Chapter 7

[English text for this chapter is available]

śaunaka uvāca |
nirgate nārade sūta bhagavān bādarāyaṇaḥ |
śrutavāṃstadabhipretaṃ tataḥ kimakarod vibhuḥ |
sūta uvāca |
brahmanadyāṃ sarasvatyāṃ āśramaḥ paścime taṭe |
śamyāprāsa iti prokta ṛṣīṇāṃ satravardhanaḥ || 2 ||
[Analyze grammar]

tasmin sva āśrame vyāso badarīṣaṇḍamaṇḍite |
āsīno'pa upaspṛśya praṇidadhyau manaḥ svayam || 3 ||
[Analyze grammar]

bhaktiyogena manasi samyak praṇihite'male |
apaśyat puruṣaṃ pūrṇaṃ māyāṃ ca tadapāśrayam || 4 ||
[Analyze grammar]

yayā saṃmohito jīva ātmānaṃ triguṇātmakam |
paro'pi manute'narthaṃ tatkṛtaṃ cābhipadyate || 5 ||
[Analyze grammar]

anarthopaśamaṃ sākṣād bhaktiyogamadhokṣaje |
lokasyājānato vidvāṃn cakre sātvatasaṃhitām || 6 ||
[Analyze grammar]

yasyāṃ vai śrūyamāṇāyāṃ kṛṣṇe paramapūruṣe |
bhaktirutpadyate puṃsaḥ śokamohabhayāpahā || 7 ||
[Analyze grammar]

sa saṃhitāṃ bhāgavatīṃ kṛtvānukramya cātmajam |
śukaṃ adhyāpayāmāsa nivṛttinirataṃ muniḥ || 8 ||
[Analyze grammar]

śaunaka uvāca |
sa vai nivṛttinirataḥ sarvatropekṣako muniḥ |
kasya vā bṛhatīṃ etāṃ ātmārāmaḥ samabhyasat || 9 ||
[Analyze grammar]

sūta uvāca |
ātmārāmāśca munayo nirgranthā apyurukrame |
kurvanti ahaitukīṃ bhaktiṃ itthaṃbhūtaguṇo hariḥ || 10 ||
[Analyze grammar]

harerguṇākṣiptamatiḥ bhagavān bādarāyaṇiḥ |
adhyagān mahadākhyānaṃ nityaṃ viṣṇujanapriyaḥ || 11 ||
[Analyze grammar]

parīkṣito'tha rājarṣeḥ janmakarmavilāpanam |
saṃsthāṃ ca pāṇḍuputrāṇāṃ vakṣye kṛṣṇakathodayam || 12 ||
[Analyze grammar]

yadā mṛdhe kauravasṛñjayānāṃ |
vīreṣvatho vīragatiṃ gateṣu |
vṛkodarāviddhagadābhimarśa |
bhagnorudaṇḍe dhṛtarāṣṭraputre || 13 ||
[Analyze grammar]

bhartuḥ priyaṃ drauṇiriti sma paśyan |
kṛṣṇāsutānāṃ svapatāṃ śirāṃsi |
upāharad vipriyameva tasya |
jugupsitaṃ karma vigarhayanti || 14 ||
[Analyze grammar]

mātā śiśūnāṃ nidhanaṃ sutānāṃ |
niśamya ghoraṃ paritapyamānā |
tadārudad bāṣpakalākulākṣī |
tāṃ sāṃtvayannāha kirīṭamālī || 15 ||
[Analyze grammar]

tadā śucaste pramṛjāmi bhadre |
yad‍brahmabaṃdhoḥ śira ātatāyinaḥ |
gāṇḍīvamuktaiḥ viśikhairupāhare |
tvākramya yatsnāsyasi dagdhaputrā || 16 ||
[Analyze grammar]

iti priyāṃ valguvicitrajalpaiḥ |
sa sāntvayitvācyutamitrasūtaḥ |
anvādravad daṃśita ugradhanvā |
kapidhvajo guruputraṃ rathena || 17 ||
[Analyze grammar]

tamāpatantaṃ sa vilakṣya dūrāt |
kumārahodvignamanā rathena |
parādravat prāṇaparīpsururvyāṃ |
yāvad‍gamaṃ rudrabhayād yathārkaḥ || 18 ||
[Analyze grammar]

yadāśaraṇamātmānaṃ aikṣata śrāntavājinam |
astraṃ brahmaśiro mene ātmatrāṇaṃ dvijātmajaḥ || 19 ||
[Analyze grammar]

athopaspṛśya salilaṃ sandadhe tatsamāhitaḥ |
ajānan upasaṃhāraṃ prāṇakṛcchra upasthite || 20 ||
[Analyze grammar]

tataḥ prāduṣkṛtaṃ tejaḥ pracaṇḍaṃ sarvato diśam |
prāṇāpadamabhiprekṣya viṣṇuṃ jiṣṇuruvāca ha || 21 ||
[Analyze grammar]

arjuna uvāca |
kṛṣṇa kṛṣṇa mahābāho bhaktānāmabhayaṅkara |
tvameko dahyamānānāṃ apavargo'si saṃsṛteḥ || 22 ||
[Analyze grammar]

tvamādyaḥ puruṣaḥ sākṣād īśvaraḥ prakṛteḥ paraḥ |
māyāṃ vyudasya cicchaktyā kaivalye sthita ātmani || 23 ||
[Analyze grammar]

sa eva jīvalokasya māyāmohitacetasaḥ |
vidhatse svena vīryeṇa śreyo dharmādilakṣaṇam || 24 ||
[Analyze grammar]

tathāyaṃ cāvatāraste bhuvo bhārajihīrṣayā |
svānāṃ cānanyabhāvānāṃ anudhyānāya cāsakṛt || 25 ||
[Analyze grammar]

kimidaṃ svitkuto veti devadeva na vedmyaham |
sarvato mukhamāyāti tejaḥ paramadāruṇam || 26 ||
[Analyze grammar]

śrībhagavānuvāca |
vetthedaṃ droṇaputrasya brāhmamastraṃ pradarśitam |
naivāsau veda saṃhāraṃ prāṇabādha upasthite || 27 ||
[Analyze grammar]

na hyasyānyatamaṃ kiñcid astraṃ pratyavakarśanam |
jahyastrateja unnaddhaṃ astrajño hyastratejasā || 28 ||
[Analyze grammar]

sūta uvāca |
śrutvā bhagavatā proktaṃ phālgunaḥ paravīrahā |
spṛṣṭvāpastaṃ parikramya brāhmaṃ brāhmāya saṃdadhe || 29 ||
[Analyze grammar]

saṃhatya anyonyaṃ ubhayoḥ tejasī śarasaṃvṛte |
āvṛtya rodasī khaṃ ca vavṛdhāte'rkavahnivat || 30 ||
[Analyze grammar]

dṛṣṭvāstratejastu tayoḥ triṃllokān pradahanmahat |
dahyamānāḥ prajāḥ sarvāḥ sāṃvartakamamaṃsata || 31 ||
[Analyze grammar]

prajopaplavamālakṣya lokavyatikaraṃ ca tam |
mataṃ ca vāsudevasya saṃjahārārjuno dvayam || 32 ||
[Analyze grammar]

tata āsādya tarasā dāruṇaṃ gautamīsutam |
babaṃdhāmarṣatāmrākṣaḥ paśuṃ raśanayā yathā || 33 ||
[Analyze grammar]

śibirāya ninīṣantaṃ rajjvā baddhvā ripuṃ balāt |
prāhārjunaṃ prakupito bhagavān aṃbujekṣaṇaḥ || 34 ||
[Analyze grammar]

mainaṃ pārthārhasi trātuṃ brahmabaṃdhumimaṃ jahi |
yo asau anāgasaḥ suptān avadhīnniśi bālakān || 35 ||
[Analyze grammar]

mattaṃ pramattamunmattaṃ suptaṃ bālaṃ striyaṃ jaḍam |
prapannaṃ virathaṃ bhītaṃ na ripuṃ hanti dharmavit || 36 ||
[Analyze grammar]

svaprāṇānyaḥ paraprāṇaiḥ prapuṣṇātyaghṛṇaḥ khalaḥ |
tad vadhastasya hi śreyo yad doṣādyātyadhaḥ pumān || 37 ||
[Analyze grammar]

pratiśrutaṃ ca bhavatā pāñcālyai śrṛṇvato mama |
āhariṣye śirastasya yaste mānini putrahā || 38 ||
[Analyze grammar]

tadasau vadhyatāṃ pāpa ātatāyyātmabaṃdhuhā |
bhartuśca vipriyaṃ vīra kṛtavān kulapāṃsanaḥ || 39 ||
[Analyze grammar]

sūta uvāca |
evaṃ parīkṣatā dharmaṃ pārthaḥ kṛṣṇena coditaḥ |
naicchad hantuṃ gurusutaṃ yadyapyātmahanaṃ mahān || 40 ||
[Analyze grammar]

athopetya svaśibiraṃ goviṃdapriyasārathiḥ |
nyavedayat taṃ priyāyai śocantyā ātmajān hatān || 41 ||
[Analyze grammar]

tathāhṛtaṃ paśuvatpāśabaddhaṃ |
avāṅmukhaṃ karmajugupsitena |
nirīkṣya kṛṣṇāpakṛtaṃ guroḥ sutaṃ |
vāmasvabhāvā kṛpayā nanāma ca || 42 ||
[Analyze grammar]

uvāca cāsahantyasya baṃdhanānayanaṃ satī |
mucyatāṃ mucyatāṃ eṣa brāhmaṇo nitarāṃ guruḥ || 43 ||
[Analyze grammar]

sarahasyo dhanurvedaḥ savisargopasaṃyamaḥ |
astragrāmaśca bhavatā śikṣito yadanugrahāt || 44 ||
[Analyze grammar]

sa eṣa bhagavān droṇaḥ prajārūpeṇa vartate |
tasyātmano'rdhaṃ pat‍nyāḥ te nānvagād vīrasūḥ kṛpī || 45 ||
[Analyze grammar]

tad dharmajña mahābhāga bhavadbhiḥ rgauravaṃ kulam |
vṛjinaṃ nārhati prāptuṃ pūjyaṃ vandyamabhīkṣṇaśaḥ || 46 ||
[Analyze grammar]

mā rodīdasya jananī gautamī patidevatā |
yathāhaṃ mṛtavatsā'rtā rodimyaśrumukhī muhuḥ || 47 ||
[Analyze grammar]

yaiḥ kopitaṃ brahmakulaṃ rājanyairajitātmabhiḥ |
tat kulaṃ pradahatyāśu sānubaṃdhaṃ śucārpitam || 48 ||
[Analyze grammar]

sūta uvāca |
dharmyaṃ nyāyyaṃ sakaruṇaṃ nirvyalīkaṃ samaṃ mahat |
rājā dharmasuto rājñyāḥ pratyanaṃdad vaco dvijāḥ || 49 ||
[Analyze grammar]

nakulaḥ sahadevaśca yuyudhāno dhanaṃjayaḥ |
bhagavān devakīputro ye cānye yāśca yoṣitaḥ || 50 ||
[Analyze grammar]

tatrāhāmarṣito bhīmaḥ tasya śreyān vadhaḥ smṛtaḥ |
na bharturnātmanaścārthe yo'han suptān śiśūn vṛthā || 51 ||
[Analyze grammar]

niśamya bhīmagaditaṃ draupadyāśca caturbhujaḥ |
ālokya vadanaṃ sakhyuḥ idamāha hasanniva || 52 ||
[Analyze grammar]

śrībhagavānuvāca |
brahmabaṃdhurna hantavya ātatāyī vadhārhaṇaḥ |
mayaivobhayamāmnātaṃ paripāhyanuśāsanam || 53 ||
[Analyze grammar]

kuru pratiśrutaṃ satyaṃ yattat sāṃtvayatā priyām |
priyaṃ ca bhīmasenasya pāñcālyā mahyameva ca || 54 ||
[Analyze grammar]

sūta uvāca |
arjunaḥ sahasā'jñāya harerhārdamathāsinā |
maṇiṃ jahāra mūrdhanyaṃ dvijasya sahamūrdhajam || 55 ||
[Analyze grammar]

vimucya raśanābaddhaṃ bālahatyāhataprabham |
tejasā maṇinā hīnaṃ śibirān nirayāpayat || 56 ||
[Analyze grammar]

vapanaṃ draviṇādānaṃ sthānān niryāpaṇaṃ tathā |
eṣa hi brahmabaṃdhūnāṃ vadho nānyo'sti daihikaḥ || 57 ||
[Analyze grammar]

putraśokāturāḥ sarve pāṇḍavāḥ saha kṛṣṇayā |
svānāṃ mṛtānāṃ yatkṛtyaṃ cakrurnirharaṇādikam || 58 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ |
prathamaskandhe drauṇinigraho nāma saptamo'dhyāyaḥ || 7 ||
[Analyze grammar]