Chapter 113

śrīnārāyaṇa uvāca |
pārvatyā vacanaṃ śrutvā vaiṣṇavaśca maheśvaraḥ |
saṃpravaktuṃ samārebhe tajjijñāsānivṛttaye || 1 ||
[Analyze grammar]

śṛṇu sati pravakṣyāmi viṣṇuṃ bhaje'hamaṃjasā |
kṛṣṇanārāyaṇo viṣṇuḥ parabrahma pareśvaraḥ || 2 ||
[Analyze grammar]

bhajanīyaḥ pūjanīyo japanīyaśca sarvadā |
mayā dīkṣā tadīyā vai grahītā badarīvane || 3 ||
[Analyze grammar]

taṃ vai pareśvaraṃ nityaṃ dhyāye bhajāmi bhāvataḥ |
pārvatī prāha deveśa vistarāt tadyathātatham || 4 ||
[Analyze grammar]

māmapi śrāvaya sarvaṃ yadi grāhyaṃ mayā bhavet |
yenā'hamapi govindamāśritya śreya āpnuyām || 5 ||
[Analyze grammar]

kathaṃ nā'dyāpi me nātha kathitaṃ nahi tatkvacit |
etāvatkālaparyantaṃ śrīharerbhajanaṃ vinā || 6 ||
[Analyze grammar]

divasāḥ sarvathā vyarthā gamitā me hariṃ vinā |
yadyahaṃ te devadeva satpātra sammatāsmi vai || 7 ||
[Analyze grammar]

tadā māmapi bhaktāṃ śrīhareḥ saṃdīkṣaya prabho |
gururbahmā gururviṣṇurgurudevo janārdanaḥ || 8 ||
[Analyze grammar]

guruḥ svasyāḥ patiḥ proktaḥ patyau sarvaṃ samāsthitam |
patyuḥ sevā parā sevā patyurbhaktiḥ parā matā || 9 ||
[Analyze grammar]

patidharmaḥ paro dharmastaṃ dharmaṃ dehi śaṃkara |
patistu vaiṣṇavo yasyāḥ patnī yadi na vaiṣṇavī || 10 ||
[Analyze grammar]

avaiṣṇavyā kṛtā sevā bhaktiḥ sarvāpi niṣphalā |
avaiṣṇavyā kṛtaṃ bhojyamaśuddhaṃ pāvanaṃ nahi || 11 ||
[Analyze grammar]

avaiṣṇavyāḥ karajalaṃ hyapeyaṃ pāvanaṃ nahi |
avaiṣṇavyā gṛhaṃ sarvaṃ śmaśānamiti gīyate || 1 || bhe |
avaiṣṇavyā gṛhāllakṣmīrniḥsarati sarvathā |
tasmādahaṃ svāmidharmaṃ vaiṣṇavaṃ pāvanaṃ param || 13 ||
[Analyze grammar]

saṃgrahītuṃ samicchāmi vistarādbrūhi tattvataḥ |
śrutvaivaṃ pārvatīgāthāṃ prāha śaṃbhurmaheśvarīm || 14 ||
[Analyze grammar]

nādyāpi pātratā te'bhūt tasmānna kathitaṃ mayā |
bahūnāṃ janmanāṃ puṇyaiḥ pātratā prāpyate khalu || 12 ||
[Analyze grammar]

etajjanmani pātratvaṃ puṣṭiṃ yāti kathāśravāt |
satāṃ tu sevayā cātmā divo bhavati nityaśaḥ || 16 ||
[Analyze grammar]

pātivratyena patyuśca sevayā''tmā balaṃ vrajet |
balavānbhāgyavānsādhusevako yo bhavejjanaḥ || 17 ||
[Analyze grammar]

tasyaiva nirmalā vṛttirbhavatyāntarabāhyajā |
nairmalyaṃ tu bhavedbījaṃ śraddhāyāḥ sarvathā priye || 18 ||
[Analyze grammar]

tato bhavati jijñāsā tayā cā'pyadhikāritā |
tathā sati guroryoge sarvaṃ phalati yatkṛtam || 19 ||
[Analyze grammar]

tavedānīṃ tu tatsarvaṃ samutpannaṃ ca yojitam |
hyupasthitaṃ ca saṃjātaṃ tasmāt tvaṃ pātramuttamam || 20 ||
[Analyze grammar]

jātā'syadya mahādevi prasannaśca bhavāmyaham |
aho mama priyā patnī vaiṣṇavīṃ sthitimicchasi || 21 ||
[Analyze grammar]

asmāt kinnu mahadbhāgyaṃ paraṃ mama kṛte bhavet |
atyatīva prasanno'smi śrutvā te hṛdayaṃ priye || 22 ||
[Analyze grammar]

sarvaṃ te 'haṃ pradāsye vai yatastvaṃ vaiṣṇavī bhava |
devi cādyāpi paryantaṃ bhojyaṃ peyaṃ yadarpitam || 23 ||
[Analyze grammar]

viṣṇave tatsamarpayya paścād bhuktaṃ mayā hi tat |
kiṃ vacmi devadeveśi hyadyā''nandamayo mahān || 24 ||
[Analyze grammar]

sūryodayaḥ suvarṇasya mama jāto'sti sarvathā |
patisevāphalaṃ sarvaṃ sakhi te bhavatu priye || 25 ||
[Analyze grammar]

gṛhaṃ sarvaṃ mama bhūyādvaiṣṇavaṃ bhāgyavānaham |
adya devi dehaśuddhyai kārtike śuklapakṣake || 26 ||
[Analyze grammar]

daśamyāṃ tu nirāhāramupavāsaṃ kuru priye |
dehaśuddhyarthamevātra paṃcagavyaṃ gṛhāṇa ca || 27 ||
[Analyze grammar]

maṇḍapaṃ śrīkṛṣṇapūjākṛte racaya śobhanam |
kadalīstaṃbhasannaddhamaśokadalatoraṇam || 28 ||
[Analyze grammar]

saptadhānyakṛtaṃ tatra sarvatobhadramaṇḍalam |
racaya tvaṃ mahābhāge tatra sthāpaya sadghaṭam || 29 ||
[Analyze grammar]

aṣṭadikṣu ghaṭānpārśve sthāpayā'ṣṭau navāṃstataḥ |
kaṇṭhe veṣṭaya vastrāṇi mukhe paṃcārdrapallavān || 30 ||
[Analyze grammar]

nārīkelaphalānyaṣṭa kṛṣṇaṃ lakṣmīṃ ca tatra vai |
madhye ghaṭe svarṇapātre pratiṣṭhāpaya bhāvataḥ || 31 ||
[Analyze grammar]

gaṇeśapūjanaṃ kṛtvā śrīkṛṣṇapūjanaṃ tataḥ |
lakṣmyāśca pūjanaṃ nārāyaṇena saha kārayā || 32 ||
[Analyze grammar]

nivedaya varāṇyeva hyupacārāṇi ṣoḍaśa |
rātrau jāgaraṇaṃ kuryāḥ prātaḥ snānaṃ tathā kuru || 33 ||
[Analyze grammar]

upacāraiḥ ṣoḍaśabhiḥ śrīkṛṣṇaṃ pratipūjaya |
tatra samāgataṃ dīkṣāvidhijñātārameva ca || 34 ||
[Analyze grammar]

ācāryaṃ māṃ śraya pūrvaṃ haryāśrayaṇasiddhaye |
ācinoti ca śāstrārthānācāre sthāpayatyapi || 25 ||
[Analyze grammar]

svayaṃ tvācarate yasmāt brahmādhyāpayati dhruvam |
mantraṃ jānāti viṣṇośca bhaktiṃ karoti sarvathā || 36 ||
[Analyze grammar]

śrīmannārāyaṇasampradāyavidyāṃ tu vetti yaḥ |
tārayati svakaṃ śiṣyamācāryaḥ sa mato guruḥ || 37 ||
[Analyze grammar]

tadvākyeṣu suviśvāsaḥ śiṣyo bhaktiparāyaṇaḥ |
gṛhṇīyānmantraratnaṃ tadekādaśyāṃ tu kārtike || 38 ||
[Analyze grammar]

gṛhāṇa devi dīkṣāṃgaṃ śaṃkhacakrasumudraṇam |
paṃcāmṛtaiḥ prasaṃsnāpya śaṃkhaṃ cakraṃ prapūjya ca || 39 ||
[Analyze grammar]

agniṃ saṃsthāpya vidhinā juhayājyaṃ vidhānataḥ |
ghṛtapāyasayorhomamaṣṭottaraśataṃ kuru || 40 ||
[Analyze grammar]

śaṃkhacakre pratapte ca kuru hyagnau tato guruḥ |
ahaṃ śaṃbhurgurustvāṃ vai cakreṇa jalajena ca || 41 ||
[Analyze grammar]

aṃkayāmi dvayorbāhvoḥ punaḥ prapūjya taddvayam |
kalaśasthajalenā'trā'bhiṣekaṃ kuru mastake || 42 ||
[Analyze grammar]

nūtanāṃ śāṭikāṃ dhṛtvā jalenācamanaṃ kuru |
lalāṭe tilakaṃ cordhvapuṃḍraṃ sacandrakaṃ kuru || 43 ||
[Analyze grammar]

candanena kuṃkumena tato mantraṃ gṛhāṇa me |
brahmāhaṃ brahmabhaktā'smi trivāraṃ tad gṛhāṇa me || 44 ||
[Analyze grammar]

tato māṃ prapūjayā'dritanaye māṃ namaskuru |
gṛhāṇa tulasīkaṇṭhīṃ kaṇṭhe dhāraya cādrije || 45 ||
[Analyze grammar]

lakṣmīnārāyaṇaśceti mantraṃ gṛhāṇa cādrije |
maheśvarīti te nāma parameśvarī cetyapi || 46 ||
[Analyze grammar]

bodhyaṃ tataḥ kuru dhyānaṃ śrīhariṃ dvibhujaṃ tathā |
lakṣmīnārāyaṇaṃ divyaṃ dhyāne gṛhāṇa sarvadā || 47 ||
[Analyze grammar]

parasmād brahmaṇo nārāyaṇād devo'sti no paraḥ |
tasyaiva cāparo mantraḥ śrīhariṃ śaraṇaṃ mama || 48 ||
[Analyze grammar]

gṛhāṇainaṃ śive'dya tvaṃ jātā pūjyā suvaiṣṇavī |
kuru bhaktiṃ harernityaṃ gurorme sevanaṃ kuru || 49 ||
[Analyze grammar]

śiṣyapraśiṣyaśākhāśca mantradānena vardhaya |
lakṣmyāvāsastvayi prāpto mayi nārāyaṇasya ca || 50 ||
[Analyze grammar]

āvāṃ bhaktiṃ kariṣyāvo nārāyaṇasya sarvadā |
sevāṃ tasya kariṣyāvo yena muktirdhruvā bhavet || 51 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne kailāse śaṃbhunā pārvatyai śrīvaiṣṇavīdīkṣādattetyaṃgabhūtakāṇḍanirūpaṇanāmā trayodaśā'dhikaśatatamo'dhyāyaḥ || 113 ||
[Analyze grammar]