Chapter 24

saṃjaya uvāca |
mahadbhairavamāsīnnaḥ saṃnivṛtteṣu pāṇḍuṣu |
dṛṣṭvā droṇaṃ chādyamānaṃ tairbhāskaramivāmbudaiḥ || 1 ||
[Analyze grammar]

taiścoddhūtaṃ rajastīvramavacakre camūṃ tava |
tato hatamamanyāma droṇaṃ dṛṣṭipathe hate || 2 ||
[Analyze grammar]

tāṃstu śūrānmaheṣvāsānkrūraṃ karma cikīrṣataḥ |
dṛṣṭvā duryodhanastūrṇaṃ svasainyaṃ samacūcudat || 3 ||
[Analyze grammar]

yathāśakti yathotsāhaṃ yathāsattvaṃ narādhipāḥ |
vārayadhvaṃ yathāyogaṃ pāṇḍavānāmanīkinīm || 4 ||
[Analyze grammar]

tato durmarṣaṇo bhīmamabhyagacchatsutastava |
ārāddṛṣṭvā kiranbāṇairicchandroṇasya jīvitam || 5 ||
[Analyze grammar]

taṃ bāṇairavatastāra kruddho mṛtyumivāhave |
taṃ ca bhīmo'tudadbāṇaistadāsīttumulaṃ mahat || 6 ||
[Analyze grammar]

ta īśvarasamādiṣṭāḥ prājñāḥ śūrāḥ prahāriṇaḥ |
bāhyaṃ mṛtyubhayaṃ kṛtvā pratyatiṣṭhanparānyudhi || 7 ||
[Analyze grammar]

kṛtavarmā śineḥ putraṃ droṇaprepsuṃ viśāṃ pate |
paryavārayadāyāntaṃ śūraṃ samitiśobhanam || 8 ||
[Analyze grammar]

taṃ śaineyaḥ śaravrātaiḥ kruddhaḥ kruddhamavārayat |
kṛtavarmā ca śaineyaṃ matto mattamiva dvipam || 9 ||
[Analyze grammar]

saindhavaḥ kṣatradharmāṇamāpatantaṃ śaraughiṇam |
ugradhanvā maheṣvāsaṃ yatto droṇādavārayat || 10 ||
[Analyze grammar]

kṣatradharmā sindhupateśchittvā ketanakārmuke |
nārācairbahubhiḥ kruddhaḥ sarvamarmasvatāḍayat || 11 ||
[Analyze grammar]

athānyaddhanurādāya saindhavaḥ kṛtahastavat |
vivyādha kṣatradharmāṇaṃ raṇe sarvāyasaiḥ śaraiḥ || 12 ||
[Analyze grammar]

yuyutsuṃ pāṇḍavārthāya yatamānaṃ mahāratham |
subāhurbhrātaraṃ śūraṃ yatto droṇādavārayat || 13 ||
[Analyze grammar]

subāhoḥ sadhanurbāṇāvasyataḥ parighopamau |
yuyutsuḥ śitapītābhyāṃ kṣurābhyāmacchinadbhujau || 14 ||
[Analyze grammar]

rājānaṃ pāṇḍavaśreṣṭhaṃ dharmātmānaṃ yudhiṣṭhiram |
veleva sāgaraṃ kṣubdhaṃ madrarāṭsamavārayat || 15 ||
[Analyze grammar]

taṃ dharmarājo bahubhirmarmabhidbhiravākirat |
madreśastaṃ catuḥṣaṣṭyā śarairviddhvānadadbhṛśam || 16 ||
[Analyze grammar]

tasya nānadataḥ ketumuccakarta sakārmukam |
kṣurābhyāṃ pāṇḍavaśreṣṭhastata uccukruśurjanāḥ || 17 ||
[Analyze grammar]

tathaiva rājā bāhlīko rājānaṃ drupadaṃ śaraiḥ |
ādravantaṃ sahānīkaṃ sahānīko nyavārayat || 18 ||
[Analyze grammar]

tadyuddhamabhavadghoraṃ vṛddhayoḥ sahasenayoḥ |
yathā mahāyūthapayordvipayoḥ saṃprabhinnayoḥ || 19 ||
[Analyze grammar]

vindānuvindāvāvantyau virāṭaṃ matsyamārcchatām |
sahasainyau sahānīkaṃ yathendrāgnī purā balim || 20 ||
[Analyze grammar]

tadutpiñjalakaṃ yuddhamāsīddevāsuropamam |
matsyānāṃ kekayaiḥ sārdhamabhītāśvarathadvipam || 21 ||
[Analyze grammar]

nākuliṃ tu śatānīkaṃ bhūtakarmā sabhāpatiḥ |
asyantamiṣujālāni yāntaṃ droṇādavārayat || 22 ||
[Analyze grammar]

tato nakuladāyādastribhirbhallaiḥ susaṃśitaiḥ |
cakre vibāhuśirasaṃ bhūtakarmāṇamāhave || 23 ||
[Analyze grammar]

sutasomaṃ tu vikrāntamāpatantaṃ śaraughiṇam |
droṇāyābhimukhaṃ vīraṃ viviṃśatiravārayat || 24 ||
[Analyze grammar]

sutasomastu saṃkruddhaḥ svapitṛvyamajihmagaiḥ |
viviṃśatiṃ śarairviddhvā nābhyavartata daṃśitaḥ || 25 ||
[Analyze grammar]

atha bhīmarathaḥ śālvamāśugairāyasaiḥ śitaiḥ |
ṣaḍbhiḥ sāśvaniyantāramanayadyamasādanam || 26 ||
[Analyze grammar]

śrutakarmāṇamāyāntaṃ mayūrasadṛśairhayaiḥ |
caitrasenirmahārāja tava pautro nyavārayat || 27 ||
[Analyze grammar]

tau pautrau tava durdharṣau parasparavadhaiṣiṇau |
pitṝṇāmarthasiddhyarthaṃ cakraturyuddhamuttamam || 28 ||
[Analyze grammar]

tiṣṭhantamagrato dṛṣṭvā prativindhyaṃ tamāhave |
drauṇirmānaṃ pituḥ kurvanmārgaṇaiḥ samavārayat || 29 ||
[Analyze grammar]

taṃ kruddhaḥ prativivyādha prativindhyaḥ śitaiḥ śaraiḥ |
siṃhalāṅgūlalakṣmāṇaṃ piturarthe vyavasthitam || 30 ||
[Analyze grammar]

pravapanniva bījāni bījakāle nararṣabha |
drauṇāyanirdraupadeyaṃ śaravarṣairavākirat || 31 ||
[Analyze grammar]

yastu śūratamo rājansenayorubhayormataḥ |
taṃ paṭaccarahantāraṃ lakṣmaṇaḥ samavārayat || 32 ||
[Analyze grammar]

sa lakṣmaṇasyeṣvasanaṃ chittvā lakṣma ca bhārata |
lakṣmaṇe śarajālāni visṛjanbahvaśobhata || 33 ||
[Analyze grammar]

vikarṇastu mahāprājño yājñaseniṃ śikhaṇḍinam |
paryavārayadāyāntaṃ yuvānaṃ samare yuvā || 34 ||
[Analyze grammar]

tatastamiṣujālena yājñaseniḥ samāvṛṇot |
vidhūya tadbāṇajālaṃ babhau tava suto balī || 35 ||
[Analyze grammar]

aṅgado'bhimukhaḥ śūramuttamaujasamāhave |
droṇāyābhimukhaṃ yāntaṃ vatsadantairavārayat || 36 ||
[Analyze grammar]

sa saṃprahārastumulastayoḥ puruṣasiṃhayoḥ |
sainikānāṃ ca sarveṣāṃ tayośca prītivardhanaḥ || 37 ||
[Analyze grammar]

durmukhastu maheṣvāso vīraṃ purujitaṃ balī |
droṇāyābhimukhaṃ yāntaṃ kuntibhojamavārayat || 38 ||
[Analyze grammar]

sa durmukhaṃ bhruvormadhye nārācena vyatāḍayat |
tasya tadvibabhau vaktraṃ sanālamiva paṅkajam || 39 ||
[Analyze grammar]

karṇastu kekayānbhrātṝnpañca lohitakadhvajān |
droṇāyābhimukhaṃ yātāñśaravarṣairavārayat || 40 ||
[Analyze grammar]

te cainaṃ bhṛśasaṃkruddhāḥ śaravrātairavākiran |
sa ca tāṃśchādayāmāsa śarajālaiḥ punaḥ punaḥ || 41 ||
[Analyze grammar]

naiva karṇo na te pañca dadṛśurbāṇasaṃvṛtāḥ |
sāśvasūtadhvajarathāḥ parasparaśarācitāḥ || 42 ||
[Analyze grammar]

putraste durjayaścaiva jayaśca vijayaśca ha |
nīlaṃ kāśyaṃ jayaṃ śūrāstrayastrīnpratyavārayan || 43 ||
[Analyze grammar]

tadyuddhamabhavadghoramīkṣitṛprītivardhanam |
siṃhavyāghratarakṣūṇāṃ yathebhamahiṣarṣabhaiḥ || 44 ||
[Analyze grammar]

kṣemadhūrtibṛhantau tau bhrātarau sātvataṃ yudhi |
droṇāyābhimukhaṃ yāntaṃ śaraistīkṣṇaistatakṣatuḥ || 45 ||
[Analyze grammar]

tayostasya ca tadyuddhamatyadbhutamivābhavat |
siṃhasya dvipamukhyābhyāṃ prabhinnābhyāṃ yathā vane || 46 ||
[Analyze grammar]

rājānaṃ tu tathāmbaṣṭhamekaṃ yuddhābhinandinam |
cedirājaḥ śarānasyankruddho droṇādavārayat || 47 ||
[Analyze grammar]

tamambaṣṭho'sthibhedinyā niravidhyacchalākayā |
sa tyaktvā saśaraṃ cāpaṃ rathādbhūmimathāpatat || 48 ||
[Analyze grammar]

vārdhakṣemiṃ tu vārṣṇeyaṃ kṛpaḥ śāradvataḥ śaraiḥ |
akṣudraḥ kṣudrakairdroṇātkruddharūpamavārayat || 49 ||
[Analyze grammar]

yudhyantau kṛpavārṣṇeyau ye'paśyaṃścitrayodhinau |
te yuddhasaktamanaso nānyā bubudhire kriyāḥ || 50 ||
[Analyze grammar]

saumadattistu rājānaṃ maṇimantamatandritam |
paryavārayadāyāntaṃ yaśo droṇasya vardhayan || 51 ||
[Analyze grammar]

sa saumadattestvaritaśchittveṣvasanaketane |
punaḥ patākāṃ sūtaṃ ca chatraṃ cāpātayadrathāt || 52 ||
[Analyze grammar]

athāplutya rathāttūrṇaṃ yūpaketuramitrahā |
sāśvasūtadhvajarathaṃ taṃ cakarta varāsinā || 53 ||
[Analyze grammar]

rathaṃ ca svaṃ samāsthāya dhanurādāya cāparam |
svayaṃ yacchanhayānrājanvyadhamatpāṇḍavīṃ camūm || 54 ||
[Analyze grammar]

musalairmudgaraiścakrairbhiṇḍipālaiḥ paraśvadhaiḥ |
pāṃsuvātāgnisalilairbhasmaloṣṭhatṛṇadrumaiḥ || 55 ||
[Analyze grammar]

ārujanprarujanbhañjannighnanvidrāvayankṣipan |
senāṃ vibhīṣayannāyāddroṇaprepsurghaṭotkacaḥ || 56 ||
[Analyze grammar]

taṃ tu nānāpraharaṇairnānāyuddhaviśeṣaṇaiḥ |
rākṣasaṃ rākṣasaḥ kruddhaḥ samājaghne hyalambusaḥ || 57 ||
[Analyze grammar]

tayostadabhavadyuddhaṃ rakṣogrāmaṇimukhyayoḥ |
tādṛgyādṛkpurā vṛttaṃ śambarāmararājayoḥ || 58 ||
[Analyze grammar]

evaṃ dvaṃdvaśatānyāsanrathavāraṇavājinām |
padātīnāṃ ca bhadraṃ te tava teṣāṃ ca saṃkulam || 59 ||
[Analyze grammar]

naitādṛśo dṛṣṭapūrvaḥ saṃgrāmo naiva ca śrutaḥ |
droṇasyābhāvabhāveṣu prasaktānāṃ yathābhavat || 60 ||
[Analyze grammar]

idaṃ ghoramidaṃ citramidaṃ raudramiti prabho |
tatra yuddhānyadṛśyanta pratatāni bahūni ca || 61 ||
[Analyze grammar]