Chapter 5

vaiśaṃpāyana uvāca |
āsīddharmasya saṃgoptā pūrvamatrisamaḥ prabhuḥ |
atrivaṃśasamutpannastvaṅgo nāma prajāpatiḥ || 1 ||
[Analyze grammar]

tasya putro'bhavadveno nātyarthaṃ dhārmiko'bhavat |
jāto mṛtyusutāyāṃ vai sunīthāyāṃ prajāpatiḥ || 2 ||
[Analyze grammar]

sa mātāmahadoṣeṇa venaḥ kālātmajātmajaḥ |
svadharmaṃ pṛṣṭhataḥ kṛtvā kāmāl lokeṣvavartata || 3 ||
[Analyze grammar]

maryādāṃ sthāpayāmāsa dharmāpetāṃ sa pārthivaḥ |
vedadharmānatikramya so'dharmanirato'bhavat || 4 ||
[Analyze grammar]

niḥsvādhyāyavaṣaṭkārāḥ prajāstasminprajāpatau |
prāvartanna papuḥ somaṃ hutaṃ yajñeṣu devatāḥ || 5 ||
[Analyze grammar]

na yaṣṭavyaṃ na hotavyamiti tasya prajāpateḥ |
āsītpratijñā krūreyaṃ vināśe pratyupasthite || 6 ||
[Analyze grammar]

ahamījyaśca yaṣṭā ca yajñaśceti kurūdvaha |
mayi yajño vidhātavyo mayi hotavyamityapi || 7 ||
[Analyze grammar]

tamatikrāntamaryādamādadānamasāṃpratam |
ūcurmaharṣayaḥ sarve marīcipramukhāstadā || 8 ||
[Analyze grammar]

vayaṃ dīkṣāṃ pravekṣyāmaḥ saṃvatsaragaṇānbahūn |
phaladāyī sa cāsmākaṃ yajñaste'dyāpi nānyathā |
adharmaṃ kuru mā vena naiṣa dharmaḥ satāṃ mataḥ || 9 ||
[Analyze grammar]

nidhane hi prasūtastvaṃ prajāpatirasaṃśayam |
prajāśca pālayiṣye'hamiti te samayaḥ kṛtaḥ || 10 ||
[Analyze grammar]

tāṃstathā bruvataḥ sarvānmaharṣīnabravīttadā |
venaḥ prahasya durbuddhirimamarthamanarthavat || 11 ||
[Analyze grammar]

sraṣṭā dharmasya kaścānyaḥ śrotavyaṃ kasya vā mayā |
śrutavīryatapaḥsatyairmayā vā kaḥ samo bhuvi |
prabhavaṃ sarvabhūtānāṃ dharmāṇāṃ ca viśeṣataḥ |
saṃmūḍhā na vidurnūnaṃ bhavanto māṃ viśeṣataḥ || 12 ||
[Analyze grammar]

icchandaheyaṃ pṛthivīṃ plāvayeyaṃ tathā jalaiḥ |
dyāṃ vai bhuvaṃ ca rundheyaṃ nātra kāryā vicāraṇā || 13 ||
[Analyze grammar]

yadā na śakyate mānādavalepācca pārthivaḥ |
anunetuṃ tadā venaṃ tataḥ kruddhā maharṣayaḥ || 14 ||
[Analyze grammar]

nigṛhya taṃ mahātmāno visphurantaṃ mahābalam |
hanyatāṃ hanyatāṃ pāpa ityūcuste parasparam || yo yajñapuruṣaṃ devamanādinidhanaṃ harim |
vinindatyadhamācāro na sa yogyo bhuvaḥ patiḥ || ityuktvā mantrapūtaistaiḥ kuśairmunigaṇā nṛpam |
nijaghnurnihataṃ pūrvaṃ bhagavannindanādinā || tasmin hate jagatsarvaṃ dasyubhūtaṃ abhūnnṛpa |
tataḥ saṃmantrya ṛṣayo mamanthustasya bhūbhujaḥ |
tato'sya savyamūruṃ te mamanthurjātamanyavaḥ || 15 ||
[Analyze grammar]

tasmiṃstu mathyamāne vai rājña ūrau prajajñivān |
hrasvo'timātraḥ puruṣaḥ kṛṣṇaścāpi babhūva ha || 16 ||
[Analyze grammar]

sa bhītaḥ prāñjalirbhūtvā sthitavāñjanamejaya |
tamatrirvihvalaṃ dṛṣṭvā niṣīdetyabravīttadā || 17 ||
[Analyze grammar]

niṣādavaṃśakartā sa babhūva vadatāṃ vara |
dhīvarānasṛjaccāpi venakalmaṣasaṃbhavān || 18 ||
[Analyze grammar]

ye cānye vindhyanilayāstumurāstumburāstathā |
adharmarucayastāta viddhi tānvenakalmaṣān || 19 ||
[Analyze grammar]

tataḥ punarmahātmānaḥ pāṇiṃ venasya dakṣiṇam |
araṇīmiva saṃrabdhā mamanthuste maharṣayaḥ || 20 ||
[Analyze grammar]

pṛthustasmātsamuttasthau karājjvalanasaṃnibhaḥ |
dīpyamānaḥ svavapuṣā sākṣādagniriva jvalan || 21 ||
[Analyze grammar]

sa dhanvī kavacī jātaḥ pṛthureva mahātapāḥ || 21 ||
[Analyze grammar]

ādyamājagavaṃ nāma dhanurgṛhya mahāravam |
śarāṃśca divyān rakṣārthaṃ kavacaṃ ca mahāprabham || 22 ||
[Analyze grammar]

tasmiñjāte'tha bhūtāni saṃprahṛṣṭāni sarvaśaḥ |
samāpeturmahārāja venaśca tridivaṃ yayau || 23 ||
[Analyze grammar]

samutpannena kauravya satputreṇa mahātmanā |
trātaḥ sa puruṣavyāghra punnāmno narakāttadā || 24 ||
[Analyze grammar]

taṃ samudrāśca nadyaśca ratnānyādāya sarvaśaḥ |
toyāni cābhiṣekārthaṃ sarva evopatasthire || 25 ||
[Analyze grammar]

pitāmahaśca bhagavāndevairāṅgirasaiḥ saha |
sthāvarāṇi ca bhūtāni jaṃgamāni ca sarvaśaḥ || 26 ||
[Analyze grammar]

samāgamya tadā vainyamabhyaṣiñcannarādhipam |
mahatā rājarājyena prajāpālaṃ mahādyutim || 27 ||
[Analyze grammar]

so'bhiṣikto mahātejā vidhivaddharmakovidaiḥ |
ādhirājye tadā rājā pṛthurvainyaḥ pratāpavān || 28 ||
[Analyze grammar]

pitrāparañjitāstasya prajāstenānurañjitāḥ |
anurāgāttatastasya nāma rājetyajāyata || 29 ||
[Analyze grammar]

āpastastambhire tasya samudramabhiyāsyataḥ |
parvatāśca dadurmārgaṃ dhvajasaṅgaśca nābhavat || 30 ||
[Analyze grammar]

akṛṣṭapacyā pṛthivī sidhyantyannāni cintayā |
sarvakāmadughā gāvaḥ puṭake puṭake madhu || 31 ||
[Analyze grammar]

etasminneva kāle tu yajñe paitāmahe śubhe |
sūtaḥ sūtyāṃ samutpannaḥ sautye'hani mahāmatiḥ || 32 ||
[Analyze grammar]

tasminneva mahāyajñe jajñe prājño'tha māgadhaḥ |
pṛthoḥ stavārthaṃ tau tatra samāhūtau maharṣibhiḥ || 33 ||
[Analyze grammar]

tāv ūcurṛṣayaḥ sarve stūyatāmeṣa pārthivaḥ |
karmaitadanurūpaṃ vāṃ pātraṃ cāyaṃ narādhipaḥ || 34 ||
[Analyze grammar]

tāv ūcatustadā sarvāṃstānṛṣīn sūtamāgadhau |
āvāṃ devānṛṣīṃścaiva prīṇayāvaḥ svakarmabhiḥ || 35 ||
[Analyze grammar]

na cāsya vidvo vai karma na tathā lakṣaṇaṃ yaśaḥ |
stotraṃ yenāsya kuryāva rājñastejasvino dvijāḥ || 36 ||
[Analyze grammar]

ṛṣayaḥ |
kariṣyate tu yatkarma cakravartī mahābalaḥ || 36 ||
[Analyze grammar]

guṇā bhaviṣyā ye cāsya tairayaṃ stūyatāṃ nṛpaḥ || 36 ||
[Analyze grammar]

ṛṣibhistau niyuktau tu bhaviṣyaiḥ stūyatāmiti |
tau stutiṃ cakraturyuktaṃ sūtamāgadhakau nṛpa |
yāni karmāṇi kṛtavānpṛthuḥ paścānmahābalaḥ || 37 ||
[Analyze grammar]

satyavāgdānaśīlo'yaṃ satyasaṃdho nareśvaraḥ || 37 ||
[Analyze grammar]

śrīmāñjaitraḥ kṣamāśīlo vikrānto duṣṭaśāsanaḥ || 37 ||
[Analyze grammar]

dharmajñaśca kṛtajñaśca dayāvānpriyabhāṣakaḥ || 37 ||
[Analyze grammar]

mānyamānayitā yajvā brahmaṇyaḥ sādhuvatsalaḥ || 37 ||
[Analyze grammar]

samaḥ śatrau ca mitre ca vyavahārasthito nṛpaḥ || 37 ||
[Analyze grammar]

tadāprabhṛti trailokye staveṣu janamejaya |
āśīrvādāḥ prayujyante sūtamāgadhabandibhiḥ || 38 ||
[Analyze grammar]

tayoḥ stavānte suprītaḥ pṛthuḥ prādātprajeśvaraḥ |
anūpadeśaṃ sūtāya magadhaṃ māgadhāya ca || 39 ||
[Analyze grammar]

taṃ dṛṣṭvā paramaprītāḥ prajāḥ prāhurmaharṣayaḥ |
vṛttīnāmeṣa vo dātā bhaviṣyati janeśvaraḥ || 40 ||
[Analyze grammar]

taṃ prajāḥ pṛthivīnāthamupatasthuḥ kṣudhārditāḥ || 40 ||
[Analyze grammar]

oṣadhīṣu pranaṣṭāsu tasmin kāle hyarājake || 40 ||
[Analyze grammar]

tamūcustena tāḥ pṛṣṭāstatrāgamanakāraṇam || 40 ||
[Analyze grammar]

prajā ūcuḥ |
arājake naraśreṣṭha dharitryā sakalauṣadhīḥ || 40 ||
[Analyze grammar]

grastāstataḥ kṣayaṃ yānti prajāḥ sarvāḥ prajeśvara || 40 ||
[Analyze grammar]

tvaṃ no vṛttiprado dhātrā prajāpālo nirūpitaḥ || 40 ||
[Analyze grammar]

dehi naḥ kṣutparītānāṃ prajānāṃ jīvanauṣahīḥ || 40 ||
[Analyze grammar]

tato vainyaṃ mahārāja prajāḥ samabhidudruvuḥ |
tvaṃ no vṛttiṃ vidhatsveti maharṣivacanāttadā || 41 ||
[Analyze grammar]

so'bhidrutaḥ prajābhistu prajāhitacikīrṣayā |
dhanurgṛhya pṛṣatkāṃśca pṛthivīmārdayadbalī || 42 ||
[Analyze grammar]

tato vainyabhayatrastā gaurbhūtvā prādravanmahī |
tāṃ pṛthurdhanurādāya dravantīmanvadhāvata || 43 ||
[Analyze grammar]

sā lokānbrahmalokādīn gatvā vainyabhayāttadā |
pradadarśāgrato vainyaṃ pragṛhītaśarāsanam || 44 ||
[Analyze grammar]

jvaladbhirniśitairbāṇairdīptatejasamacyutam |
mahāyogaṃ mahātmānaṃ durdharṣamamarairapi || 45 ||
[Analyze grammar]

alabhantī tu sā trāṇaṃ vainyamevānvapadyata |
kṛtāñjalipuṭā bhūtvā pūjyā lokaistribhiḥ sadā || 46 ||
[Analyze grammar]

uvāca vainyaṃ nādharmaṃ strīvadhe paripaśyasi |
kathaṃ dhārayitā cāsi prajā rājanvinā mayā || 47 ||
[Analyze grammar]

mayi lokāḥ sthitā rājanmayedaṃ dhāryate jagat |
matkṛte na vinaśyeyuḥ prajāḥ pārthiva viddhi tat || 48 ||
[Analyze grammar]

na māmarhasi hantuṃ vai śreyaścettvaṃ cikīrṣasi |
prajānāṃ pṛthivīpāla śṛṇu cedaṃ vaco mama || 49 ||
[Analyze grammar]

upāyataḥ samārabdhāḥ sarve sidhyantyupakramāḥ |
tasmādvadāmyupāyaṃ te taṃ kuruṣva yadīcchasi |
upāyaṃ paśya yena tvaṃ dhārayethāḥ prajā nṛpa || 50 ||
[Analyze grammar]

hatvāpi māṃ na śaktastvaṃ prajānāṃ poṣaṇe nṛpa |
annabhūtā bhaviṣyāmi yaccha kopaṃ mahādyute || 51 ||
[Analyze grammar]

pṛthuḥ |
ātmayogabalenemā dhārayiṣyāmyahaṃ prajāḥ || 51 ||
[Analyze grammar]

tataḥ praṇamya vasudhā taṃ bhūyaḥ prāha pārthivam || 51 ||
[Analyze grammar]

avadhyāśca striyaḥ prāhustiryagyonigateṣvapi |
sattveṣu pṛthivīpāla na dharmaṃ tyaktumarhasi || 52 ||
[Analyze grammar]

evaṃ bahuvidhaṃ vākyaṃ śrutvā rājā mahāmanāḥ |
cintayitvā bahuvidhaṃ prajānāṃ hitakamyayā |
kopaṃ nigṛhya dharmātmā vasudhāmidamabravīt || 53 ||
[Analyze grammar]