Chapter 79

tāṃ kathāmilasaṃbaddhāṃ rāmeṇa samudīritām |
lakṣmaṇo bharataścaiva śrutvā paramavismitau || 1 ||
[Analyze grammar]

tau rāmaṃ prāñjalībhūtvā tasya rājño mahātmanaḥ |
vistaraṃ tasya bhāvasya tadā papracchatuḥ punaḥ || 2 ||
[Analyze grammar]

kathaṃ sa rājā strībhūto vartayāmāsa durgatim |
puruṣo vā yadā bhūtaḥ kāṃ vṛttiṃ vartayatyasau || 3 ||
[Analyze grammar]

tayostadbhāṣitaṃ śrutvā kautūhalasamanvitam |
kathayāmāsa kākutṣṭhastasya rājño yathā gatam || 4 ||
[Analyze grammar]

tameva prathamaṃ māsaṃ strībhūtvā lokasundarī |
tābhiḥ parivṛtā strībhirye'sya pūrvaṃ padānugāḥ || 5 ||
[Analyze grammar]

tat kānanaṃ vigāhyāśu vijahre lokasundarī |
drumagulmalatākīrṇaṃ padbhyāṃ padmadalekṣaṇā || 6 ||
[Analyze grammar]

vāhanāni ca sarvāṇi saṃtyaktvā vai samantataḥ |
parvatābhogavivare tasmin reme ilā tadā || 7 ||
[Analyze grammar]

atha tasmin vanoddeśe parvatasyāvidūrataḥ |
saraḥ suruciraprakhyaṃ nānāpakṣigaṇāyutam || 8 ||
[Analyze grammar]

dadarśa sā ilā tasminbudhaṃ somasutaṃ tadā |
jvalantaṃ svena vapuṣā pūrṇaṃ somamivoditam || 9 ||
[Analyze grammar]

tapantaṃ ca tapastīvramambhomadhye durāsadam |
yaśak saraṃ kāmagamaṃ tāruṇye paryavasthitam || 10 ||
[Analyze grammar]

sā taṃ jalāśayaṃ sarvaṃ kṣobhayāmāsa vismitā |
saha taiḥ pūra puruṣaiḥ strībhūtai raghunandana || 11 ||
[Analyze grammar]

budhastu tāṃ nirīkṣyaiva kāmabāṇābhipīḍitaḥ |
nopalebhe tadātmānaṃ cacāla ca tadāmbhasi || 12 ||
[Analyze grammar]

ilāṃ nirīkṣamāṇaḥ sa trailokyābhyadhikāṃ śubhām |
cintāṃ samabhyatikrāmat kā nviyaṃ devatādhikā || 13 ||
[Analyze grammar]

na devīṣu na nāgīṣu nāsurīṣvapsaraḥsu ca |
dṛṣṭapūrvā mayā kā cid rūpeṇaitena śobhitā || 14 ||
[Analyze grammar]

sadṛśīyaṃ mama bhaved yadi nānyaparigrahā |
iti buddhiṃ samāsthāya jalāt sthalamupāgamat || 15 ||
[Analyze grammar]

sa āśramaṃ samupāgamya catasraḥ pramadāstataḥ |
śabdāpayata dharmātmā tāścainaṃ ca vavandire || 16 ||
[Analyze grammar]

sa tāḥ papraccha dharmātma kasyaiṣā lokasundarī |
kimarthamāgatā ceha satyamākhyāta māciram || 17 ||
[Analyze grammar]

śubhaṃ tu tasya tadvākyaṃ madhuraṃ madhurākṣaram |
śrutvā tu tāḥ striyaḥ sarvā ūcurmadhurayā girā || 18 ||
[Analyze grammar]

asmākameṣā suśroṇī prabhutve vartate sadā |
apatiḥ kānanānteṣu sahāsmābhiraṭatyasau || 19 ||
[Analyze grammar]

tadvākyamavyaktapadaṃ tāsāṃ strīṇāṃ niśamya tu |
vidyāmāvartanīṃ puṇyāmāvartayata sa dvijaḥ || 20 ||
[Analyze grammar]

so'rthaṃ viditvā nikhilaṃ tasya rājño yathāgatam |
sarvā eva striyastāśca babhāṣe munipuṃgavaḥ || 21 ||
[Analyze grammar]

atra kiṃ puruṣā bhadrā avasañ śailarodhasi |
vatsyathāsmin girau yūyamavakāśo vidhīyatām || 22 ||
[Analyze grammar]

mūlaputraphalaiḥ sarvā vartayiṣyatha nityadā |
striyaḥ kimpuruṣānnāma bhartṝn samupalapsyatha || 23 ||
[Analyze grammar]

tāḥ śrutvā somaputrasya vācaṃ kiṃpuruṣīkṛtāḥ |
upāsāṃ cakrire śailaṃ bahvyastā bahudhā tadā || 24 ||
[Analyze grammar]