Chapter 62

tato'bravīnmahātejāḥ sugrīvo vānarādhipaḥ |
arthyaṃ vijāpayaṃścāpi hanūmantaṃ mahābalam || 1 ||
[Analyze grammar]

yato hataḥ kumbhakarṇaḥ kumārāśca niṣūditāḥ |
nedānīmupanirhāraṃ rāvaṇo dātumarhati || 2 ||
[Analyze grammar]

ye ye mahābalāḥ santi laghavaśca plavaṃgamāḥ |
laṅkāmabhyutpatantvāśu gṛhyolkāḥ plavagarṣabhāḥ || 3 ||
[Analyze grammar]

tato'staṃ gata āditye raudre tasminniśāmukhe |
laṅkāmabhimukhāḥ solkā jagmuste plavagarṣabhāḥ || 4 ||
[Analyze grammar]

ulkāhastairharigaṇaiḥ sarvataḥ samabhidrutāḥ |
ārakṣasthā virūpākṣāḥ sahasā vipradudruvuḥ || 5 ||
[Analyze grammar]

gopurāṭṭa pratolīṣu caryāsu vividhāsu ca |
prāsādeṣu ca saṃhṛṣṭāḥ sasṛjuste hutāśanam || 6 ||
[Analyze grammar]

teṣāṃ gṛhasahasrāṇi dadāha hutabhuk tadā |
āvāsān rākṣasānāṃ ca sarveṣāṃ gṛhamedhinām || 7 ||
[Analyze grammar]

hemacitratanutrāṇāṃ sragdāmāmbaradhāriṇām |
sīdhupānacalākṣāṇāṃ madavihvalagāminām || 8 ||
[Analyze grammar]

kāntālambitavastrāṇāṃ śatrusaṃjātamanyunām |
gadāśūlāsi hastānāṃ khādatāṃ pibatāmapi || 9 ||
[Analyze grammar]

śayaneṣu mahārheṣu prasuptānāṃ priyaiḥ saha |
trastānāṃ gacchatāṃ tūrṇaṃ putrānādāya sarvataḥ || 10 ||
[Analyze grammar]

teṣāṃ gṛhasahasrāṇi tadā laṅkānivāsinām |
adahat pāvakastatra jajvāla ca punaḥ punaḥ || 11 ||
[Analyze grammar]

sāravanti mahārhāṇi gambhīraguṇavanti ca |
hemacandrārdhacandrāṇi candraśālonnatāni ca || 12 ||
[Analyze grammar]

ratnacitragavākṣāṇi sādhiṣṭhānāni sarvaśaḥ |
maṇividrumacitrāṇi spṛśantīva ca bhāskaram || 13 ||
[Analyze grammar]

krauñcabarhiṇavīṇānāṃ bhūṣaṇānāṃ ca nisvanaiḥ |
nāditānyacalābhāni veśmānyagnirdadāha saḥ || 14 ||
[Analyze grammar]

jvalanena parītāni toraṇāni cakāśire |
vidyudbhiriva naddhāni meghajālāni gharmage || 15 ||
[Analyze grammar]

vimāneṣu prasuptāśca dahyamānā varāṅganāḥ |
tyaktābharaṇasaṃyogā hāhetyuccairvicukruśaḥ || 16 ||
[Analyze grammar]

tatra cāgniparītāni nipeturbhavanānyapi |
vajrivajrahatānīva śikharāṇi mahāgireḥ || 17 ||
[Analyze grammar]

tāni nirdahyamānāni dūrataḥ pracakāśire |
himavacchikharāṇīva dīptauṣadhivanāni ca || 18 ||
[Analyze grammar]

harmyāgrairdahyamānaiśca jvālāprajvalitairapi |
rātrau sā dṛśyate laṅkā puṣpitairiva kiṃśukaiḥ || 19 ||
[Analyze grammar]

hastyadhyakṣairgajairmuktairmuktaiśca turagairapi |
babhūva laṅkā lokānte bhrāntagrāha ivārṇavaḥ || 20 ||
[Analyze grammar]

aśvaṃ muktaṃ gajo dṛṣṭvā kaccidbhīto'pasarpati |
bhīto bhītaṃ gajaṃ dṛṣṭvā kva cidaśvo nivartate || 21 ||
[Analyze grammar]

sā babhūva muhūrtena haribhirdīpitā purī |
lokasyāsya kṣaye ghore pradīpteva vasuṃdharā || 22 ||
[Analyze grammar]

nārī janasya dhūmena vyāptasyoccairvineduṣaḥ |
svano jvalanataptasya śuśruve daśayojanam || 23 ||
[Analyze grammar]

pradagdhakāyānaparān rākṣasānnirgatānbahiḥ |
sahasābhyutpatanti sma harayo'tha yuyutsavaḥ || 24 ||
[Analyze grammar]

udghuṣṭaṃ vānarāṇāṃ ca rākṣasānāṃ ca nisvanaḥ |
diśo daśa samudraṃ ca pṛthivīṃ cānvanādayat || 25 ||
[Analyze grammar]

viśalyau tu mahātmānau tāv ubhau rāmalakṣmaṇau |
asaṃbhrāntau jagṛhatustāv ubhau dhanuṣī vare || 26 ||
[Analyze grammar]

tato visphārayāṇasya rāmasya dhanuruttamam |
babhūva tumulaḥ śabdo rākṣasānāṃ bhayāvahaḥ || 27 ||
[Analyze grammar]

aśobhata tadā rāmo dhanurvisphārayanmahat |
bhagavāniva saṃkruddho bhavo vedamayaṃ dhanuḥ || 28 ||
[Analyze grammar]

vānarodghuṣṭaghoṣaśca rākṣasānāṃ ca nisvanaḥ |
jyāśabdaścāpi rāmasya trayaṃ vyāpa diśo daśa || 29 ||
[Analyze grammar]

tasya kārmukamuktaiśca śaraistatpuragopuram |
kailāsaśṛṅgapratimaṃ vikīrṇamapatadbhuvi || 30 ||
[Analyze grammar]

tato rāmaśarāndṛṣṭvā vimāneṣu gṛheṣu ca |
saṃnāho rākṣasendrāṇāṃ tumulaḥ samapadyata || 31 ||
[Analyze grammar]

teṣāṃ saṃnahyamānānāṃ siṃhanādaṃ ca kurvatām |
śarvarī rākṣasendrāṇāṃ raudrīva samapadyata || 32 ||
[Analyze grammar]

ādiṣṭā vānarendrāste sugrīveṇa mahātmanā |
āsannā dvāramāsādya yudhyadhvaṃ plavagarṣabhāḥ || 33 ||
[Analyze grammar]

yaśca vo vitathaṃ kuryāttatra tatra vyavasthitaḥ |
sa hantavyo'bhisaṃplutya rājaśāsanadūṣakaḥ || 34 ||
[Analyze grammar]

teṣu vānaramukhyeṣu dīptolkojjvalapāṇiṣu |
sthiteṣu dvāramāsādya rāvaṇaṃ manyurāviśat || 35 ||
[Analyze grammar]

tasya jṛmbhitavikṣepādvyāmiśrā vai diśo daśa |
rūpavāniva rudrasya manyurgātreṣvadṛśyata || 36 ||
[Analyze grammar]

sa nikumbhaṃ ca kumbhaṃ ca kumbhakarṇātmajāv ubhau |
preṣayāmāsa saṃkruddho rākṣasairbahubhiḥ saha || 37 ||
[Analyze grammar]

śaśāsa caiva tān sarvān rākṣasān rākṣaseśvaraḥ |
rākṣasā gacchatātraiva siṃhanādaṃ ca nādayan || 38 ||
[Analyze grammar]

tatastu coditāstena rākṣasā jvalitāyudhāḥ |
laṅkāyā niryayurvīrāḥ praṇadantaḥ punaḥ punaḥ || 39 ||
[Analyze grammar]

bhīmāśvarathamātaṃgaṃ nānāpatti samākulam |
dīptaśūlagadākhaḍgaprāsatomarakārmukam || 40 ||
[Analyze grammar]

tad rākṣasabalaṃ ghoraṃ bhīmavikramapauruṣam |
dadṛśe jvalitaprāsaṃ kiṅkiṇīśatanāditam || 41 ||
[Analyze grammar]

hemajālācitabhujaṃ vyāveṣṭitaparaśvadham |
vyāghūrṇitamahāśastraṃ bāṇasaṃsaktakārmukam || 42 ||
[Analyze grammar]

gandhamālyamadhūtsekasaṃmodita mahānilam |
ghoraṃ śūrajanākīrṇaṃ mahāmbudharanisvanam || 43 ||
[Analyze grammar]

taṃ dṛṣṭvā balamāyāntaṃ rākṣasānāṃ sudāruṇam |
saṃcacāla plavaṃgānāṃ balamuccairnanāda ca || 44 ||
[Analyze grammar]

javenāplutya ca punastad rākṣasabalaṃ mahat |
abhyayāt pratyaribalaṃ pataṃga iva pāvakam || 45 ||
[Analyze grammar]

teṣāṃ bhujaparāmarśavyāmṛṣṭaparighāśani |
rākṣasānāṃ balaṃ śreṣṭhaṃ bhūyastaramaśobhata || 46 ||
[Analyze grammar]

tathaivāpyapare teṣāṃ kapīnāmasibhiḥ śitaiḥ |
pravīrānabhito jaghnurghorarūpā niśācarāḥ || 47 ||
[Analyze grammar]

ghnantamanyaṃ jaghānānyaḥ pātayantamapātayat |
garhamāṇaṃ jagarhānye daśantamapare'daśat || 48 ||
[Analyze grammar]

dehītyanye dadātyanyo dadāmītyaparaḥ punaḥ |
kiṃ kleśayasi tiṣṭheti tatrānyonyaṃ babhāṣire || 49 ||
[Analyze grammar]

samudyatamahāprāsaṃ muṣṭiśūlāsisaṃkulam |
prāvartata mahāraudraṃ yuddhaṃ vānararakṣasām || 50 ||
[Analyze grammar]

vānarāndaśa sapteti rākṣasā abhyapātayan |
rākṣasāndaśasapteti vānarā jaghnurāhave || 51 ||
[Analyze grammar]

visrastakeśarasanaṃ vimuktakavacadhvajam |
balaṃ rākṣasamālambya vānarāḥ paryavārayan || 52 ||
[Analyze grammar]