Chapter 78

tacchrutvā lakṣmaṇenoktaṃ vākyaṃ vākyaviśāradaḥ |
pratyuvāca mahātejāḥ prahasan rāghavo vacaḥ || 1 ||
[Analyze grammar]

evametannaraśreṣṭha yathā vadasi lakṣmaṇa |
vṛtraghātamaśeṣeṇa vājimedhaphalaṃ ca yat || 2 ||
[Analyze grammar]

śrūyate hi purā saumya kardamasya prajāpateḥ |
putro bāhlīśvaraḥ śrīmānilo nāma sudhārmikaḥ || 3 ||
[Analyze grammar]

sa rājā pṛthivīṃ sarvāṃ vaśe kṛtvā mahāyaśāḥ |
rājyaṃ caiva naravyāghra putravat paryapālayat || 4 ||
[Analyze grammar]

suraiśca paramodārairdaiteyaiśca mahāsuraiḥ |
nāgarākṣasagandharvairyakṣaiśca sumahātmabhiḥ || 5 ||
[Analyze grammar]

pūjyate nityaśaḥ saumya bhayārtai raghunandana |
abibhyaṃśca trayo lokāḥ saroṣasya mahātmanaḥ || 6 ||
[Analyze grammar]

sa rājā tādṛśo hyāsīddharme vīrye ca niṣṭhitaḥ |
buddhyā ca paramodāro bāhlīkānāṃ mahāyaśāḥ || 7 ||
[Analyze grammar]

sa pracakre mahābāhurmṛgayāṃ rucire vane |
caitre manorame māsi sabhṛtyabalavāhanaḥ || 8 ||
[Analyze grammar]

prajaghne sa nṛpo'raṇye mṛgāñ śatasahasraśaḥ |
hatvaiva tṛptirnābhūcca rājñastasya mahātmanaḥ || 9 ||
[Analyze grammar]

nānāmṛgāṇāmayutaṃ vadhyamānaṃ mahātmanā |
yatra jāto mahāsenastaṃ deśamupacakrame || 10 ||
[Analyze grammar]

tasmiṃstu devadeveśaḥ śailarājasutāṃ haraḥ |
ramayāmāsa durdharṣaiḥ sarvairanucaraiḥ saha || 11 ||
[Analyze grammar]

kṛtvā strībhūtamātmānamumeśo gopatidhvajaḥ |
devyāḥ priyacikīrṣuḥ sa tasminparvatanirjhare || 12 ||
[Analyze grammar]

ye ca tatra vanoddeśe sattvāḥ puruṣavādinaḥ |
yacca kiṃ cana tat sarvaṃ nārīsaṃjñaṃ babhūva ha || 13 ||
[Analyze grammar]

etasminnantare rājā sa ilaḥ kardamātmajaḥ |
nighnanmṛgasahasrāṇi taṃ deśamupacakrame || 14 ||
[Analyze grammar]

sa dṛṣṭvā strīkṛtaṃ sarvaṃ savyālamṛgapakṣiṇam |
ātmānaṃ sānugaṃ caiva strībhūtaṃ raghunandana || 15 ||
[Analyze grammar]

tasya duḥkhaṃ mahattvāsīddṛṣṭvātmānaṃ tathā gatam |
umāpateśca tat karma jñātvā trāsamupāgamat || 16 ||
[Analyze grammar]

tato devaṃ mahātmānaṃ śitikaṇṭhaṃ kapardinam |
jagāma śaraṇaṃ rājā sabhṛtyabalavāhanaḥ || 17 ||
[Analyze grammar]

tataḥ prahasya varadaḥ saha devyā mahāyaśāḥ |
prajāpatisutaṃ vākyamuvāca varadaḥ svayam || 18 ||
[Analyze grammar]

uttiṣṭhottiṣṭha rājarṣe kārdameya mahābala |
puruṣatvamṛte saumya varaṃ varaya suvrata || 19 ||
[Analyze grammar]

tataḥ sa rājā śokārtāḥ pratyākhyāto mahātmanā |
na sa jagrāha strībhūto varamanyaṃ surottamāt || 20 ||
[Analyze grammar]

tataḥ śokena mahatā śailarājasutāṃ nṛpaḥ |
praṇipatya mahādevīṃ sarveṇaivāntarātmanā || 21 ||
[Analyze grammar]

īśe varāṇāṃ varade lokānāmasi bhāmini |
amoghadarśane devi bhaje saumye namo'stu te || 22 ||
[Analyze grammar]

hṛdgataṃ tasya rājarṣervijñāya harasaṃnidhau |
pratyuvāca śubhaṃ vākyaṃ devī rudrasya saṃmatā || 23 ||
[Analyze grammar]

ardhasya devo varado varārdhasya tathā hyaham |
tasmādardhaṃ gṛhāṇa tvaṃ strīpuṃsoryāvadicchasi || 24 ||
[Analyze grammar]

tadadbhutatamaṃ śrutvā devyā varamanuttamam |
saṃprahṛṣṭamanā bhūtvā rājā vākyamathābravīt || 25 ||
[Analyze grammar]

yadi devi prasannā me rūpeṇāpratimā bhuvi |
māsaṃ strītvamupāsitvā māsaṃ syāṃ puruṣaḥ punaḥ || 26 ||
[Analyze grammar]

īpsitaṃ tasya vijñāya devī surucirānanā |
pratyuvāca śubhaṃ vākyamevametadbhaviṣyati || 27 ||
[Analyze grammar]

rājanpuruṣabhūtastvaṃ strībhāvaṃ na smariṣyasi |
strībhūtaścāparaṃ māsaṃ na smariṣyasi pauruṣam || 28 ||
[Analyze grammar]

evaṃ sa rājā puruṣo māmaṃ bhūtvātha kārdamiḥ |
trailokyasundarī nārī māsamekamilābhavat || 29 ||
[Analyze grammar]