Chapter 289

śrīnārāyaṇa uvāca |
atha lakṣmi daśamyāṃ kārtike dharmāṃgadaḥ prage |
paṭahaṃ vādayitvā vāraṇopari praghoṣayan || 1 ||
[Analyze grammar]

mā bhoktavyaṃ janaiḥ kaiścidekādaśyāṃ harerdine |
sainyaṃ prajāśca nītvā sa yayau raivatatīrthake || 2 ||
[Analyze grammar]

kartuṃ pradakṣiṇaṃ raivatādreḥ sandhāvalīyutaḥ |
ekādaśīṃ samārabhya pūrṇimāvadhipañcake || 3 ||
[Analyze grammar]

kartuṃ pradakṣiṇaṃ tatrā''yānti tīrthāni devatāḥ |
prabodhinyāṃ raivatādrau brahmaviṣṇumaheśvarāḥ || 4 ||
[Analyze grammar]

ṛṣayo vasavaḥ sādhyā maruto munayastathā |
pitaro nidhayaḥ kāṣṭhā grahā rudrāśca siddhayaḥ || 5 ||
[Analyze grammar]

kṛttikāścandranakṣatramaṇḍalaṃ surakoṭayaḥ |
yakṣarākṣasapaiśācā bhūtapretavināyakāḥ || 6 ||
[Analyze grammar]

kūṣmāṇḍāścāpi vetālā gaṇeśāśca gaṇādayaḥ |
hanūmanto mahālakṣmyaḥ paryo yoginya ityapi || 7 ||
[Analyze grammar]

durgāścaṇḍyo mānavāśca devā nadyaḥ sarāṃsi ca |
samudrāḥ parvatāḥ sthalyo dvīpāḥ kṣetrāṇi kheṭakāḥ || 8 ||
[Analyze grammar]

puryo'raṇyāni divasā niśā divā vratānyapi |
evamanye vyomasaṃsthāḥ pātālasthā bhujaṃgamāḥ || 9 ||
[Analyze grammar]

satyaḥ sādhvyaśca bhaktānyo nyāsinyaśca kumārikāḥ |
dehakṛṣṇārpaṇaparā narā nāryaḥ prayānti ca || 10 ||
[Analyze grammar]

cāraṇyaścāpi kinnaryo gāndharvyo dāsikāstathā |
vaiṣṇavāḥ śāṃkarāḥ saurā gāṇapatyāśca śaktigāḥ || 11 ||
[Analyze grammar]

cārvākā bījamārgāśca nārasiṃhāśca rāmiṇaḥ |
dāttātreyāḥ kāpilāścārhatā bauddhāḥ śivāśritāḥ || 12 ||
[Analyze grammar]

mahānto guravo dharmācāryāścatuḥpumarthakāḥ |
ābhīrā ūraṇavārā gopālā vāmamārgiṇaḥ || 13 ||
[Analyze grammar]

mahābhāgavātā merā nartakā naṭajātayaḥ |
aghorapathalambāśca gāruḍā bhairavāśritāḥ || 14 ||
[Analyze grammar]

haṃsāḥ paramahaṃsāśca sadaṇḍāḥ kuladevinaḥ |
vidyādharāśca gaṇikā bahurūpāśca nāṭikāḥ || 15 ||
[Analyze grammar]

gorakṣāḥ kāravaḥ sāmbāścāturvarṇyāśramānugāḥ |
pradakṣiṇārthamāyānti raivatādrau tu kārtike || 16 ||
[Analyze grammar]

jalānnavastradehādyarpakā yatra tvasaṃkhyakāḥ |
āyānti puṇyamokṣārthaṃ gurvarpaṇavidhāyinaḥ || 17 ||
[Analyze grammar]

śrīkṛṣṇaḥ śrīharirnārāyaṇāvirbhāvamūrtayaḥ |
āyānti janamokṣārtha pradakṣiṇasavotsukāḥ || 18 ||
[Analyze grammar]

saurāṣṭramaṇḍalaṃ tasya tīrthakṣetrasamaṃ tathā |
kṛṣṇanārāyaṇaḥ sākṣāllakṣmīyugatra parvate || 19 ||
[Analyze grammar]

mūrdhni saṃrājate divyaḥ sahagolokamaṇḍalaḥ |
ekā pradakṣiṇā yena kṛtā tena tataḥ khalu || 20 ||
[Analyze grammar]

jīveśabrahmalokānāṃ kṛtā syātsā pradakṣiṇā |
yatphalaṃ labhyate brahmadhāmnaḥ pradkṣiṇābhavam || 21 ||
[Analyze grammar]

tadatra labhyate puṇyaṃ saṃsārabhavavārakam |
iti matvā rājaputro dharmāṃgadaḥ pradakṣiṇām || 22 ||
[Analyze grammar]

kartuṃ daśamyāṃ tvāyāto yoginīparvatāgrataḥ |
māhīṣaparvatapārśve svarṇarekhānadītaṭe || 23 ||
[Analyze grammar]

mahodyāne tvāmravaṇe niśāṃ vyagamayat tataḥ |
prātardāmodaraṃ dṛṣṭvā snātvā kuṇḍe bhaveśvaram || 24 ||
[Analyze grammar]

nṛsiṃhaṃ ca tathā dṛṣṭvā mṛgīkuṇḍaṃ vyalokayat |
dharmāṃgado janagāthāṃ śrutavāṃstatra śobhanām || 25 ||
[Analyze grammar]

rājā rukmāṃgadaścātra mohinyā saha rājate |
brahmaputryā prasevito dharmāṃgadapitā'sti yaḥ || 26 ||
[Analyze grammar]

saḥ svapaṭahaghoṣeṇa na bhuṃkte harivāsare |
nirodhayati taṃ nārī bhoktavyaṃ harivāsare || 27 ||
[Analyze grammar]

kīdṛśī sā brahmaputrī pṛthvyāṃ rājñā vadhūkṛtā |
tapo'rthaṃ nirgataścāpi vadhūṃ kṛtvā ca yāṃ punaḥ || 28 ||
[Analyze grammar]

sevate khalu rukmāṃgo harerdinaṃ jahāti na |
draṣṭavyā sā devaputrī tvitikṛtvā janā yayuḥ || 29 ||
[Analyze grammar]

dharmāgado'pi sainyena svamātrā sahito yayau |
suvarṇarakṣāsaritaścottare sarasastaṭe || 30 ||
[Analyze grammar]

yatra divyo mahān saudho vairājasyeva rājate |
grāmo divyaḥ svaḥpatīnāṃ vimānamiva rājate || 31 ||
[Analyze grammar]

brahmaṇā viṣṇunā śaṃbhunā pradattaṃ svaloṃkajam |
divyopakaraṇaṃ sarvaṃ satyalokīyavastujam || 32 ||
[Analyze grammar]

dāsadāsyastathā divyāḥ sarvaṃ divyaṃ virājate |
carmacakṣurjanaiḥ sarvamadṛśyaṃ yaddhi vartate || 33 ||
[Analyze grammar]

dharmāṃgadena tatsarvaṃ lokitaṃ pitranugrahāt |
mahadāścaryamāpanno vavande caraṇau pituḥ || 34 ||
[Analyze grammar]

sandhyāvalyā'pi svapatyuścaraṇau vanditau mudā |
brahmaputrī vavande tāṃ jyeṣṭhā svasāramityatha || 35 ||
[Analyze grammar]

svasrā tvāśīrvādamukhyairmohinī cābhivardhitā |
vṛttāntaṃ kuśalaṃ cāpi jñātvā parasparaṃ tataḥ || 36 ||
[Analyze grammar]

premamagnāśca te sarve pradakṣiṇārthaṃ niryayuḥ |
mohinī tu haṭhāt pradakṣiṇārthaṃ na yayau tadā || 37 ||
[Analyze grammar]

atha dharmāgadenā'syāścaraṇau vanditau mudā |
heturjijñāsito manobhagnatāyāstadagrataḥ || 38 ||
[Analyze grammar]

rukmāṃgadena tatsarvaṃ vijñāpitaṃ vratātmakam |
vratanirodhayitryāstacchratvā''ścaryaṃ yayurjanāḥ || 39 ||
[Analyze grammar]

rukmāṃgadastadā prāha tvanunīya śubhaṃ vacaḥ |
mohini kuru yātrāṃ tvaṃ raivatādreḥ pradakṣiṇam || 40 ||
[Analyze grammar]

vrataṃ harerdinasyāpi prabodhinyāḥ parātparam |
ekādaśyāṃ na bhoktavyaṃ pakṣayorubhayorapi || 41 ||
[Analyze grammar]

akāryakaraṇejantorgosahasravadhaḥ smṛtaḥ |
jānannapi kathaṃ devi bhokṣye'haṃ harivāsare || 42 ||
[Analyze grammar]

puroḍāśo'pi vedhoje samprāpte bhagavaddine |
abhakṣyeṇa samaṃ proktaḥ kiṃ punaścānnabhakṣaṇam || 43 ||
[Analyze grammar]

kṣīṇānāṃ phalamūlādi payaādi prabhojanam |
prakīrtitaṃ vrate devi saśaktānāṃ nahi kvacit || 44 ||
[Analyze grammar]

saśaktānāṃ vrate'danaṃ narakāyaiva kevalam |
mā''grahaṃ kuru satyasthe vratabhaṃgo bhavenmama || 45 ||
[Analyze grammar]

yadanyad rocate tubhyaṃ tatkarttā'smi na saṃśayaḥ |
mohinyuvāca śṛṇvatsu rājñīdharmāṃgadādiṣu || 86 ||
[Analyze grammar]

ṛṣimunisurapitṛjaṃgamasthāvarādiṣu |
na tvanyad rocate rājan vinā vai bhojanaṃ tava || 47 ||
[Analyze grammar]

jīvitasyāpi dānena na me kiṃcitprayojanam |
na ca vedeṣu dṛṣṭo'yamupavāso harerdine || 48 ||
[Analyze grammar]

vedabāhyaṃ kathaṃ dharmaṃ bhavāṃścaritumicchati |
śṛṇvantu brāhmaṇāḥ sarve vedān kṛtvā'yamagrataḥ || 49 ||
[Analyze grammar]

satyaṃ vadati rājā kiṃ nā'haṃ bhokṣye harerdine |
sarvaṃ vai sthāvaraṃ yadvā jaṃgamaṃ tvannajīvanam || 50 ||
[Analyze grammar]

mṛtā api diviṣadaḥ prīyante'nnairjalairapi |
pipīlikādayaścānnaṃ mukhenādāya kaṣṭataḥ || 51 ||
[Analyze grammar]

cāturmāsyārthamevaite śītartukṣapaṇāya ca |
praviśanti bile tatra sañcinvantyadanāharṇam || 52 ||
[Analyze grammar]

anne vai prāṇināṃ prāṇā annaṃ kasya na rocate |
rājā khādati nā'nnādi samprāpte harivāsare || 93 ||
[Analyze grammar]

tapasvināṃ tu sādhūnāṃ yujyate'nnavivarjanam |
upavāsādikaraṇaṃ bhūbhujāṃ kiṃ nu vaidikam || 54 ||
[Analyze grammar]

paradharmo na cā''caryo duḥkhadaśca bhayāvahaḥ |
so'yamadya mahīpālo yaterdharme vyavasthitaḥ || 55 ||
[Analyze grammar]

annātprabhavati prāṇaḥ prāṇāddehabalādikam |
balena nṛpadharmāśca taddhīnaḥ paribhūyate || 56 ||
[Analyze grammar]

evaṃ jñātvā mayā rājā bodhyamāno na buddhyati |
atrārthe brāhmaṇāḥ sarve pramāṇaṃ na tu bhāminī || 57 ||
[Analyze grammar]

yāthātathyaṃ vadantvatra vaidikaṃ tat karomyaham |
patnīvratavaśiṣṭhādyā brāhmaṇā nṛpamabruvan || 58 ||
[Analyze grammar]

ekādaśyāṃ na bhoktavyamiti yaḥ śapathastava |
na kṛto vedadṛṣṭyā vai svabuddhyaiva prakalpitaḥ || 59 ||
[Analyze grammar]

sāgnīnāṃ prāśanaṃ proktaṃ havyasya sandhyayoḥ kila |
pratyahaṃ homaśiṣṭasya bhoktṛtvaṃ vedasammatam || 60 ||
[Analyze grammar]

viśeṣeṇa nṛpāṇāṃ tu nityayajñaprakāriṇām |
vadātra bhūmipālānāṃ kathamuktamupoṣaṇam || 61 ||
[Analyze grammar]

vaidiko'vaidikā vāpi yastvayā śapathaḥ kṛtaḥ |
paripūrṇo bhavatvadya vākyenaiva dvijanmanām || 62 ||
[Analyze grammar]

vratabhaṃgo na te'stīha bhuṃkṣva viprādibhiḥ saha |
paritāpo na te kāryo vipravākyaṃ mahattamam || 63 ||
[Analyze grammar]

vayaṃ hi vedadraṣṭāro brahmavākyaṃ janārdanaḥ |
yo'nyathā manute viprād rākṣasīṃ yonimāpnuyāt || 64 ||
[Analyze grammar]

śrutvaitad brāhmaṇānāṃ tu vaidikānāṃ vacastataḥ |
ruvamāṃgadaḥ praṇipatya vedadraṣṭṝnuvāca ha || 65 ||
[Analyze grammar]

yūyaṃ vedapradaṣṭāro vaidikaṃ vadatha dhruvam |
anādṛtya paraṃ vedamupadeśo na vaḥ kvacit || 66 ||
[Analyze grammar]

nāradarṣistathā kātyāyano vaśiṣṭha ityapi |
brahmācātha mahādevo ye tvanye'tra samāgatāḥ || 67 ||
[Analyze grammar]

śṛṇutaiṣāṃ tu vākyāni harerdine vratakṛte |
nāradasya vacastatra prathamaṃ śṛṇuta dvijāḥ || 68 ||
[Analyze grammar]

nityaṃ bhaktisamāyuktairnarairviṣṇuparāyaṇaiḥ |
pakṣe pakṣe ca kartavyamekādaśyāmupoṣaṇam || 69 ||
[Analyze grammar]

ekādaśyāṃ tu yo bhuṃkte naro'nnaṃ sa tu pātakī |
viṇmūtrapūyavāhinyāṃ patatyeva na saṃśayaḥ || 70 ||
[Analyze grammar]

anukalpo nṛṇāṃ proktaḥ kṣīṇānāṃ varavarṇini |
mūlaṃ phalaṃ payastoyamupabhogyaṃ bhavecchubhe || 71 ||
[Analyze grammar]

natveva bhojanaṃ kaiścidekādaśyāṃ budhairmatam |
śayane ca madutthāne matpārśvaparivartane || 72 ||
[Analyze grammar]

naro mūlaphalāhārī hṛdi śalyaṃ mamā'rpayet |
daśamyādi mahīpāla tridināni vivarjayet || 73 ||
[Analyze grammar]

gandhatāmbūlapuṣpādi strīsaṃbhogaṃ divāniśam |
jāgaraṃ viṣṇupūjāṃ ca vinā tvardhaphalaṃ vratam || 74 ||
[Analyze grammar]

atastābhyāṃ yutopoṣyā vaiṣṇavena harestithiḥ |
vratāni viṣṇubhaktānāṃ nityānīmāni saṃjaguḥ || 75 ||
[Analyze grammar]

ekādaśyo'khilāḥ śuddhā dvādaśī vāmanasya tu |
śrīrāmādityasajjanmanavamī divyasiddhidā || 76 ||
[Analyze grammar]

kṛṣṇajanmāṣṭamī cātha nṛsiṃhasya caturdaśī |
śivarātriścetimukhyavratānyuktāni tattvataḥ || 77 ||
[Analyze grammar]

iti nāradavākyāni hyatha kātyāyanasya ca |
sarve śṛṇvantu munayo bhavanto vedadṛṣṭayaḥ || 78 ||
[Analyze grammar]

ekādaśyāmahorātraṃ bhuktvā cāndrāyaṇaṃ caret |
ekādaśyāmupavaset pakṣayorubhayorapi || 79 ||
[Analyze grammar]

upavāsaḥ sa vijñeyaḥ sarvabhogavivarjitaḥ |
vaśiṣṭhasyāpi vākyaṃ vai śṛṇvantu vedadṛṣṭayaḥ || 80 ||
[Analyze grammar]

upoṣyaikādaśīṃ rājan dvādaśīdivase tathā |
tajjapyajapanadhyānatatkathāśravaṇādayaḥ || 81 ||
[Analyze grammar]

upavāsakṛtāmete guṇāścānye dayādayaḥ |
vedhovākyaṃ tu śṛṇvantu ṛṣayo vedadṛṣṭayaḥ || 82 ||
[Analyze grammar]

aśvamedhasahasrāṇi rājasūyaśatāni ca |
ekenaivopavāsena prabodhinyāṃ labhennaraḥ || 82 ||
[Analyze grammar]

prabodhavāsare viṣṇorvidhivat samupoṣayet |
tāmupoṣya harerbhaktyā durlabhaṃ na bhavet kvacit || 84 ||
[Analyze grammar]

śivavākyaṃ ca śṛṇvantu bhavanto vedadṛṣṭayaḥ |
na śaivo na ca sauro'sau na śākto gaṇasevakaḥ || 85 ||
[Analyze grammar]

yo bhuṃkte vāsare viṣṇorjñeyaḥ paśvadhiko hi saḥ |
vipriyaṃ ca kṛtaṃ tena duṣṭenaiva tu pāpinā || 86 ||
[Analyze grammar]

madbhaktibalamāśritya yo bhuṃkte vai harerdine |
iti bhavanto vaktāro niṣeddhāro'pi te punaḥ || 87 ||
[Analyze grammar]

kathaṃ tatra suviśvāso mayā kāryo vratārdane |
sarveṣāmeva bhūtānāṃ bhavanto mārgadarśinaḥ || 88 ||
[Analyze grammar]

viparītā yadi syuste jagadāndhyaṃ samāpnuyāt |
akāryakaraṇaṃ kṛtvā kiṃ jīveccharadāṃ śatam || 89 ||
[Analyze grammar]

yuṣmākaṃ tāni vākyāni brūta cā'vaidikāni kim |
so'haṃ kathaṃ karomyatra tvabhakṣyā'nnasya bhakṣaṇam || 90 ||
[Analyze grammar]

kathaṃ cāpi vrataṃ tyakṣye vimārgasthajanoktitaḥ |
bhavadbhirnocitaṃ vaktuṃ pratikūlaṃ vratāpaham || 91 ||
[Analyze grammar]

devā vā dānavā daityā gāndharvā rākṣasāśca vā |
siddhā vā brāhmaṇā vāpi pitā me jananī ca me || 92 ||
[Analyze grammar]

harirvāpi haro viṣṇurmohinījanako'pi vā |
ṛṣayo'pi vadeyuścenno bhokṣye harivāsare || 93 ||
[Analyze grammar]

yo hi rukmāṃgado rājā vikhyāto haribhaktimān |
vratapratijñāṃ viphalāṃ na kadācit kariṣyati || 94 ||
[Analyze grammar]

sūryastu kṛṣṇatāṃ gacchenmeruḥ sthānāccaled yadi |
samudraḥ śuṣkatāṃ yāyād vahniḥ śaityānvito bhavet || 95 ||
[Analyze grammar]

viparītā bhavantaḥ syurmohinī mriyate'pi vā |
tathāpi na tyaje viprā vratamekādaśīdine || 96 ||
[Analyze grammar]

āraṭyatai paṭahena prasiddhirbhuvaneṣu me |
daṇḍyo vadhyo vivāsyaśca hyannādo harivāsare || 97 ||
[Analyze grammar]

evaṃ khyāte yadi bhoktā'nnasya syāṃ harivāsare |
amedhyaliptaḥ paṭaho bhaveddhoṣo'nṛtānvitaḥ || 98 ||
[Analyze grammar]

kīrtiḥ kaluṣatāṃ gacched yāmye vāsaśca me bhavet |
vṛthā sūtā janitrī syānnirāśāḥ pitaraḥ surāḥ || 99 ||
[Analyze grammar]

harṣaṃ gacched yamaścāpi vratabhaṃgaśca me bhavet |
mohinī kṛtakṛtyā syād vāntyāśīva bhavāmyaham || 100 ||
[Analyze grammar]

rājā dharmadharo'haṃ so'dharmapoṣṭā kathaṃ bhavet |
na vedā nāpi santaste munayaḥ ṛṣayo'pi na || 101 ||
[Analyze grammar]

ye maṇḍayanti kṛṣṇasya vāsare bhojanakriyām |
ityabhidhāya natvā ca virarāma nṛpastadā || 102 ||
[Analyze grammar]

śrutvaitad brāhmaṇā devāḥ praśaśaṃsurnṛpaṃ mudā |
kintu kopasuraktākṣī mohinī jvalitāntarā || 103 ||
[Analyze grammar]

śṛṇvatsu teṣu sarveṣu bhartāraṃ samabhāṣata |
svakāryasādhinī viṣṇuvrataghnī ca kṣurāntarā || 104 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne paṭahaghoṣaṃ kurvato dharmāṃgadasya kārtike raivatapradakṣiṇāraṃbhe svapitṛrukmāṃgadasamāgame |
mohinyā ekādaśīvratavināśakahaṭhena ṛṣīṇāṃ rājñā vākyasaṃvāda iti nirūpaṇanāmaikonanavatyadhikadviśatatamo'dhyāyaḥ || 289 ||
[Analyze grammar]