Chapter 8

[English text for this chapter is available]

sūta uvāca |
atha te samparetānāṃ svānāmudakamicchatām |
dātuṃ sakṛṣṇā gaṅgāyāṃ puraskṛtya yayuḥ striyaḥ || 1 ||
[Analyze grammar]

te ninīyodakaṃ sarve vilapya ca bhṛśaṃ punaḥ |
āplutā haripādābjaḥ ajaḥpūtasarijjale || 2 ||
[Analyze grammar]

tatrāsīnaṃ kurupatiṃ dhṛtarāṣṭraṃ sahānujam |
gāndhārīṃ putraśokārtāṃ pṛthāṃ kṛṣṇāṃ ca mādhavaḥ || 3 ||
[Analyze grammar]

sāṃtvayāmāsa munibhiḥ hatabaṃdhūn śucārpitān |
bhūteṣu kālasya gatiṃ darśayan apratikriyām || 4 ||
[Analyze grammar]

sādhayitvājātaśatroḥ svaṃ rājyaṃ kitavairhṛtam |
ghātayitvāsato rājñaḥ kacasparśakṣatāyuṣaḥ || 5 ||
[Analyze grammar]

yājayitvāśvamedhaistaṃ tribhiruttamakalpakaiḥ |
tadyaśaḥ pāvanaṃ dikṣu śatamanyorivātanot || 6 ||
[Analyze grammar]

āmaṃtrya pāṇḍuputrāṃśca śaineyoddhavasaṃyutaḥ |
dvaipāyanādibhirvipraiḥ pūjitaiḥ pratipūjitaḥ || 7 ||
[Analyze grammar]

gantuṃ kṛtamatirbrahman dvārakāṃ rathamāsthitaḥ |
upalebhe'bhidhāvantīṃ uttarāṃ bhayavihvalām || 8 ||
[Analyze grammar]

uttarovāca |
pāhi pāhi mahāyogin devadeva jagatpate |
nānyaṃ tvadabhayaṃ paśye yatra mṛtyuḥ parasparam || 9 ||
[Analyze grammar]

abhidravati māmīśa śarastaptāyaso vibho |
kāmaṃ dahatu māṃ nātha mā me garbho nipātyatām || 10 ||
[Analyze grammar]

sūta uvāca |
upadhārya vacastasyā bhagavān bhaktavatsalaḥ |
apāṇḍavamidaṃ kartuṃ drauṇerastramabudhyata || 11 ||
[Analyze grammar]

tarhyevātha muniśreṣṭha pāṇḍavāḥ pañca sāyakān |
ātmano'bhimukhān dīptān ālakṣyāstrāṇyupādaduḥ || 12 ||
[Analyze grammar]

vyasanaṃ vīkṣya tatteṣāṃ ananyaviṣayātmanām |
sudarśanena svāstreṇa svānāṃ rakṣāṃ vyadhādvibhuḥ || 13 ||
[Analyze grammar]

antaḥsthaḥ sarvabhūtānāṃ ātmā yogeśvaro hariḥ |
svamāyayā'vṛṇod‍garbhaṃ vairāṭyāḥ kurutantave || 14 ||
[Analyze grammar]

yadyapyastraṃ brahmaśiraḥ tvamoghaṃ cāpratikriyam |
vaiṣṇavaṃ teja āsādya samaśāmyad bhṛgūdvaha || 15 ||
[Analyze grammar]

mā maṃsthā hyetadāścaryaṃ sarvāścaryamaye'cyute |
ya idaṃ māyayā devyā sṛjatyavati hantyajaḥ || 16 ||
[Analyze grammar]

brahmatejovinirmuktaiḥ ātmajaiḥ saha kṛṣṇayā |
prayāṇābhimukhaṃ kṛṣṇaṃ idamāha pṛthā satī || 17 ||
[Analyze grammar]

kuntyuvāca |
namasye puruṣaṃ tvā'dyaṃ īśvaraṃ prakṛteḥ param |
alakṣyaṃ sarvabhūtānāṃ antarbahiravasthitam || 18 ||
[Analyze grammar]

māyājavanikācchannaṃ ajñādhokṣajamavyayam |
na lakṣyase mūḍhadṛśā naṭo nāṭyadharo yathā || 19 ||
[Analyze grammar]

tathā paramahaṃsānāṃ munīnāṃ amalātmanām |
bhaktiyogavidhānārthaṃ kathaṃ paśyema hi striyaḥ || 20 ||
[Analyze grammar]

kṛṣṇāya vāsudevāya devakīnaṃdanāya ca |
naṃdagopakumārāya goviṃdāya namo namaḥ || 21 ||
[Analyze grammar]

namaḥ paṅkajanābhāya namaḥ paṅkajamāline |
namaḥ paṅkajanetrāya namaste paṅkajāṅghraye || 22 ||
[Analyze grammar]

yathā hṛṣīkeśa khalena devakī |
kaṃsena ruddhāticiraṃ śucārpitā |
vimocitāhaṃ ca sahātmajā vibho |
tvayaiva nāthena muhurvipad‍gaṇāt || 23 ||
[Analyze grammar]

viṣānmahāgneḥ puruṣādadarśanād |
asatsabhāyā vanavāsakṛcchrataḥ |
mṛdhe mṛdhe'nekamahārathāstrato |
drauṇyastrataścāsma hare'bhirakṣitāḥ || 24 ||
[Analyze grammar]

vipadaḥ santu tāḥ śaśvat tatra tatra jagad‍guro |
bhavato darśanaṃ yatsyād apunarbhavadarśanam || 25 ||
[Analyze grammar]

janmaiśvaryaśrutaśrībhiḥ edhamānamadaḥ pumān |
naivārhatyabhidhātuṃ vai tvāṃ akiñcanagocaram || 26 ||
[Analyze grammar]

namo'kiñcanavittāya nivṛttaguṇavṛttaye |
ātmārāmāya śāntāya kaivalyapataye namaḥ || 27 ||
[Analyze grammar]

manye tvāṃ kālamīśānaṃ anādinidhanaṃ vibhum |
samaṃ carantaṃ sarvatra bhūtānāṃ yanmithaḥ kaliḥ || 28 ||
[Analyze grammar]

na veda kaścid bhagavaṃścikīrṣitaṃ |
tavehamānasya nṛṇāṃ viḍambanam |
na yasya kaścid dayito'sti karhicid |
dveṣyaśca yasminviṣamā matirnṛṇām || 29 ||
[Analyze grammar]

janma karma ca viśvātman ajasyākarturātmanaḥ |
tiryaṅ nṛṣiṣu yādaḥsu tad atyantaviḍambanam || 30 ||
[Analyze grammar]

gopyādade tvayi kṛtāgasi dāma tāvad |
yā te daśāśrukalila añjana saṃbhramākṣam |
vaktraṃ ninīya bhayabhāvanayā sthitasya |
sā māṃ vimohayati bhīrapi yadbibheti || 31 ||
[Analyze grammar]

kecid āhuḥ ajaṃ jātaṃ puṇyaślokasya kīrtaye |
yadoḥ priyasya anvavāye malayasyeva candanam || 32 ||
[Analyze grammar]

apare vasudevasya devakyāṃ yācito'bhyagāt |
ajastvamasya kṣemāya vadhāya ca suradviṣām || 33 ||
[Analyze grammar]

bhārāvatāraṇāyānye bhuvo nāva ivodadhau |
sīdantyā bhūribhāreṇa jāto hyātmabhuvārthitaḥ || 34 ||
[Analyze grammar]

bhave'smin kliśyamānānāṃ avidyākāmakarmabhiḥ |
śravaṇa smaraṇārhāṇi kariṣyam iti kecana || 35 ||
[Analyze grammar]

śrṛṇvanti gāyanti gṛṇantyabhīkṣṇaśaḥ |
smaranti nandanti tavehitaṃ janāḥ |
ta eva paśyantyacireṇa tāvakaṃ |
bhavapravāhoparamaṃ padāmbujam || 36 ||
[Analyze grammar]

apyadya nastvaṃ svakṛtehita prabho |
jihāsasi svit suhṛdo'nujīvinaḥ |
yeṣāṃ na cānyat bhavataḥ padāmbujāt |
parāyaṇaṃ rājasu yojitāṃhasām || 37 ||
[Analyze grammar]

ke vayaṃ nāmarūpābhyāṃ yadubhiḥ saha pāṇḍavāḥ |
bhavato'darśanaṃ yarhi hṛṣīkāṇāṃ iva īśituḥ || 38 ||
[Analyze grammar]

neyaṃ śobhiṣyate tatra yathedānīṃ gadādhara |
tvatpadaiḥ aṅkitā bhāti svalakṣaṇavilakṣitaiḥ || 39 ||
[Analyze grammar]

ime janapadāḥ svṛddhāḥ supakvauṣadhivīrudhaḥ |
vanādri nadī udanvanto hyedhante tava vīkṣitaiḥ || 40 ||
[Analyze grammar]

atha viśveśa viśvātman viśvamūrte svakeṣu me |
snehapāśaṃ imaṃ chindhi dṛḍhaṃ pāṇḍuṣu vṛṣṇiṣu || 41 ||
[Analyze grammar]

tvayi me'nanyaviṣayā matirmadhupate'sakṛt |
ratiṃ udvahatāt addhā gaṅgevaughaṃ udanvati || 42 ||
[Analyze grammar]

śrīkṛṣṇa kṛṣṇasakha vṛṣṇi ṛṣabhāvanidhrug |
rājanyavaṃśadahana anapavarga vīrya |
govinda godvijasurārtiharāvatāra |
yogeśvarākhilaguro bhagavan namaste || 43 ||
[Analyze grammar]

sūta uvāca |
pṛthayetthaṃ kalapadaiḥ pariṇūtākhilodayaḥ |
mandaṃ jahāsa vaikuṇṭho mohayanniva māyayā || 44 ||
[Analyze grammar]

tāṃ bāḍhaṃ iti upāmaṃtrya praviśya gajasāhvayam |
striyaśca svapuraṃ yāsyan premṇā rājñā nivāritaḥ || 45 ||
[Analyze grammar]

vyāsādyairīśvarehā jñaiḥ kṛṣṇenād‍bhutakarmaṇā |
prabodhito'pi itihāsaiḥ nābudhyata śucārpitaḥ || 46 ||
[Analyze grammar]

āha rājā dharmasutaḥ cintayan suhṛdāṃ vadham |
prākṛtenātmanā viprāḥ snehamohavaśaṃ gataḥ || 47 ||
[Analyze grammar]

aho me paśyatājñānaṃ hṛdi rūḍhaṃ durātmanaḥ |
pārakyasyaiva dehasya bahvyo me'kṣauhiṇīrhatāḥ || 48 ||
[Analyze grammar]

bāladvijasuhṛn mitra pitṛbhrātṛguru druhaḥ |
na me syāt nirayāt mokṣo hyapi varṣa ayuta āyutaiḥ || 49 ||
[Analyze grammar]

naino rājñaḥ prajābhartuḥ dharmayuddhe vadho dviṣām |
iti me na tu bodhāya kalpate śāsanaṃ vacaḥ || 50 ||
[Analyze grammar]

strīṇāṃ mat hatabaṃdhūnāṃ droho yo'sau ihotthitaḥ |
karmabhiḥ gṛhamedhīyaiḥ nāhaṃ kalpo vyapohitum || 51 ||
[Analyze grammar]

yathā paṅkena paṅkāmbhaḥ surayā vā surākṛtam |
bhūtahatyāṃ tathaivaikāṃ na yajñaiḥ mārṣṭumarhati || 52 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ |
prathamaskandhe kuntīstutiryudhiṣṭhirānutāpo nāma aṣṭamo'dhyāyaḥ || 8 ||
[Analyze grammar]