Chapter 29

saṃjaya uvāca |
madrādhipasyādhirathistadaivaṃ vaco niśamyāpriyamapratītaḥ |
uvāca śalyaṃ viditaṃ mamaitadyathāvidhāvarjunavāsudevau || 1 ||
[Analyze grammar]

śaure rathaṃ vāhayato'rjunasya balaṃ mahāstrāṇi ca pāṇḍavasya |
ahaṃ vijānāmi yathāvadadya parokṣabhūtaṃ tava tattu śalya || 2 ||
[Analyze grammar]

tau cāpradhṛṣyau śastrabhṛtāṃ variṣṭhau vyapetabhīryodhayiṣyāmi kṛṣṇau |
saṃtāpayatyabhyadhikaṃ tu rāmācchāpo'dya māṃ brāhmaṇasattamācca || 3 ||
[Analyze grammar]

avātsaṃ vai brāhmaṇacchadmanāhaṃ rāme purā divyamastraṃ cikīrṣuḥ |
tatrāpi me devarājena vighno hitārthinā phalgunasyaiva śalya || 4 ||
[Analyze grammar]

kṛto'vabhedena mamorumetya praviśya kīṭasya tanuṃ virūpām |
gurorbhayāccāpi na celivānahaṃ taccāvabuddho dadṛśe sa vipraḥ || 5 ||
[Analyze grammar]

pṛṣṭaścāhaṃ tamavocaṃ maharṣiṃ sūto'hamasmīti sa māṃ śaśāpa |
sūtopadhāvāptamidaṃ tvayāstraṃ na karmakāle pratibhāsyati tvām || 6 ||
[Analyze grammar]

anyatra yasmāttava mṛtyukālādabrāhmaṇe brahma na hi dhruvaṃ syāt |
tadadya paryāptamatīva śastramasminsaṃgrāme tumule tāta bhīme || 7 ||
[Analyze grammar]

apāṃ patirvegavānaprameyo nimajjayiṣyannivahānprajānām |
mahānagaṃ yaḥ kurute samudraṃ velaiva taṃ vārayatyaprameyam || 8 ||
[Analyze grammar]

pramuñcantaṃ bāṇasaṃghānamoghānmarmacchido vīrahaṇaḥ sapatrān |
kuntīputraṃ pratiyotsyāmi yuddhe jyākarṣiṇāmuttamamadya loke || 9 ||
[Analyze grammar]

evaṃ balenātibalaṃ mahāstraṃ samudrakalpaṃ sudurāpamugram |
śaraughiṇaṃ pārthivānmajjayantaṃ veleva pārthamiṣubhiḥ saṃsahiṣye || 10 ||
[Analyze grammar]

adyāhave yasya na tulyamanyaṃ manye manuṣyaṃ dhanurādadānam |
surāsurānvai yudhi yo jayeta tenādya me paśya yuddhaṃ sughoram || 11 ||
[Analyze grammar]

atimānī pāṇḍavo yuddhakāmo amānuṣaireṣyati me mahāstraiḥ |
tasyāstramastrairabhihatya saṃkhye śarottamaiḥ pātayiṣyāmi pārtham || 12 ||
[Analyze grammar]

divākareṇāpi samaṃ tapantaṃ samāptaraśmiṃ yaśasā jvalantam |
tamonudaṃ megha ivātimātro dhanaṃjayaṃ chādayiṣyāmi bāṇaiḥ || 13 ||
[Analyze grammar]

vaiśvānaraṃ dhūmaśikhaṃ jvalantaṃ tejasvinaṃ lokamimaṃ dahantam |
megho bhūtvā śaravarṣairyathāgniṃ tathā pārthaṃ śamayiṣyāmi yuddhe || 14 ||
[Analyze grammar]

pramāthinaṃ balavantaṃ prahāriṇaṃ prabhañjanaṃ mātariśvānamugram |
yuddhe sahiṣye himavānivācalo dhanaṃjayaṃ kruddhamamṛṣyamāṇam || 15 ||
[Analyze grammar]

viśāradaṃ rathamārgeṣvasaktaṃ dhuryaṃ nityaṃ samareṣu pravīram |
loke varaṃ sarvadhanurdharāṇāṃ dhanaṃjayaṃ saṃyuge saṃsahiṣye || 16 ||
[Analyze grammar]

adyāhave yasya na tulyamanyaṃ madhyemanuṣyaṃ dhanurādadānam |
sarvāmimāṃ yaḥ pṛthivīṃ saheta tathā vidvānyotsyamāno'smi tena || 17 ||
[Analyze grammar]

yaḥ sarvabhūtāni sadevakāni prasthe'jayatkhāṇḍave savyasācī |
ko jīvitaṃ rakṣamāṇo hi tena yuyutsate māmṛte mānuṣo'nyaḥ || 18 ||
[Analyze grammar]

ahaṃ tasya pauruṣaṃ pāṇḍavasya brūyāṃ hṛṣṭaḥ samitau kṣatriyāṇām |
kiṃ tvaṃ mūrkhaḥ prabhaṣanmūḍhacetā māmavocaḥ pauruṣamarjunasya || 19 ||
[Analyze grammar]

apriyo yaḥ paruṣo niṣṭhuro hi kṣudraḥ kṣeptā kṣamiṇaścākṣamāvān |
hanyāmahaṃ tādṛśānāṃ śatāni kṣamāmi tvāṃ kṣamayā kālayogāt || 20 ||
[Analyze grammar]

avocastvaṃ pāṇḍavārthe'priyāṇi pradharṣayanmāṃ mūḍhavatpāpakarman |
mayyārjave jihmagatirhatastvaṃ mitradrohī saptapadaṃ hi mitram || 21 ||
[Analyze grammar]

kālastvayaṃ mṛtyumayo'tidāruṇo duryodhano yuddhamupāgamadyat |
tasyārthasiddhimabhikāṅkṣamāṇastamabhyeṣye yatra naikāntyamasti || 22 ||
[Analyze grammar]

mitraṃ midernandateḥ prīyatervā saṃtrāyatermānada modatervā |
bravīti taccāmuta viprapūrvāttaccāpi sarvaṃ mama duryodhane'sti || 23 ||
[Analyze grammar]

śatruḥ śadeḥ śāsateḥ śāyatervā śṛṇātervā śvayatervāpi sarge |
upasargādbahudhā sūdateśca prāyeṇa sarvaṃ tvayi tacca mahyam || 24 ||
[Analyze grammar]

duryodhanārthaṃ tava cāpriyārthaṃ yaśorthamātmārthamapīśvarārtham |
tasmādahaṃ pāṇḍavavāsudevau yotsye yatnātkarma tatpaśya me'dya || 25 ||
[Analyze grammar]

astrāṇi paśyādya mamottamāni brāhmāṇi divyānyatha mānuṣāṇi |
āsādayiṣyāmyahamugravīryaṃ dvipottamaṃ mattamivābhimattaḥ || 26 ||
[Analyze grammar]

astraṃ brāhmaṃ manasā taddhyajayyaṃ kṣepsye pārthāyāpratimaṃ jayāya |
tenāpi me naiva mucyeta yuddhe na cetpatedviṣame me'dya cakram || 27 ||
[Analyze grammar]

vaivasvatāddaṇḍahastādvaruṇādvāpi pāśinaḥ |
sagadādvā dhanapateḥ savajrādvāpi vāsavāt || 28 ||
[Analyze grammar]

nānyasmādapi kasmāccidbibhimo hyātatāyinaḥ |
iti śalya vijānīhi yathā nāhaṃ bibhemyabhīḥ || 29 ||
[Analyze grammar]

tasmādbhayaṃ na me pārthānnāpi caiva janārdanāt |
adya yuddhaṃ hi tābhyāṃ me saṃparāye bhaviṣyati || 30 ||
[Analyze grammar]

śvabhre te patatāṃ cakramiti me brāhmaṇo'vadat |
yudhyamānasya saṃgrāme prāptasyaikāyane bhayam || 31 ||
[Analyze grammar]

tasmādbibhemi balavadbrāhmaṇavyāhṛtādaham |
ete hi somarājāna īśvarāḥ sukhaduḥkhayoḥ || 32 ||
[Analyze grammar]

homadhenvā vatsamasya pramatta iṣuṇāhanam |
carantamajane śalya brāhmaṇāttapaso nidheḥ || 33 ||
[Analyze grammar]

īṣādantānsaptaśatāndāsīdāsaśatāni ca |
dadato dvijamukhyāya prasādaṃ na cakāra me || 34 ||
[Analyze grammar]

kṛṣṇānāṃ śvetavatsānāṃ sahasrāṇi caturdaśa |
āharanna labhe tasmātprasādaṃ dvijasattamāt || 35 ||
[Analyze grammar]

ṛddhaṃ gehaṃ sarvakāmairyacca me vasu kiṃcana |
tatsarvamasmai satkṛtya prayacchāmi na cecchati || 36 ||
[Analyze grammar]

tato'bravīnmāṃ yācantamaparāddhaṃ prayatnataḥ |
vyāhṛtaṃ yanmayā sūta tattathā na tadanyathā || 37 ||
[Analyze grammar]

anṛtoktaṃ prajā hanyāttataḥ pāpamavāpnuyāt |
tasmāddharmābhirakṣārthaṃ nānṛtaṃ vaktumutsahe || 38 ||
[Analyze grammar]

mā tvaṃ brahmagatiṃ hiṃsyāḥ prāyaścittaṃ kṛtaṃ tvayā |
madvākyaṃ nānṛtaṃ loke kaścitkuryātsamāpnuhi || 39 ||
[Analyze grammar]

ityetatte mayā proktaṃ kṣiptenāpi suhṛttayā |
jānāmi tvādhikṣipantaṃ joṣamāssvottaraṃ śṛṇu || 40 ||
[Analyze grammar]