Chapter 32

tataste rākṣasāstatra gatvā rāvaṇamandiram |
nyavedayanpurīṃ ruddhāṃ rāmeṇa saha vānaraiḥ || 1 ||
[Analyze grammar]

ruddhāṃ tu nagarīṃ śrutvā jātakrodho niśācaraḥ |
vidhānaṃ dviguṇaṃ śrutvā prāsādaṃ so'dhyarohata || 2 ||
[Analyze grammar]

sa dadarśāvṛtāṃ laṅkāṃ saśailavanakānanām |
asaṃkhyeyairharigaṇaiḥ sarvato yuddhakāṅkṣibhiḥ || 3 ||
[Analyze grammar]

sa dṛṣṭvā vānaraiḥ sarvāṃ vasudhāṃ kavalīkṛtām |
kathaṃ kṣapayitavyāḥ syuriti cintāparo'bhavat || 4 ||
[Analyze grammar]

sa cintayitvā suciraṃ dhairyamālambya rāvaṇaḥ |
rāghavaṃ hariyūthāṃśca dadarśāyatalocanaḥ || 5 ||
[Analyze grammar]

prekṣato rākṣasendrasya tānyanīkāni bhāgaśaḥ |
rāghavapriyakāmārthaṃ laṅkāmāruruhustadā || 6 ||
[Analyze grammar]

te tāmravaktrā hemābhā rāmārthe tyaktajīvitāḥ |
laṅkāmevāhyavartanta sālatālaśilāyudhāḥ || 7 ||
[Analyze grammar]

te drumaiḥ parvatāgraiśca muṣṭibhiśca plavaṃgamāḥ |
prāsādāgrāṇi coccāni mamantustoraṇāni ca || 8 ||
[Analyze grammar]

pārikhāḥ pūrayanti sma prasannasalilāyutāḥ |
pāṃsubhiḥ parvatāgraiśca tṛṇaiḥ kāṣṭhaiśca vānarāḥ || 9 ||
[Analyze grammar]

tataḥ sahasrayūthāśca koṭiyūthāśca yūthapāḥ |
koṭīśatayutāścānye laṅkāmāruruhustadā || 10 ||
[Analyze grammar]

kāñcanāni pramṛdnantastoraṇāni plavaṃgamāḥ |
kailāsaśikharābhāni gopurāṇi pramathya ca || 11 ||
[Analyze grammar]

āplavantaḥ plavantaśca garjantaśca plavaṃgamāḥ |
laṅkāṃ tāmabhyavartanta mahāvāraṇasaṃnibhāḥ || 12 ||
[Analyze grammar]

jayatyatibalo rāmo lakṣmaṇaśca mahābalaḥ |
rājā jayati sugrīvo rāghaveṇābhipālitaḥ || 13 ||
[Analyze grammar]

ityevaṃ ghoṣayantaśca garjantaśca plavaṃgamāḥ |
abhyadhāvanta laṅkāyāḥ prākāraṃ kāmarūpiṇaḥ || 14 ||
[Analyze grammar]

vīrabāhuḥ subāhuśca nalaśca vanagocaraḥ |
nipīḍyopaniviṣṭāste prākāraṃ hariyūthapāḥ || 15 ||
[Analyze grammar]

etasminnantare cakruḥ skandhāvāraniveśanam || 16 ||
[Analyze grammar]

pūrvadvāraṃ tu kumudaḥ koṭibhirdaśabhirvṛtaḥ |
āvṛtya balavāṃstasthau haribhirjitakāśibhiḥ || 17 ||
[Analyze grammar]

dakṣiṇadvāramāgamya vīraḥ śatabaliḥ kapiḥ |
āvṛtya balavāṃstasthau viṃśatyā koṭibhirvṛtaḥ || 18 ||
[Analyze grammar]

suṣeṇaḥ paścimadvāraṃ gatastārā pitā hariḥ |
āvṛtya balavāṃstasthau ṣaṣṭi koṭibhirāvṛtaḥ || 19 ||
[Analyze grammar]

uttaradvāramāsādya rāmaḥ saumitriṇā saha |
āvṛtya balavāṃstasthau sugrīvaśca harīśvaraḥ || 20 ||
[Analyze grammar]

golāṅgūlo mahākāyo gavākṣo bhīmadarśanaḥ |
vṛtaḥ koṭyā mahāvīryastasthau rāmasya pārvataḥ || 21 ||
[Analyze grammar]

ṛṣkāṇāṃ bhīmavegānāṃ dhūmraḥ śatrunibarhaṇaḥ |
vṛtaḥ koṭyā mahāvīryastasthau rāmasya pārśvataḥ || 22 ||
[Analyze grammar]

saṃnaddhastu mahāvīryo gadāpāṇirvibhīṣaṇaḥ |
vṛto yastaistu sacivaistasthau tatra mahābalaḥ || 23 ||
[Analyze grammar]

gajo gavākṣo gavayaḥ śarabho gandhamādanaḥ |
samantāt parighāvanto rarakṣurharivāhinīm || 24 ||
[Analyze grammar]

tataḥ kopaparītātmā rāvaṇo rākṣaseśvaraḥ |
niryāṇaṃ sarvasainyānāṃ drutamājñāpayattadā || 25 ||
[Analyze grammar]

niṣpatanti tataḥ sainyā hṛṣṭā rāvaṇacoditāḥ |
samaye pūryamāṇasya vegā iva mahodadheḥ || 26 ||
[Analyze grammar]

etasminnantare ghoraḥ saṃgrāmaḥ samapadyata |
rakṣasāṃ vānarāṇāṃ ca yathā devāsure purā || 27 ||
[Analyze grammar]

te gadābhiḥ pradīptābhiḥ śaktiśūlaparaśvadhaiḥ |
nijaghnurvānarān ghorāḥ kathayantaḥ svavikramān || 28 ||
[Analyze grammar]

tathā vṛkṣairmahākāyāḥ parvatāgraiśca vānarāḥ |
rākṣasāstāni rakṣāṃsi nakhairdantaiśca vegitāḥ || 29 ||
[Analyze grammar]

rākṣasāstvapare bhīmāḥ prākārasthā mahīgatān |
bhiṇḍipālaiśca khaḍgaiśca śūlaiścaiva vyadārayan || 30 ||
[Analyze grammar]

vānarāścāpi saṃkruddhāḥ prākārasthānmahīgatāḥ |
rākṣasānpātayāmāsuḥ samāplutya plavaṃgamāḥ || 31 ||
[Analyze grammar]

sa saṃprahārastumulo māṃsaśoṇitakardamaḥ |
rakṣasāṃ vānarāṇāṃ ca saṃbabhūvādbhutopamāḥ || 32 ||
[Analyze grammar]