Chapter 144

śrīnārāyaṇa uvāca |
ahaṃ vasāmi sattīrthe lokoddhāraṇahetave |
sarvatrāpi nivasāmi cāntaryāmitvahetave || 1 ||
[Analyze grammar]

mūrtau mūrtau sadā varte sevāgrahaṇahetave |
tattatsthāne vasāmyatra bhaktasauhārdahetave || 2 ||
[Analyze grammar]

kvacidbhaktā''grahād yadvā mama saṃkalpakāraṇāt |
kvacitkāryāvaśyakatvānnivasāmi sthale sthale || 3 ||
[Analyze grammar]

bhārate paścime bhāge yāvatsāgarasaṃgate |
raivatādrisamaṃ tīrthaṃ nānyad divyaṃ hi vartate || 4 ||
[Analyze grammar]

tatraiva dakṣiṇe'raṇye somanāthasya saṃsthitiḥ |
uttare svarṇanagare'nādikṛṣṇasya saṃsthitiḥ || 5 ||
[Analyze grammar]

pūrve kuṃkumavāpyāṃ ca gopālakṛṣṇasaṃsthitiḥ |
paścime vāmanasthalyāṃ trivikramasya me sthitiḥ || 6 ||
[Analyze grammar]

evaṃ sarvatra taddeśe nivasāmi sthale sthale |
mahatyāṃ vai rājadhānyāṃ lakṣmīnārāyaṇasthitiḥ || 7 ||
[Analyze grammar]

prānte prānte janoddhārahetave nivasāmyaham |
yugānte mama saudhāni vivartante tvitastataḥ || 8 ||
[Analyze grammar]

vilīyante tu jīrṇāni kāryante nūtanāni ca |
yathā bhaktā bhavantyeva tadvatpunarbhavāmyaham || 9 ||
[Analyze grammar]

nānto'smi mama divyānāṃ sthānānāṃ yugabhedataḥ |
bhūmirdeśāsta eva syurahamapyasmi caiva saḥ || 10 ||
[Analyze grammar]

arcakasya tapaḥśraiṣṭhyād bhaktabhaktibalāttathā |
mūrtīnāmatisaundaryādahaṃ varte samakṣavat || 11 ||
[Analyze grammar]

balerbhaktiṃ vilokyaiva kaśyapasya tapastathā |
dīrgho'pi vāmano bhūtvā'vasaṃ vai raivatācale || 12 ||
[Analyze grammar]

kaśyapena mahograṃ vai tapastaptaṃ nadītaṭe |
ojasvatyāścottare vai cūtavṛkṣābhisaṃvṛte || 13 ||
[Analyze grammar]

ūrjayantyā jalaṃ pītvā tatra varṣasahasrakam |
putrārthaṃ nirjane sthāne yatrāste vāmanasthalī || 14 ||
[Analyze grammar]

tatrā'dityā saha tena kaśyapena hariḥ svayam |
prasāditaśca putratve vṛtto'to vāmano'bhavam || 15 ||
[Analyze grammar]

tatkāraṇaṃ tu te vacmi śṛṇu lakṣmi manogatam |
hiraṇyakaśipuṃ hatvā nṛsiṃho bhagavān svayam || 16 ||
[Analyze grammar]

dadāvindrāya trailokyaṃ prahlādāyā'talādikam |
kāle haripadaṃ prāptaḥ prahlādaḥ sāttvatāgragaḥ || 17 ||
[Analyze grammar]

prahlādasya sutaḥ śreṣṭho virocana itīritaḥ |
sa varṣāṇāmayutaṃ vai rājyaṃ kṛtvā divaṃ yayau || 18 ||
[Analyze grammar]

tasya putro mahābāhuḥ sātvatānāṃ varo baliḥ |
satyapratijño dharmiṣṭho bhaktaḥ priyatamo hareḥ || 19 ||
[Analyze grammar]

sa jitvā lokapālāṃśca dikpālāṃśca samantataḥ |
trīṃllokānsvavaśe kṛtvā rājā'bhūt tribhuvāṃ patiḥ || 20 ||
[Analyze grammar]

ekātapatrāṃ pṛthivīṃ baliścakre balaitinaḥ |
akṛṣṭapacyā pṛthivī bahusasyaphalapradā || 21 ||
[Analyze grammar]

gandhavanti ca puṣpāṇi rasavanti phalāni ca |
āskandhaphalino vṛkṣā puṭake puṭake madhu || 22 ||
[Analyze grammar]

gāvaḥ pūrṇadughāḥ sarvā balau rājye praśāsati |
svadharmaniratāḥ sarve narāḥ pāpavivarjitāḥ || 23 ||
[Analyze grammar]

arcayanti hṛṣīkeśaṃ satataṃ vaiṣṇavīprajāḥ |
indrāditridaśāstasya kiṃkarāḥ samupasthitāḥ || 24 ||
[Analyze grammar]

aiśvaryaṃ triṣu lokeṣu bubhuje baladarpakṛt |
caturvedā dvijāstasya rājye yajñādikāriṇaḥ || 21 ||
[Analyze grammar]

kṣatriyā rakṣaṇe saktā yuddhaśāstrārthakovidāḥ |
goṣu sevāparā vaiśyāḥ śūdrā śuśrūṣaṇe ratāḥ || 26 ||
[Analyze grammar]

dāridryaduḥkhamaraṇairvimuktāścirajīvinaḥ |
maṇidīpaprakāśāstu diveva niśi santi yat || 27 ||
[Analyze grammar]

sarve kuṭumbino hṛṣṭāḥ sukhinaḥ sveṣṭavastubhiḥ |
nityaṃ vaivāhavāditrairgarjanti yūpamaṇḍapāḥ || 28 ||
[Analyze grammar]

yajñe santoṣitā devā nā'to yuddhaṃ parasparam |
sāpatnikakalirnāsti paśupakṣijaneṣvapi || 29 ||
[Analyze grammar]

maitrībhāvaṃ gataṃ sarvaṃ jagat sthāvarajaṃgamam |
tadā tu nārado yuddhaṃ trailokye nahi paśyati || 30 ||
[Analyze grammar]

tāvattasyodare pīḍā mahatī samajāyata |
kiṃ tarpaṇena snānena japahomādibhiśca kim || 31 ||
[Analyze grammar]

tat snānaṃ yatra yuddhyante gajā dantavighaṭṭanaiḥ |
sandhyā yatra raktairbhūḥ kabandhānāṃ tu pāṭalā || 32 ||
[Analyze grammar]

kravyādā yatra tṛpyanti tarpaṇaṃ tanmama priyam |
pūjā kṣatriyaśastraughairhanyante kṣatriyā raṇe || 33 ||
[Analyze grammar]

sa homo yatra hūyante hanyante narapuṃgavāḥ |
yuddhaṃ vinā trilokyāṃ me śūnyaṃ tu dṛśyate'nvaham || 34 ||
[Analyze grammar]

tathā kariṣye cendrasya balinā kalaho bhavet |
nāradastadvicintyaiva yayāvindraṃ prati drutam || 35 ||
[Analyze grammar]

indro dadarśa cāyāntamudāsīnaṃ tu nāradam |
siṃhāsanaṃ parityajya samutthāyā'grataḥ sthitaḥ || 36 ||
[Analyze grammar]

svāgatenā'bhivandyā'tha babhāṣe nāradaṃ hariḥ |
maharṣe kuśalo'syadya kuto vā''gamyate tvayā || 37 ||
[Analyze grammar]

snāne sanghyārcane home kuśalaṃ svinnu vidyate |
iti pṛṣṭo vihasyā'tha nāradaḥ prāha taṃ prati || 38 ||
[Analyze grammar]

baliryāvanmahāṃścakravartī bhavati sarvagaḥ |
tatra kiṃ kuśalaṃ me'sti te'pi pṛcchāmi tanmṛṣā || 39 ||
[Analyze grammar]

kuśalaṃ tu tadā mahyaṃ praṣṭavyaṃ yadi saṃyuge |
devānāṃ vijayaṃ drakṣye baleścādhogatiṃ tathā || 40 ||
[Analyze grammar]

ādityādyā grahāḥ sarve baliṃ namanti yojitāḥ |
baleryajñaistathā meghā varṣanti haviṣā bhuvi || 41 ||
[Analyze grammar]

rogādimaraṇaṃ nāsti kiṃ yamasya prayojanam |
trilokīśo mahendraśca dikpālo lokapālakaḥ || 42 ||
[Analyze grammar]

surādhipaṃ baliṃ tvadya stuvanti mānavā api |
tvāṃ tu hasanti daityendrā jalpanti nirbalānsurān || 43 ||
[Analyze grammar]

vasundharāṃ svarṇamayīṃ svāyattīkṛtya sarvathā |
balirna manute tvāṃ vai sureśvara iti svayam || 44 ||
[Analyze grammar]

surāḥ sarve balyadhīnā balikratusubhojinaḥ |
raṃbhā tiṣṭhati balyagre manute tvāṃ na menakā || 45 ||
[Analyze grammar]

tilottamā baliṃ yāti tūrvaśī ca balervaśā |
sukeśī matrjughoṣā ca nirīkṣete baliṃ sadā || 46 ||
[Analyze grammar]

pulomā pulakodbhedaṃ na karoti baliṃ vinā |
paulomī ca baliṃ stauti namati dyaurbaliṃ sadā || 47 ||
[Analyze grammar]

nāradaḥ parvataścaiva hāhā hūhūśca tumburuḥ |
baleḥ rājyaṃ praśaṃsanti te kimasti prayojanam || 48 ||
[Analyze grammar]

bṛhaspatiryadācaṣṭe na tadvācyaṃ mayā tava |
indrāṇī tu baliṃ cendraṃ matvā prātaḥ prapaśyati || 49 ||
[Analyze grammar]

iti śrutvā mahendrastu kopajvalitamānasaḥ |
gajaṃ vajraṃ prāha sūtau rathamānayataṃ drutam || 50 ||
[Analyze grammar]

sūryaṃ rudraṃ yamaṃ vāyuṃ susajjān kurutaṃ tathā |
raṇavādyāni vādyantāṃ prayāntu tvaritā bhaṭāḥ || 51 ||
[Analyze grammar]

itīndraṃ kruddhamālokya bṛhaspatirudāradhīḥ |
prāha sāmādyupāyena balirjayyo na cānyathā || 52 ||
[Analyze grammar]

yadadhīnaṃ jagatsarvaṃ viṣṇuṃ surasurakṣakam |
mantrayantu samāhūyā'nutiṣṭhantu tadāritam || 53 ||
[Analyze grammar]

athavā rājate viṣṇuḥ kāryārthaṃ mandare girau |
gacchāmastatra ṛṣayaḥ sendrā brahmapurogamāḥ || 54 ||
[Analyze grammar]

gautamo'trirbharadvājo viśvāmitro'tha kaśyapaḥ |
jamadagnirvaśiṣṭhaśca bālakhilyāśca nāradaḥ || 55 ||
[Analyze grammar]

gatāḥ sarve tadā viṣṇurbālakhilyāṃstu vāmanān |
jahāsā'ṅguṣṭhaparvābhān bhāvikāryabalāddhariḥ || 56 ||
[Analyze grammar]

tadā sarve bālakhilyā uccairūcuḥ parasparam |
asmān hasasi tasmāttvaṃ vāmano vai bhaviṣyasi || 97 ||
[Analyze grammar]

vastrāpathe raivatādrau devakāryaṃ vidhāya ca |
vāmanatvaṃ parityajya dāmodaro nivatsyasi || 58 ||
[Analyze grammar]

ityukto bālakhilyaiḥ sa viṣṇuḥ svāgatamācarat |
indro balestrilokādhipatyaṃ prāha suduḥsaham || 99 ||
[Analyze grammar]

vaśīkṛtaṃ tu balinā daityā yajñabhujaḥ kṛtāḥ |
tasmādbalirbhraṣṭarājyaḥ pātālamadhitiṣṭhatu || 60 ||
[Analyze grammar]

sūryasomānvaye kaścid rājā bhavatu bhūtale |
ityāśrutya svayaṃ prāha kariṣye ca tathā hariḥ || 61 ||
[Analyze grammar]

ṛṣayastatra gacchantu kārayantu mahāmakham |
ahaṃ tatra samāgatya sādhayiṣyāmi taṃ balim || 62 ||
[Analyze grammar]

ityuktā munayaḥ sarve svasvasthānaṃ yayustadā |
kālaṃ pratīkṣamāṇāste pratīkṣante harerjanim || 63 ||
[Analyze grammar]

kaśyapo'pi sutaṃ tvindraṃ bhraṣṭarājyaṃ vilokya ca |
ādityā saha saurāṣṭre tapastepe payovṛtam || 64 ||
[Analyze grammar]

arcayāmāsa deveśaṃ padmanābhaṃ janārdanam |
śarīre tu tayostatra pipīlikābhirāvṛte || 65 ||
[Analyze grammar]

tejo mahattayovyāptaṃ saurāṣṭre paritastadā |
lokāstu vismitāstena tau stuvanti punaḥ punaḥ || 66 ||
[Analyze grammar]

harirvarṣasahasrānte prasannastapasā tayoḥ |
tatraivāvirabhūt tasya devyā saha sanātanaḥ || 67 ||
[Analyze grammar]

taṃ dṛṣṭvā puṇḍarīkākṣaṃ śaṃkhacakragadādharam |
indīvaradalaśyāmaṃ sarvābharaṇaśobhitam || 68 ||
[Analyze grammar]

kirīṭahārakeyūrakuṇḍalaśṛṃkhalānvitam |
pītāṃbaraṃ śrīvatsāṃkakaustubhahāravakṣasam || 69 ||
[Analyze grammar]

lakṣmīyuktaṃ garuḍasthaṃ prasannaṃ jagadīśvaram |
harṣanirbharahṛdayastuṣṭāva kaśyapo harim || 70 ||
[Analyze grammar]

namo namaste lakṣmīśa sarveśa bhuvaneśvara |
svāśritānāṃ sukhadātre bhaktakāryakṛte namaḥ || 71 ||
[Analyze grammar]

ādimadhyāntarahitanityarūpāya te namaḥ |
namaḥ sarvatrāṇakṛte vedavedāṃgacakṣuṣe || 72 ||
[Analyze grammar]

sūkṣmāya sthūlarūpāya nārāyaṇāya te namaḥ |
kalyāṇaguṇapūrṇāya parātmane ca te namaḥ || 73 ||
[Analyze grammar]

namaste yogigamyāya bhaktecchāpūrakāya te |
nityamuktaikabhogāya paradhāmeśvarāya ca || 74 ||
[Analyze grammar]

caturātmannamastubhyaṃ vyūhātmane ca te namaḥ |
paṃcapaṃcasvarūpāya paṃcasaṃskāriṇe namaḥ || 75 ||
[Analyze grammar]

nārāyaṇāya kṛṣṇāya vāsudevāya te namaḥ |
śārṅgiṇe viśvarūpāya dhātre trātre ca te namaḥ || 769 ||
[Analyze grammar]

viṣṇave jiṣṇave tubhyaṃ śuddhasatvāya te namaḥ |
balerbalaṃ mahajjātaṃ tanniṣūdaya mādhava || 77 ||
[Analyze grammar]

devāstadā sukhinaḥ syuriti cābhyarthanā'sti me |
yadyapi balirājo'sau bhakto'sti suramelanaḥ || 78 ||
[Analyze grammar]

kintu surātikramaṇaṃ māstu daityasya mādhava |
tasmāt trilokagaṃ rājyaṃ tvindrasyaiva sadā'stu vai || 79 ||
[Analyze grammar]

balestvāsurarājyaṃ ca pātālādau yathāstu ca |
tathā'styabhyarthanīyaṃ me yathecchasi tathā kuru || 80 ||
[Analyze grammar]

uktvā tu kaśyapastatra virarāma hareḥ puraḥ |
aditiḥ prāha deveśaṃ natvā stutvā jagatprabhum || 81 ||
[Analyze grammar]

he nātha yadi devānāṃ śāstṛtva cāsure bhavet |
tadā'smatputrabāhulye nāsti kiñcitprayojanam || 82 ||
[Analyze grammar]

yadi śṛgālāḥ kākāśca syurdevasya vibhūtayaḥ |
kiṃ siṃhena ca haṃsena tadā vai mahimā tava || 83 ||
[Analyze grammar]

yadi daityāḥ sārvabhaumā bhrātaraste ca kiṃkarāḥ |
alaṃ tarhi jīvitena tvadityā ramayā śriyā || 84 ||
[Analyze grammar]

yadi bhavānmahaiśvaryo daityo'pi tādṛśo bhavet |
alaṃ bhagavatā tarhi daityo vai mādhavo bhavet || 85 ||
[Analyze grammar]

tasmātpātrādhikāreṇa deyā smṛddhirhi nā'nyathā |
yadi lauhaṃ gale nyastaṃ śobhate rūpabhāsuram || 86 ||
[Analyze grammar]

kṛtaṃ tarhi suvarṇena vyartha sṛṣṭaṃ hi hāṭakam |
yadi daityau bhavedindro vyarthā hyasarasastathā || 87 ||
[Analyze grammar]

rājamātaro rākṣasyaścedindrāṇyā hyalaṃ tadā |
kiṃbahūktena me nātha vyavasthāṃ kuru keśava || 88 ||
[Analyze grammar]

ityabhyarthita evā'yaṃ śrīpatiḥ parameśvaraḥ |
prāha tau vai varārthāya kaśyapaḥ prāha taṃ tadā || 89 ||
[Analyze grammar]

putratvaṃ mama deveśa saṃprāpya traidaśaṃ hitam |
prakuruṣvendrāvarajo bhūtvopendro mama priyaḥ || 90 ||
[Analyze grammar]

yena kenāpyupāyena baliṃ nirjitya līlayā |
trailokyaṃ dehi devāya śakrāyeti sukhaṃ kuru || 91 ||
[Analyze grammar]

ityuktastena vipreṇa tathetyāha janārdanaḥ |
aditiḥ kaśyapaścainaṃ pūjayāmāsaturbahu || 92 ||
[Analyze grammar]

devaiḥ saṃstūyamānaḥ śrīharistvantaradhīyata |
aditiḥ kaśyapaścaitau madhyadeśaṃ gatau tadā || 93 ||
[Analyze grammar]

himālayasya bhūmau vai kaṃcitkālaṃ samūṣatuḥ |
etasminneva samaye kaśyapasya mahātmanaḥ || 94 ||
[Analyze grammar]

adityā garbhamāgacchad bhagavān mādhavaḥ svayam |
prāvirbhāvamagamat sa devastryaṃguladehavān || 95 ||
[Analyze grammar]

daśavarṣavayaskaḥ sa vitastidehavānabhūt |
mātre pitre vane tatraikadā hyāsurasainyapaḥ || 96 ||
[Analyze grammar]

adṛśyata baliḥ pṛthvyāṃ jetuṃ sarvān samāgataḥ |
tato devān munīn pitṝn jetuṃ yāsyati yāvatā || 17 ||
[Analyze grammar]

tāvatā hyaditiḥ prāha kaśyapaṃ prāṇavallabham |
baliḥ sainyena devānvai jitvā smṛddhiṃ hariṣyati || 98 ||
[Analyze grammar]

kiṃ kartavyaṃ mama putro'dyāpi vitastimātrakaḥ |
rakṣaṇaṃ durlabhaṃ cāsya devānāṃ tu kathaṃ hi tat || 99 ||
[Analyze grammar]

tathā bhavatu yadbhāvi hariḥ rakṣāṃ kariṣyati |
iti dīnāṃ mātṛvācaṃ saṃśrutvā guptamādhavaḥ || 100 ||
[Analyze grammar]

tadā prādarśayanmātre vitastivigrahe śubhe |
anantānantasṛṣṭyaṇḍakoṭīryāścāṇurūpiṇīḥ || 101 ||
[Analyze grammar]

uḍḍīyante sma cāṇḍāni saptāvaraṇavanti tu |
lokālokaśca meruścā'drayo'nye tatra darśitāḥ || 102 ||
[Analyze grammar]

āpagāścābdhayaścāpi nakṣatragrahatārakāḥ |
meghā vanāni pātālālayāsteṣāṃ gṛhāṇi ca || 103 ||
[Analyze grammar]

uccāvacāni sarvāṇi sthalāni darśitāni vai |
tatra himagiristasya vanāni tatra kaśyapaḥ || 104 ||
[Analyze grammar]

aditiśca svayaṃ kṛṣṇo vitastimātravigrahaḥ |
baleḥ sainyaṃ tathā sarvaṃ darśitaṃ tatra vāmane || 105 ||
[Analyze grammar]

vāmanena mahādīrghe dehe pradarśya tattanum |
kṣaṇāttirohitaṃ tatrā'bhavadvitastimānakaḥ || 106 ||
[Analyze grammar]

athaivaṃ darśane jāte pitrorāśvāsanaṃ hyabhūt |
devānāṃ bhayahartā'yaṃ prāpte kāle bhavediti || 107 ||
[Analyze grammar]

tataḥ ṣoḍaśavarṣo'yaṃ hastamātrapramāṇakaḥ |
prāptamaśrusvarṇarekhaḥ kaustubhena virājitaḥ || 108 ||
[Analyze grammar]

svarṇāntameghavatsnigdhakeśayūthasumastakaḥ |
padmapatranibhanetraścandrojjvalāsyaśobhanaḥ || 109 ||
[Analyze grammar]

sudṛḍhapakvaśarīraḥ komalaḥ karapattalaiḥ |
haste svalpaṃ tvātapatraṃ yaṣṭikā ratnapauraṭī || 110 ||
[Analyze grammar]

mālikā śuklamaṇibhiḥ kṛtā karagatā śubhā |
candanasyordhvapuṃḍraṃ ca bhāle kuṃkumacandrakaḥ || 111 ||
[Analyze grammar]

suvarṇavarṇaṃ svalpaṃ suyajñopavītamaṃsake |
raktorṇāyāḥ paṭaṃ mūrdhni kaustubho hṛdaye tadā || 112 ||
[Analyze grammar]

svarṇaprāntaṃ śvetavastramuttarīyaṃ ca kaṃcukam |
kaṭyāṃ tu komalā cārdrā śubhā muñjasya mekhalā || 113 ||
[Analyze grammar]

pītāmbaraṃ svarṇavarṇaṃ pāduke svarṇabhūṣite |
kāṣṭhakamaṇḍalurhaste rajjūḥ kārpāsanirmitā || 114 ||
[Analyze grammar]

kare puruṣaviṣṇunārāyaṇasūktapustakam |
pūjārthaṃ vaṃśapātraṃ ca grathitaṃ rājate kare || 115 ||
[Analyze grammar]

āsanaṃ cājinaṃ kukṣau dhṛtvā natvā ca pādayoḥ |
pitrorāśīḥ samādāya vijayāyā'bhijitkṣaṇe || 116 ||
[Analyze grammar]

tatsthalātsa viniryāto yātrānimittamacyutaḥ |
athāpi balibhūpaḥ saḥ pṛthvīṃ jitvā divaṃ tathā || 117 ||
[Analyze grammar]

ājagāma bhuvaṃ ramyāṃ raivatācalayoginīm |
raivatādrernirṛtāyāṃ dakṣiṇe vāmanātpurāt || 118 ||
[Analyze grammar]

āmrāraṇyaṃ nadīṃ cojasvatīṃ deśaṃ supallavam |
jalasthalatarucchāyāsukhaṃ sarvaṃ vilokya ca || 119 ||
[Analyze grammar]

uvāsa yajñakhātāni kārayāmāsa vai baliḥ |
balikhātapradeśaḥ so balimakheti viśrutaḥ || 120 ||
[Analyze grammar]

bhūmiṃ tāṃ saṃskṛtāṃ kārayitvā ca makhamaṇḍapam |
dvādaśāhaṃ mahāyajñaṃ prārabhat sarvadakṣiṇam || 121 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne nārāyaṇasya sattīrthavāso baliguṇavarṇanaṃ nāradasyendraṃ prati gamanaṃ baleḥ pātanamantraṇā kaśyapādityoḥ saurāṣṭre tapaścaryā nārāyaṇādvaraprāptirvāmanajanmabalidigvijayaḥ saurāṣṭre balimakhāraṃbhaścetivarṇananāmā catuścatvāriṃśadadhikaśatatamo'dhyāyaḥ || 144 ||
[Analyze grammar]