Chapter 76

tataḥ śaraṃ dāśarathiḥ saṃdhāyāmitrakarśanaḥ |
sasarja rākṣasendrāya kruddhaḥ sarpa iva śvasan || 1 ||
[Analyze grammar]

tasya jyātalanirghoṣaṃ sa śrutvā rāvaṇātmajaḥ |
vivarṇavadano bhūtvā lakṣmaṇaṃ samudaikṣata || 2 ||
[Analyze grammar]

taṃ viṣaṇṇamukhaṃ dṛṣṭvā rākṣasaṃ rāvaṇātmajam |
saumitriṃ yuddhasaṃsaktaṃ pratyuvāca vibhīṣaṇaḥ || 3 ||
[Analyze grammar]

nimittānyanupaśyāmi yānyasmin rāvaṇātmaje |
tvara tena mahābāho bhagna eṣa na saṃśayaḥ || 4 ||
[Analyze grammar]

tataḥ saṃdhāya saumitriḥ śarānagniśikhopamān |
mumoca niśitāṃstasmai sarvāniva viṣolbaṇān || 5 ||
[Analyze grammar]

śakrāśanisamasparśairlakṣmaṇenāhataḥ śaraiḥ |
muhūrtamabhavanmūḍhaḥ sarvasaṃkṣubhitendriyaḥ || 6 ||
[Analyze grammar]

upalabhya muhūrtena saṃjñāṃ pratyāgatendriyaḥ |
dadarśāvasthitaṃ vīraṃ vīro daśarathātmajam || 7 ||
[Analyze grammar]

so'bhicakrāma saumitriṃ roṣāt saṃraktalocanaḥ |
abravīccainamāsādya punaḥ sa paruṣaṃ vacaḥ || 8 ||
[Analyze grammar]

kiṃ na smarasi tad yuddhe prathame matparākramam |
nibaddhastvaṃ saha bhrātrā yadā yudhi viceṣṭase || 9 ||
[Analyze grammar]

yuvā khalu mahāyuddhe śakrāśanisamaiḥ śaraiḥ |
śāyinau prathamaṃ bhūmau visaṃjñau sapuraḥsarau || 10 ||
[Analyze grammar]

smṛtirvā nāsti te manye vyaktaṃ vā yamasādanam |
gantumicchasi yasmāttvaṃ māṃ dharṣayitumicchasi || 11 ||
[Analyze grammar]

yadi te prathame yuddhe na dṛṣṭo matparākramaḥ |
adya tvāṃ darśayiṣyāmi tiṣṭhedānīṃ vyavasthitaḥ || 12 ||
[Analyze grammar]

ityuktvā saptabhirbāṇairabhivivyādha lakṣmaṇam |
daśabhiśca hanūmantaṃ tīkṣṇadhāraiḥ śarottamaiḥ || 13 ||
[Analyze grammar]

tataḥ śaraśatenaiva suprayuktena vīryavān |
krodhāddviguṇasaṃrabdho nirbibheda vibhīṣaṇam || 14 ||
[Analyze grammar]

taddṛṣṭvendrajitaḥ karma kṛtaṃ rāmānujastadā |
acintayitvā prahasannaitat kiṃ ciditi bruvan || 15 ||
[Analyze grammar]

mumoca sa śarān ghorān saṃgṛhya narapuṃgavaḥ |
abhītavadanaḥ kruddho rāvaṇiṃ lakṣmaṇo yudhi || 16 ||
[Analyze grammar]

naivaṃ raṇagataḥ śūrāḥ praharanti niśācara |
laghavaścālpavīryāśca sukhā hīme śarāstava || 17 ||
[Analyze grammar]

naivaṃ śūrāstu yudhyante samare jayakāṅkṣiṇaḥ |
ityevaṃ taṃ bruvāṇastu śaravarṣairavākirat || 18 ||
[Analyze grammar]

tasya bāṇaistu vidhvastaṃ kavacaṃ hemabhūṣitam |
vyaśīryata rathopasthe tārājālamivāmbarāt || 19 ||
[Analyze grammar]

vidhūtavarmā nārācairbabhūva sa kṛtavraṇaḥ |
indrajit samare śūraḥ prarūḍha iva sānumān || 20 ||
[Analyze grammar]

abhīkṣṇaṃ niśvasantau hi yudhyetāṃ tumulaṃ yudhi |
śarasaṃkṛttasarvāṅgo sarvato rudhirokṣitau || 21 ||
[Analyze grammar]

astrāṇyastravidāṃ śreṣṭhau darśayantau punaḥ punaḥ |
śarānuccāvacākārānantarikṣe babandhatuḥ || 22 ||
[Analyze grammar]

vyapetadoṣamasyantau laghucitraṃ ca suṣṭhu ca |
ubhau tu tumulaṃ ghoraṃ cakraturnararākṣasau || 23 ||
[Analyze grammar]

tayoḥ pṛthakpṛthagbhīmaḥ śuśruve talanisvanaḥ |
sughorayorniṣṭanatorgagane meghayoriva || 24 ||
[Analyze grammar]

te gātrayornipatitā rukmapuṅkhāḥ śarā yudhi |
asṛgdigdhā viniṣpeturviviśurdharaṇītalam || 25 ||
[Analyze grammar]

anyaiḥ suniśitaiḥ śastrairākāśe saṃjaghaṭṭire |
babhañjuścicchiduścāpi tayorbāṇāḥ sahasraśaḥ || 26 ||
[Analyze grammar]

sa babhūva raṇe ghorastayorbāṇamayaścayaḥ |
agnibhyāmiva dīptābhyāṃ satre kuśamayaścayaḥ || 27 ||
[Analyze grammar]

tayoḥ kṛtavraṇau dehau śuśubhāte mahātmanoḥ |
sapuṣpāviva niṣpatrau vane śālmalikuṃśukau || 28 ||
[Analyze grammar]

cakratustumulaṃ ghoraṃ saṃnipātaṃ muhurmuhuḥ |
indrajil lakṣmaṇaścaiva parasparajayaiṣiṇau || 29 ||
[Analyze grammar]

lakṣmaṇo rāvaṇiṃ yuddhe rāvaṇiścāpi lakṣmaṇam |
anyonyaṃ tāvabhighnantau na śramaṃ pratyapadyatām || 30 ||
[Analyze grammar]

bāṇajālaiḥ śarīrasthairavagāḍhaistarasvinau |
śuśubhāte mahāvīrau virūḍhāviva parvatau || 31 ||
[Analyze grammar]

tayo rudhirasiktāni saṃvṛtāni śarairbhṛśam |
babhrājuḥ sarvagātrāṇi jvalanta iva pāvakāḥ || 32 ||
[Analyze grammar]

tayoratha mahān kālo vyatīyād yudhyamānayoḥ |
na ca tau yuddhavaimukhyaṃ śramaṃ vāpyupajagmatuḥ || 33 ||
[Analyze grammar]

atha samarapariśramaṃ nihantuṃ samaramukheṣvajitasya lakṣmaṇasya |
priyahitamupapādayanmahaujāḥ samaramupetya vibhīṣaṇo'vatasthe || 34 ||
[Analyze grammar]