Chapter 20

atha gatvā punaḥ prāpya śiṃśapātas tato nṛpaḥ |
sa trivikramasenas taṃ skandhe vetālam ādade || 1 ||
[Analyze grammar]

āyāntaṃ ca sa vetālo bhūyas taṃ nṛpam abravīt |
rājañ śṛṇu kathām ekāṃ saṃkṣiptāṃ varṇayāmi te || 2 ||
[Analyze grammar]

asti vārāṇasī nāma purī haranivāsabhūḥ |
devasvāmīti tatrāsīn mānyo narapater dvijaḥ || 3 ||
[Analyze grammar]

mahādhanasya tasyaiko harisvāmīty abhūt sutaḥ |
tasya bhāryā ca lāvaṇyavatīty atyuttamābhavat || 4 ||
[Analyze grammar]

tilottamādinākastrīnirmāṇe prāptakauśalaḥ |
anargharūpalāvaṇyāṃ manye yāṃ nirmame vidhiḥ || 5 ||
[Analyze grammar]

tayā sa kāntayā sākaṃ harisvāmī kadācana |
ratiśrānto yayau nidrāṃ harmye candrāṃśuśītale || 6 ||
[Analyze grammar]

tat kālaṃ tena mārgeṇa kāmacārī vihāyasā |
āgān madanavegākhyo vidyādharakumārakaḥ || 7 ||
[Analyze grammar]

sa tatra lāvaṇyavatīṃ patyuḥ pārśve dadarśa tām |
suptāṃ ratiklamasrastavastravyaktāṅgasauṣṭhavām || 8 ||
[Analyze grammar]

tadrūpahṛtacittaḥ san madanāndhaḥ sa tat kṣaṇam |
suptām eva nipatyaitāṃ gṛhītvā nabhasā yayau || 9 ||
[Analyze grammar]

kṣaṇāt prabuddho 'tha yuvā harisvāmī sa tatpatiḥ |
prāṇeśvarīm apaśyaṃs tām udatiṣṭhat sasaṃbhramaḥ || 10 ||
[Analyze grammar]

aho kim etat kva gatā kupitā sā nu kiṃ mayi |
channā jijñāsituṃ kiṃ me cittaṃ parihasaty uta || 11 ||
[Analyze grammar]

ity anekavikalpaughavyākulas tām itas tataḥ |
harmyaprāsādavalabhīṣv anviṣyan so 'bhraman niśi || 12 ||
[Analyze grammar]

agṛhodyānataś cinvan yan na prāpa kuto 'pi tām |
tat sa śokāgnisaṃtapto vilalāpāśrugadgadam || 13 ||
[Analyze grammar]

hā candrabimbavadane hā jyotsnāgauri hā priye |
rātryā tulyaguṇadveṣāt kiṃ nu soḍhāsi nānayā || 14 ||
[Analyze grammar]

tvayā kāntyā jito bibhyad iva candanaśītalaiḥ |
karair asukhayad yo māṃ so 'yam indus tvayā vinā || 15 ||
[Analyze grammar]

labdhāntara ivedānīṃ tair eva tudati priye |
prajvaladbhir ivāṅgārair viṣadigdhair ivāśugaiḥ || 16 ||
[Analyze grammar]

ity ādi krandatas tasya sā harisvāminas tadā |
kṛcchrād vyatīyāya niśā na punar virahavyathā || 17 ||
[Analyze grammar]

prātar bibheda viśvasya karaiḥ saṃtamasaṃ raviḥ |
bhettuṃ na cakṣame tasya mohāndhatamasaṃ punaḥ || 18 ||
[Analyze grammar]

vilabdha iva cakrāhvais tasya tīrṇaniśais tadā |
bheje śatagunībhāvaṃ karuṇākranditadhvaniḥ || 19 ||
[Analyze grammar]

svajanaiḥ sāntvyamāno 'pi viyogānaladīpitaḥ |
na ca lebhe dvijayuvā dhṛtiṃ tāṃ preyasīṃ vinā || 20 ||
[Analyze grammar]

iha sthitam iha snātaṃ kṛtam atra prasādhanam |
vihṛtaṃ ca tayātreti yayau tv ita ito rudan || 21 ||
[Analyze grammar]

mṛtā tāvan na sā tat kim ātmaivaṃ hanyate tvayā |
avaśyaṃ tām avāptāsi jīvañ jātu kutaścana || 22 ||
[Analyze grammar]

tad dhairyam avalambasva tāṃ gaveṣaya ca priyām |
aprāpyaṃ nāma nehāsti dhīrasya vyavasāyinaḥ || 23 ||
[Analyze grammar]

iti bandhusuhṛdvākyair bodhitaḥ so 'tha kṛcchrataḥ |
dinaiḥ kaiścid dharisvāmī babandha dhṛtim āsthayā || 24 ||
[Analyze grammar]

acintayac ca sarvasvaṃ kṛtvā brāhmaṇasād aham |
bhramāmi tāvat tīrthāni kṣapayāmy aghasaṃcayam || 25 ||
[Analyze grammar]

pāpakṣayād dhi tāṃ jātu priyāṃ bhrāmyann avāpnuyām |
ity ālocya yathāvasthaṃ snānādy utthāya so 'karot || 26 ||
[Analyze grammar]

anyedyuś ca vicitrānnapānaṃ sattre dvijanmanām |
cakārāvāritaṃ kiṃ ca dadau dhanam aśeṣataḥ || 27 ||
[Analyze grammar]

brāhmaṇyamātravittasya nirgatyaiva svadeśataḥ |
priyāprāptīcchayā so 'tha tīrthāni bhramituṃ yayau || 28 ||
[Analyze grammar]

bhrāmyataś ca jagāmāsya bhīmo grīṣmartukesarī |
pracaṇḍādityavadano dīptatadraśmikesaraḥ || 29 ||
[Analyze grammar]

priyāvirahasaṃtaptapānthaniḥśvāsamārutaiḥ |
nyastoṣmāṇa ivātyuṣṇā vānti sma ca samīraṇāḥ || 30 ||
[Analyze grammar]

śuṣyadvidīrṇapaṅkāś ca hṛdayaiḥ sphuṭitair iva |
jalāśayā dadṛśire gharmaluptāmbusaṃpadaḥ || 31 ||
[Analyze grammar]

cīrīcītkāramukharās tāpamlānadalādharāḥ |
madhuśrīvirahān mārgeṣv arudann iva pādapāḥ || 32 ||
[Analyze grammar]

tasmin kāle 'rkatāpena viyogena kṣudhā tṛṣā |
nityādhvanā ca sa klānto virūkṣakṣāmadhūsaraḥ || 33 ||
[Analyze grammar]

bhojanārthi harisvāmī prāpa grāmaṃ kvacid bhraman |
padmanābhābhidhānasya gṛhaṃ viprasya sattriṇaḥ || 34 ||
[Analyze grammar]

tatra dṛṣṭvā sa bhuñjānān viprān abhyantare bahūn |
dvāraśākhāṃ samālambya tasthau niḥśabdaniścalaḥ || 35 ||
[Analyze grammar]

tathāsthitaṃ tam ālokya sattriṇas tasya gehinī |
padmanābhasya saṃjātadayā sādhvī vyacintayat || 36 ||
[Analyze grammar]

aho kṣun nāma gurvy eṣā na kuryāt kasya lāghavam |
yad evam ayam annārthī ko 'py āste dvāry adhomukhaḥ || 37 ||
[Analyze grammar]

dūrādhvābhyāgataḥ snātas tāvat kṣīṇendriyaḥ kṣudhā |
tad eṣaś cānnadānasya pātram ity avadhārya sā || 38 ||
[Analyze grammar]

paramānnabhṛtaṃ sādhvī tasmai saghṛtaśarkaram |
pātram utkṣipya pāṇibhyām ānīya praśritā dadau || 39 ||
[Analyze grammar]

jagāda caitaṃ bhuṅkṣvaitad gatvā vāpītaṭe kvacit |
idaṃ sthānaṃ samucchiṣṭaṃ bhuñjānair brāhmanair vṛtam || 40 ||
[Analyze grammar]

tatheti so 'nnapātraṃ tad gṛhītvā nātidūrataḥ |
gatvā sthāpitavān vāpyās taṭe vaṭataror adhaḥ || 41 ||
[Analyze grammar]

prakṣālya pāṇipādaṃ ca vāpyām ācamya cātra saḥ |
yāvad bhakṣayituṃ tuṣṭaḥ paramānnam upaiti tat || 42 ||
[Analyze grammar]

tāvad gṛhītvā kṛṣṇāhiṃ cañcvā pādayugena ca |
śyenaḥ kutaścid āgatya tarau tasminn upāviśat || 43 ||
[Analyze grammar]

tena tasyohyamānasya sarpasyākramya pakṣiṇā |
utkrāntajīvitasyāsyād viṣalālā viniryayau || 44 ||
[Analyze grammar]

sā tatrādhaḥsthite tasminn annapātre 'patat tadā |
tac cādṛṣṭvā harisvāmī sa etyānnam abhuṅkta tat || 45 ||
[Analyze grammar]

kṣudhārtasya tadā tasya mṛṣṭānnaṃ tat kṣaṇena tat |
kṛtsnaṃ bhuktavatas tīvrā prodabhūd viṣavedanā || 46 ||
[Analyze grammar]

aho vidhau viparyaste na viparyasyatīha kim |
yad viṣībhūtam annaṃ me sakṣīraghṛṭaśarkaram || 47 ||
[Analyze grammar]

iti jalpan viṣārtaḥ sa harisvāmī pariskhalan |
gatvā tāṃ sattriṇas tasya viprasyovāca gehinīm || 48 ||
[Analyze grammar]

tvaddattād viṣam annān me jātaṃ tad viṣamantriṇam |
kaṃcin mamānaya kṣipraṃ brahmahatyānyathāsti te || 49 ||
[Analyze grammar]

ity uktvaiva sa tāṃ sādhvīṃ kim etad iti vihvalām |
harisvāmī parāvṛttanetraḥ prāṇair vyayujyata || 50 ||
[Analyze grammar]

tataḥ sā tena nirdoṣāpy ātitheyy api sattriṇā |
bhāryā niṣkāsitā gehān mithyātithivadhakrudhā || 51 ||
[Analyze grammar]

sāpy utpannamṛṣāvadyā suśubhād api karmaṇaḥ |
jātāvamānā tapase sādhvī tīrtham aśiśriyat || 52 ||
[Analyze grammar]

kasya vipravadhaḥ so 'stu sarpaśyenānnadeśv iti |
tad abhūd dharmarājāgre vādo nāsīt tu nirṇayaḥ || 53 ||
[Analyze grammar]

tat trivikramasena tvaṃ rajan brūhi mamādhunā |
kasya sā brahmahatyeti pūrvaḥ śāpaḥ sa te 'nyathā || 54 ||
[Analyze grammar]

iti vetālato rājā śrutvā śāpaniyantritaḥ |
sa trivikramasenas taṃ muktamauno 'bravīd idam || 55 ||
[Analyze grammar]

tasya tat pātakaṃ tāvat sarpasya yadi vāsya kaḥ |
vivaśasyāparādho 'sti bhakṣyamāṇasya śatruṇā || 56 ||
[Analyze grammar]

atha syenasya tenāpi kiṃ duṣṭaṃ kṣudhitātmanā |
akasmāt prāptam ānīya bhakṣyaṃ bhakṣayatā nijam || 57 ||
[Analyze grammar]

daṃpatyor annadātror vā tayor ekasya vā kutaḥ |
abhāvyadoṣau dharmaikapravṛttau tāv ubhau yataḥ || 58 ||
[Analyze grammar]

tad ahaṃ tasya manye sā brahmahatyā jaḍātmanaḥ |
avicāryaiva yo brūyād eṣām ekatamasya tām || 59 ||
[Analyze grammar]

ity uktavato 'sya nṛpasyāṃsād bhūyo 'py agāt sa vetālaḥ |
nijapadam eva nṛpo 'pi sa punar api dhīras tam anvagād eva || 60 ||
[Analyze grammar]