasmayaistavātmajaṃ jyeṣṭhamavidhyadaṣṭabhiḥ || 23 ||
[Analyze grammar]

kṛpo'tha bhojaśca tavātmajastathā svayaṃ ca karṇo niśitairatāḍayat |
sa taiścaturbhiryuyudhe yadūttamo digīśvarairdaityapatiryathā tathā || 24 ||
[Analyze grammar]

samānateneṣvasanena kūjatā bhṛśātatenāmitabāṇavarṣiṇā |
babhūva durdharṣataraḥ sa sātyakiḥ śarannabhomadhyagato yathā raviḥ || 25 ||
[Analyze grammar]

punaḥ samāsādya rathānsudaṃśitāḥ śinipravīraṃ jugupuḥ paraṃtapāḥ |
sametya pāñcālarathā mahāraṇe marudgaṇāḥ śakramivārinigrahe || 26 ||
[Analyze grammar]

tato'bhavadyuddhamatīva dāruṇaṃ tavāhitānāṃ tava sainikaiḥ saha |
rathāśvamātaṅgavināśanaṃ tathā yathā surāṇāmasuraiḥ purābhavat || 27 ||
[Analyze grammar]

rathadvipā vājipadātayo'pi vā bhramanti nānāvidhaśastraveṣṭitāḥ |
paraspareṇābhihatāśca caskhalurvinedurārtā vyasavo'patanta ca || 28 ||
[Analyze grammar]

tathā gate bhīmamabhīstavātmajaḥ sasāra rājāvarajaḥ kirañśaraiḥ |
tamabhyadhāvattvarito vṛkodaro mahāruruṃ siṃha ivābhipetivān || 29 ||
[Analyze grammar]

tatastayoryuddhamatītamānuṣaṃ pradīvyatoḥ prāṇadurodare'bhavat |
paraspareṇābhiniviṣṭaroṣayorudagrayoḥ śambaraśakrayoryathā || 30 ||
[Analyze grammar]

śaraiḥ śarīrāntakaraiḥ sutejanairnijaghnatustāvitaretaraṃ bhṛśam |
sakṛtprabhinnāviva vāśitāntare mahāgajau manmathasaktacetasau || 31 ||
[Analyze grammar]

tavātmajasyātha vṛkodarastvarandhanuḥ kṣurābhyāṃ dhvajameva cācchinat |
lalāṭamapyasya bibheda patriṇā śiraśca kāyātprajahāra sāratheḥ || 32 ||
[Analyze grammar]

sa rājaputro'nyadavāpya kārmukaṃ vṛkodaraṃ dvādaśabhiḥ parābhinat |
svayaṃ niyacchaṃsturagānajihmagaiḥ śaraiśca bhīmaṃ punarabhyavīvṛṣat || 33 ||
[Analyze grammar]