Chapter 290

śrīnārāyaṇa uvāca |
śṛṇu lakṣmi tadā kruddhā sveṣṭasiddhyai tu mohinī |
atyāgrahaṃ cakārā'sya rājño vāgdānapūraṇe || 1 ||
[Analyze grammar]

kopasaṃraktanayanā bhartāraṃ pratyabhāṣata |
karoṣi cenna me vākyaṃ dharmabāhyo bhaviṣyasi || 2 ||
[Analyze grammar]

tvayā mamā'rpitaḥ pāṇirvaradānāya bhūpate |
cenna dāsyasi kṛtakṛtyā yāsye sarvaṃ mayā'rjitam || 3 ||
[Analyze grammar]

na cāhaṃ te priyā patnī na ca tvaṃ me patiḥ priyaḥ |
dhik tvāṃ dvibhāṣiṇaṃ dharmavacolopakaraṃ naram || 4 ||
[Analyze grammar]

satyāccalitamadya tvāṃ tyakṣye svārthaparāyaṇam |
ityuktvā satvaraṃ tanvī prasthitā'dhomukhī ruṣā || 5 ||
[Analyze grammar]

tadānīṃ pitṛbhakto'tra rukmāṃgadasutaḥ svayam |
dharmāṃgado jananyā vai sammukho'bhūnnanāma tām || 6 ||
[Analyze grammar]

namraḥ provāca tāṃ devi kathaṃ ruṣṭā pituḥ priye |
prasthānaṃ tu na te yogyaṃ mātaryogyaṃ vadāmyaham || 7 ||
[Analyze grammar]

dharmāṃgadavacaḥ śrutvā mohinī vākyamabravīt |
pitā tavā'nṛtī putra hasto yenā'nyathākṛtaḥ || 8 ||
[Analyze grammar]

yena kṛtaṃ sukṛtaṃ vai dhvajāṃkuśāṃ'kitena tu |
taddhastaṃ ca mama haste vinyasya yadvaco'rpitam || 9 ||
[Analyze grammar]

na karotyeṣa te janmapitā kiṃ pravadāmyaham |
na mayā tvatra vastavyaṃ hyanṛtārthapratāriṣu || 10 ||
[Analyze grammar]

na yāce kāṃcanaṃ dhānyaṃ hastyaśvaṃ grāmavāsasī |
yena tasya bhaveddhānistādṛg yāce na vai suta || 11 ||
[Analyze grammar]

yenā'sau prīṇayed dehaṃ patnīṃ māṃ navayauvanām |
tanmayā prārthitaṃ putra so'yaṃ mohānna yacchati || 12 ||
[Analyze grammar]

tasya mamopakārāya yācito nṛpasattamaḥ |
sukhahetoḥ puṣṭihetostaccāpi no karotyayam || 13 ||
[Analyze grammar]

sukhacyutaṃ cyutaṃ satyāt tyaktvā yāmi sukhālayam |
tacchrutvā mohinīṃ natvā tato dharmāṃgado'bravīt || 14 ||
[Analyze grammar]

divyamātarnivartasva kariṣye'haṃ tavepsitam |
yasya satye sthitā lokāḥ sadevāsuramānuṣāḥ || 15 ||
[Analyze grammar]

vaivasvatagṛhaṃ yena kṛtaṃ śūnyaṃ harerbalāt |
kīrtiḥ prakāśate yasya vyāpya brahmāṇḍakoṭiṣu || 16 ||
[Analyze grammar]

matpitā sa kathaṃ mayi jīvati hyanṛtī bhavet |
mamopari dayāṃ kṛtvā nivartasva śubhaṃ bhavet || 17 ||
[Analyze grammar]

etaddharmāṃgadavākyamākarṇya sveṣṭalālasā |
nyavartata tataḥ prāha tātaṃ dharmāṃgadaḥ sutaḥ || 18 ||
[Analyze grammar]

tātaiṣā jananī me'dya tvāṃ vadatyanṛtī tviti |
kasmāttvamanṛtī bhūpa bhaviṣyasi mayi sthite || 19 ||
[Analyze grammar]

pradehi sakalaṃ tvasyai yat tvayā samayīkṛtam |
ahaṃ dāsastava rājan vikrīyatāṃ tṛṇāya mām || 20 ||
[Analyze grammar]

devyai dadasva cedicchejjīvitaṃ me ṛtī bhava |
kīrtināśo mahānnāśo na nāśaḥ sutayoṣitoḥ || 21 ||
[Analyze grammar]

kīrtilābho mahān lābho na lābhaḥ sutayoṣitoḥ |
dharmāṃgadavacaḥ śrutvā rukmāṃgada uvāca tam || 22 ||
[Analyze grammar]

kīrtirnaśyatu me putra hyanṛtī vā bhavāmyaham |
yāmi vā nirayaṃ tvandhaṃ kathaṃ bhokṣye harerdine || 23 ||
[Analyze grammar]

yadyahaṃ kutsitāṃ yoniṃ vrajeyaṃ krimisaṃjñitām |
tathāpi naiva kartā syāṃ bhojanaṃ tu harerdine || 24 ||
[Analyze grammar]

vratārthaṃ dundubhirvakti vitatho na sa me bhavet |
abhakṣyabhakṣaṇaṃ kṛtvā kiṃ jīveccharadāṃ śatam || 25 ||
[Analyze grammar]

asatyaṃ bhavatu proktaṃ na bhokṣye harivāsare |
dhikkṛto'pi janaistvatra mohinyā rahito'pi vā || 26 ||
[Analyze grammar]

yadi cenmaraṇaṃ me'sti na bhokṣye harivāsare |
kathaṃ harṣamahaṃ kuryāṃ dṛṣṭvā yāmyapuraṃ gatān || 27 ||
[Analyze grammar]

yāstu śūnyāḥ kṛtāḥ putra mayā narakapaṃktayaḥ |
janaiḥ pūrṇā bhaveyustā bhukte mayi harerdine || 28 ||
[Analyze grammar]

bhojanaṃ vāsare viṣṇoḥ kārayitvāpi te prasūḥ |
yācate yamarājasya kṣetraṃ pūrayituṃ khalā || 29 ||
[Analyze grammar]

tanna dāsyāmi mohinyai devaiḥ śāṭhyamidaṃ kṛtam |
śaṭhā ceyaṃ śaṭhā devāḥ śaṭhe śāṭhyaṃ prakalpayet || 30 ||
[Analyze grammar]

pibedviṣaṃ viśedvahniṃ nipatet parvatāgrataḥ |
svasyāḥ chindyācchiraścāpi na bhokṣye'haṃ harerdine || 31 ||
[Analyze grammar]

mohinī maraṇaṃ yātu yatheṣṭaṃ vā pragacchatu |
nāhaṃ bhokṣye harerahni janmamṛtyuhare vrate || 32 ||
[Analyze grammar]

ekādaśyupavāsena yanmayā puṇyamarjitam |
saṃcitaṃ ca yaśastadvai bhuktvā vināśaye katham || 33 ||
[Analyze grammar]

svapiturvacanaṃ śrutvā dharmāṃgado'tidhārmikaḥ |
sandhyāvalīṃ tadā prāha mohinīṃ parisāntvaya || 34 ||
[Analyze grammar]

yathā na cyavate satyād yathā bhuṃkte na me pitā |
tathā vidhīyatāṃ yatra kuśalaṃ tūbhayorbhavet || 35 ||
[Analyze grammar]

putravacastu sā śrutvā mohinīṃ prāha pūrvajā |
anuvartasva rājānaṃ mā''grahaṃ kuru pāpake || 36 ||
[Analyze grammar]

nā''svādayati rājā'nnaṃ saṃprāpte harivāsare |
kāmaṃ varaya satyasthe varamanyaṃ sudurlabham || 37 ||
[Analyze grammar]

kaniṣṭhāyā variṣṭhā'haṃ kariṣye pādavandanam |
patyurarthe pariṇītā karomi mastakārpaṇam || 38 ||
[Analyze grammar]

pariṇītā tu nāsi tvaṃ kuto'nyathedṛśāgrahaḥ |
vācā śapathadoṣaiśca sannirudhyaṃ pratārya yā || 39 ||
[Analyze grammar]

kārayet patimakṛtyaṃ sā pāpā narakaṃ vrajet |
cyutā ca narakātsapta pañca janmāni śūkarī || 40 ||
[Analyze grammar]

tato bhavati cāṇḍālī tataśca kāṣṭhilā bhavet |
tataśchuchundarī syācca tataḥ kākī śṛgālikā || 41 ||
[Analyze grammar]

godhā bhūtvā tataḥ sā vai gotve naiva praśuddhyati |
vipakṣasyāpi bhagini sadbuddhidānamuttamam || 42 ||
[Analyze grammar]

yena śreyaḥ paraṃ syādvai sukhaṃ sukhayituḥ sadā |
sandhyāvalīvacaḥ śrutvā mohinī prāha mānavaḥ || 43 ||
[Analyze grammar]

mānanīyā'si me jyeṣṭhe karomi vacanaṃ tava |
yadi cennācared rājā bhojanaṃ harivāsare || 44 ||
[Analyze grammar]

kuruṣva tvaparaṃ devi maraṇādadhikaṃ tava |
mamāpi duḥkhadaṃ tvetad rāṣṭrasyāpi praśokakṛt || 45 ||
[Analyze grammar]

kasyeṣṭaṃ maraṇaṃ devi kasyā'niṣṭaṃ ca jīvanam |
daivā''viṣṭo janaḥ sarvo'niṣṭaṃ cāpi karoti vai || 46 ||
[Analyze grammar]

caturvargacyutaṃ ghoraṃ yaśobhāgyavināśakam |
karmarekhāprabhagno vai karotyaśubhakarma tat || 47 ||
[Analyze grammar]

sā'haṃ pāpadurācārā vratakāmā sanirghṛṇam |
yādṛgbhāvānvitaṃ bījaṃ tādṛśī jāyate kriyā || 48 ||
[Analyze grammar]

yādṛśena tu bhāvena yonau śukraṃ samutsṛjet |
tādṛśena tu bhāvena santānaṃ saṃbhavediti || 49 ||
[Analyze grammar]

sā'haṃ rukmāṃgadanāśabhāvena brahmaṇā kṛtā |
duṣṭabhāvā tathā jātā duṣṭakartrī nṛpasya yat || 50 ||
[Analyze grammar]

na lagnaṃ na grahā devi na horā puṇyadarśinī |
kintu niṣekabhāvena bhāvitaṃ bālakaḥ bhavet || 51 ||
[Analyze grammar]

na tatra prabalaṃ kvāpi dākṣiṇyaṃ mitratā tathā |
na ca vrīḍā na ca sneho na dharmo na dayādikam || 52 ||
[Analyze grammar]

vakṣye prāṇaharaṃ te'dya nṛpasya ca sutasya ca |
prajānāṃ ca vadhūnāṃ ca yadakāryaṃ hi sarvathā || 53 ||
[Analyze grammar]

kartuṃ śakyaṃ na manasā śrotuṃ karṇena nāpi yat |
tat kathaṃ vai śarīreṇa kartuṃ śakyeta mānavi || 54 ||
[Analyze grammar]

karoṣi ced bhavet kīrtistava rājñaśca sadyaśaḥ |
svargatistava putrasya praśaṃsā mama dhikkṛtiḥ || 55 ||
[Analyze grammar]

mohinīvacanaṃ śrutvā devī sandhyāvalī priye |
dhairyamālambya tāṃ tanvīṃ brūhi brūhityacodayat || 56 ||
[Analyze grammar]

mā vadaivaṃ navavadhu bhartrarthe sakalaṃ bhavet |
ātmano nidhane vāpi putrasya nidhane'pi vā || 57 ||
[Analyze grammar]

bharturarthe prakurvantyā rājyanāśe na me vyathā |
yasyā bhartā bhaved duḥkhī tasyāḥ proktā hyadhogatiḥ || 58 ||
[Analyze grammar]

caṇḍike sā tavaivāstu na me bharturmamāpi na |
matputrasyāpi sā mā'stu yā tvadīyā bhaviṣyati || 59 ||
[Analyze grammar]

saṃjāte sukhadāmpatye bhāryā mokṣavirodhinī |
bhūtvā duḥkhapradā syāccenna bhāryā sā tu rākṣasī || 60 ||
[Analyze grammar]

bhāryā samuddharetpāpātpatantaṃ niraye patim |
sā bhāryā'nyā karmavallīrūpā saṃsāravardhinī || 61 ||
[Analyze grammar]

jīvitenāpi vacasā bhartāraṃ vaṃcayettu yā |
kṛmiyoniśataṃ prāpya puṣkasī jāyate tu sā || 62 ||
[Analyze grammar]

patirhi daivataṃ loke vañcanīyo na bhāryayā |
sā tvaṃ brūhi pradāsyāmi bharturarthe tavepsitam || 63 ||
[Analyze grammar]

vittaṃ dehaṃ tathā putraṃ yattvanyadvā sudurlabham |
kimanyad daivataṃ loke strīṇāmekaṃ patiṃ vinā || 64 ||
[Analyze grammar]

tasyārthe vā tyajet sarvaṃ jīvanaṃ kiṃ tato'dhikam |
śrutveti mohinī prāha svārthamohakaraṇḍikā || 65 ||
[Analyze grammar]

yadyevaṃ tvaṃ vijānāsi bhartrarthaṃ dhanajīvanam |
tadāhaṃ yācaye vittaṃ jīvitādadhikaṃ śubhe || 66 ||
[Analyze grammar]

dehi putraśiro mahyaṃ yadiṣṭaṃ hṛdayādhikam |
yadi no bhojanaṃ kuryād rājā vai harivāsare || 67 ||
[Analyze grammar]

tadā svahaste saṃgṛhya khaḍgaṃ rājā patistava |
dharmāṃgadaśiraśchitvā mamotsaṃge dadātu vai || 68 ||
[Analyze grammar]

etadvā kuru tadbhadre yadā'nnaṃ na bhunakti saḥ |
tacchrutvā vacanaṃ tasyā mohinyāḥ kaṭukākṣaram || 69 ||
[Analyze grammar]

pracakampe kṣaṇaṃ sandhyāvalī matvā tu rākṣasīm |
śanairdhairyaṃ samālambya dharmavākyānyuvāca ha || 70 ||
[Analyze grammar]

dhanaṃ tyajet tyajed dārān jīvitaṃ ca gṛhaṃ tyajet |
tyajed deśaṃ tyajedbhūpaṃ svargaṃ mitraṃ guruṃ tyajet || 71 ||
[Analyze grammar]

tyajettīrthaṃ tyajeddharma tyajetputraṃ bahupriyam |
tyajedyogaṃ tyajeddānaṃ jñānaṃ puṇyakriyāṃ tyajet || 72 ||
[Analyze grammar]

tapastyajet tyajedviśvāṃ siddhiṃ mokṣaṃ tyajet param |
pakṣayorubhayoścāpi na tyajeddharivāsaram || 73 ||
[Analyze grammar]

ekādaśyā vratenaiva tatsarvaṃ prāpyate muhuḥ |
tatrāpi bhartṛtuṣṭyarthe sarvaṃ jahyāt pativratā || 74 ||
[Analyze grammar]

dāpaye tava tuṣṭyarthaṃ patyurvrataprapūtaye |
dharmāṃgadaśiraścaṇḍe rākṣasī tvaṃ na devajā || 75 ||
[Analyze grammar]

na satyāccālaye caṇḍe patyarthaṃ ca vratārthakam |
ityuktvā vinayātpādau bhartuḥ saṃgṛhya padmaje || 76 ||
[Analyze grammar]

uvāca vacanaṃ rājñī dharmāṃgadaśiraḥkṛte |
mohinyā moharūpāyā nānyat saṃkocate khalu || 77 ||
[Analyze grammar]

bhojanaṃ vāsare viṣṇorbadhaṃ vā tanayasya vai |
dharmatyāgād varaṃ nātha putramūrdhanikṛntanam || 78 ||
[Analyze grammar]

vyāpādya sutaṃ rājan snehaṃ tyaktvā sudūrataḥ |
mā satyalaṃghanaṃ kārṣīradharmo mā spṛśet tvayi || 79 ||
[Analyze grammar]

mātṛsneho'tra bhartrarthe putre bhavati sārthakaḥ |
dharmasnehasvarūpo'yaṃ gṛhīto na tu laukikaḥ || 80 ||
[Analyze grammar]

prāṇān datvā priyāṃ datvā putraṃ sarvasvameva vā |
satyaṃ harervrataṃ rakṣyaṃ hṛṣīkeśārthamatra hi || 81 ||
[Analyze grammar]

tadalaṃ paritāpena satyaṃ pālaya bhūpate |
satyasya pālanād rājan viṣṇudehena yujyate || 82 ||
[Analyze grammar]

manye bhūpāla devaiḥ sā tvadvrataparipanthibhiḥ |
śikṣitā preṣitā satyavināśāya harervrate || 83 ||
[Analyze grammar]

putravyāpādanād devā bhaviṣyanti tvadhomukhāḥ |
teṣāṃ mūrdhni padaṃ datvā yāsyase paramaṃ padam || 84 ||
[Analyze grammar]

viruddhā vibudhā bhūpa seśvarāstava sadvrataiḥ |
mokṣamārgaprabhettārastava niścayalopakāḥ || 85 ||
[Analyze grammar]

rītirvai devatāḥ paripanthino bhaktimārgiṇām |
sa tvaṃ bhūpa dṛḍho bhūtvā ghātayasva sutaṃ priyam || 86 ||
[Analyze grammar]

mohinyāḥ kuru vākyaṃ vai hyātmanaḥ satyapālanāt |
pālanāya vrataṃ viṣṇoḥ kuru putrasamarpaṇam || 87 ||
[Analyze grammar]

bhāryāyā vacanaṃ śrutvā rājā rukmāṃgadastadā |
sandhyāvalīmuvācedaṃ mohinyāḥ sannidhau priye || 88 ||
[Analyze grammar]

putrahatyā mahāhatyā brahmahatyā'dhikā bhavet |
ghātayitvā sutaṃ tvatra kā paratra gatirbhavet || 89 ||
[Analyze grammar]

aprajaṃ tu sutaṃ hatvā kā gatirme bhaviṣyati |
anyārthe kiṃ sutaṃ hanmi kiṃ hanmi harivāsaram || 90 ||
[Analyze grammar]

na bhokṣye vāsare viṣṇorna hanmi tanayaṃ priye |
ātmānaṃ dārayiṣyāmi mohinī mriyatāṃ ca vā || 91 ||
[Analyze grammar]

athavā mohinīṃ samyaganunayāmi vai punaḥ |
yadi śāntaṃ manastasyāḥ sāmnā syācchreyase yataḥ || 92 ||
[Analyze grammar]

iti vicārya nṛpatiḥ sandhyāvalyāḥ samīpataḥ |
rukmāṃgadaḥ sāntvanārthaṃ mohinīmidamabravīt || 93 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne dharmāṃgadakṛto mohinī pratyanunayo rukmāṃgadasya vratadārḍhye sandhyāvalyāpatyarthe kṛtopadeśe'pi mohinyā putraśiraso'bhyarthanaṃ sandhyāvalyāḥ śirodānānumatiścetyādinirūpaṇanāmā navatyadhikadviśatatamo'dhyāyaḥ || 290 ||
[Analyze grammar]