Chapter 14

śrīpuruṣottama uvāca |
evaṃ nārāyaṇīśri svasadṛśaṃ ca pareśvaram |
strībhūtaṃ samalokyaivā''ścarya nāryo gatāstadā || 1 ||
[Analyze grammar]

dṛṣṭvā nārāyaṇīdvandvaṃ rādhādvandvaṃ samānakam |
sevā'rhaṃ spṛśyamevāpi siṣevire satīstriyaḥ || 2 ||
[Analyze grammar]

sarvāstā brahmacāriṇyastatrotsave hariṃ striyam |
sarvabhāvairyogyasevāprakārairvai siṣevire || 3 ||
[Analyze grammar]

samāyātāḥ striyaḥ sarvā narapūrvāḥ samantataḥ |
samājaścā'bhavanmandākinyāstīre hyasaṃkhyakaḥ || 4 ||
[Analyze grammar]

strīsamāje strīsvarūpaścā'haṃ tatra virājitaḥ |
nārībhiścārthitaścāhaṃ strībhāvamocanaṃ prati || 5 ||
[Analyze grammar]

vayaṃ nāryo narapūrvāḥ sudarśanyāḥ praśāpataḥ |
jātāḥ smo'tra vinā doṣaṃ duṣṭadaityādidoṣataḥ || 6 ||
[Analyze grammar]

duṣṭarājanyadoṣaiśca satīdharṣaṇapāpakaiḥ |
nirdoṣā api bhūvāsā narā nārītvamāgatāḥ || 7 ||
[Analyze grammar]

sudarśanyā bhaktyā te daṇḍo'tikramitaḥ kṛtaḥ |
tasmāt kṛtvā kṛpāṃ kṛṣṇa patīnno dehi puṃtanum || 8 ||
[Analyze grammar]

nāryo'pi naisargasiddhā arthayāmāsurityapi |
patīnno dehi bhagavan bālān bālātmakān kuru || 9 ||
[Analyze grammar]

pūrvanarān vidhehyatra narānnṛlokavāsinaḥ |
hariścāhaṃ ca tatchrupvā jagād strīsamājake || 10 ||
[Analyze grammar]

bhaktā'gre'haṃ parādhīno bhaktoktaṃ laṃghayāmi na |
surdśanīṃ yācamāno militvā strījanā vayam || 11 ||
[Analyze grammar]

ityahaṃ samupādiśya samāje cotthito'bhavam |
samāhūtāṃ samāje ca sudarśanīṃ tadā'vadam || 12 ||
[Analyze grammar]

bhakte brahmapare sādhvi mahaiśvaryasamanvite |
duṣṭānāṃ daṇḍanaṃ yuktaṃ rakṣaṇaṃ svavratasya ca || 13 ||
[Analyze grammar]

ayuktaṃ daṇḍanaṃ yadvai niraparādhadehinām |
bālakānāṃ ca vṛddhānāṃ yūnāṃ dharmavatāmapi || 14 ||
[Analyze grammar]

tasmād yāce svayaṃ cāhamanādiḥ puruṣottamaḥ |
nārīrūpastava vākyād vāritaṃ vacanaṃ kuru || 15 ||
[Analyze grammar]

śāpanivāraṇaṃ sarvalokānāṃ kuru bhāminī |
nārīmayaṃ jagat sarvaṃ vinā naraṃ na yāsyati || 16 ||
[Analyze grammar]

vicārya śāpasaṃhāraṃ kuru bhakte madarthitam |
śrutvā sudarśanī devī vicārya tūrṇamāha mām || 17 ||
[Analyze grammar]

śāpasya kāraṇaṃ kṛṣṇa devadaityanarādibhiḥ |
pradharṣaṇaṃ satīnāṃ vai kriyate cāśrameṣvapi || 18 ||
[Analyze grammar]

tanmā bhūditi kṛtvaiva sadā nāryo mayā kṛtāḥ |
yadi tvaṃ ced rakṣaṇasya kartā no duṣṭanāśakṛt || 19 ||
[Analyze grammar]

ākalpāntaṃ vasa bhūmau tadā śāpaṃ harāmyaham |
ityuktvā sā satī sudarśanī me pādayostadā || 20 ||
[Analyze grammar]

patitā daṇḍavat pūjāṃ pracakāra sumādibhiḥ |
mālikāṃ pradadau kaṇṭhe strīvraje strīsvarūpiṇaḥ || 21 ||
[Analyze grammar]

ahaṃ bhaktāprarakṣārthaṃ oṃ tathāstvityuvāca tām |
satī sudarśanī paścājjalaṃ haste nidhāya ca || 22 ||
[Analyze grammar]

śāpanimittena prāpitaḥ parameśvaraḥ |
bhūtale dhanyabhāgyo'yaṃ loko yatra pumuttamaḥ || 23 ||
[Analyze grammar]

hariścātra nijāvāsaṃ tvākalpāntaṃ kariṣyati |
rakṣāṃ brahmavratinīnāṃ kariṣyati kusaṃgitaḥ || 24 ||
[Analyze grammar]

evaṃ vinimayenā'haṃ mama śāpaṃ maholbaṇam |
saṃharāmi jagatsāmye śrīhareḥ sannidhāviha || 25 ||
[Analyze grammar]

ityuktvā karatoyaṃ sā mumoca kṛṣṇapādayoḥ |
bhūmau tāvat samāje cā'nyatra loke sthalāntare || 26 ||
[Analyze grammar]

satye svarge mānave ca pātālādau ca ye'bhavan |
narapūrvā nārikāstā drāṅnarā abhavaṃstadā || 27 ||
[Analyze grammar]

trilokīyaṃ yathāpūrvā tadā''san yugalātmikā |
kṛṣṇaḥ kṛṣṇasvarūpo'bhūnnārāyaṇo nijātmakaḥ || 28 ||
[Analyze grammar]

puruṣottama evāpi puruṣottamarūpadhṛk |
tathaiva ca yathāpūrvaṃ sarvaṃ tatra vyajāyata || 29 ||
[Analyze grammar]

nārāyaṇaḥ svayaṃ prāha samāje'haṃ tadā punaḥ |
satīdharṣaṇakṛnme'tra vadhyaḥ sudarśanena vai || 30 ||
[Analyze grammar]

bhaviṣyati na sandeho dehānte strī bhaviṣyati |
daityāśca dānavāścāpi nṛpāśca surakoṭayaḥ || 31 ||
[Analyze grammar]

satīdharṣaṇakartāro vīkṣya duṣṭāḥ sudarśanam |
nikṛntanaṃ taijasaṃ ca duḥsahaṃ dāruṇaṃ tataḥ || 32 ||
[Analyze grammar]

kṣamāmayācire tatra vivāsitāśca te tadā |
dūraṃ te prayayuḥ sarve duḥkhitā vai vanāntare || 33 ||
[Analyze grammar]

athāpi duṣṭabhāvā ye te cakreṇa nikṛntitāḥ |
niṣūditāḥ pare loke duṣṭabhāvā'nvitāśca ye || 34 ||
[Analyze grammar]

sādhvyaḥ satyaśca vai sarvā brahmacaryaparāyaṇāḥ |
api dharṣaṇamāpannā yā yāstā harisannidhau || 35 ||
[Analyze grammar]

samāgatya harervāri pādayostāḥ papuḥ śubham |
pāvanaṃ sarvapāpānāṃ tena vai śuddhatāṃ yayuḥ || 36 ||
[Analyze grammar]

saṃsevyaṃ navadhā bhaktyā pratyakṣaṃ puruṣottamam |
pāvanyastā hi saṃjātā muktānyastvaikṣarārthikāḥ || 37 ||
[Analyze grammar]

ahaṃ lakṣmi tvayā sākaṃ śrīpatiḥ puruṣottamaḥ |
nyavasaṃ cāpyanādiśrīstrīpuṃnārāyaṇābhidhaḥ || 38 ||
[Analyze grammar]

ayonijaḥ svatantraśca prākaṭyaṃ samupāśritaḥ |
bhaktānāmnā prasiddhiste lakṣmi sudarśanī yathā || 39 ||
[Analyze grammar]

tathā sudarśanīśrīstvaṃ prasiddhā parameśvarī |
jātā sudarśanīyogāt śīlavratasya poṣiṇī || 40 ||
[Analyze grammar]

ityevaṃ śivasukteśri prākaṭyaṃ mama vai purā |
kathitaṃ smara sarvaṃ tat strīmayaṃ jagadadbhutam || 41 ||
[Analyze grammar]

athā'nye'pi me'vatārāstatrā'bhavan hi koṭiśaḥ |
sarvān jānāmyahaṃ lakṣmi yathākāryaṃ mayā kṛtān || 42 ||
[Analyze grammar]

śṛṇu tvanyanmama cāpi prākaṭyaṃ cānyavatsare |
saptadaśe vatsare cā'prajñātākhye tu vedhasaḥ || 43 ||
[Analyze grammar]

kalpe trayodaśe cāpi manau tu daśame tadā |
āsījjaganmahādaityakulenā'tīva pīḍitam || 44 ||
[Analyze grammar]

timiṃgilo mahādaityo mākaro varuṇākare |
abhūt purā tadā kāmarūpadhṛga jalasañcaraḥ || 45 ||
[Analyze grammar]

śrīśīlike jalavyāpte dvīpe yasyā'bhavad gṛham |
tajjātikāstathā cānye kāmarūpadharā api || 46 ||
[Analyze grammar]

mākarāśca vasanti smā'yutasāhasrasaṃkhyakāḥ |
narā nāryo bhavanti sma viniryānti jalād bahiḥ || 47 ||
[Analyze grammar]

nivasanti mahādvīpe śrīśīlike gṛheṣu ca |
bahiryāntyapi deśeṣu māṃsādāste narān paśūn || 48 ||
[Analyze grammar]

apahṛtya jalamadhye dvīpe vā bhakṣayanti tān |
nararūpāśca te bhūmau prayānti nagarādiṣu || 49 ||
[Analyze grammar]

apaharanti nārīśca bālakān bālikāstathā |
vyomnā yānti mahābhūbhṛtsānuṣvapi ca mākarāḥ || 50 ||
[Analyze grammar]

vanasthān parvatasthāṃśca gahvarasthān hi tāpasān |
ṛṣīn dvijān paśūn pakṣigaṇān haranti vai balāt || 51 ||
[Analyze grammar]

dvīpe nītvā bhakṣayanti naramāṃsādamākarāḥ |
samudre jalamadhye ca matsyān jalecarānapi || 52 ||
[Analyze grammar]

naukāgānmānavāṃścāpi bhakṣayanti sma vai balāt |
ityevaṃ śatavarṣāṇi bhakṣitā mānavādayaḥ || 53 ||
[Analyze grammar]

lokeṣu sarvakhaṇḍeṣūdghoṣo mahānajāyata |
parvateṣu gahvareṣu tāpaseṣvapi sarvataḥ || 54 ||
[Analyze grammar]

mākarāṇāṃ bhayaṃ cāste trasanti sma ca dehinaḥ |
balināṃ sannidhau ke'pi prayānti naiva rakṣaṇe || 55 ||
[Analyze grammar]

rājāno'pi bhayodvignāstadā jātāḥ samantataḥ |
cakravartī mahārājastadāsīd dharmavāhanaḥ || 56 ||
[Analyze grammar]

yoddhuṃ yayau samudrānte vyomnā raṇe tu mākaraiḥ |
bahurūpadharairvyomnā māyāvṛṣṭyā nipātitaḥ || 57 ||
[Analyze grammar]

samudre ca mṛtaḥ so'pi rājā vai dharmavāhanaḥ |
tato loke bhayaṃ yānti cānye mākarayuddhataḥ || 58 ||
[Analyze grammar]

mākarāṇāṃ balaṃ puṣṭaṃ jāto rājño vināśataḥ |
prasahyā'bdhitaṭasthānāmāharanti dhanastriyaḥ || 59 ||
[Analyze grammar]

bālāṃśca bālikā gāścābhūṣaṇāmbarasampadaḥ |
bhuñjate nirbhayāścāpi caidhitāśca samantataḥ || 60 ||
[Analyze grammar]

atha ye khaṇḍarājānaste'pi taiśca śanaiḥ śanaiḥ |
pṛthak pṛthak hṛtāścāpi mākarairmāṃsabhojanaiḥ || 61 ||
[Analyze grammar]

dvīpāśca dvīpakalpāśca bhūbhāgā vaśagāḥ kṛtāḥ |
bhuñjate sma yatheṣṭaṃ te māyārūpapradhāriṇaḥ || 62 ||
[Analyze grammar]

atyācāro mahān khaṇḍe khaṇḍe sma jāyate tadā |
rudanti nirbalā lokā narā nāryaḥ pradharṣitāḥ || 63 ||
[Analyze grammar]

bhakṣitā bālakā yeṣāṃ patnyaśca patayastathā |
nirvaṃśā bahavo jātā mākaropadravaistadā || 64 ||
[Analyze grammar]

evaṃ te śatavarṣānte vṛddhimāptā hi mākarāḥ |
koṭisaṃkhyāḥ prajātā vai rākṣasā iva sarvataḥ || 65 ||
[Analyze grammar]

jalaprānte vasantyete sabalā api vai kvacit |
nirbalatvakṣaṇe vārdhau praviśanti sma tatkṣaṇam || 66 ||
[Analyze grammar]

yuddheṣvebhirjayaṃ naiva labhante mānavā nṛpāḥ |
māyāmantrakarā naikarūpadhṛgo'tidāruṇāḥ || 67 ||
[Analyze grammar]

nṛpān vijitya rājyāni cakrurvaśāni khaṇḍaśaḥ |
atha prajāstadā cātyācāraṃ mākarakāsuraiḥ || 68 ||
[Analyze grammar]

kṛtaṃ naiva sahante smā'sahma sarvavināśanam |
yajñāḥ sarvatra nāśyante vyomamārgeṇa taistadā || 69 ||
[Analyze grammar]

utsavā devanilayā nāśyante'pi samantataḥ |
udyānāni vināśyante phalapuṣpamayānyapi || 70 ||
[Analyze grammar]

sasyāni ca kaṇāḍhyāni nāśyante'pi samantataḥ |
yadyad ratnamayaṃ loke hriyante sarvameva taiḥ || 71 ||
[Analyze grammar]

evaṃ tūpadrave jāte mānavāḥ parameśvaram |
parabrahmā'kṣarātītaṃ tadā māṃ cārthayanmuhuḥ || 72 ||
[Analyze grammar]

samastairhṛjjanyabhāvaiḥ pūjayanti sma māṃ hṛdi |
prārthayanti sma rakṣārthaṃ dīnā'nāthā'balādikāḥ || 73 ||
[Analyze grammar]

tato mayā śrutaṃ teṣāmārādhanaṃ tadā'kṣare |
mākarāṇāṃ vināśārthaṃ dharmarakṣaṇahetave || 74 ||
[Analyze grammar]

mānavānāṃ rakṣaṇārthaṃ tvayā sākaṃ tadā drutam |
ahaṃ sāyudha evāpi vimānena bhuvaṃ prati || 75 ||
[Analyze grammar]

ājagāmā'mbarāt tūrṇaṃ dvāradvīpamupāśritaḥ |
vimānaṃ vai mayā tatrā'dṛśyabhāvaṃ kṛtaṃ kṣaṇāt || 76 ||
[Analyze grammar]

āraṇyakaṃ mayā rūpaṃ tvayā'pyāraṇyakaṃ kṛtam |
tāpasaṃ cāpi tadrūpaṃ dhṛtvāhaṃ vyacaraṃ vane || 77 ||
[Analyze grammar]

atha te mākarā lokā dvīpādāgatya māṃ tvayā |
sākaṃ jahrurnije dvīpe tapasvinaṃ tato mayā || 78 ||
[Analyze grammar]

dṛṣṭo dvīpaḥ sanniveśagrāmapattanaśobhitaḥ |
māṃ khādituṃ mākarāste tvāyātāḥ sotsavāstataḥ || 79 ||
[Analyze grammar]

mayā sudarśanaṃ cakraṃ prahitaṃ tatkṣaṇānnanu |
tacca vyāpādayad vahnijvālayā cā'dahattathā || 80 ||
[Analyze grammar]

ghaṭikākālamātreṇa dvīpo nirmākaraḥ kṛtaḥ |
dadruvurmākarā mākaryaśca sarīsṛpā jhaṣāḥ || 81 ||
[Analyze grammar]

yādāṃsi ca tathā bhūtvā viviśurmakarālayam |
dvīpamadhye tāpaso'haṃ tvayā sākaṃ tadā'vasam || 82 ||
[Analyze grammar]

pattanāni tu śūnyāni vartante sma tadā khalu |
atha daityo mākareśo yuddhārthaṃ jalamadhyataḥ || 83 ||
[Analyze grammar]

sannaddhaśca paro bhūtvā sasainyaḥ samupāyayau |
mayā sudarśanenaiva nikṛntitā hi mākarāḥ || 84 ||
[Analyze grammar]

daityaḥ parājayaṃ vīkṣya prāṇatrāṇaparāyaṇaḥ |
dudrāva sahasā cābdhau viveśa gahanaṃ talam || 85 ||
[Analyze grammar]

sahasrahastavān daityaḥ sahasramastakastathā |
sahasrapādasampannaḥ punaryuddhārthamāyayau || 86 ||
[Analyze grammar]

mayā punaḥ preritaṃ ca cakraṃ sudarśanaṃ mama |
nikṛttā bāhavaścāsya bahavo vai tadā hi saḥ || 87 ||
[Analyze grammar]

punarviveśa jaladhimathā'hamapi vai tadā |
khaṇḍe khaṇḍe sthitān mārgayitvā tān mākarā'surān || 88 ||
[Analyze grammar]

sudarśanena cakreṇa vyāpādayaṃ samantataḥ |
pṛthvyāṃ yatra ca yatraite hyāsan mākaradānavāḥ || 89 ||
[Analyze grammar]

tān sarvānahanaṃ cakradhāreṇā'vasare tadā |
atha vai mākaro daityo'yutahastasamanvitaḥ || 90 ||
[Analyze grammar]

ayutānana evāpyayutapāt samupāyayau |
me bhātaṃ ca vināśo'sya kartavyo'vaśyameva ha || 91 ||
[Analyze grammar]

tataḥ śāntiṃ mākarāṇāmupadravaḥ prayāsyati |
athā'haṃ saṅgaraṃ cakre mākareṇa durātmanā || 92 ||
[Analyze grammar]

hatā hastāḥ sahasrāṇi trīṇi trīṇyānanāni ca |
yadā tadā mākareśo dudrāva jaladhiṃ yayau || 93 ||
[Analyze grammar]

ahaṃ sākaṃ tvayā lakṣmi cā'bhavaṃ jalamānavaḥ |
lakṣahasto lakṣamukho lakṣapāllakṣahetikaḥ || 94 ||
[Analyze grammar]

lakṣajālasamāyuktaḥ prāviśaṃ mākarālayam |
sa māṃ dṛṣṭvā mahadrūpaṃ cakre vārṣu palāyanam || 95 ||
[Analyze grammar]

abdhitaścā'nyamabdhiṃ ca tato'bdhyantaramityapi |
pṛṣṭhe yāntaṃ tu māṃ vīkṣya prāṇatrāṇaparāyaṇaḥ || 96 ||
[Analyze grammar]

bhayodvigno babhūvā'ti kṣīrasāgaramāviśat |
mayā sudarśanaṃ cakraṃ prahitaṃ tasya mṛtyave || 97 ||
[Analyze grammar]

pṛṣṭhalagnaṃ prajajvāla dadāha taṃ samantataḥ |
cukṣobha sāgaraḥ sarvaścakampe pṛthivī muhuḥ || 98 ||
[Analyze grammar]

atha jñātvā nidhanaṃ svaṃ yuddhārthaṃ sammukho'bhavat |
mayā yuddhaṃ nyāyasāraṃ dattaṃ tasmai mahātmane || 99 ||
[Analyze grammar]

yathā yathā'haṃ taṃ hanmi tathā sa nūtanaḥ |
utpadyate mākaro'pi māyayā koṭirūpadhṛk || 100 ||
[Analyze grammar]

māsānte sa mayā vārdhau yuddhaṃ datvā hato'suraḥ |
sudarśanena cakreṇa lakṣakaṇṭhā nikṛntitāḥ || 101 ||
[Analyze grammar]

tadā vyomni ninedurvai dundubhayo dyuvāsinām |
puṣpāṇāṃ varṣaṇaṃ jātaṃ samudro māmapūjayat || 102 ||
[Analyze grammar]

pārṣadāḥ sarvadhāmnāṃ ca muktāśceśāḥ samāyayuḥ |
surāśca mānavāścāpi pupūjurmāṃ pumuttamam || 103 ||
[Analyze grammar]

jalamānavarūpaṃ māṃ śrīpatiṃ puruṣottamam |
lakṣānanaṃ lakṣahastaṃ lakṣahetisamanvitam || 104 ||
[Analyze grammar]

lakṣapādaṃ śvetavarṇaṃ komalaṃ candrabhāsanam |
jalāvāsaṃ jaladevīdevaiḥ prapūjitaṃ hi mām || 105 ||
[Analyze grammar]

duḥkhamuktā dehinaścā''narcurmāṃ parameśvaram |
anādiśrīkṛṣṇanārāyaṇaṃ śrīpuruṣottamam || 106 ||
[Analyze grammar]

jalamānavarūpaṃ māṃ svayaṃ śrīparameśvaram |
anādiśrījalanārāyaṇāhvayaṃ tadā priye || 107 ||
[Analyze grammar]

tvāmanādijalanārāyaṇīṃ cānarcureva te |
atha jalād vinirgatya śrīśīlike bhuvastale || 108 ||
[Analyze grammar]

dvīpe vāsaṃ cakārā'haṃ mākarāṇāṃ hi pattane |
tato me pārṣadāstatra tvāyātā bahavastadā || 109 ||
[Analyze grammar]

śrīdvīpo me'bhavad dvīpaḥ samudrataṭavartanaḥ |
tāpasānāṃ ca muktānāṃ tapo'rthaṃ tatra kalpake || 110 ||
[Analyze grammar]

brahmaṇo vatsare saptadaśe lakṣmi ca taṃ smara |
śvetadvīpo yathā cādyastathā śrīdvīpanāmakaḥ || 111 ||
[Analyze grammar]

śrīśīladvīpa evā'bhūnmama te vāsakāraṇāt |
jaladvīpastathā śvetanārāyaṇālayo'pi saḥ || 112 ||
[Analyze grammar]

tadā lokāśca śāstrāṇi kathayanti sma naikadhā |
smara sarvaṃ hi tallakṣmi purātanātpurātanam || 113 ||
[Analyze grammar]

cakatkāramayaṃ sthānaṃ divyaṃ mayā purārjitam |
paṭhanācchravaṇādasya smaraṇānmokṣamāvrajet || 114 ||
[Analyze grammar]

anye tathā'vatārā me jātāścāpi sahasraśaḥ |
tānahaṃ vedmi sarvān vai pratyakṣajñānavānaham || 115 ||
[Analyze grammar]

tato bhaktā mayā pṛthvyāṃ pārṣadairmama yogibhiḥ |
ṛṣibhirmunibhiścāpi sādhubhirvaiṣṇavāḥ kṛtāḥ || 116 ||
[Analyze grammar]

prajāḥ sarvāstato jātā vaiṣṇavyo mama cāśritāḥ |
muktimārgaḥ pravṛttaśca yajñayāgādayo'bhavan || 117 ||
[Analyze grammar]

prajāśca sukhitā jātā mānavā nirbhayā api |
dṛśyante vaiṣṇavā bhūmau mama pūjāparāyaṇāḥ || 118 ||
[Analyze grammar]

narā nāryo vyomagāścā''yānti maddarśanāya ha |
sarvābhyaḥ khalu digbhyaśca śrīdvīpo mokṣado'bhavat || 119 ||
[Analyze grammar]

ākalpāntaṃ tataścā'haṃ nyavasaṃ śrīsuśīlike |
dvīpe tatra tataścā'haṃ svā'kṣaraṃ prayayau priye || 120 ||
[Analyze grammar]

iti śrīlakṣmīnārāyaṇīyasaṃhitāyāṃ tṛtīye dvāparasantāne strībhūtānāṃ bhūtalavāsiprajānāṃ rakṣaṇārthaṃ prārthanayā'nādistrīpuṃnārāyaṇasya saptadaśe vedhaso vatsare ca mākarādi |
daityanāśārtham anādiśrījalanārāyaṇasya ca prākaṭyamityādinirūpaṇanāmā caturdaśo'dhyāyaḥ || 14 ||
[Analyze grammar]