Chapter 90

lakṣmaṇena tu tadvākyamuktaṃ śrutvā sa rāghavaḥ |
rāvaṇāya śarān ghorān visasarja camūmukhe || 1 ||
[Analyze grammar]

daśagrīvo rathasthastu rāmaṃ vajropamaiḥ śaraiḥ |
ājaghāna mahāghorairdhārābhiriva toyadaḥ || 2 ||
[Analyze grammar]

dīptapāvakasaṃkāśaiḥ śaraiḥ kāñcanabhūṣaṇaiḥ |
nirbibheda raṇe rāmo daśagrīvaṃ samāhitaḥ || 3 ||
[Analyze grammar]

bhūmisthitasya rāmasya rathasthasya ca rakṣasaḥ |
na samaṃ yuddhamityāhurdevagandharvadānavāḥ || 4 ||
[Analyze grammar]

tataḥ kāñcanacitrāṅgaḥ kiṃkiṇīśatabhūṣitaḥ |
taruṇādityasaṃkāśo vaidūryamayakūbaraḥ || 5 ||
[Analyze grammar]

sadaśvaiḥ kāñcanāpīḍairyuktaḥ śvetaprakīrṇakaiḥ |
haribhiḥ sūryasaṃkāśairhemajālavibhūṣitaiḥ || 6 ||
[Analyze grammar]

rukmaveṇudhvajaḥ śrīmāndevarājaratho varaḥ |
abhyavartata kākutsthamavatīrya triviṣṭapāt || 7 ||
[Analyze grammar]

abravīcca tadā rāmaṃ sapratodo rathe sthitaḥ |
prāñjalirmātalirvākyaṃ sahasrākṣasya sārathiḥ || 8 ||
[Analyze grammar]

sahasrākṣeṇa kākutstha ratho'yaṃ vijayāya te |
dattastava mahāsattva śrīmāñ śatrunibarhaṇaḥ || 9 ||
[Analyze grammar]

idamaindraṃ mahaccāpaṃ kavacaṃ cāgnisaṃnibham |
śarāścādityasaṃkāśāḥ śaktiśca vimalā śitāḥ || 10 ||
[Analyze grammar]

āruhyemaṃ rathaṃ vīra rākṣasaṃ jahi rāvaṇam |
mayā sārathinā rāma mahendra iva dānavān || 11 ||
[Analyze grammar]

ityuktaḥ sa parikramya rathaṃ tamabhivādya ca |
āruroha tadā rāmo lokāṃl lakṣmyā virājayan || 12 ||
[Analyze grammar]

tadbabhūvādbhutaṃ yuddhaṃ dvairathaṃ lomaharṣaṇam |
rāmasya ca mahābāho rāvaṇasya ca rakṣasaḥ || 13 ||
[Analyze grammar]

sa gāndharveṇa gāndharvaṃ daivaṃ daivena rāghavaḥ |
astraṃ rākṣasarājasya jaghāna paramāstravit || 14 ||
[Analyze grammar]

astraṃ tu paramaṃ ghoraṃ rākṣasaṃ rākasādhipaḥ |
sasarja paramakruddhaḥ punareva niśācaraḥ || 15 ||
[Analyze grammar]

te rāvaṇadhanurmuktāḥ śarāḥ kāñcanabhūṣaṇāḥ |
abhyavartanta kākutsthaṃ sarpā bhūtvā mahāviṣāḥ || 16 ||
[Analyze grammar]

te dīptavadanā dīptaṃ vamanto jvalanaṃ mukhaiḥ |
rāmamevābhyavartanta vyāditāsyā bhayānakāḥ || 17 ||
[Analyze grammar]

tairvāsukisamasparśairdīptabhogairmahāviṣaiḥ |
diśaśca saṃtatāḥ sarvāḥ pradiśaśca samāvṛtāḥ || 18 ||
[Analyze grammar]

tāndṛṣṭvā pannagān rāmaḥ samāpatata āhave |
astraṃ gārutmataṃ ghoraṃ prāduścakre bhayāvaham || 19 ||
[Analyze grammar]

te rāghavadhanurmuktā rukmapuṅkhāḥ śikhiprabhāḥ |
suparṇāḥ kāñcanā bhūtvā viceruḥ sarpaśatravaḥ || 20 ||
[Analyze grammar]

te tān sarvāñ śarāñjaghnuḥ sarparūpānmahājavān |
suparṇarūpā rāmasya viśikhāḥ kāmarūpiṇaḥ || 21 ||
[Analyze grammar]

astre pratihate kruddho rāvaṇo rākṣasādhipaḥ |
abhyavarṣattadā rāmaṃ ghorābhiḥ śaravṛṣṭibhiḥ || 22 ||
[Analyze grammar]

tataḥ śarasahasreṇa rāmamakliṣṭakāriṇam |
ardayitvā śaraugheṇa mātaliṃ pratyavidhyata || 23 ||
[Analyze grammar]

pātayitvā rathopasthe rathāt ketuṃ ca kāñcanam |
aindrānabhijaghānāśvāñ śarajālena rāvaṇaḥ || 24 ||
[Analyze grammar]

viṣedurdevagandharvā dānavāścāraṇaiḥ saha |
rāmamārtaṃ tadā dṛṣṭvā siddhāśca paramarṣayaḥ || 25 ||
[Analyze grammar]

vyathitā vānarendrāśca babhūvuḥ savibhīṣaṇāḥ |
rāmacandramasaṃ dṛṣṭvā grastaṃ rāvaṇarāhuṇā || 26 ||
[Analyze grammar]

prājāpatyaṃ ca nakṣatraṃ rohiṇīṃ śaśinaḥ priyām |
samākramya budhastasthau prajānāmaśubhāvahaḥ || 27 ||
[Analyze grammar]

sadhūmaparivṛttormiḥ prajvalanniva sāgaraḥ |
utpapāta tadā kruddhaḥ spṛśanniva divākaram || 28 ||
[Analyze grammar]

śastravarṇaḥ suparuṣo mandaraśmirdivākaraḥ |
adṛśyata kabandhāṅgaḥ saṃsakto dhūmaketunā || 29 ||
[Analyze grammar]

kosalānāṃ ca nakṣatraṃ vyaktamindrāgnidaivatam |
ākramyāṅgārakastasthau viśākhāmapi cāmbare || 30 ||
[Analyze grammar]

daśāsyo viṃśatibhujaḥ pragṛhītaśarāsanaḥ |
adṛśyata daśagrīvo maināka iva parvataḥ || 31 ||
[Analyze grammar]

nirasyamāno rāmastu daśagrīveṇa rakṣasā |
nāśakadabhisaṃdhātuṃ sāyakān raṇamūrdhani || 32 ||
[Analyze grammar]

sa kṛtvā bhrukuṭīṃ kruddhaḥ kiṃ cit saṃraktalocanaḥ |
jagāma sumahākrodhaṃ nirdahanniva cakṣuṣā || 33 ||
[Analyze grammar]