Chapter 9

tato nikumbho rabhasaḥ sūryaśatrurmahābalaḥ |
suptaghno yajñakopaśca mahāpārśvo mahodaraḥ || 1 ||
[Analyze grammar]

agniketuśca durdharṣo raśmiketuśca rākṣasaḥ |
indrajicca mahātejā balavān rāvaṇātmajaḥ || 2 ||
[Analyze grammar]

prahasto'tha virūpākṣo vajradaṃṣṭro mahābalaḥ |
dhūmrākṣaścātikāyaśca durmukhaścaiva rākṣasaḥ || 3 ||
[Analyze grammar]

parighānpaṭṭasānprāsāñ śaktiśūlaparaśvadhān |
cāpāni ca sabāṇāni khaḍgāṃśca vipulāñ śitān || 4 ||
[Analyze grammar]

pragṛhya paramakruddhāḥ samutpatya ca rākṣasāḥ |
abruvan rāvaṇaṃ sarve pradīptā iva tejasā || 5 ||
[Analyze grammar]

adya rāmaṃ vadhiṣyāmaḥ sugrīvaṃ ca salakṣmaṇam |
kṛpaṇaṃ ca hanūmantaṃ laṅkā yena pradharṣitā || 6 ||
[Analyze grammar]

tān gṛhītāyudhān sarvān vārayitvā vibhīṣaṇaḥ |
abravīt prāñjalirvākyaṃ punaḥ pratyupaveśya tān || 7 ||
[Analyze grammar]

apyupāyaistribhistāta yo'rthaḥ prāptuṃ na śakyate |
tasya vikramakālāṃstānyuktānāhurmanīṣiṇaḥ || 8 ||
[Analyze grammar]

pramatteṣvabhiyukteṣu daivena prahateṣu ca |
vikramāstāta sidhyanti parīkṣya vidhinā kṛtāḥ || 9 ||
[Analyze grammar]

apramattaṃ kathaṃ taṃ tu vijigīṣuṃ bale sthitam |
jitaroṣaṃ durādharṣaṃ pradharṣayitumicchatha || 10 ||
[Analyze grammar]

samudraṃ laṅghayitvā tu ghoraṃ nadanadīpatim |
kṛtaṃ hanumatā karma duṣkaraṃ tarkayeta kaḥ || 11 ||
[Analyze grammar]

balānyaparimeyāni vīryāṇi ca niśācarāḥ |
pareṣāṃ sahasāvajñā na kartavyā kathaṃ cana || 12 ||
[Analyze grammar]

kiṃ ca rākṣasarājasya rāmeṇāpakṛtaṃ purā |
ājahāra janasthānād yasya bhāryāṃ yaśasvinaḥ || 13 ||
[Analyze grammar]

kharo yadyativṛttastu rāmeṇa nihato raṇe |
avaśyaṃ prāṇināṃ prāṇā rakṣitavyā yathā balam || 14 ||
[Analyze grammar]

etannimittaṃ vaidehī bhayaṃ naḥ sumahadbhavet |
āhṛtā sā parityājyā kalahārthe kṛte na kim || 15 ||
[Analyze grammar]

na naḥ kṣamaṃ vīryavatā tena dharmānuvartinā |
vairaṃ nirarthakaṃ kartuṃ dīyatāmasya maithilī || 16 ||
[Analyze grammar]

yāvanna sagajāṃ sāśvāṃ bahuratnasamākulām |
purīṃ dārayate bāṇairdīyatāmasya maithilī || 17 ||
[Analyze grammar]

yāvat sughorā mahatī durdharṣā harivāhinī |
nāvaskandati no laṅkāṃ tāvat sītā pradīyatām || 18 ||
[Analyze grammar]

vinaśyeddhi purī laṅkā śūrāḥ sarve ca rākṣasāḥ |
rāmasya dayitā patnī na svayaṃ yadi dīyate || 19 ||
[Analyze grammar]

prasādaye tvāṃ bandhutvāt kuruṣva vacanaṃ mama |
hitaṃ pathyaṃ tvahaṃ brūmi dīyatāmasya maithilī || 20 ||
[Analyze grammar]

purā śaratsūryamarīcisaṃnibhānnavāgrapuṅkhān sudṛḍhānnṛpātmajaḥ |
sṛjatyamoghān viśikhān vadhāya te pradīyatāṃ dāśarathāya maithilī || 21 ||
[Analyze grammar]

tyajasva kopaṃ sukhadharmanāśanaṃ bhajasva dharmaṃ ratikīrtivardhanam |
prasīda jīvema saputrabāndhavāḥ pradīyatāṃ dāśarathāya maithilī || 22 ||
[Analyze grammar]