Chapter 57

prasthāpya tadbalaṃ sarvaṃ māsamātroṣitaḥ pathi |
eka evāśu śatrughno jagāma tvaritastadā || 1 ||
[Analyze grammar]

dvirātramantare śūra uṣya rāghavanandanaḥ |
vālmīkerāśramaṃ puṇyamagacchadvāsamuttamam || 2 ||
[Analyze grammar]

so'bhivādya mahātmānaṃ vālmīkiṃ munisattamam |
kṛtāñjaliratho bhūtvā vākyametaduvāca ha || 3 ||
[Analyze grammar]

bhagavan vastumicchāmi guroḥ kṛtyādihāgataḥ |
śvaḥ prabhāte gamiṣyāmi pratīcīṃ vāruṇīṃ diśam || 4 ||
[Analyze grammar]

śatrughnasya vacaḥ śrutvā prahasya munipuṃgavaḥ |
pratyuvāca mahātmānaṃ svāgataṃ te mahāyaśaḥ || 5 ||
[Analyze grammar]

svamāśramamidaṃ saumya rāghavāṇāṃ kulasya ha |
āsanaṃ pādyamarghyaṃ ca nirviśaṅkaḥ pratīccha me || 6 ||
[Analyze grammar]

pratigṛhya tataḥ pūjāṃ phalamūlaṃ ca bhojanam |
bhakṣayāmāsa kākutsthastṛptiṃ ca paramāṃ gataḥ || 7 ||
[Analyze grammar]

sa tu bhuktvā mahābāhurmaharṣiṃ tamuvāca ha |
pūrvaṃ yajñavibhūtīyaṃ kasyāśramasamīpataḥ || 8 ||
[Analyze grammar]

tasya tadbhāṣitaṃ śrutvā vālmīkirvākyamabravīt |
śatrughna śṛṇu yasyedaṃ babhūvāyatanaṃ purā || 9 ||
[Analyze grammar]

yuṣmākaṃ pūrvako rājā sudāsasya mahātmanaḥ |
putro mitrasaho nāma vīryavānatidhārmikaḥ || 10 ||
[Analyze grammar]

sa bāla eva saudāso mṛgayāmupacakrame |
cañcūryamāṇaṃ dadṛśe sa śūro rākṣasadvayam || 11 ||
[Analyze grammar]

śārdūlarūpiṇau ghorau mṛgānbahusahasraśaḥ |
bhakṣayāṇāvasaṃtuṣṭau paryāptiṃ ca na jagmatuḥ || 12 ||
[Analyze grammar]

sa tu tau rākṣasau dṛṣṭvā nirmṛgaṃ ca vanaṃ kṛtam |
krodhena mahatāviṣṭo jaghānaikaṃ maheṣuṇā || 13 ||
[Analyze grammar]

vinipātya tamekaṃ tu saudāsaḥ puruṣarṣabhaḥ |
vijvaro vigatāmarṣo hataṃ rakṣo'bhyavaikṣata || 14 ||
[Analyze grammar]

nirīkṣamāṇaṃ taṃ dṛṣṭvā sahāyastasya rakṣasaḥ |
saṃtāpamakarodghoraṃ saudāsaṃ cedamabravīt || 15 ||
[Analyze grammar]

yasmādanaparāddhaṃ tvaṃ sahāyaṃ mama jaghnivān |
tasmāttavāpi pāpiṣṭha pradāsyāmi pratikriyām || 16 ||
[Analyze grammar]

evamuktvā tu taṃ rakṣastatraivāntaradhīyata |
kālaparyāyayogena rājā mitrasaho'bhavat || 17 ||
[Analyze grammar]

rājāpi yajate yajñaṃ tasyāśramasamīpataḥ |
aśvamedhaṃ mahāyajñaṃ taṃ vasiṣṭho'bhyapālayat || 18 ||
[Analyze grammar]

tatra yajño mahānāsīdbahuvarṣagaṇāyutān |
samṛddhaḥ parayā lakṣmyā devayajñasamo'bhavat || 19 ||
[Analyze grammar]

athāvasāne yajñasya pūrvavairamanusmaran |
vasiṣṭharūpī rājānamiti hovāca rākṣasaḥ || 20 ||
[Analyze grammar]

adya yajñāvasānānte sāmiṣaṃ bhojanaṃ mama |
dīyatāmiti śīghraṃ vai nātra kāryā vicāraṇā || 21 ||
[Analyze grammar]

tacchrutvā vyāhṛtaṃ vākyaṃ rakṣasā kāmarūpiṇā |
bhakṣasaṃskārakuśalamuvāca pṛthivīpatiḥ || 22 ||
[Analyze grammar]

haviṣyaṃ sāmiṣaṃ svādu yathā bhavati bhojanam |
tathā kuruṣva śīghraṃ vai parituṣyed yathā guruḥ || 23 ||
[Analyze grammar]

śāsanāt pārthivendrasya sūdaḥ saṃbhrāntamānasaḥ |
sa ca rakṣaḥ punastatra sūdaveṣamathākarot || 24 ||
[Analyze grammar]

sa mānuṣamatho māṃsaṃ pārthivāya nyavedayat |
idaṃ svāduhaviṣyaṃ ca sāmiṣaṃ cānnamāhṛtam || 25 ||
[Analyze grammar]

sa bhojanaṃ vasiṣṭhāya patnyā sārdhamupāharat |
madayantyā naravyāghra sāmiṣaṃ rakṣasā hṛtam || 26 ||
[Analyze grammar]

jñātvā tadāmiṣaṃ vipro mānuṣaṃ bhojanāhṛtam |
krodhena mahatāviṣṭo vyāhartumupacakrame || 27 ||
[Analyze grammar]

yasmāttvaṃ bhojanaṃ rājanmamaitaddātumicchasi |
tasmādbhojanametatte bhaviṣyati na saṃśayaḥ || 28 ||
[Analyze grammar]

sa rājā saha patnyā vai praṇipatya muhurmuhuḥ |
punarvasiṣṭhaṃ provāca yaduktaṃ brahmarūpiṇā || 29 ||
[Analyze grammar]

tacchrutā pārthivendrasya rakṣasā vikṛtaṃ ca tat |
punaḥ provāca rājānaṃ vasiṣṭhaḥ puruṣarṣabham || 30 ||
[Analyze grammar]

mayā roṣaparītena yadidaṃ vyāhṛtaṃ vacaḥ |
naitacchakyaṃ vṛthā kartuṃ pradāsyāmi ca te varam || 31 ||
[Analyze grammar]

kālo dvādaśa varṣāṇi śāpasyāsya bhaviṣyati |
matprasādācca rājendra atītaṃ na smariṣyasi || 32 ||
[Analyze grammar]

evaṃ sa rājā taṃ śāpamupabhujyārimardanaḥ |
pratilebhe punā rājyaṃ prajāścaivānvapālayat || 33 ||
[Analyze grammar]

tasya kalmāṣapādasya yajñasyāyatanaṃ śubham |
āśramasya samīpe'sminyasminpṛcchasi rāghava || 34 ||
[Analyze grammar]

tasya tāṃ pārthivendrasya kathāṃ śrutvā sudāruṇām |
viveśa parṇaśālāyāṃ maharṣimabhivādya ca || 35 ||
[Analyze grammar]