Chapter 19

sa trivikramaseno 'tha punas taṃ śiṃśapātarum |
gatvā prāpya ca vetālaṃ rājā skandhe cakāra tam || 1 ||
[Analyze grammar]

pratasthe ca tam ādāya tūṣṇīm eva sa pūrvavat |
tato bhūyas tam āha sma vetālaḥ so 'ṃsapṛṣṭhataḥ || 2 ||
[Analyze grammar]

rājann evam anudvignaḥ paryāptam asi me priyaḥ |
tad etāṃ śṛṇv akhedāya hṛdyām ākhyāmi te kathām || 3 ||
[Analyze grammar]

aṅgadeśe yaśaḥketur iti rājābhavat purā |
kṣmām āśrito 'ṅgaguptyartham adagdho 'nya iva smaraḥ || 4 ||
[Analyze grammar]

bāhuvīryajitāśeṣavairivargasya tasya ca |
dīrghadarśīty abhūn mantrī śakrasyeva bṛhaspatiḥ || 5 ||
[Analyze grammar]

tasmin mantriṇi vinyasya rājyaṃ sa hatakaṇṭakam |
śanaiḥ sukhaikasakto 'bhūd vayorūpamadān nṛpaḥ || 6 ||
[Analyze grammar]

tasthāv antaḥpure śaśvan nāsthāne pramadāspade |
śuśrāva raktimad gītaṃ vacanaṃ na hitaiṣiṇām || 7 ||
[Analyze grammar]

rajyati sma ca niścinto jālavātāyaneṣu saḥ |
na punā rājakāryeṣu bahucchidreṣu jātv api || 8 ||
[Analyze grammar]

dīrghadarśī tu tad rājyacintābhāraṃ samudvahan |
atiṣṭhat sa mahāmantrī divāniśam atandritaḥ || 9 ||
[Analyze grammar]

nāmamātre kṛtadhṛtiṃ prakṣipya vyasane nṛpam |
mantrī rājñaḥ śriyaṃ bhuṅkte dīrghadarśīha sāmpratam || 10 ||
[Analyze grammar]

ity utpanne mahaty atra janavāde 'tha gehinīm |
svairaṃ medhāvinīṃ nāma dīrghadarśī jagāda saḥ || 11 ||
[Analyze grammar]

priye rājñi sukhāsakte tadbhāraṃ vahato 'pi me |
rājyaṃ bhakṣitam etenety utpannam ayaśo jane || 12 ||
[Analyze grammar]

lokavādaś ca mithyāpi mahatām iha doṣakṛt |
tatyāja kiṃ na rāmo 'pi janavādena jānakīm || 13 ||
[Analyze grammar]

tad atra kiṃ mayā kāryam ity ukte tena mantriṇā |
bhāryā medhāvinī dhīrā sānvarthā tam abhāṣata || 14 ||
[Analyze grammar]

tīrthayātrāpadeśena yuktyāpṛcchya mahīpatim |
kaṃcit kālaṃ videśaṃ te gantuṃ yuktaṃ mahāmate || 15 ||
[Analyze grammar]

evaṃ te niḥspṛhasyaiṣa janavādo nivartsyati |
tvayy asthite tato rājyam udvakṣyati nṛpaḥ svayam || 16 ||
[Analyze grammar]

tataś cāsya śanair etad vyasanaṃ hānimeṣyati |
āgatasyātra nirgarhā bhavitrī mantritā ca te || 17 ||
[Analyze grammar]

ity ukto bhāryayā gatvā dīrghadarśī tatheti saḥ |
kathāprasaṅge taṃ bhūpaṃ yaśaḥketuṃ vyajijñapat || 18 ||
[Analyze grammar]

anujānīhi māṃ rājan divasān kāṃścid apy aham |
vrajāmi tīrthayātrāyai dharmo hi prepsitaḥ sa me || 19 ||
[Analyze grammar]

tac chrutvā so 'bravīd rājā maivaṃ tīrthair vinā paraḥ |
dānādiḥ kiṃ na dharmo 'sti svargyas te svagṛheṣv api || 20 ||
[Analyze grammar]

athāvocat sa mantrī tam arthaśuddhyādi mṛgyate |
dānādau nityaśuddhāni tīrthāni nṛpate punaḥ || 21 ||
[Analyze grammar]

yāvac ca yauvanaṃ rājaṃs tāvad gamyāni dhīmatā |
aviśvāsye śarīre hi saṃgamas taiḥ kuto 'nyadā || 22 ||
[Analyze grammar]

iti tasmin vadaty eva rājñi caivaṃ niṣedhati |
praviśyātra pratīhāro rājānaṃ taṃ vyajijñapat || 23 ||
[Analyze grammar]

deva vyomasaromadhyam aṃśumālī vigāhate |
tad uttiṣṭhata saiṣā vaḥ snānavelātivartate || 24 ||
[Analyze grammar]

śrutvaitat sahasā snātum udatiṣṭhan mahīpatiḥ |
yātronmukhaḥ sa mantrī ca taṃ praṇamya gṛhaṃ yayau || 25 ||
[Analyze grammar]

tatrāvasthāpya bhāryāṃ tām anuyātrānivāritām |
sa pratasthe tato yuktyā svabhṛtyair apy atarkitaḥ || 26 ||
[Analyze grammar]

ekākī ca bhramaṃs tāṃs tān deśāṃs tīrthāni ca vrajan |
sa prāpa puṇḍraviṣayaṃ dīrghadarśī suniścayaḥ || 27 ||
[Analyze grammar]

tatra pattana ekasminn adūre 'bdheḥ praviśya saḥ |
ekaṃ devakulaṃ śaivaṃ tatprāṅgaṇa upāviśat || 28 ||
[Analyze grammar]

tatrārkakarasaṃtāpaklāntaṃ dūrādhvadhūsaram |
dadarśa nidhidattākhyo vaṇig devārcanāgataḥ || 29 ||
[Analyze grammar]

sa taṃ tathāvidhaṃ dṛṣṭvā sopavītaṃ sulakṣaṇam |
saṃbhāvya cottamaṃ vipram ātitheyo 'nayad gṛham || 30 ||
[Analyze grammar]

tatra cāpūjayat snānabhojanādyais tam uttamaiḥ |
kaḥ kutas tvaṃ kva yāsīti viśrāntaṃ ca sa pṛṣṭavān || 31 ||
[Analyze grammar]

dīrghadarśīti vipro 'ham aṅgadeśād ihāgataḥ |
tīrthayātrārtham ity eva gāmbhīryāt so 'py uvāca tam || 32 ||
[Analyze grammar]

tataḥ sa nidhidatto 'pi taṃ jagāda mahāvaṇik |
suvarṇadvīpagamanāyodyato 'haṃ vaṇijyayā || 33 ||
[Analyze grammar]

tat tvaṃ tiṣṭheha madgehe yāvad eṣyāmy ahaṃ tataḥ |
tīrthayātrāpariśrānto viśrānto hy atha yāsyasi || 34 ||
[Analyze grammar]

tac chrutvā so 'bravīd dīrghadarśī tarhi mameha kim |
tvayaiva saha yāsyāmi sārthavāha yathāsukham || 35 ||
[Analyze grammar]

evam astv iti tenokte sādhunā so 'tha tadgṛhe |
cirād avāptaśayano niśāṃ mantrī nināya tām || 36 ||
[Analyze grammar]

anyedyur atha tenaiva vaṇijā saha vāridhim |
gatvāruroha tadbhāṇḍapūrṇaṃ pravahaṇaṃ ca saḥ || 37 ||
[Analyze grammar]

tena gacchan pravahaṇenābdhim adbhutabhīṣaṇam |
vilokayan sa saṃprāpa svarṇadvīpaṃ krameṇa tat || 38 ||
[Analyze grammar]

kva mantrimukhyatā cāsya kva vādhvollaṅghitāmbudhiḥ |
ayaśobhīravaḥ kiṃ na kurvate bata sādhavaḥ || 39 ||
[Analyze grammar]

tatra dvīpe samaṃ tena kaṃcit kālam uvāsa saḥ |
vaṇijā nidhidattena kurvatā krayavikrayau || 40 ||
[Analyze grammar]

āgacchaṃś ca tato 'kasmāt tadyukto vahanasthitaḥ |
kalpavṛkṣaṃ dadarśābdhāv ūrmeḥ paścāt samutthitam || 41 ||
[Analyze grammar]

pravālaśākhāsubhagaiḥ skandhair jāmbūnadojjvalaiḥ |
phalair maṇimayaiḥ kāntaiḥ kusumaiś copaśobhitam || 42 ||
[Analyze grammar]

tasya skandhe ca sadratnaparyaṅkotsaṅgavartinīm |
kanyām atyadbhutākārakamanīyām avaikṣata || 43 ||
[Analyze grammar]

aho kim etad ity evaṃ yāvad dhyāyati sa kṣaṇam |
tāvat sā vīṇinī kanyā gātum evaṃ pracakrame || 44 ||
[Analyze grammar]

yat karmabījam uptaṃ yena purā niścitaṃ sa tad bhuṅkte |
pūrvakṛtasya hi śakyo vidhināpi na kartum anyathābhāvaḥ || 45 ||
[Analyze grammar]

ity udgāya kṣaṇāt tasminn ambhodhau divyakanyakā |
sakalpadrumaparyaṅkaśayyātraiva mamajja sā || 46 ||
[Analyze grammar]

kimapy apūrvam adyedaṃ mayā dṛṣṭam ihādbhutam |
kvābdhiḥ kva dṛṣṭanaṣṭo 'tra gāyaddivyāṅganas taruḥ || 47 ||
[Analyze grammar]

yadi vā vandya eṣo 'bdhir ākaraḥ śaśvad īdṛśām |
lakṣmīndupārijātādyā nāsmāt te te kim udgatāḥ || 48 ||
[Analyze grammar]

iti taṃ cintayantaṃ ca tatkṣaṇaṃ dīrghadarśinam |
vilokya vismayāviṣṭaṃ karṇadhārādayo 'bruvan || 49 ||
[Analyze grammar]

evam eṣā sadaiveha dṛśyate varakanyakā |
nimajjati ca tatkālaṃ tavaitad darśanaṃ navam || 50 ||
[Analyze grammar]

ity uktas taiḥ samaṃ tena nidhidattena sa kramāt |
mantrī citrīyamāṇo 'bdhes tīraṃ potagato 'bhyagāt || 51 ||
[Analyze grammar]

tatrottāritabhāṇḍena tenaiva vaṇijā saha |
jagāma hṛṣṭabhṛtyena sotsavaṃ so 'tha tadgṛham || 52 ||
[Analyze grammar]

sthitvā nāticiraṃ tatra nidhidattam uvāca tam |
sārthavāha bhavadgehe viśrānto 'haṃ ciraṃ sukham || 53 ||
[Analyze grammar]

idānīṃ gantum icchāmi svadeśaṃ bhadram astu te |
ity uktvā tam anicchantam apy āmantrya vaṇikpatim || 54 ||
[Analyze grammar]

dīrghadarśī sa sattvaikasahāyaḥ prasthitas tataḥ |
kramollaṅghitadūrādhvā prāpāṅgaviṣayaṃ nijam || 55 ||
[Analyze grammar]

tatra taṃ dadṛśuś cārā bahir nagaram āgatam |
ye yaśaḥketunā rājñā prāṅnyastās tadgaveṣaṇe || 56 ||
[Analyze grammar]

taiś ca gatvā sa vijñaptaś cārai rājā tam abhyagāt |
svayaṃ nirgatya nagarāt tadviśleṣasuduḥkhitaḥ || 57 ||
[Analyze grammar]

upetya ca pariṣvaṅgapūrvaṃ tam abhinandya saḥ |
nināyābhyantaraṃ bhūpaś cirādhvakṣāmadhūsaram || 58 ||
[Analyze grammar]

tyaktvāsmān kiṃ tvayā nītaṃ na paraṃ bata mānasam |
yāvac charīram apy etan niḥsnehaparuṣāṃ daśām || 59 ||
[Analyze grammar]

kiṃ vā bhagavato vetti bhavitavyasya ko gatim |
yad akasmāt tavaiṣābhūt tīrthādigamane matiḥ || 60 ||
[Analyze grammar]

tad brūhi ke tvayā bhrāntā deśā dṛṣṭaṃ ca kiṃ navam |
iti tatra ca taṃ rājā sa jagāda svamantriṇam || 61 ||
[Analyze grammar]

tataḥ suvarṇadvīpāntaṃ so 'dhvānaṃ varṇayan kramāt |
abdhāv udgaminīṃ tasmai tāṃ dṛṣṭāṃ divyakanyakām || 62 ||
[Analyze grammar]

gāyantīṃ trijagatsārabhūtāṃ kalpatarusthitām |
yathāvat kathayāmāsa dīrghadarśī mahībhṛte || 63 ||
[Analyze grammar]

sa tāṃ śrutvaiva ca nṛpas tathā smaravaśo 'bhavat |
yathā tayā vinā mene niṣphale rājyajīvite || 64 ||
[Analyze grammar]

jagāda ca tam ekānte nītvā svasacivaṃ tadā |
draṣṭavyāsau mayāvaśyaṃ jīvitaṃ nāsti me 'nyathā || 65 ||
[Analyze grammar]

yāmi tvaduktena pathā praṇamya bhavitavyatām |
nivāraṇīyo nāhaṃ te nānugamyaś ca sarvathā || 66 ||
[Analyze grammar]

guptam eko hi yāsyāmi rājyaṃ rakṣyaṃ tu me tvayā |
madvaco mānyathā kārṣīḥ śāpito 'si mamāsubhiḥ || 67 ||
[Analyze grammar]

ity uktvā tatprativaco nirasya visasarja tam |
mantriṇaṃ svagṛhaṃ rājā cirotkaṃ svajanaṃ prati || 68 ||
[Analyze grammar]

tatrānalpotsave 'py āsīd dīrghadarśī sudurmanāḥ |
svāminy asādhyavyasane sukhaṃ sanmantriṇāṃ kutaḥ || 69 ||
[Analyze grammar]

anyedyuś ca sa taddhastanyastarājyabharo nṛpaḥ |
yaśaḥketus tataḥ prāyān niśi tāpasaveṣabhṛt || 70 ||
[Analyze grammar]

gacchaṃś ca kuśanābhākhyaṃ muniṃ mārge dadarśa saḥ |
so 'tra taṃ tāpasākalpaṃ praṇataṃ munir ādiśat || 71 ||
[Analyze grammar]

lakṣmīdattena vaṇijā saha potena vāridhau |
gatvā prapsyasi tām iṣṭāṃ kanyāṃ vraja nirākulaḥ || 72 ||
[Analyze grammar]

iti tadvacasā prītās taṃ praṇamya sa pārthivaḥ |
gacchan deśān nadīr adrīn krāntvā taṃ prāpad ambudhim || 73 ||
[Analyze grammar]

sutāraśaṅkhadhavalair vīcibhrūbhir vikasvaraiḥ |
vīkṣamāṇam ivāvartanetrair ātithyasaṃbhramāt || 74 ||
[Analyze grammar]

tattīre vaṇijā tena muniproktena saṃgatiḥ |
lakṣmīdattena jajñe 'sya svarṇadvīpaṃ yiyāsunā || 75 ||
[Analyze grammar]

tenaiva saha cakrāṅkapādamudrādi darśanāt |
prahveṇāruhya vahanaṃ pratasthe so 'mbudhau nṛpaḥ || 76 ||
[Analyze grammar]

madhyam abdheś ca saṃprāpte vahane vārimadhyataḥ |
udagāt kalpaviṭapiskandhasthā sātra kanyakā || 77 ||
[Analyze grammar]

yāvat paśyati tāṃ rājā cakora iva candrikām |
tāvat sā gāyati smaivaṃ vallakīvādyasundaram || 78 ||
[Analyze grammar]

yat karmabījam uptaṃ yena purā niścitaṃ sa tad bhuṅkte |
pūrvakṛtasya hi śakyo vidhināpi na kartum anyathābhāvaḥ || 79 ||
[Analyze grammar]

tasmād yatra yathā yad bhavitavyaṃ yasya daivayogena |
tatra tathā tatprāptyai vivaśo 'sau nīyate 'tra na bhrāntiḥ || 80 ||
[Analyze grammar]

iti sūcitabhavyārthāṃ gāyantīṃ tāṃ vibhāvayan |
niḥspandaḥ sa kṣaṇaṃ tasthau rājā smaraśarāhataḥ || 81 ||
[Analyze grammar]

ratnākara namaḥ satyam agādhahṛdayāya te |
yena tvayaitāṃ pracchādya vipralabdho hariḥ śriyā || 82 ||
[Analyze grammar]

tat surair apy alabhyāntaṃ sapakṣakṣmābhṛdāśrayam |
śaraṇaṃ tvāṃ prapanno 'ham iṣṭasiddhiṃ vidhatsva me || 83 ||
[Analyze grammar]

evaṃ yāvat samudraṃ taṃ sa nataḥ stauti bhūmipaḥ |
tāvat sā kanyakā tatra nimamajja sapādapā || 84 ||
[Analyze grammar]

tad dṛṣṭvaivānumārge 'syāḥ sa rājātmānam akṣipat |
vāridhāv atra kāmāgnisaṃtāpasyeva śāntaye || 85 ||
[Analyze grammar]

tad vīkṣyāśaṅkitaṃ matvā vinaṣṭaṃ taṃ sa sajjanaḥ |
lakṣmīdatto vaṇig duḥkhād dehatyāgodyato 'bhavat || 86 ||
[Analyze grammar]

mā kārṣīḥ sāhasaṃ nāsti magnasyāsyāmbhudhau bhayam |
eṣo rājā yaśaḥketur nāmnā tāpasaveṣabhṛt || 87 ||
[Analyze grammar]

etat kanyārtham āyātaḥ pūrvabhāryeyam asya ca |
etāṃ prāpya punaś cāsāv aṅgarājyaṃ sameṣyati || 88 ||
[Analyze grammar]

ity athāśvāsito vācā tatkālaṃ gaganotthayā |
sārthavāho yathākāmaṃ sa jagāmeṣṭasiddhaye || 89 ||
[Analyze grammar]

sa rājāpi yaśaḥketur nimagno 'nto mahodadhau |
akasmān nagaraṃ divyam apaśyaj jātavismayaḥ || 90 ||
[Analyze grammar]

bhāsvanmaṇimayastambhaiḥ kāñcanojjvalabhittibhiḥ |
virājamānaṃ prāsādair muktājālagavākṣakaiḥ || 91 ||
[Analyze grammar]

nānāratnaśilāpaṭṭabaddhasopānavāpikaiḥ |
kāmadaiḥ kalpavṛkṣāḍhyair udyānair upaśobhitam || 92 ||
[Analyze grammar]

samṛddhe 'pi pure tatra nirjane 'tha gṛhaṃ gṛham |
anupraviśya na yadā tāṃ dadarśa priyāṃ kvacit || 93 ||
[Analyze grammar]

tadā vicinvan dṛṣṭvaikam uttuṅgaṃ maṇimandiram |
āruhya dvāram udghāṭya praviveśa sa bhūpatiḥ || 94 ||
[Analyze grammar]

praviśya cāntaḥ sadratnaparyaṅkasthitam ekakam |
vastrācchāditasarvāṅgaṃ śayānaṃ kaṃcid aikṣata || 95 ||
[Analyze grammar]

kiṃ syāt saiveti sotkaṇṭham udghāṭayati tanmukham |
yāvat tāvad apaśyat tāṃ svepsitām eva so 'ṅganām || 96 ||
[Analyze grammar]

srastanīlāṃśukadhvāntahasanmukhaśaśiśriyam |
jyotsnāvadātāṃ pātālagatām iva divā niśām || 97 ||
[Analyze grammar]

taddarśanena cāsyābhūd avasthā kāpi sā tadā |
grīṣmartau marupānthasya saritsaṃdarśanena yā || 98 ||
[Analyze grammar]

sāpy unmīlitacakṣus taṃ kalyāṇākṛtilakṣaṇam |
vīkṣyākasmāt tathāprāptaṃ saṃbhramāc chayanaṃ jahau || 99 ||
[Analyze grammar]

kṛtātithyā natamukhī pūjayantīva pādayoḥ |
phullekṣaṇotpalanyāsaiḥ śanair etam uvāca ca || 100 ||
[Analyze grammar]

ko bhavān kim agamyaṃ ca praviṣṭho 'si rasātalam |
rājacihnāṅkitatanoḥ kiṃ ca te tāpasavratam || 101 ||
[Analyze grammar]

ity ādiśa mahābhāga prasādo yadi te mayi |
evaṃ tasyā vacaḥ śrutvā sa rājā pratyuvāca tām || 102 ||
[Analyze grammar]

aṅgarājo yaśaḥketur iti nāmnāsmi sundari |
āptād anvahadṛśyāṃ ca tvām aśrauṣam ihāmbudhau || 103 ||
[Analyze grammar]

tatas tvadarthaṃ kṛtvemaṃ veṣaṃ rājyaṃ vimucya ca |
āgatyaiṣa praviṣṭo 'ham anumārgeṇa te 'mbudhim || 104 ||
[Analyze grammar]

tan me kathaya kāsi tvam ity ukte tena cātha sā |
salajjā sānurāgā ca sānandā caivam abhyadhāt || 105 ||
[Analyze grammar]

mṛgāṅkasena ity asti śrīmān vidyādharādhipaḥ |
māṃ mṛgāṅkavatīṃ nāmnā viddhi tasya sutām imām || 106 ||
[Analyze grammar]

sa mām asmin svanagare vimucyaikākinīṃ pitā |
na jāne hetunā kena gataḥ kvāpi sapaurakaḥ || 107 ||
[Analyze grammar]

tenāhaṃ śūnyavasater nirviṇṇonmajjya vāridheḥ |
yantrakalpadrumārūḍhā gāyāmi bhavitavyatām || 108 ||
[Analyze grammar]

evam uktavatī tena smaratā tan muner vacaḥ |
tathārajyata sā rājñā vacobhiḥ premapeśalaiḥ || 109 ||
[Analyze grammar]

yathānurāgavivaśā bhāryātvaṃ tasya tatkṣaṇam |
aṅgīcakāra vīrasya samayaṃ tv ekam abhyadhāt || 110 ||
[Analyze grammar]

śuklakṛṣṇacaturdaśyām aṣṭamyāṃ cāryaputra te |
pratimāsam anāyattā caturo divasān aham || 111 ||
[Analyze grammar]

yatra kvāpi dineṣv eṣu gacchantī cāsmi na tvayā |
praṣṭavyā na niṣeddhavyā kāraṇaṃ hy atra vidyate || 112 ||
[Analyze grammar]

evaṃ tām uktasamayāṃ sa rājā divyakanyakām |
tathety uktvaiva gāndharvavidhinā pariṇītavān || 113 ||
[Analyze grammar]

bheje tataś ca saṃbhogasukhaṃ tatra tayā saha |
yathābhūd anya evāsyā mānmatho maṇḍanakramaḥ || 114 ||
[Analyze grammar]

keśeṣu srastamālyeṣu kacagrahanakhāvalī |
bimbādhare 'tha niṣpītanīrāge daśanakṣatiḥ || 115 ||
[Analyze grammar]

kucayoḥ karajaśreṇir bhinnamāṇikyamālayoḥ |
luptāṅgarāgeṣv aṅgeṣu gāḍhāliṅganarāgitā || 116 ||
[Analyze grammar]

iti taddivyasaṃbhogasukhāvasthitam atra tam |
sā mṛgāṅkavatī bhāryā bhūpaṃ prāhedam ekadā || 117 ||
[Analyze grammar]

tvam ihaiva pratīkṣethāḥ kāryārthaṃ kvāpi yāmy aham |
adya saiṣā hi saṃprāptā mama kṛṣṇacaturdaśī || 118 ||
[Analyze grammar]

iha sthas tv āryaputrāmuṃ mā sma gāḥ sphāṭikaṃ gṛham |
mātra vāpyāṃ nipatito bhūlokaṃ tvaṃ gamiṣyasi || 119 ||
[Analyze grammar]

ity uktvā sā tam āmantrya yayau tasmāt purād bahiḥ |
rājāpi prāptakhaḍgas tāṃ channo jijñāsur anvagāt || 120 ||
[Analyze grammar]

tatrāpaśyat tamaḥśyāmaṃ vyāttavakrabilaṃ ca saḥ |
sākāram iva pātālam āyāntaṃ rākṣasaṃ nṛpaḥ || 121 ||
[Analyze grammar]

sa rākṣaso nipatyaiva muktaghoraravas tadā |
tāṃ mṛgāṅkavatīṃ vaktre nikṣipyaiva nigīrṇavān || 122 ||
[Analyze grammar]

tad dṛṣṭvaivātikopena sahasā sa jvalann iva |
nirmokamuktabhujagaśyāmalena mahāsinā || 123 ||
[Analyze grammar]

koṣākṛṣṭena dhāvitvā rājasiṃho 'bhidhāvataḥ |
ciccheda rakṣasas tasya saṃdaṣṭauṣṭhapuṭaṃ śiraḥ || 124 ||
[Analyze grammar]

rakṣaḥkabandhavāntena rājñas tasyāsravāriṇā |
krodhajo 'tha śaśāmāgnir na tu kāntāviyogajaḥ || 125 ||
[Analyze grammar]

tato mohaniśāndhe 'smin vinaṣṭagatike nṛpe |
akasmān meghamalinasyāṅgaṃ bhittveva rakṣasaḥ || 126 ||
[Analyze grammar]

tasyoddyotitadikcakrā candramūrtir ivāmalā |
sā mṛgāṅkavatī jīvanty akṣatāṅgī viniryayau || 127 ||
[Analyze grammar]

tāṃ tathā saṃkaṭottīrṇāṃ dṛṣṭvā kāntāṃ sasaṃbhramam |
ehy ehīti vadan rājā pradhāvyaivāliliṅga saḥ || 128 ||
[Analyze grammar]

priye kim etat svapno 'yam uta māyeti tena sā |
pṛṣṭā nṛpeṇa saṃsmṛtya vidyādhary evam abravīt || 129 ||
[Analyze grammar]

śṛṇv āryaputra na svapno na māyeyam ayaṃ punaḥ |
vidhyādharendrāt svapituḥ śāpo 'bhūd īdṛśo mama || 130 ||
[Analyze grammar]

bahuputro 'pi sa hi me pitā pūrvaṃ vasann iha |
mayā vinātivātsalyān nāhāram akarot sadā || 131 ||
[Analyze grammar]

ahaṃ ca sarvadā śarvapūjāsakteha nirjane |
caturdaśyor athāṣṭamyor āgacchaṃ pakṣayor dvayoḥ || 132 ||
[Analyze grammar]

ekadā ca caturdaśyām ihāgatya rasān mama |
ciraṃ gaurīṃ samarcantyā daivād avasitaṃ dinam || 133 ||
[Analyze grammar]

tad ahar matpratīkṣaḥ san kṣudhito 'pi sa matpitā |
nābhuṅkta nāpibat kiṃcid āsīt kruddhas tu māṃ prati || 134 ||
[Analyze grammar]

tato rātrāv upetāṃ māṃ sāparādhām adhomukhīm |
bhavitavyabalagrastamatsnehaḥ śapati sma saḥ || 135 ||
[Analyze grammar]

yathā tvadavalepena grasto 'dyāham ayaṃ kṣudhā |
māsi māsi tathāṣṭamyoś caturdaśyoś ca kevalam || 136 ||
[Analyze grammar]

harārcanarasād yantīm atraiva tvāṃ bahiḥ pure |
nāmnā kṛtāntasaṃtrāso rākṣaso nigariṣyati || 137 ||
[Analyze grammar]

bhittvā bhittvāsya hṛdayaṃ jīvantī ca nireṣyasi |
na smariṣyasi śāpaṃ ca na tāṃ nigaraṇavyathām || 138 ||
[Analyze grammar]

sthāsyasy ekākinī cātrety uktaśāpavacāḥ śanaiḥ |
so 'nunīto mayā dhyātvā śāpāntaṃ me 'bravīt pitā || 139 ||
[Analyze grammar]

bhartā bhūtvā yaśaḥketunāmāṅganṛpatir yadā |
rākṣasena nigīrṇāṃ tvāṃ dṛṣṭvā taṃ nihaniṣyati || 140 ||
[Analyze grammar]

tadā tvaṃ mokṣyase śāpād dhṛdayāt tasya nirgatā |
saṃsmariṣyasi śāpādi vidyāḥ sarvās tathā nijāḥ || 141 ||
[Analyze grammar]

ity ādiśya sa śāpāntaṃ tyaktvā mām ekakām iha |
niṣadhādriṃ gatas tāto bhūlokaṃ saparicchadaḥ || 142 ||
[Analyze grammar]

ahaṃ tathā carantī ca śāpamohād ihāvasam |
kṣīṇaś caiṣa sa śāpo me jātā sarvatra ca smṛtiḥ || 143 ||
[Analyze grammar]

tat tātapārśvam adhunā niṣadhādriṃ vrajāmy aham |
śāpānte svāṃ gatiṃ yāma ity eṣa samayo hi naḥ || 144 ||
[Analyze grammar]

tvam ihāsva svarāṣṭraṃ vā vraja svātantryam atra te |
evaṃ tayokte sa nṛpo duḥkhito 'rthayate sma tām || 145 ||
[Analyze grammar]

saptāhāni na gantavyaṃ prasīda sumukhi tvayā |
kṣipāva tāvad autsukyam udyāne krīḍanair iha || 146 ||
[Analyze grammar]

tvaṃ gacchātha pituḥ sthānaṃ yāsyāmy aham api svakam |
etat tadvacanaṃ mugdhā tathety aṅgīcakāra sā || 147 ||
[Analyze grammar]

tato 'tra reme sa tayā sahodyāneṣu kāntayā |
sajalotpalanetrāsu vāpīṣu ṣaḍahaṃ nṛpaḥ || 148 ||
[Analyze grammar]

mā sma yātaṃ vihāyāsmān iti pūt kurvatīṣv iva |
utkṣiptavīcihastāsu haṃsasārasaniḥsvanaiḥ || 149 ||
[Analyze grammar]

saptame 'hni sa yuktyā tāṃ priyāṃ tatrānayad gṛhe |
bhūlokaprāpiṇī yatra sā yantradvāravāpikā || 150 ||
[Analyze grammar]

tatra kaṇṭhe gṛhītvā tāṃ tasyāṃ vāpyāṃ nipatya saḥ |
uttasthau svapurodyānavāpīmadhyāt tayā saha || 151 ||
[Analyze grammar]

tatra kāntāsakhaṃ prāptaṃ taṃ dṛṣṭvodyānapālakāḥ |
hṛṣṭās tan mantriṇe gatvā jagadur dīrghadarśine || 152 ||
[Analyze grammar]

so 'py etya pādapatitas tam ānītepsitāṅganam |
dṛṣṭvā prāveśayan mantrī sapauro 'bhyantaraṃ nṛpam || 153 ||
[Analyze grammar]

aho saiṣā kathaṃ prāptā rājñā divyāṅganāmunā |
vyomnīva vidyud iva yā kṣaṇadṛśyā mayekṣitā || 154 ||
[Analyze grammar]

yad yasya likhitaṃ dhātrā lalāṭākṣarapaṅktiṣu |
tad avaśyam asaṃbhāvyam api tasyopatiṣṭhate || 155 ||
[Analyze grammar]

ity atra mantrimukhye 'smin dhyāyaty anyajane 'pi ca |
divyastrīprāptisāścaryaṃ rājāgamanasotsave || 156 ||
[Analyze grammar]

sā mṛgāṅkavatī dṛṣṭvā taṃ svadeśagataṃ nṛpam |
iyeṣa pūrṇasaptāhā yātuṃ vaidyādharīṃ gatim || 157 ||
[Analyze grammar]

nāvirāsīc ca vidyāsyāḥ smṛtāpy utpatanī tadā |
tataḥ sā muṣitevātra viṣādam agamat param || 158 ||
[Analyze grammar]

kim akasmād viṣaṇṇeva dṛśyase vada me priye |
ity uktā tena rājñā sā vidhyādary evam abravīt || 159 ||
[Analyze grammar]

sthitāhaṃ śāpamuktāpi tvatsnehād yad iyac ciram |
tena vidyā mama bhraṣṭā naṣṭā divyā ca sā gatiḥ || 160 ||
[Analyze grammar]

tac chrutvā hanta siddheyaṃ mama vidyādharīti saḥ |
rājā tato yaśaḥketuḥ pūrṇaṃ cakre mahotsavam || 161 ||
[Analyze grammar]

tad dṛṣṭvā dīrghadarśī sa mantrī gatvā gṛhaṃ niśi |
śayanīyagato 'kasmād dhṛtsphoṭena vyapadyata || 162 ||
[Analyze grammar]

tato 'nubhūya tacchokaṃ dhṛtarājyabharaḥ svayam |
yaśaḥketuś ciraṃ tasthau sa mṛgāṅkavatīyutaḥ || 163 ||
[Analyze grammar]

ity etāṃ kathayitvā mārge tasmai kathāṃ sa vetālaḥ |
avadat punas trivikramasenaṃ nṛpatiṃ tam aṃsagataḥ || 164 ||
[Analyze grammar]

tad brūhi bhūpate te saṃpanne svāminas tathābhyudaye |
hṛdayaṃ sapadi sphuṭitaṃ tasya mahāmantriṇaḥ kim iti || 165 ||
[Analyze grammar]

divyastrī na mayā kiṃ prāpteti śucāsphuṭad dhṛdayam |
kiṃ vā rājyam abhīpsor rājāgamajena duḥkhena || 166 ||
[Analyze grammar]

etac ca yadi na vakṣyasi mahyaṃ jānann apīha tad rājan |
dharmaś ca tava vinaṅkṣyati yāsyati dalaśaś ca jhaṭiti śiraḥ || 167 ||
[Analyze grammar]

śrutveti tu trivikramaseno rājā jagāda vetālam |
naitat tasmin dvayam api śubhacarite yujyate hi mantrivare || 168 ||
[Analyze grammar]

kiṃ tu strīmātrarasād upekṣitaṃ yena bhūbhujā rājyam |
tasyādhunā tu divyastrīraktasyātra kā vārtā || 169 ||
[Analyze grammar]

tan me kaṣṭe 'pi kṛte pratyuta doṣo batādhikībhūtaḥ |
iti tasya vibhāvayato hṛdayaṃ tanmantriṇaḥ sphuṭitam || 170 ||
[Analyze grammar]

ity ukte narapatinā punaḥ sa māyī vetālo nijapadam eva taj jagāma |
rājāpi prasabham avāptum anvadhāvad bhūyo 'pi drutam atha taṃ sa dhīracetāḥ || 171 ||
[Analyze grammar]