Chapter 10

[English text for this chapter is available]

śaunaka uvāca |
hatvā svarikthaspṛdha ātatāyino |
yudhiṣṭhiro dharmabhṛtāṃ variṣṭhaḥ |
sahānujaiḥ pratyavaruddhabhojanaḥ |
kathaṃ pravṛttaḥ kimakāraṣīttataḥ || 1 ||
[Analyze grammar]

sūta uvāca |
vaṃśaṃ kurorvaṃśadavāgninirhṛtaṃ |
saṃrohayitvā bhavabhāvano hariḥ |
niveśayitvā nijarājya īśvaro |
yudhiṣṭhiraṃ prītamanā babhūva ha || 2 ||
[Analyze grammar]

niśamya bhīṣmoktamathācyutoktaṃ |
pravṛtta vijñāna vidhūta vibhramaḥ |
śaśāsa gāmindra ivājitāśrayaḥ |
paridhyupāntāṃ anujānuvartitaḥ || 3 ||
[Analyze grammar]

kāmaṃ vavarṣa parjanyaḥ sarvakāmadughā mahī |
siṣicuḥ sma vrajān gāvaḥ payasodhasvatīrmudā || 4 ||
[Analyze grammar]

nadyaḥ samudrā girayaḥ savanaspativīrudhaḥ |
phalantyoṣadhayaḥ sarvāḥ kāmaṃ anvṛtu tasya vai || 5 ||
[Analyze grammar]

nādhayo vyādhayaḥ kleśā daivabhūtātmahetavaḥ |
ajātaśatrau avabhavan jantūnāṃ rājñi karhicit || 6 ||
[Analyze grammar]

uṣitvā hāstinapure māsān katipayān hariḥ |
suhṛdāṃ ca viśokāya svasuśca priyakāmyayā || 7 ||
[Analyze grammar]

āmaṃtrya cābhyanujñātaḥ pariṣvajyābhivādya tam |
āruroha rathaṃ kaiścit pariṣvakto'bhivāditaḥ || 8 ||
[Analyze grammar]

subhadrā draupadī kuntī virāṭatanayā tathā |
gāndhārī dhṛtarāṣṭraśca yuyutsuḥ gautamo yamau || 9 ||
[Analyze grammar]

vṛkodaraśca dhaumyaśca striyo matsyasutādayaḥ |
na sehire vimuhyanto virahaṃ śārṅgadhanvanaḥ || 10 ||
[Analyze grammar]

satsaṅgāt muktaduḥsaṅgo hātuṃ notsahate budhaḥ |
kīrtyamānaṃ yaśo yasya sakṛt ākarṇya rocanam || 11 ||
[Analyze grammar]

tasmin nyastadhiyaḥ pārthāḥ saheran virahaṃ katham |
darśanasparśasaṃlāpa śayanāsana bhojanaiḥ || 12 ||
[Analyze grammar]

sarve te'nimiṣaiḥ akṣaiḥ taṃ anu drutacetasaḥ |
vīkṣantaḥ snehasambaddhā vicelustatra tatra ha || 13 ||
[Analyze grammar]

nyarundhan ud‍galat bāṣpaṃ autkaṇṭhyāt devakīsute |
niryātyagārāt no'bhadraṃ iti syāt bāndhavastriyaḥ || 14 ||
[Analyze grammar]

mṛdaṅgaśaṅkhabheryaśca vīṇāpaṇava gomukhāḥ |
dhundhuryānaka ghaṇṭādyā neduḥ dundubhayastathā || 15 ||
[Analyze grammar]

prāsādaśikharārūḍhāḥ kurunāryo didṛkṣayā |
vavṛṣuḥ kusumaiḥ kṛṣṇaṃ premavrīḍāsmitekṣaṇāḥ || 16 ||
[Analyze grammar]

sitātapatraṃ jagrāha muktādāmavibhūṣitam |
rat‍nadaṇḍaṃ guḍākeśaḥ priyaḥ priyatamasya ha || 17 ||
[Analyze grammar]

uddhavaḥ sātyakiścaiva vyajane paramād‍bhute |
vikīryamāṇaḥ kusumai reje madhupatiḥ pathi || 18 ||
[Analyze grammar]

aśrūyantāśiṣaḥ satyāḥ tatra tatra dvijeritāḥ |
nānurūpānurūpāśca nirguṇasya guṇātmanaḥ || 19 ||
[Analyze grammar]

anyonyamāsīt saṃjalpa uttamaślokacetasām |
kauravendrapurastrīṇāṃ sarvaśrutimanoharaḥ || 20 ||
[Analyze grammar]

sa vai kilāyaṃ puruṣaḥ purātano |
ya eka āsīdaviśeṣa ātmani |
agre guṇebhyo jagadātmanīśvare |
nimīlitātmanniśi suptaśaktiṣu || 21 ||
[Analyze grammar]

sa eva bhūyo nijavīryacoditāṃ |
svajīvamāyāṃ prakṛtiṃ sisṛkṣatīm |
anāmarūpātmani rūpanāmanī |
vidhitsamāno'nusasāra śāstrakṛt || 22 ||
[Analyze grammar]

sa vā ayaṃ yatpadamatra sūrayo |
jitendriyā nirjitamātariśvanaḥ |
paśyanti bhakti utkalitāmalātmanā |
nanveṣa sattvaṃ parimārṣṭumarhati || 23 ||
[Analyze grammar]

sa vā ayaṃ sakhyanugīta satkatho |
vedeṣu guhyeṣu ca guhyavādibhiḥ |
ya eka īśo jagadātmalīlayā |
sṛjatyavatyatti na tatra sajjate || 24 ||
[Analyze grammar]

yadā hyadharmeṇa tamodhiyo nṛpā |
jīvanti tatraiṣa hi sattvataḥ kila |
dhatte bhagaṃ satyamṛtaṃ dayāṃ yaśo |
bhavāya rūpāṇi dadhat yuge yuge || 25 ||
[Analyze grammar]

aho alaṃ ślāghyatamaṃ yadoḥ kulaṃ |
aho alaṃ puṇyatamaṃ madhorvanam |
yadeṣa puṃsāṃ ṛṣabhaḥ śriyaḥ patiḥ |
svajanmanā caṅkramaṇena cāñcati || 26 ||
[Analyze grammar]

aho bata svaryaśasaḥ tiraskarī |
kuśasthalī puṇyayaśaskarī bhuvaḥ |
paśyanti nityaṃ yadanugraheṣitaṃ |
smitāvalokaṃ svapatiṃ sma yatprajāḥ || 27 ||
[Analyze grammar]

nūnaṃ vratasnānahutādineśvaraḥ |
samarcito hyasya gṛhītapāṇibhiḥ |
pibaṃti yāḥ sakhyadharāmṛtaṃ muhuḥ |
vrajastriyaḥ sammumuhuḥ yadāśayāḥ || 28 ||
[Analyze grammar]

yā vīryaśulkena hṛtāḥ svayaṃvare |
pramathya caidyaḥ pramukhānhi śuṣmiṇaḥ |
pradyumna sāmbāmba sutādayo'parā |
yāḥ cāhṛtā bhaumavadhe sahasraśaḥ || 29 ||
[Analyze grammar]

etāḥ paraṃ strītvamapāstapeśalaṃ |
nirastaśaucaṃ bata sādhu kurvate |
yāsāṃ gṛhāt puṣkaralocanaḥ patiḥ |
na jātu apaityāhṛtibhiḥ hṛdi spṛśan || 30 ||
[Analyze grammar]

evaṃvidhā gadantīnāṃ sa giraḥ purayoṣitām |
nirīkṣaṇena abhinandan sasmitena yayau hariḥ || 31 ||
[Analyze grammar]

ajātaśatruḥ pṛtanāṃ gopīthāya madhudviṣaḥ |
parebhyaḥ śaṅkitaḥ snehāt prāyuṅkta caturaṅgiṇīm || 32 ||
[Analyze grammar]

atha dūrāgatān śauriḥ kauravān virahāturān |
sannivartya dṛḍhaṃ snigdhān prāyātsvanagarīṃ priyaiḥ || 33 ||
[Analyze grammar]

kurujāṅgalapāñcālān śūrasenān sayāmunān |
brahmāvartaṃ kurukṣetraṃ matsyān sārasvatānatha || 34 ||
[Analyze grammar]

marudhanvamatikramya sauvīrābhīrayoḥ parān |
ānartān bhārgavopāgāt śrāntavāho manāgvibhuḥ || 35 ||
[Analyze grammar]

tatra tatra ha tatratyaiḥ hariḥ pratyudyatārhaṇaḥ |
sāyaṃ bheje diśaṃ paścāt gaviṣṭho gāṃ gatastadā || 36 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ |
prathamaskandhe śrīkṛṣṇadvārakāgamanaṃ nāma daśamo'dhyāyaḥ || 10 ||
[Analyze grammar]