Chapter 143

śrīnārāyaṇa uvāca |
tatra vastrāpathe lakṣmi kārtikyāṃ kurute tu yaḥ |
yātrāṃ vigāhya tattīrthe kṛtamokṣaḥ prajāyate || 1 ||
[Analyze grammar]

dāmodare saritproktā svarṇarakṣābhidhā śubhā |
brahmakuṇḍaṃ tatra tīrthaṃ tathā brahmeśvaraḥ śivaḥ || 2 ||
[Analyze grammar]

kālameghaśca saṃprokto bhavo dāmodarastathā |
gavyūtidvitaye dūre kālikā śikharopari || 3 ||
[Analyze grammar]

indreśvaro vāyudiśi mṛgīkuṇḍo bhavāntike |
kṛte sāraṇikaṃ tīrthaṃ tretāyāṃ hemamārakam || 4 ||
[Analyze grammar]

paścime unnabīleti kṣetraṃ yojanadūragam |
tatra tīrthānyanekāni siddhasthānāni ṣoḍaśa || 5 ||
[Analyze grammar]

sūryakuṇḍastatra tīrthaṃ gaṃgeśo maṃgalaṃ tathā |
siddheśvaramahādevo gavyūtiḥ paści me pure || 6 ||
[Analyze grammar]

indreśvare cakratīrthaṃ hāṭakeśastu paścime |
yakṣeśvarī mahādevī tata uparikṣmādharaḥ || 7 ||
[Analyze grammar]

somaliṃgeti madhyaḥ sa yatra tīrthānyanekaśaḥ |
gajendrasya padaṃ tatra tatraiva rasakūpikā || 8 ||
[Analyze grammar]

kuṇḍānāṃ ca śataṃ tatra hyambikā śikharopari |
pradyumnaśca tathā sāmbastathā gorakṣako'pi ca || 9 ||
[Analyze grammar]

gaṇeśo hanumāṃścāpi rāmalakṣmaṇamādhavāḥ |
vasanti vanamadhye te tattannāmnā vanāni ca || 10 ||
[Analyze grammar]

bhavastatra samāyātaḥ kathayāmi kathāmimām |
kailāsaśikhare ramye śivasya sannidhau kvacit || 11 ||
[Analyze grammar]

brahmaviṣṇusurendrādyā devāstatrā''yayurdrutam |
viṣṇuḥ provāca taṃ śaṃbhuṃ daityānāṃ ca varapradam || 12 ||
[Analyze grammar]

nāhaṃ pālayituṃ śaktastvaṃ dadāsi varān bahūn |
daityānāṃ dānavānāṃ ca rakṣasā ca maheśvara || 13 ||
[Analyze grammar]

vikṛtiṃ yānti paścāt te kaṣṭavadhyā bhavanti me |
śrupvovāca tadā śaṃbhurvaraṃ yadi dadāmi na || 14 ||
[Analyze grammar]

tadā tu tapasā daityāḥ sarvaṃ kuryurhi bhasmitam |
tvayā'haṃ brahmaṇā devairvaradānāya yojitaḥ || 15 ||
[Analyze grammar]

madīyā prakṛtistveṣā tāṃ kathaṃ tyaktumutsahe |
yena kena prakāreṇa prajāḥ pālyāstvayā prabho || 16 ||
[Analyze grammar]

kṣantavyaṃ me varadānakarmāpi bahudaṃ bhavet |
tvāṃ vinā śrīhare viṣṇo daityānāmantako hi kaḥ || 17 ||
[Analyze grammar]

mayā vā brahmaṇā vāpi varadānena yojitāḥ |
daityā vā dānavā vā ca rākṣasā vāpi ye ca ke || 18 ||
[Analyze grammar]

tvayā yuktyā prahantavyā nānyathā kuśalaṃ bhavet |
aparādhastu soḍhavyaḥ karuṇāsāgaro bhavān || 19 ||
[Analyze grammar]

jālandharo hiraṇyākṣo hiraṇyakaśipustathā |
anye cāsuramūrdhanyā yuktyā tvayaiva ghātitāḥ || 20 ||
[Analyze grammar]

yathā yuktiṃ bhavānvetti tathā jānāti nā'paraḥ |
vayaṃ tu varadāsteṣāṃ bhavāṃsteṣāṃ tu śāntikṛt || 21 ||
[Analyze grammar]

ityasmābhiścālitaṃ vai saṃsāracakrakaṃ mahat |
tathaivaitat saṃcalati kṣamasva puruṣottama || 22 ||
[Analyze grammar]

ahaṃ vyakto vicarāmi tenā''gacchanti devatāḥ |
daityāśca varalābhārthaṃ tato'vyakto bhavāmyaham || 23 ||
[Analyze grammar]

devīṃ tu pārvatīṃ rakṣa gacchāmyaviditasthalam |
iti kṛtvā mahādevastatraivāntaradhīyata || 24 ||
[Analyze grammar]

kailāsaṃ tu parityajya raivatācalamāgataḥ |
girīṇāṃ madhyamāsthāya tyaktvā divye ca vāsasī || 25 ||
[Analyze grammar]

gajā'jitaṃ parityajya tyaktvā mūrtaṃ surūpakam |
bhittvā bhūmitalaṃ śaṃbhuḥ sthāṇurūpo babhūva ha || 26 ||
[Analyze grammar]

yasmātsvayaṃ babhūveti bhaveśvaraḥ svayaṃ śivaḥ |
svayaṃbhūrvai bhavo jāto bhaveśvarataḍāgake || 27 ||
[Analyze grammar]

atrāntare tu kailāse te na paśyanti śaṃkaram |
tato devāḥ pracalitāḥ kṛtvā gaurīṃ puraḥsarām || 28 ||
[Analyze grammar]

nandibhadrādayaḥ sarve devā indrādayastathā |
putreṇa sahitā devī siṃhārūḍhā svayaṃ yayau || 29 ||
[Analyze grammar]

adhiruhya garutmantaṃ yayau viṣṇuḥ sanātanaḥ |
haṃsādhirūḍho bhagavān brahmā cāyāti pṛṣṭhataḥ || 30 ||
[Analyze grammar]

airāvataṃ samāruhya devarājo gataḥ svayam |
gaṃgā sarasvatī devī yamunā ca śaradvatī || 31 ||
[Analyze grammar]

devatāścāgatāḥ sarvā nāgā yakṣāśca kinnarāḥ |
adhiruhya gireḥ śṛṃgamambādevī vyavasthitā || 32 ||
[Analyze grammar]

brahmā viṣṇustathā devā mārgayāṃcakrurīśvaram |
dadṛśustaṃ taḍāgasya nimnabhūmau maheśvaram || 33 ||
[Analyze grammar]

kimarthaṃ vā kathaṃ cātrā samāyātāḥ surādayaḥ |
mayā tvatraiva vastavyaṃ bhaveśvarasurūpataḥ || 34 ||
[Analyze grammar]

bhavanto yadi santuṣṭāḥ surā nadyaśca sevakāḥ |
girau raivatake viṣṇurambā sarve'tra vāhakāḥ || 35 ||
[Analyze grammar]

siṃhādayo'pi tiṣṭhantu kailāso'nya ivātra vai |
suvarṇā bhagavatpatnī svarṇarekhā nadī matā || 6 ||
[Analyze grammar]

tatra gaṃgāsarasvatyādayo vasantu sarvadā |
parvate svarṇarakṣā sā svarṇarekhā tu sā bhuvi || 37 ||
[Analyze grammar]

evaṃ śaṃbhurbhaveśākhyo viṣṇurdāmodaraḥ svayam |
brahmā svayaṃbhūstatrāsti cendra indreśvare sthitaḥ || 38 ||
[Analyze grammar]

anyā'nye yatra sāralyaṃ tatra tatra vyavasthitāḥ |
tata etanmahattīrthaṃ mṛtyusaṃsāratārakam || 39 ||
[Analyze grammar]

bahurātraṃ haristatra kṛtvā daityanibarhaṇam |
samāgatya ca viśrāntiṃ nayatyeva dayānidhiḥ || 40 ||
[Analyze grammar]

reme raivatake viṣṇuryāvadābhūtasaṃplavam |
hiraṇyakaśipuṃ hatvā gatvā ca raivate girau || 41 ||
[Analyze grammar]

śarabhaṃ śivamāskandya nārasiṃhaṃ mumoca saḥ |
hiraṇyākṣaṃ tathā hatvā gatvā raivatake girau || 42 ||
[Analyze grammar]

vane vyāghramavaskandya vārāhaṃ samumoca vai |
pṛthvīṃ kṛtvā samāṃ devaḥ pṛthuścovāsa raivate || 43 || || 1 ||
[Analyze grammar]

jayamālā pṛthunā dāmodarāṃse niveśitā |
brahmaghnaśca surāpaśca bhrūṇahā gurutalpagaḥ || 44 ||
[Analyze grammar]

svarṇarakṣājale snāto mucyate sarvapātakaiḥ |
bhavadāmodarā'mbānāṃ darśanādyāti dhāma tat || 45 ||
[Analyze grammar]

vāmanastu baliṃ prāpya jitvā raivatake sthitaḥ |
kailāsaparvataṃ tyaktvā devīṃ devāṃśca saṃgatān || 46 ||
[Analyze grammar]

vaiśākhe paṃcadaśyāṃ tu bhūmiṃ bhittvā bhavo'bhavat |
tasminneva dine lakṣmi svarṇarakṣānadījalāt || 47 ||
[Analyze grammar]

panthānaṃ vāsukiḥ prāpa sarvapāpapraṇāśanam |
airāvatapadākrānta ūrjayanto mahāgiriḥ || 48 ||
[Analyze grammar]

susrāva toyaṃ bahudhā gajapādodbhavaṃ śuci |
vastrāpathasya kṣetrasya pramāṇaṃ śṛṇu padmaje || 49 ||
[Analyze grammar]

harasya bhramato bhūmau patitaṃ vastrabhūṣaṇam |
tāvanmātraṃ hi tatkṣetraṃ devairvastrāpathaṃ kṛtam || 50 ||
[Analyze grammar]

uttareṇa nadī bhadrā pūrvaṃ kuṃkumavāpikā |
dakṣiṇe ca baleḥ sthānamūrjayantīnadīmanu || 51 ||
[Analyze grammar]

paścimāyāṃ paraṃ nadyoḥ saṃgamo vāmanātpuraḥ |
etadvastrāpathaṃ kṣetraṃ bhuktimuktipradāyakam || 52 ||
[Analyze grammar]

jñeyaḥ kṣetrasya cāyāmo yojanānāṃ catuṣṭayam |
kṣetrasya dīrghatā yojanānāṃ dvādaśakaṃ matā || 53 ||
[Analyze grammar]

bhūmau luṇṭhandaṇḍavacca kṛtvā prakrāmati kramāt |
daṇḍapramāṇabhūmervā prakramed dhūlikāṃ vahan || 54 ||
[Analyze grammar]

sa saptasāgarāṃ pṛthvīṃ śāsitvā'nne hareḥ padam |
śatabhaumavimānastho divyadeho vrajatyatha || 55 ||
[Analyze grammar]

vidhāya bhujabandhaṃ vā pādau badhvā śanaiḥ śanaiḥ |
maunena mānuṣo yāyād dāmodaraṃ bhaveśvaram || 56 ||
[Analyze grammar]

sarvapāpaiḥ pramucyeta mokṣamante hyavāpnuyāt |
vastrāpathe mahākṣetre nagare vāmanasthale || 57 ||
[Analyze grammar]

vaśiṣṭho bhagavāṃstaptuṃ tapastatrājagāma ha |
īśānakoṇe nagarāt svarṇarekhānadījale || 58 ||
[Analyze grammar]

snātvā dhyātvā hariṃ devaṃ praṇanāma muniryadā |
tadā hariharau tatra samāyātau tamūcatuḥ || 59 ||
[Analyze grammar]

tvaṃ vai varṣaśataṃ cātra ghore tapasi saṃsthitaḥ |
maharṣe tava tuṣṭau svaḥ kiṃ te prārthyaṃ vadasva tat || 60 ||
[Analyze grammar]

vasiṣṭhaḥ prāha deveśau yadi deyo varo mama |
tadā bhavadbhyāmatraiva stheyamācandratārakam || 61 ||
[Analyze grammar]

mamāpi darśanaṃ sevā yuvayoḥ sarvadā bhavet |
atra ye pāpino lokā jalaṃ pītvā kṣaṇaṃ ca vā || 62 ||
[Analyze grammar]

grahīṣyanti ca viśrāmaṃ teṣāṃ pāpalayo bhavet |
hyetadvāsiṣṭhasaṃjñaṃ ca tīrthaṃ khyātaṃ bhavetsadā || 63 ||
[Analyze grammar]

tathāstviti samuccārya devau cāṃśena tiṣṭhataḥ |
svarṇadurge tu nagare kṛṣṇāyā uttare taṭe || 64 ||
[Analyze grammar]

dātārasya tu daityasya vināśāya sudarśanam |
cakraṃ vai prahitaṃ tacca dagdhvā 'suramupāgatam || 65 ||
[Analyze grammar]

tadā nārāyaṇo yatra viśrāmaṃ prāptavān hariḥ |
tatra trivikramo devaḥ siddheśvaraśca śaṃkaraḥ || 66 ||
[Analyze grammar]

śrīkṛṣṇo rādhayā sākaṃ gaṇeśo hanumāṃstathā |
devāścānye samāyātā nārāyaṇadidṛkṣayā || 67 ||
[Analyze grammar]

parvatīyajanaiḥ śuddhaiḥ kalyāṇīyasumārgagaiḥ |
divyadṛṣṭyā tu te devā dṛṣṭāstatra samāgatāḥ || 68 ||
[Analyze grammar]

tairbhaktapuṃgavairdevāḥ sāttvataiḥ samapūjitāḥ |
namaskṛtāstathā devāḥ prasannā jagaduśca tān || 69 ||
[Analyze grammar]

bhaktyā tu bhavatāṃ tuṣṭā vadantu kimapekṣitam |
prāhuste tu tadā devān yadi deyo varo bhavet || 70 ||
[Analyze grammar]

vasantu cātra saṃsthāne kalyāṇāya tu dehinām |
parvatīyāstathā'raṇyavāsino'pi tvadīkṣaṇāt || 71 ||
[Analyze grammar]

muktiṃ yāsyanti tasmādvai saṃprayacchantu tadvaram |
tathāstviti varaṃ datvā sthitāścāṃśaistu mandire || 72 ||
[Analyze grammar]

suvarṇasiṃharājñā vai kārite'tra mahattare |
suvarṇakalaśaiḥ svarṇā''sanadvāraiḥ suśobhite || 73 ||
[Analyze grammar]

raktapītaiḥ śvetanīlairmaṇibhiḥ kṛtabhūmike |
sphāṭikādyaiśca suklṛptasopānabhittimaṇḍale || 74 ||
[Analyze grammar]

atrāgatya tu ye lokā kariṣyantīkṣaṇādikam |
dānaṃ puṇyaṃ japa homaṃ sādhusādhvyāditarpaṇam || 75 ||
[Analyze grammar]

śrāddhaṃ tathotsavaṃ daivaṃ teṣāṃ puṇyamanantakam |
udyāpanaṃ kariṣyanti jīrṇoddhāraṃ ca ye janāḥ || 76 ||
[Analyze grammar]

naivedyaṃ phaladānādi satāṃ sevāṃ dhanādibhiḥ |
tanubhiśca kariṣyanti te yāsyantyakṣaraṃ padam || 77 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne raivate vastrāpathe vividhatīrthabhaveśvaradāmodarasvayaṃbhūtrivikramavāsiṣṭhasvarṇarakṣādinivāsakāraṇapradarśanādināmā tricatvāriṃśadadhikaśatatamo'dhyāyaḥ || 143 ||
[Analyze grammar]