Chapter 145

śrīnārāyaṇa uvāca |
śṛṇu lakṣmi vāmano'pi tīrthāni vyacaradbhuvi |
yayau saḥ prathamaṃ hariharakṣetraṃ tataḥ purīm || 1 ||
[Analyze grammar]

kapilāśramamāsādya brahmaputrānadṃ yayau |
kāmarūpasya kāmākṣīṃ dṛṣṭvā paśupatiṃ tathā || 2 ||
[Analyze grammar]

kedāreśvaramāsādya yayau badarikāśramam |
hanumattīrthamāsādya kailāsādrimupāyayau || 3 ||
[Analyze grammar]

agāttato haridvāraṃ kurukṣetraṃ tataḥ param |
prayayau yāmunaṃ vṛdāvanaṃ gokulamityapi || 4 ||
[Analyze grammar]

tato'yodhyāpurīṃ gatvā sarayūṃ ca prayāgakam |
gayāṃ godāvarīṃ gatvā kāverīṃ gatavāṃstataḥ || 5 ||
[Analyze grammar]

kāṃcīṃ gatvā ca kṛṣṇāṃ ca tāmraparṇīṃ kumārikām |
setubandhaṃ cāpi janārdanaṃ ca malayācalam || 6 ||
[Analyze grammar]

aruṇācalamāsādya padmākṣetraṃ varāhakam |
bhūtapurīṃ tataḥ siṃhāraṇyaṃ ca narmadāṃ tataḥ || 7 ||
[Analyze grammar]

tāpīṃ siddhapadaṃ paścātpuṣkarākhyaṃ sarastataḥ |
sindhuṃ nārāyaṇasaraḥ suvarṇadvārikāṃ tataḥ || 8 ||
[Analyze grammar]

samudre gomatīsaṃge yāvat snāti tu vāmanaḥ |
tāvattatra samāyātāḥ snānārthaṃ munayo'pi ca || 9 ||
[Analyze grammar]

gautamo'trirbharadvājo viśvāmitro'tha kaśyapaḥ |
jamadagnirvasiṣṭho nārado'paśyanpareśvaram || 10 ||
[Analyze grammar]

vāmanaṃ lakṣaṇairjñātvā nemustaṃ parameśvaram |
hariḥ prāha ca tānsarvān gacchantu balikhātakam || 11 ||
[Analyze grammar]

ṛṣayastatra gacchantu kārayantu mahāmakham |
ahaṃ tatrā''gamiṣyāmi sādhayiṣyāmi taṃ balim || 12 ||
[Analyze grammar]

ityuktāḥ ṛṣayaḥ sarve gatāste yajñamaṇḍape |
dvādaśāho mahāyajñaḥ prārabdhaḥ sarvadakṣiṇaḥ || 13 ||
[Analyze grammar]

śukreṇā''mantritāḥ sarve munayo yajñakarmasu |
patnīvrataḥ samāyāto brāhmaṇo yajñakarmaṇi || 14 ||
[Analyze grammar]

ṛṣayaḥ pitaro devā munayo yakṣarākṣasāḥ |
daityāśca dānavā nāgāḥ sarpā uragajātayaḥ || 15 ||
[Analyze grammar]

bhūtāḥ pretāḥ piśācāśca vaināyakāśca kinnarāḥ |
sūtāśca māgadhāścaiva bandinaścāraṇāstathā || 16 ||
[Analyze grammar]

gāndharvā nartakāścaiva naṭāścāṭā bahirgṛhāḥ |
kūṣmāṇḍāścaiva vetālā aśuddhāḥ śuddhajātayaḥ || 17 ||
[Analyze grammar]

dyaurgrahāḥ ketavaścāpi tattvānyapi ca śaktayaḥ |
siddhayo yoginīcakraṃ sādhvyaśca sādhavastathā || 18 ||
[Analyze grammar]

brāhmaṇāḥ kṣatriyā vaiśyāstathā sevakajātayaḥ |
nadyaśca parvatāścāpi kṣetratīrthāni sāgarāḥ || 19 ||
[Analyze grammar]

sarāṃsi cāpyaraṇyāni caitāni cāṇḍajāni ca |
yāni kāni ca divyāni puṇyarūpadharāṇi ca || 20 ||
[Analyze grammar]

caturdaśastarasthāni balirājye sthitāni ca |
tāni tvākārayāmāsa balistrailokyarājyakṛt || 21 ||
[Analyze grammar]

lakṣaśaḥ koṭiśastatra pṛthvyāṃ divi ca parvate |
samudre'raṇyadeśe ca nūpuretya samantataḥ || 22 ||
[Analyze grammar]

sarveṣāṃ tu kṛte rājyasamāḥ saudhā vinirmitāḥ |
antarīkṣavimānāni nagaryo jalavāsinām || 23 ||
[Analyze grammar]

vāyoḥ stare ca saudhāni meghasthabhavanāni ca |
parvate'raṇyavṛkṣādau bhūmau bhūmyantare tathā || 24 ||
[Analyze grammar]

yathā yathā ca yeṣāṃ vai vāse dehānukūlatā |
tathā tathā ca teṣāṃ vai bhavanānyakaronnṛpaḥ || 25 ||
[Analyze grammar]

viśvakarmā mayaścātha kāravaḥ śilpinastathā |
catuḥṣaṣṭhikalāḥ sarvāḥ śilpavidyāḥ sumūrtikāḥ || 26 ||
[Analyze grammar]

nagarāṇi tathā grāmā mūrtimanta upasthitāḥ |
kāraṇāni ca kāryāṇi ṛtavo māsavatsarāḥ || 27 ||
[Analyze grammar]

agnayo marutaḥ sarve dikpālā lokapālakāḥ |
mūrtimanti ca tattvāni bhūtāni viṣayāstathā || 28 ||
[Analyze grammar]

brahmaviṣṇumaheśāśca pārṣadā dāsakoṭayaḥ |
vaiṣṇavāḥ śivabhaktāśca tathā'nye daivasāttvatāḥ || 29 ||
[Analyze grammar]

yajñe tvākāritāstatra śakunā'śakunāni ca |
kāmadughāśca paśavaḥ pakṣiṇo garuḍādayaḥ || 30 ||
[Analyze grammar]

amṛtāni ca dugdhāni vividhānnāni sarvaśaḥ |
peyānyanekajātīni bhakṣyabhojanaparvatāḥ || 31 ||
[Analyze grammar]

rasāśca vividhāstatra madyapalalamādakāḥ |
rūkṣā ārdrāstathā snigdhāḥ khecarānnāni bhūriśaḥ || 32 ||
[Analyze grammar]

nivārāśca yavāścaiva godhūmacaṇakā'kṣatāḥ |
tilā javarikā māṣā havīṃṣyannāni bhūriśaḥ || 33 ||
[Analyze grammar]

na dṛṣṭāni śrutānyeva caturdaśasu bhūmiṣu |
yāni yeṣāṃ subhojyāni phalapatrādikāni ca || 34 ||
[Analyze grammar]

abdhijānyagnijānyatra sambhārottamajāni ca |
pātravastravibhūṣādiyānavāhanapaṃktayaḥ || 35 ||
[Analyze grammar]

vidyuddīpāḥ koṭiśaśca jalayantrāṇyanekaśaḥ |
kūpā vāpyo vastrasaudhā rasavatyaḥ sahasraśaḥ || 36 ||
[Analyze grammar]

sūdāśca yājñikāstatra ṛtvijā lakṣaśaḥ kṛtāḥ |
jāpakāḥ pūjakāṃstatra gāyakā vaidikāstathā || 37 ||
[Analyze grammar]

vṛtāśca koṭiśaḥ sādhyā viśvedevāstathā'pare |
vidvāṃso devaguravo daityānāṃ guravastathā || 38 ||
[Analyze grammar]

yajñasya vividhe kārye tathā'ṅge yojitāstadā |
devyo gaṅgādisaritaḥ śāradā ca sarasvatī || 39 ||
[Analyze grammar]

sāvitryādyāstathā cānyā gītakīrtipragalbhikāḥ |
ṛco vedāśca śāstrāṇi mūrtimanti bhavanti ca || 40 ||
[Analyze grammar]

tatra kā nyūnatā vai syād yatra trailokyapālakaḥ |
mahābhāgavato rājā balirvai yajñakārakaḥ || 41 ||
[Analyze grammar]

pravarṣantīcchayā yasya sadā lokāścaturdaśa |
mahāyajñe tadā'trā'bhūt sarvaṃ vai vāmanaṃ vinā || 42 ||
[Analyze grammar]

kāmo vasanto bāṇāśca ratiścāpi samāgatāḥ |
rāgiṇyaśca tathā rāgā grāmāśca mūrchanā yayuḥ || 43 ||
[Analyze grammar]

manvantarāṇi dharmasya vaṃśajāḥ sadguṇādayaḥ |
vasavo nidhayo rudrā diśā ādityadevatāḥ || 44 ||
[Analyze grammar]

candramasaśca nakṣatrā grāmāḥ kheṭāśca kharvaṭāḥ |
oṣadhyo jalajāścāpi sthalajā mūlajāstathā || 45 ||
[Analyze grammar]

amṛtavallikā nāgavallyaśca jīvavallikāḥ |
bhūgolajñāḥ khagolajñā daivajñā gaṇakāstathā || 46 ||
[Analyze grammar]

muhūrtāni tathā yogāḥ sarve ye te samāyayuḥ |
mallā naṭā bahurūpā nāṭakāni ca khelakāḥ || 47 ||
[Analyze grammar]

pradarśanāni divyāni vahnisphoṭāni bhūriśaḥ |
paśuyuddhāni ramyāṇi naravyāyāmakāṇi ca || 48 ||
[Analyze grammar]

vyākhyānāni kathakāśca tyāgisanyāsisādhavaḥ |
brahmacārijanā bālakhilyāstathordhvaśīlinaḥ || 49 ||
[Analyze grammar]

yatkiṃcidvai jagattattvaṃ sarvaṃ tatra samāgatam |
balinā bahumānena svāgatenā''dṛtaṃ jagat || 50 ||
[Analyze grammar]

siṃhāraṇyaṃ tadā sarvaṃ prajādevamayaṃ hyabhūt |
antarīkṣaṃ jalaṃ sthānaṃ prāghūrṇikasupūritam || 51 ||
[Analyze grammar]

yathā vā nūtanaṃ tatra brahmāṇḍamiva dṛśyate |
nedṛśastu samājo vai bhūto bhāvī na vā punaḥ || 52 ||
[Analyze grammar]

yajñasya maṇḍapastatra śatagavyūtimānataḥ |
ā ca svarṇadvārikāta ā ca someśvarāvadhi || 53 ||
[Analyze grammar]

ā ca makarālayata ā ca kuṃkumavāpikam |
bhūmistu maṇḍapaiḥ sā śobhate dyauriva nūtanā || 54 ||
[Analyze grammar]

yajñakuṇḍo yojanaṃ tu kamalākāravatkṛtaḥ |
araṇyebhyaḥ pippalāpāmārgodumbarakiṃśukāḥ || 55 ||
[Analyze grammar]

homakāṣṭhāni cānyāni samidhāṃ parvatāḥ kṛtāḥ |
ājyanārīkelaraṃbhādrākṣādiphalaparvatāḥ || 56 ||
[Analyze grammar]

tilaśāliyavadhānyanivārāṇāṃ ca parvatāḥ |
puṣpapatramūlaśākhāmañjarībījaparvatāḥ || 57 ||
[Analyze grammar]

śarkarā dugdhapākāśca pāyasānnāni bhūriśaḥ |
hūyante puṣkalānyeva vedaghoṣāśca nākagāḥ || 58 ||
[Analyze grammar]

bhojanāni prabhujyante yajñaśiṣṭāni nityadā |
miṣṭapānāni pīyante yajñaprāsādikāni vai || 59 ||
[Analyze grammar]

īśvarāṇāṃ ca devānāmāgamo gama ityapi |
maṇḍape vartate tatrā'vyavacchinnapravāhaṇaḥ || 60 ||
[Analyze grammar]

ekataśca dvitaścāpi tritaśceti ṛṣitrayam |
tattaddevādimantraiśca navamutpādyate'rthakam || 61 ||
[Analyze grammar]

arko dvitīyarūpeṇa dvitīyaścandramāstathā |
prakāśete sadā tatra divārātryorna vai bhidā || 62 ||
[Analyze grammar]

avyavacchedyadhārābhirghṛtānāmagnisammukhaiḥ |
bhuṅakte harirvāmano'yaṃ vyāpakaḥ śrīhariḥ svayam || 63 ||
[Analyze grammar]

evaṃ satatamāgneyaṃ karma sampadyate śubham |
kimu tatra varṇanīyaṃ śeṣo'pi śramamāptavān || 64 ||
[Analyze grammar]

śramamāpurdarśakā vai varṇakānāṃ tu kā kathā |
bhagavadbhaktiyuktasya sarvaṃ smṛddhaṃ na saṃśayaḥ || 65 ||
[Analyze grammar]

prabhorbhakteḥ pratāpādvai tvanantāḥ smṛddhayo baleḥ |
nityaṃ homasya bhojyasya pānasyā'rthyarpaṇasya ca || 66 ||
[Analyze grammar]

dakṣiṇāyāṃ suvarṇasyā''nantyasyānto na dāpane |
dīyatāṃ dīyatāṃ ceti bhujyatāṃ bhujyatāṃ tathā || 67 ||
[Analyze grammar]

pīyatāṃ pīyatāṃ ceti nīyatāṃ nīyatāṃ tathā |
svāgataṃ svāgataṃ vaśca pañcakaṃ nātra śāmyati || 68 ||
[Analyze grammar]

vedaghoṣā gītighoṣā nāmavoṣā harestathā |
vādyaghoṣāḥ kīrtighoṣāḥ pañcakaṃ nātra śāmyati || 69 ||
[Analyze grammar]

atihṛṣṭo baliryajñe dadau dānaṃ parārdhakam |
suvarṇānāṃ hīrakāṇāṃ rūpyakāṇāṃ ca koṭikāḥ || 70 ||
[Analyze grammar]

gavāṃ dānaparārdhāṇi vastradānā'rbudārbudam |
vibhūṣāṇāṃ rūpyakāṇāṃ mudrāṇāṃ tvabjakoṭayaḥ || 71 ||
[Analyze grammar]

chatrāṇāṃ pādukādīnāṃ pātrāṇāṃ ca parārdhakam |
yānānāṃ vāhanānāṃ ca hastīnāṃ vājināṃ tathā || 72 ||
[Analyze grammar]

rathānāṃ kanyakānāṃ ca koṭikoṭyarbudāni ca |
dānānyevaṃ dadau sākṣād viṣṇuḥ kṛṣṇa ivā'paraḥ || 73 ||
[Analyze grammar]

vasavo dānakārye'tra mukhyāścaivā'bhavaṃstadā |
lakṣmīḥ ramā mahālakṣmīḥ mukhyāḥ svarṇādidāpane || 74 ||
[Analyze grammar]

dyauśca pṛthvī kṛte mukhye ratnabhojyādidāpane |
merustatra mahāmukhyaḥ pātrapaśvādidāpane || 75 ||
[Analyze grammar]

samudrāśca kuberaśca himādryādaya ityapi |
araṇyāni viśvakarmā mayaścānye divaukasaḥ || 76 ||
[Analyze grammar]

ratnabhūṣāvibhūtyādiyānavāhanadāpane |
mukhyāḥ kṛtāśca te sarve daduḥ sarvasvameva yat || 77 ||
[Analyze grammar]

uddhoṣo'bhūccaturdaśalokeṣu sarvato diśi |
trilokeśo baliryajñe dadau dānāni koṭiśaḥ || 78 ||
[Analyze grammar]

svarṇapātreṣu sarvebhyo dīyate bhojanaṃ bahu |
atithirbrāhmaṇo vidvān sarvasvenāpi pūjyate || 79 ||
[Analyze grammar]

sarvalokanivāsinyaḥ prajāstatrā''yayurmakhe |
gacchantu pratigṛhṇantu dānaṃ bhuñjantu bhojanam || 80 ||
[Analyze grammar]

paśyantu kīdṛśo yajño na bhūto na bhaviṣyati |
saurāṣṭradeśe vikhyāto raivatācalasannidhau || 81 ||
[Analyze grammar]

kṣetraṃ vastrāpathaṃ khyātaṃ tatrā'yaṃ vaiṣṇavo makhaḥ |
paścimād dakṣiṇe bhāge balerasti mahāmakhaḥ || 82 ||
[Analyze grammar]

ityuddhoṣaṃ paraṃ śrutvā vāmano'pi mahāprabhuḥ |
sarvajño'pyasarvajñavat evaṃ cedyāmi labdhaye || 83 ||
[Analyze grammar]

iti kurvan caturvedī brāhmaṇastīrthayātrayā |
raivatādrau samāyāto lokairajñātaceṣṭitaḥ || 84 ||
[Analyze grammar]

mahodaro hrasvabhujo hrasvapādo mahāśirāḥ |
mahāhanuḥ sthūlakaṇṭhaḥ sthūlajaṃgho'tilālasaḥ || 85 ||
[Analyze grammar]

baddhaśikho dhṛtavastracchatropānatkamaṇḍaluḥ |
vastrāpathe samāyātaḥ svarṇarakṣānadītaṭe || 86 ||
[Analyze grammar]

vāmanaścintayāmāsa somanāthaṃ bhaveśvaram |
dāmodaraṃ tathā dattātreyaṃ raivatakaṃ girim || 87 ||
[Analyze grammar]

dṛṣṭvā dattaṃ tato yāmi baleryajñasthalaṃ khalu |
iti kṛtvā gataḥ someśvaraṃ śaṃbhuṃ dadarśa ca || 88 ||
[Analyze grammar]

somanātho mahādevo viṣṇuṃ provāca vāmanam |
siddhastvaṃ sarvathā viṣṇo kāryasiddhirbhaviṣyati || 89 ||
[Analyze grammar]

taṃ natvā ca yayau yatra harastvāste bhaveśvaraḥ |
samprāptastadvanaṃ divyaṃ ramyaṃ raivatake girau || 90 ||
[Analyze grammar]

yatra vṛkṣā naikavidhā dīrghaśākhāḥ phalānvitāḥ |
vaṭodumbarabilvāśca sarjā'rjunakadambakāḥ || 91 ||
[Analyze grammar]

palāśāśvatthajambvaśca dhavādyā vāruṇadrumāḥ |
śamīkaṃkolanimbāśca bījapūrāśca dāḍimāḥ || 91 ||
[Analyze grammar]

badaryaśca bakāḥ pūgā śivāḥ kamalaśalyakāḥ |
hintālāśca śirīṣāśca bījakā vaṃśakhādirāḥ || 13 ||
[Analyze grammar]

ajamodā nikuṃbhāśca iṅgudyaśca karīrakāḥ |
dhāmārgavāḥ kurabakāḥ karaṃjāśca punarnavāḥ || 94 ||
[Analyze grammar]

aṃkolāḥ pāribhadrāśca kambalyaḥ panasāstathā |
utpalāśca haridrāśca gaṇḍīrā vāyasīdrumāḥ || 95 ||
[Analyze grammar]

tamālakā rasālāśca kharjūryaḥ karamardakāḥ |
sevatīśālmalīśālā madhūkāśca bibhītakāḥ || 96 ||
[Analyze grammar]

harītakyaḥ kandarālā vaṭāścaivāṭarūṣakāḥ |
vikaṃkatāḥ kapitthāśca rohiṇīvetrapāṭalāḥ || 97 ||
[Analyze grammar]

madanāścaiva nirguṇḍyaḥ kadalyaḥ śiṃśapādayaḥ |
elālavaṃgalavalīsaralāgurupādapāḥ || 98 ||
[Analyze grammar]

śrīkhaṇḍakaravīrāśca kalpavṛkṣā mahottamāḥ |
vāmanena tadā dṛṣṭāḥ chāyāvṛkṣāḥ surārcitāḥ || 99 ||
[Analyze grammar]

udayāstamane yeṣāṃ chāyā na pratihanyate |
dṛṣṭvā vṛkṣāṃstaḍāge ca snātvā mūlaṃ gireryayau || 100 ||
[Analyze grammar]

vāpikāyā jalaṃ pītvā yāvadviśrāntimicchati |
kṣetrapālāḥ pañca tāvad darśanāya samāgatāḥ || 101 ||
[Analyze grammar]

ekapādabhidho girestaṭe vasati sarvadā |
giridāruṇanāmā'sau dvitīyo vartate girau || 102 ||
[Analyze grammar]

ūrjayantagirermūrdhni meghanādastṛtīyakaḥ |
bhavānīśikhare ramye siṃhanādaścaturthakaḥ || 103 ||
[Analyze grammar]

svarṇarakṣānadītīre kālamegho vasatyapi |
vāmanasya darśanaṃ ca kṛtvā te svasthalaṃ gatāḥ || 104 ||
[Analyze grammar]

ekādaśīṃ samārabhya yāvadvai pūrṇimātithiḥ |
tadbhīṣmapaṃcakaṃ śreṣṭhaṃ kārtike mokṣakṛddhi tat || 105 ||
[Analyze grammar]

pradakṣiṇā prakartavyā svarṇarakṣāplavastathā |
darśanaṃ sarvathā kāryaṃ dāmodarabhaveśayoḥ || 106 ||
[Analyze grammar]

atha nṛsiṃho bhagavān vāmanaṃ draṣṭumāgataḥ |
stutvā sthitastadā taṃ vai vāmanaḥ prāha nṛhare || 107 ||
[Analyze grammar]

dāmodarāgre bhavatā stheyaṃ vai vacanānmama |
sadātra rakṣā kartavyā sarveṣāṃ tīrthavāsinām || 108 ||
[Analyze grammar]

devasyā'gre sadā stheyaṃ yāvadindrāścaturdaśa |
evamastviti tatraiṣastīrtharakṣāṃ karoti vai || 109 ||
[Analyze grammar]

tato vai vāmano devo bhavānīṃ skandamātaram |
draṣṭuṃ sa ca hariryāto śikhare gaganāśrite || 110 ||
[Analyze grammar]

dṛṣṭvā bhavānīṃ tāmambāmūrdhvabāhurvyavasthitaḥ |
nirīkṣya medinīṃ sarvāṃ paścime sāgarāmbarām || 111 ||
[Analyze grammar]

tato gatau gorakṣasya śikhare svayamacyutaḥ |
tatastṛtīye śikhare dattātreyaṃ vyalokayat || 112 ||
[Analyze grammar]

uḍuीya pūrvasyāmaśvapaṭṭasarovaram |
kukumavāpīṃ gatvā kaṃbharāgopāladarśanam || 113 ||
[Analyze grammar]

kṛtvā patnīvratatīrthamāyāduḍḍīya raivatam |
tato maṇipuraṃ cāyāt tataḥ sa vāmanaṃ puram || 114 ||
[Analyze grammar]

āsure'tra pure tatra vāmanastu gṛhād gṛham |
brāhmaṇānāṃ śubhaṃ gatvā nityaṃ bhikṣāṃ tu yācate || 115 ||
[Analyze grammar]

catuṣpatheṣu ramyeṣu devatāyataneṣu ca |
āste parivṛto lokaiścālayan sthūlayaṣṭikām || 116 ||
[Analyze grammar]

vidhunoti śiraḥ sthūlaṃ nṛtyati bālalīlayā |
kvacidyāti hrasvapādairgāyatyatimanoharam || 117 ||
[Analyze grammar]

vedānadhīte caturo ghanacchaṭāvibhūṣitān |
daityānāṃ tanujāḥ sarve brāhmaṇānāṃ tathaiva ca || 118 ||
[Analyze grammar]

vāmanaṃ parito yānti divārātraṃ tu narmabhiḥ |
vicitraṃ vāmanaṃ rūpaṃ draṣṭumāyānti mānavāḥ || 119 ||
[Analyze grammar]

kumārairbahubhirnīto vāmano yajñamaṇḍape |
yatrāsti dānakartā vai yajamāno balirnṛpaḥ || 120 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne vāmanasya tīrthayātrā baliyajñe caturdaśabhavānāṃ koṭyabjādisamājaikatrībhavanaṃ yajñamaṇḍapakuṇḍahomadānāni vāmanasya raivatācalayātrā vāmanapurasthitistato |
yajñamaṇḍape baliṃ pratyāgamanamiti nirūpaṇanāmā pañcacatvāriṃśadadhikaśatatamo'dhyāyaḥ || 145 ||
[Analyze grammar]