Chapter 31

atha tasminnimittāni dṛṣṭvā lakṣmaṇapūrvajaḥ |
lakṣmaṇaṃ lakṣmisaṃpannamidaṃ vacanamabravīt || 1 ||
[Analyze grammar]

parigṛhyodakaṃ śītaṃ vanāni phalavanti ca |
balaughaṃ saṃvibhajyemaṃ vyūhya tiṣṭhema lakṣmaṇa || 2 ||
[Analyze grammar]

lokakṣayakaraṃ bhīmaṃ bhayaṃ paśyāmyupasthitam |
nibarhaṇaṃ pravīrāṇāmṛkṣavānararakṣasām || 3 ||
[Analyze grammar]

vātāśca paruṣaṃ vānti kampate ca vasuṃdharā |
parvatāgrāṇi vepante patanti dharaṇīdharāḥ || 4 ||
[Analyze grammar]

meghāḥ kravyādasaṃkāśāḥ paruṣāḥ paruṣasvanāḥ |
krūrāḥ krūraṃ pravarṣanti miśraṃ śoṇitabindubhiḥ || 5 ||
[Analyze grammar]

raktacandanasaṃkāśā saṃdhyāparamadāruṇā |
jvalacca nipatatyetadādityādagnimaṇḍalam || 6 ||
[Analyze grammar]

ādityamabhivāśyante janayanto mahadbhayam |
dīnā dīnasvarā ghorā apraśastā mṛgadvijāḥ || 7 ||
[Analyze grammar]

rajanyāmaprakāśaśca saṃtāpayati candramāḥ |
kṛṣṇaraktāṃśuparyanto yathā lokasya saṃkṣaye || 8 ||
[Analyze grammar]

hrasvo rūkṣo'praśastaśca pariveṣaḥ sulohitaḥ |
ādityamaṇḍale nīlaṃ lakṣma lakṣmaṇa dṛśyate || 9 ||
[Analyze grammar]

dṛśyante na yathāvacca nakṣatrāṇyabhivartate |
yugāntamiva lokasya paśya lakṣmaṇa śaṃsati || 10 ||
[Analyze grammar]

kākāḥ śyenāstathā gṛdhrā nīcaiḥ paripatanti ca |
śivāścāpyaśivā vācaḥ pravadanti mahāsvanāḥ || 11 ||
[Analyze grammar]

kṣipramadya durādharṣāṃ purīṃ rāvaṇapālitām |
abhiyāma javenaiva sarvato haribhirvṛtāḥ || 12 ||
[Analyze grammar]

ityevaṃ tu vadan vīro lakṣmaṇaṃ lakṣmaṇāgrajaḥ |
tasmādavātaracchīghraṃ parvatāgrānmahābalaḥ || 13 ||
[Analyze grammar]

avatīrya tu dharmātmā tasmācchailāt sa rāghavaḥ |
paraiḥ paramadurdharṣaṃ dadarśa balamātmanaḥ || 14 ||
[Analyze grammar]

saṃnahya tu sasugrīvaḥ kapirājabalaṃ mahat |
kālajño rāghavaḥ kāle saṃyugāyābhyacodayat || 15 ||
[Analyze grammar]

tataḥ kāle mahābāhurbalena mahatā vṛtaḥ |
prasthitaḥ purato dhanvī laṅkāmabhimukhaḥ purīm || 16 ||
[Analyze grammar]

taṃ vibhīṣaṇa sugrīvau hanūmāñjāmbavānnalaḥ |
ṛkṣarājastathā nīlo lakṣmaṇaścānyayustadā || 17 ||
[Analyze grammar]

tataḥ paścāt sumahatī pṛtanarkṣavanaukasām |
pracchādya mahatīṃ bhūmimanuyāti sma rāghavam || 18 ||
[Analyze grammar]

śailaśṛṅgāṇi śataśaḥ pravṛddhāṃśca mahīruhām |
jagṛhuḥ kuñjaraprakhyā vānarāḥ paravāraṇāḥ || 19 ||
[Analyze grammar]

tau tvadīrgheṇa kālena bhrātarau rāmalakṣmaṇau |
rāvaṇasya purīṃ laṅkāmāsedaturariṃdamau || 20 ||
[Analyze grammar]

patākāmālinīṃ ramyāmudyānavanaśobhitām |
citravaprāṃ suduṣprāpāmuccaprākāratoraṇām || 21 ||
[Analyze grammar]

tāṃ surairapi durdharṣāṃ rāmavākyapracoditāḥ |
yathānideśaṃ saṃpīḍya nyaviśanta vanaukasaḥ || 22 ||
[Analyze grammar]

laṅkāyāstūttaradvāraṃ śailaśṛṅgamivonnatam |
rāmaḥ sahānujo dhanvī jugopa ca rurodha ca || 23 ||
[Analyze grammar]

laṅkāmupaniviṣṭaśca rāmo daśarathātmajaḥ |
lakṣmaṇānucaro vīraḥ purīṃ rāvaṇapālitām || 24 ||
[Analyze grammar]

uttaradvāramāsādya yatra tiṣṭhati rāvaṇaḥ |
nānyo rāmāddhi taddvāraṃ samarthaḥ parirakṣitum || 25 ||
[Analyze grammar]

rāvaṇādhiṣṭhitaṃ bhīmaṃ varuṇeneva sāgaram |
sāyudhau rākṣasairbhīmairabhiguptaṃ samantataḥ |
laghūnāṃ trāsajananaṃ pātālamiva dānavaiḥ || 26 ||
[Analyze grammar]

vinyastāni ca yodhānāṃ bahūni vividhāni ca |
dadarśāyudhajālāni tathaiva kavacāni ca || 27 ||
[Analyze grammar]

pūrvaṃ tu dvāramāsādya nīlo haricamūpatiḥ |
atiṣṭhat saha maindena dvividena ca vīryavān || 28 ||
[Analyze grammar]

aṅgado dakṣiṇadvāraṃ jagrāha sumahābalaḥ |
ṛṣabheṇa gavākṣeṇa gajena gavayena ca || 29 ||
[Analyze grammar]

hanūmānpaścimadvāraṃ rarakṣa balavān kapiḥ |
pramāthi praghasābhyāṃ ca vīrairanyaiśca saṃgataḥ || 30 ||
[Analyze grammar]

madhyame ca svayaṃ gulme sugrīvaḥ samatiṣṭhata |
saha sarvairhariśreṣṭhaiḥ suparṇaśvasanopamaiḥ || 31 ||
[Analyze grammar]

vānarāṇāṃ tu ṣaṭtriṃśat koṭyaḥ prakhyātayūthapāḥ |
nipīḍyopaniviṣṭāśca sugrīvo yatra vānaraḥ || 32 ||
[Analyze grammar]

śāsanena tu rāmasya lakṣmaṇaḥ savibhīṣaṇaḥ |
dvāre dvāre harīṇāṃ tu koṭiṃ koṭiṃ nyaveśayat || 33 ||
[Analyze grammar]

paścimena tu rāmasya sugrīvaḥ saha jāmbavān |
adūrānmadhyame gulme tasthau bahubalānugaḥ || 34 ||
[Analyze grammar]

te tu vānaraśārdūlāḥ śārdūlā iva daṃṣṭriṇaḥ |
gṛhītvā drumaśailāgrān hṛṣṭā yuddhāya tasthire || 35 ||
[Analyze grammar]

sarve vikṛtalāṅgūlāḥ sarve daṃṣṭrānakhāyudhāḥ |
sarve vikṛtacitrāṅgāḥ sarve ca vikṛtānanāḥ || 36 ||
[Analyze grammar]

daśanāgabalāḥ ke cit ke ciddaśaguṇottarāḥ |
ke cinnāgasahasrasya babhūvustulyavikramāḥ || 37 ||
[Analyze grammar]

santi caughā balāḥ ke cit ke cicchataguṇottarāḥ |
aprameyabalāścānye tatrāsan hariyūthapāḥ || 38 ||
[Analyze grammar]

adbhutaśca vicitraśca teṣāmāsīt samāgamaḥ |
tatra vānarasainyānāṃ śalabhānāmivodgamaḥ || 39 ||
[Analyze grammar]

paripūrṇamivākāśaṃ saṃchanneva ca medinī |
laṅkāmupaniviṣṭaiśca saṃpatadbhiśca vānaraiḥ || 40 ||
[Analyze grammar]

śataṃ śatasahasrāṇāṃ pṛthagṛkṣavanaukasām |
laṅkā dvārāṇyupājagmuranye yoddhuṃ samantataḥ || 41 ||
[Analyze grammar]

āvṛtaḥ sa giriḥ sarvaistaiḥ samantāt plavaṃgamaiḥ |
ayutānāṃ sahasraṃ ca purīṃ tāmabhyavartata || 42 ||
[Analyze grammar]

vānarairbalavadbhiśca babhūva drumapāṇibhiḥ |
sarvataḥ saṃvṛtā laṅkā duṣpraveśāpi vāyunā || 43 ||
[Analyze grammar]

rākṣasā vismayaṃ jagmuḥ sahasābhinipīḍitāḥ |
vānarairmeghasaṃkāśaiḥ śakratulyaparākramaiḥ || 44 ||
[Analyze grammar]

mahāñ śabdo'bhavattatra balaughasyābhivartataḥ |
sāgarasyeva bhinnasya yathā syāt salilasvanaḥ || 45 ||
[Analyze grammar]

tena śabdena mahatā saprākārā satoraṇā |
laṅkā pracalitā sarvā saśailavanakānanā || 46 ||
[Analyze grammar]

rāmalakṣmaṇaguptā sā sugrīveṇa ca vāhinī |
babhūva durdharṣatarā sarvairapi surāsuraiḥ || 47 ||
[Analyze grammar]

rāghavaḥ saṃniveśyaivaṃ sainyaṃ svaṃ rakṣasāṃ vadhe |
saṃmantrya mantribhiḥ sārdhaṃ niścitya ca punaḥ punaḥ || 48 ||
[Analyze grammar]

ānantaryamabhiprepsuḥ kramayogārthatattvavit |
vibhīṣaṇasyānumate rājadharmamanusmaran |
aṅgadaṃ vālitanayaṃ samāhūyedamabravīt || 49 ||
[Analyze grammar]

gatvā saumya daśagrīvaṃ brūhi madvacanāt kape |
laṅghayitvā purīṃ laṅkāṃ bhayaṃ tyaktvā gatavyathaḥ || 50 ||
[Analyze grammar]

bhraṣṭaśrīkagataiśvaryamumūrṣo naṣṭacetanaḥ |
ṛṣīṇāṃ devatānāṃ ca gandharvāpsarasāṃ tathā || 51 ||
[Analyze grammar]

nāgānāmatha yakṣāṇāṃ rājñāṃ ca rajanīcara |
yacca pāpaṃ kṛtaṃ mohādavaliptena rākṣasa || 52 ||
[Analyze grammar]

nūnamadya gato darpaḥ svayambhū varadānajaḥ |
yasya daṇḍadharaste'haṃ dārāharaṇakarśitaḥ |
daṇḍaṃ dhārayamāṇastu laṅkādvare vyavasthitaḥ || 53 ||
[Analyze grammar]

padavīṃ devatānāṃ ca maharṣīṇāṃ ca rākṣasa |
rājarṣīṇāṃ ca sarveṣāṃ gamiṣyasi mayā hataḥ || 54 ||
[Analyze grammar]

balena yena vai sītāṃ māyayā rākṣasādhama |
māmatikrāmayitvā tvaṃ hṛtavāṃstadvidarśaya || 55 ||
[Analyze grammar]

arākṣasamimaṃ lokaṃ kartāsmi niśitaiḥ śaraiḥ |
na ceccharaṇamabhyeṣi māmupādāya maithilīm || 56 ||
[Analyze grammar]

dharmātmā rakṣasāṃ śreṣṭhaḥ saṃprāpto'yaṃ vibhīṣaṇaḥ |
laṅkaiśvaryaṃ dhruvaṃ śrīmānayaṃ prāpnotyakaṇṭakam || 57 ||
[Analyze grammar]

na hi rājyamadharmeṇa bhoktuṃ kṣaṇamapi tvayā |
śakyaṃ mūrkhasahāyena pāpenāvijitātmanā || 58 ||
[Analyze grammar]

yudhyasva vā dhṛtiṃ kṛtvā śauryamālambya rākṣasa |
maccharaistvaṃ raṇe śāntastataḥ pūto bhaviṣyasi || 59 ||
[Analyze grammar]

yadyāviśasi lokāṃstrīnpakṣibhūto manojavaḥ |
mama cakṣuṣpathaṃ prāpya na jīvanpratiyāsyasi || 60 ||
[Analyze grammar]

bravīmi tvāṃ hitaṃ vākyaṃ kriyatāmaurdhvadekikam |
sudṛṣṭā kriyatāṃ laṅkā jīvitaṃ te mayi sthitam || 61 ||
[Analyze grammar]

ityuktaḥ sa tu tāreyo rāmeṇākliṣṭakarmaṇā |
jagāmākāśamāviśya mūrtimāniva havyavāṭ || 62 ||
[Analyze grammar]

so'tipatya muhūrtena śrīmān rāvaṇamandiram |
dadarśāsīnamavyagraṃ rāvaṇaṃ sacivaiḥ saha || 63 ||
[Analyze grammar]

tatastasyāvidūreṇa nipatya haripuṃgavaḥ |
dīptāgnisadṛśastasthāvaṅgadaḥ kanakāṅgadaḥ || 64 ||
[Analyze grammar]

tad rāmavacanaṃ sarvamanyūnādhikamuttamam |
sāmātyaṃ śrāvayāmāsa nivedyātmānamātmanā || 65 ||
[Analyze grammar]

dūto'haṃ kosalendrasya rāmasyākliṣṭakarmaṇaḥ |
vāliputro'ṅgado nāma yadi te śrotramāgataḥ || 66 ||
[Analyze grammar]

āha tvāṃ rāghavo rāmaḥ kausalyānandavardhanaḥ |
niṣpatya pratiyudhyasva nṛśaṃsaṃ puruṣādhama || 67 ||
[Analyze grammar]

hantāsmi tvāṃ sahāmātyaṃ saputrajñātibāndhavam |
nirudvignāstrayo lokā bhaviṣyanti hate tvayi || 68 ||
[Analyze grammar]

devadānavayakṣāṇāṃ gandharvoragarakṣasām |
śatrumadyoddhariṣyāmi tvāmṛṣīṇāṃ ca kaṇṭakam || 69 ||
[Analyze grammar]

vibhīṣaṇasya caiśvaryaṃ bhaviṣyati hate tvayi |
na cet satkṛtya vaidehīṃ praṇipatya pradāsyasi || 70 ||
[Analyze grammar]

ityevaṃ paruṣaṃ vākyaṃ bruvāṇe haripuṃgave |
amarṣavaśamāpanno niśācaragaṇeśvaraḥ || 71 ||
[Analyze grammar]

tataḥ sa roṣatāmrākṣaḥ śaśāsa sacivāṃstadā |
gṛhyatāmeṣa durmedhā vadhyatāmiti cāsakṛt || 72 ||
[Analyze grammar]

rāvaṇasya vacaḥ śrutvā dīptāgnisamatejasaḥ |
jagṛhustaṃ tato ghorāścatvāro rajanīcarāḥ || 73 ||
[Analyze grammar]

grāhayāmāsa tāreyaḥ svayamātmānamātmanā |
balaṃ darśayituṃ vīro yātudhānagaṇe tadā || 74 ||
[Analyze grammar]

sa tānbāhudvaye saktānādāya patagāniva |
prāsādaṃ śailasaṃkāśamutpāpātāṅgadastadā || 75 ||
[Analyze grammar]

te'ntarikṣādvinirdhūtāstasya vegena rākṣasāḥ |
bhumau nipatitāḥ sarve rākṣasendrasya paśyataḥ || 76 ||
[Analyze grammar]

tataḥ prāsādaśikharaṃ śailaśṛṅgamivonnatam |
tat paphāla tadākrāntaṃ daśagrīvasya paśyataḥ || 77 ||
[Analyze grammar]

bhaṅktvā prāsādaśikharaṃ nāma viśrāvya cātmanaḥ |
vinadya sumahānādamutpapāta vihāyasā || 78 ||
[Analyze grammar]

rāvaṇastu paraṃ cakre krodhaṃ prāsādadharṣaṇāt |
vināśaṃ cātmanaḥ paśyanniḥśvāsaparamo'bhavat || 79 ||
[Analyze grammar]

rāmastu bahubhirhṛṣṭairninadadbhiḥ plavaṃgamaiḥ |
vṛto ripuvadhākāṅkṣī yuddhāyaivābhyavartata || 80 ||
[Analyze grammar]

suṣeṇastu mahāvīryo girikūṭopamo hariḥ |
bahubhiḥ saṃvṛtastatra vānaraiḥ kāmarūpibhiḥ || 81 ||
[Analyze grammar]

caturdvārāṇi sarvāṇi sugrīvavacanāt kapiḥ |
paryākramata durdharṣo nakṣatrāṇīva candramāḥ || 82 ||
[Analyze grammar]

teṣāmakṣauhiṇiśataṃ samavekṣya vanaukasām |
laṅkāmupaniviṣṭānāṃ sāgaraṃ cātivartatām || 83 ||
[Analyze grammar]

rākṣasā vismayaṃ jagmustrāsaṃ jagmustathāpare |
apare samaroddharṣāddharṣamevopapedire || 84 ||
[Analyze grammar]

kṛtsnaṃ hi kapibhirvyāptaṃ prākāraparikhāntaram |
dadṛśū rākṣasā dīnāḥ prākāraṃ vānarīkṛtam || 85 ||
[Analyze grammar]

tasminmahābhīṣaṇake pravṛtte kolāhale rākṣasarājadhānyām |
pragṛhya rakṣāṃsi mahāyudhāni yugāntavātā iva saṃviceruḥ || 86 ||
[Analyze grammar]